«LI QʼOLOM naabʼal, aʼut ebʼ laj kʼanjel inkʼaʼ kʼihebʼ. Chetzʼaama bʼiʼ chiru laj Eechal qʼolom naq xtaqlahaqebʼ chaq aj kʼanjel saʼ li xqʼolom» (Luc. 10:2). Wiibʼ mil chihabʼ tana chik naq li Jesus kixye li aatin aʼin abʼan naxye chi tzʼaqal re ru li yook chi kʼulmank saʼ li tenamit Myanmar. Kʼaʼut? Xbʼaan naq saʼ Myanmar wank 4.200 aj puktesinel li nekeʼxkʼe resil li Xʼawabʼejilal li Yos rehebʼ li 55 miyon chi qas qiitzʼin.

Abʼanan, li Jehobʼa, laj «Eechal qʼolom», kixtochʼ xchʼool chi siʼeent li qechpaabʼanel re jalan jalanq li teep re naq teʼqʼaxonq saʼ li tenamit Asia bʼarwiʼ naʼok li iqʼ ut li saqʼe ut teʼtenqʼanq saʼ li qʼolok chirix li Yos. Kʼaʼut naq keʼxkanabʼ li xtenamit? Chanru xeʼruuk xbʼaanunkil aʼin? Kʼaru li osobʼtesink yookebʼ xkʼulbʼal? Qilaq kʼaru nekeʼxye.

Wiibʼ oxibʼ chihabʼ anaqwan, laj Kazuhiro, aj kʼamolbʼe saʼ li puktesink re Japon, kitaweʼk xbʼaan li nimla yajel Epilepsia xkʼabʼaʼ, maakʼaʼ chik naxjultika ut keʼxkʼam saʼ li bʼanlebʼaal. Laj bʼanonel kixye re, naq chiru wiibʼ chihabʼ inkʼaʼ naru tixbʼeresi li xbʼelebʼaal chʼiichʼ. Laj Kazuhiro inkʼaʼ naxpaabʼ li yook xkʼulbʼal ut xkʼoxla: «Kʼaru tinbʼaanu? Li kʼajoʼ nawulak chiwu aʼan wank choʼq aj kʼamolbʼe saʼ li puktesink ut inkʼaʼ nawaj xkanabʼankil». Kixtzʼaama re li Jehobʼa chi anchal li xchʼool naq ttenqʼaaq re naq inkʼaʼ tixkanabʼ wank choʼq aj kʼamolbʼe saʼ li puktesink.

Laj Kazuhiro naxye: «Naq xnumeʼk jun po, jun li wamiiw li yook chi puktesink Myanmar xnaw li xinkʼul. Xinxbʼoq ut kixye we: “Arin saʼ Myanmar aajel ru li kamiʼoneet. Wi tatchalq, naru tatwanq choʼq aj kʼamolbʼe saʼ li puktesink usta maakʼaʼ laabʼelebʼaal chʼiichʼ”. Xinpatzʼ re laj bʼanonel ma naru tinxik chi wank Myanmar usta yajin. Xsachk inchʼool naq kixye we: “Jun aj bʼanonel re Myanmar li naril li ulul, Neurologo nayeemank re, wank arin Japon anaqwan. Tatinkʼam re naq taanaw ru. Wi tchalq wiʼ chik laayajel, aʼan naru naʼilok aawe”. Laaʼin xwekʼa naq joʼkaʼin xinxsume li Jehobʼa».

Saʼ junpaat, laj Kazuhiro xtzʼiibʼa jun li esil choʼq re li qamolam re Myanmar re xyeebʼal naq aʼan ut li rixaqil nekeʼraj kʼanjelak joʼ aj kʼamolbʼe saʼ li puktesink saʼ li teep aʼin. Naq kinumeʼk oobʼ kutan, li qamolam kixye rehebʼ: «Chalqex, naqaj xtzʼaqobʼ aj kʼamolbʼe saʼ li puktesink». Laj Kazuhiro ut li xMari, li rixaqil, xeʼxkʼayi li xbʼelebʼaal chʼiichʼ, xeʼrisi li xhu re xik saʼ jalan chik tenamit ut xeʼxtoj xnaʼaj re xik saʼ soʼsolchʼiichʼ. Saʼebʼ li qakutan, kʼajoʼ xsahilebʼ xchʼool chi kʼanjelak saʼ li chʼuut rehebʼ li inkʼaʼ nekeʼaatinak li wank  Mandalay. Laj Kazuhiro naxye: «Chixjunil li xqakʼul saʼ li qayuʼam naxkawresi li qapaabʼal chirix li naxyeechiʼi Salmo 37:5, li naxye: “Chaqʼaxtesi aawibʼ rubʼel roq rubʼel ruqʼ li Qaawaʼ, kʼojkʼooq aachʼool rikʼin, ut Aʼan taatenqʼanq aawe”».

Saʼ li chihabʼ 2014, ebʼ laj Testiiw re li Jehobʼa re Myanmar xeʼsahoʼk xchʼool chi xkʼubʼankil jun li nimla chʼutam re jun kutan. Naabʼalebʼ li jalanebʼ xtenamit xeʼwulak saʼ li nimla chʼutam aʼin. Saʼ xyanqebʼ wank li xMonique, jun li qechpaabʼanel re Estados Unidos li wank 34 chihabʼ re. Aʼan naxye: «Naq xinsutqʼiik saʼ li nimla chʼutam, xintijok chiru li Jehobʼa chirix kʼaru tinbʼaanu rikʼin linyuʼam. Xinʼaatinak ajwiʼ rikʼin linnaʼ linyuwaʼ chirix li ninkʼoxla xbʼaanunkil. Saʼ oxibʼal xqakʼoxla naq us raj naq tinxik chi puktesink saʼ Myanmar. Abʼan naq toj maajiʼ ninkʼubʼ chiʼus li tinbʼaanu, naabʼal sut xintijok ut xinkanabʼ naq tnumeʼq wiibʼ oxibʼ kutan». Li xMonique naxseeraqʼi qe kʼaʼut kixbʼaanu aʼin.

Aʼan naxchʼolobʼ: «Li Jesus kixye rehebʼ li xtzolom naq teʼxbʼir rix joʼnimal teʼxsach. Joʼkan naq xinkʼoxla: “Ma ttzʼaqloq chiwu lintumin re qʼaxonk aran? Ma tinruuq xweenteninkil wibʼ chi inkʼaʼ tinkʼe xtzʼaqobʼ linhoor chi kʼanjelak?”». Li xMonique naxye: «Saʼ junpaat xinkʼe reetal naq moko tzʼaqal ta lintumin re kanaak saʼ najtil tenamit». Joʼkan naq, kʼaru kixbʼaanu re naq truuq chi xik? (Luc. 14:28).

Li xMonique naxye ajwiʼ: «Saʼ jun kutan, laj echal kʼanjel xye we naq naraj aatinak wikʼin. Kʼajoʼ xʼok inkʼaʼuxl, xinkʼoxla naq tinrisi saʼ linkʼanjel. Abʼan, moko joʼkan ta, xbʼanyoxi chiwu li chaabʼil kʼanjel li ninbʼaanu ut kixye we naq teʼxkʼe xtzʼaqobʼ intojbʼal. Ut aʼan tzʼaqal li tumin li naʼajmank re xtojbʼal linkʼas».

Li xMonique wank Myanmar chalen li po Diciembre 2014. Chanru narekʼa ribʼ chi kʼanjelak saʼ jun li teep bʼarwiʼ naʼajmank aj puktesinel? Aʼan naxsume: «Kʼajoʼ xsahil inchʼool chi wank arin. Yookin xtzolbʼal oxibʼ li qas qiitzʼin chirix li Santil Hu. Jun rehebʼ aʼan jun li ixq li wank 67 chihabʼ re junelik seʼseʼ li ru naq nikinxkʼul ut nikinxqʼalu. Naq kixtzol naq li xkʼabʼaʼ li Yos aʼan Jehobʼa, xʼelk xyaʼal ru. Xye we: “Aʼin xbʼeen sut naq xwabʼi li xkʼabʼaʼ li Yos. Kʼajoʼ aasaajil chiwu ut xaakʼut chiwu li wank tzʼaqal xwankil saʼ chixjunil linyuʼam”. Laaʼin ajwiʼ xinyaabʼak. Naq nakʼulmank aʼin, nasahoʼk linchʼool chi kʼanjelak bʼarwiʼ aajel ru aj puktesinel». Tojeʼ, li xMonique xwulak saʼ Li tzolok choʼq rehebʼ li nekeʼkʼamok bʼe chi xpuktesinkil li Xʼawabʼejilal li Yos.

Li kiyeemank saʼ li Anuario de los testigos de Jehová 2013 chirix Myanmar kirekʼasi ajwiʼ xchʼool wiibʼ oxibʼ aj puktesinel re qʼaxonk saʼ li tenamit aʼin. Li xLi jun qechpaabʼanel li wank tana 30 chihabʼ re, wulaj wulaj nakʼanjelak ut wank chaq Asia bʼarwiʼ naʼok li iqʼ ut li saqʼe abʼan li kiril saʼ li Anuario xkawresi li xchʼool re xik chi kʼanjelak chiru li Yos saʼ Myanmar. Aʼan naxye: «Saʼ li chihabʼ 2014 naq xinwulak saʼ li nimla chʼutam aran Yangon, xinnaw ru jun sumal li yook chi puktesink saʼ li aatinobʼaal Chino saʼ Myanmar. Xbʼaan naq ninnaw li aatinobʼaal aʼin, xinqʼaxonk aran re tenqʼank saʼ li chʼuut rehebʼ laj Chino. Li xMonique ut laaʼin xkoho chi puktesink saʼ Mandalay. Li Jehobʼa xoorosobʼtesi ut xqataw qakʼanjel chiru jun waʼlebʼ choʼq aj kʼutunel saʼ jun chi tzolebʼaal ut nachʼ li qochoch aran. Usta tiq ru li kutan ut naqataw jalan chik ebʼ li chʼaʼajkilal, kʼajoʼ xsahil linchʼool chi kʼanjelak arin chiru li Yos. Ebʼ li qas qiitzʼin li wankebʼ Myanmar moko bʼihomebʼ ta, tuulanebʼ ut nawulak chiruhebʼ rabʼinkil li esil li naxye li Santil Hu. Kʼajoʼ nasachk qachʼool rilbʼal chanru narosobʼtesi li Jehobʼa li puktesink. Chʼolchʼo chiwu naq li Jehobʼa naraj naq tinkʼanjelaq arin Mandalay».

Naabʼal li qechpaabʼanel li nekeʼtenqʼank saʼ li teep bʼarwiʼ naʼajmank aj puktesinel rilomebʼ li xwankil li  tijok. Jun eetalil, aran Japon laj Jumpei ut li xNao, li rixaqil, li maare numenaq 30 chihabʼ rehebʼ, wankebʼ saʼ jun li chʼuut rehebʼ li inkʼaʼ nekeʼruuk chi aatinak. Kʼaʼut naq keʼqʼaxonk Myanmar? Laj Jumpei naxye: «Rikʼin li wixaqil junelik xqaj kʼanjelak chirix li Yos saʼ jalan chik tenamit. Jun li qechpaabʼanel winq li wank saʼ li qachʼuut xqʼaxonk Myanmar. Ut laaʼo xooqʼaxonk ajwiʼ saʼ li po Mayo 2010, usta moko naabʼal ta li tumin xokxo qabʼan. Ebʼ li qechpaabʼanel re Myanmar xooʼeʼxkʼul chi anchalebʼ xchʼool». Kʼaru naxye laj Jumpei chirix li puktesink saʼ Myanmar? Aʼan naxye: «Ebʼ li qas qiitzʼin kʼajoʼ nekeʼwulak chiru li esil. Naq li inkʼaʼ nekeʼruuk chi aatinak nekeʼril ebʼ li bʼideo li yiibʼanbʼil choʼq rehebʼ, nasachk xchʼoolebʼ. Kʼajoʼ xsahil qachʼool naq xooqʼaxonk arin».

Kʼaru nekeʼxbʼaanu laj Jumpei ut li xNao re xtojbʼal li xsachomq? Laj Jumpei naxye: «Chiru oxibʼ chihabʼ, xqasach chixjunil li qatumin ut maakʼaʼ chik re xtojbʼal li qochoch re li jun chik chihabʼ. Kʼajoʼ naq xootijok chiru li Jehobʼa. Xsachk qachʼool naq li qamolam xooxbʼoq chi wank chiru jarubʼaq po joʼ aj kʼamolbʼe saʼ li puktesink li nekeʼxbʼaanu 130 hoonal. Xqakʼojobʼ qachʼool rikʼin li Jehobʼa ut aʼan inkʼaʼ xooxkanabʼ. Junelik xooxtenqʼa». Tojeʼ, laj Jumpei ut li xNao xeʼwulak saʼ Li tzolok choʼq rehebʼ li nekeʼkʼamok bʼe chi xpuktesinkil li Xʼawabʼejilal li Yos.

Laj Simone, jun li qech aj paabʼanel re Italia li wank 43 chihabʼ re, ut li xʼAnna, li rixaqil, li nachalk Nueva Zelanda ut wank 37 chihabʼ re, xeʼqʼaxonk Myanmar. Kʼaru kiʼekʼasink rehebʼ? Li xʼAnna naxsume: «Li Anuario 2013 li kiʼaatinak chirix Myanmar». Laj Simone naxye ajwiʼ: «Oxloqʼ chiqu wank Myanmar. Moko naabʼal ta naʼajmank re wank arin, ut naru ninkʼe xkomon inhoonal re li Jehobʼa. Nasachk inchʼool rilbʼal chanru nokooxtenqʼa naq nokookʼanjelak bʼarwiʼ naʼajmank aj puktesinel» (Sal. 121:5). Li xʼAnna naxye: «Maajunwa wekʼahom li sahil chʼoolejil aʼin. Moko ninsikʼ ta li bʼihomal ut wank xkomon inhoonal choʼq re linbʼeelom; nawekʼa naq xoonachʼok chiʼus. Joʼkan ajwiʼ, chaabʼilebʼ li qamiiw li xqataw. Ebʼ li qas qiitzʼin sa nekeʼril ebʼ laj Testiiw, ut nasachk qachʼool rilbʼal chanru nekeʼxkʼulubʼa li yaal». Kʼaru naraj xyeebʼal?

Li xʼAnna naxchʼolobʼ: «Saʼ jun kutan, saʼ kʼayil xinpuktesi li yaal re jun li ixq li natzolok saʼ li nimla tzolebʼaal ut xinye re, naq tinsutqʼiiq wiʼ chik. Naq xqil wiʼ chik qibʼ, yook chi ochbʼeniik xbʼaan jun li ramiiw ixq. Saʼ jun sut chik, jalanebʼ chik. Ut, moqon chik, jalanebʼ chik. Anaqwan oobʼ rehebʼ aʼan yookebʼ xtzolbʼal li Santil Hu wikʼin». Laj Simone naxye: «Ebʼ li qas qiitzʼin li naqapuktesi wiʼ li yaal sa nekeʼaatinak ut naabʼal xpatzʼomebʼ. Kʼajoʼ nekeʼwulak chiru li esil. Relik chi yaal, maakʼaʼ qahoonal re xtzolbʼal chixjunilebʼ».

Kʼaru xeʼxbʼaanu wiibʼ oxibʼ rehebʼ naq toj maajiʼ nekeʼqʼaxonk Myanmar? Li xMizuho, re Japon, naxye: «Rikʼin laj Sachio, linbʼeelom, junelik xqaj xik saʼ jun li tenamit bʼarwiʼ naʼajmank aj puktesinel, abʼan, bʼar? Li xchaabʼilal ru li naʼlebʼ li wank saʼ li Anuario 2013  kiwulak saʼ li qachʼool. Joʼkan naq xooʼok xkʼoxlankil naq tooqʼaxonq Myanmar». Laj Sachio naxye: «Xqakʼubʼ wank jun xamaan aran Yangon, li xnimal ru li tenamit re Myanmar. Naru naqaye naq yal xqaj rilbʼal li tenamit. Naq ak xqil chik, xqakʼe reetal naq tento tooqʼaxonq».

Laj Rodney ut li xJane, li rixaqil, ebʼ aj Australia ut wank tana 50 chihabʼ rehebʼ. Rochbʼenebʼ li xkokʼal, laj Jordan ut li xDanica, chalen li chihabʼ 2010 yookebʼ chi kʼanjelak chirix li Yos saʼ Myanmar. Laj Rodney naxye: «Kʼajoʼ xrahoʼk qachʼool chi rilbʼal naq ebʼ li qas qiitzʼin maakʼaʼebʼ xpaabʼal. Ninye rehebʼ li junkabʼal naq xyalaqebʼ puktesink saʼ jun li tenamit joʼ Myanmar». Kʼaʼut naxye aʼin? Aʼan ajwiʼ naxchʼolobʼ: «Rikʼin maakʼaʼ naru naqajuntaqʼeeta chixjunil li osobʼtesihom li xqakʼul saʼ xkʼabʼaʼ naq wanko arin. Naabʼalebʼ li saaj yookebʼ xkʼaʼuxl chirix li xselular, li bʼelebʼaal chʼiichʼ, li kʼanjel ut yalaq kʼaʼaq chik re ru. Ebʼ li qakokʼal nekeʼroksi li xhoonal re xtzolbʼal ebʼ li akʼ aatin choʼq re li puktesink. Nekeʼraj xtzolbʼal chanru teʼnaʼlebʼaq rikʼinebʼ li qas qiitzʼin li inkʼaʼ nekeʼxnaw chirix li Santil Hu ut nekeʼraj ajwiʼ xtzolbʼal chanru teʼsumenq saʼebʼ li chʼutam. Yookebʼ xkʼebʼal xchʼool chirix aʼin ut chirix jalan chik li kʼanjel chirix li Yos chi sahebʼ saʼ xchʼool».

Laj Oliver wank 37 chihabʼ re ut nachalk Estados Unidos. Aʼan naxchʼolobʼ kʼaʼut us qʼaxonk saʼ jalan chik tenamit re tenqʼank: «Xintaw rusilal kʼanjelak chiru li Jehobʼa bʼarwiʼ moko kʼaynaqin ta. Wank saʼ jalan chik naʼaj xkawresi linpaabʼal ut xinxtenqʼa chi xkʼojobʼankil linchʼool rikʼin li Jehobʼa yalaq joqʼe. Kʼanjelak chiru li Yos rochbʼenebʼ li inkʼaʼ ninnawebʼ ru, ut junaq ru li xpaabʼalebʼ wikʼin, xinxtenqʼa chi rilbʼal naq maakʼaʼ junaq chik li naʼlebʼ saʼ ruuchichʼochʼ li wank xwankil chiru li Xʼawabʼejilal li Yos». Saʼebʼ li qakutan, laj Oliver ut li xʼAnna, li rixaqil, chi sa saʼ xchʼoolebʼ yookebʼ xpuktesinkil li esil rehebʼ li qas qiitzʼin saʼ li aatinobʼaal Chino.

Li xTrazel, li qechpaabʼanel li wank 52 chihabʼ re ut nachalk Australia, nakʼanjelak chirix li Yos saʼ Myanmar chalen li chihabʼ 2004, naxye: «Chixjunilebʼ li teʼruuq, ninye rehebʼ naq teʼkʼanjelaq chirix li Yos bʼarwiʼ naʼajmank aj puktesinel. Ninkʼe reetal naq li Jehobʼa narosobʼtesi li naxkʼe xqʼe chi kʼanjelak chiru chi anchal xchʼool. Maajunwa xinkʼoxla wank chi joʼkaʼin. Aʼan aʼin li yuʼam li kʼajoʼ xchaabʼilal li maajunwa xnumeʼk saʼ linchʼool».

Naqaj naq chixjunil li xeʼxseeraqʼi ebʼ li qechpaabʼanel aʼin tixwaklesi aachʼool re xtzʼilbʼal rix ma tatruuq ajwiʼ laaʼat xtenqʼankilebʼ li qas qiitzʼin li nekeʼraj rabʼinkil li esil saʼebʼ li teep bʼarwiʼ maajiʼ napuktesimank li yaal. Chanchan tawiʼ naq ebʼ li qechpaabʼanel li wankebʼ saʼebʼ li teep aʼin yookebʼ xyeebʼal aawe: «Okan chaq Myanmar ut tenqʼaho!».