Chanchan tawiʼ naq inkʼaʼ. Laj Tza moko kixye ta re li xʼEva naq, wi tixtzeka raj ru li cheʼ li kixye li Yos naq inkʼaʼ tixlow, kaʼajwiʼ tkamq li xtibʼel ut naq li xmusiqʼ tkanaaq chi yoʼyo saʼ jalan chik naʼajej (saʼebʼ li qakutan nekeʼxye naq aʼin li nakanaak chi yoʼyo naq nakamk junaq li kristiʼaan). Naq kiroksi li kʼantiʼ, laj Tza kixye re li xʼEva naq maahoon maawulaj tkamq. Laj Tza kiraj xyeebʼal naq wanq xyuʼam chi junelik ut naq qʼaxal tixyal xsahil li xyuʼam saʼ Ruuchichʼochʼ, moko wanq ta chik rubʼel xwankil li Yos (Gen. 2:17; 3:3-5).

Joʼkan bʼiʼ, wi li bʼalaqʼil naʼlebʼ li naxye naq toj wank nakanaak chi yoʼyo naq nakamk junaq li poyanam moko kitiklaak ta saʼ li naʼajej Eden, joqʼe kitiklaak? Inkʼaʼ naqanaw joqʼe tzʼaqal kitiklaak. Naqanaw naq li bʼalaqʼil paabʼal kisachmank ru saʼ li Bʼutʼihaʼ li kiwank saʼ xkutankil laj Noe. Saʼ xkʼabʼaʼ naq kaʼajwiʼ laj Noe ut li xjunkabʼal keʼkoleʼk, ut aʼanebʼ chaq xmoos li Yos, chixjunil li xnaʼlebʼ li bʼalaqʼil paabʼal xsachmank ajwiʼ ru.

Joʼkan utan, li naʼlebʼ li naxye naq wank nakanaak chi yoʼyo naq nakamk junaq li poyanam kitiklaak tana naq ak xnumeʼk li Bʼutʼihaʼ. Naq li Yos kixpoʼ ru li aatinobʼaal aran Babel ut naq ebʼ li kristiʼaan xeʼxchaʼchaʼi ribʼ «saʼ chixjunil li ruuchichʼochʼ», relik chi yaal naq xeʼxkʼam ajwiʼ rikʼinebʼ li naʼlebʼ li naxye naq toj wank nakanaak chi yoʼyo naq nakamk junaq li poyanam (Gen. 11:8, 9). Joʼkan naq inkʼaʼ naqanaw joqʼe kitiklaak li bʼalaqʼil naʼlebʼ aʼin. Li kʼaru chʼolchʼo tzʼaqal chiqu aʼan naq laj Tza li «xyuwaʼil li tikʼtiʼ», kibʼaanunk re ut naq kisahoʼk saʼ xchʼool naq li naʼlebʼ aweʼ kixhel ribʼ saʼ chixjunil li Ruuchichʼochʼ (Juan 8:44).