Ma xaakʼe aachʼool chi rilbʼal ebʼ li hu li tojeʼ xeʼelk Laj Kʼaakʼalehom? Kʼutbʼesi ma nakaanaw xsumenkil ebʼ li patzʼom:

Bʼar wank li kaahibʼ chi naʼlebʼ li tqabʼaanu re naq toobʼichanq chiʼus?

Xaqxoqo chiʼus ut tqataqsi li qabʼichlebʼaal, tqanujtesi chi iqʼ li qapospoʼoy, tqate chiʼus saʼ qe ut toobʼichanq saʼ kawil kuxej. Chi joʼkan, kawaq xyaabʼ qakux (w17.11-S, perel 5).

Saʼ li tenamit Israel wank ebʼ li naʼaj re kolok ibʼ, kʼaru naqatzol chirix bʼar kʼojobʼanbʼilebʼ ut chanru wank ebʼ li bʼe?

Wank waqibʼ li naʼaj re kolok ibʼ saʼ li tenamit, ut chaabʼil yiibʼanbʼil ebʼ li bʼe li nekeʼkʼamok aran. Saʼ xkʼabʼaʼ aʼin, saʼ junpaat ut moko chʼaʼaj ta chiru laj maak xtawbʼal bʼar tixkol ribʼ (w17.11-S, perel 14).

Kʼaʼut li xkamik li Jesus aʼan xmaatan li Yos li tzʼaqal re ru?

Naxkʼe qoybʼenihom re naq toowanq chi junelik ut nokooxkol chiru li maak ut li kamk. Xbʼaan naq, li Yos naxra ebʼ li ralal xkʼajol laj Adan, kixkʼe chaq li Jesus naq toj wanko saʼ li maak (wp17.6-S, perel 6 ut 7).

Kʼaʼut naq Salmo 118:22 naʼaatinak chirix li xwaklijik chi yoʼyo li Jesus?

Li Jesus keʼxtzʼeqtaana joʼ li Sikʼbʼil Ru ut keʼxkamsi. Tento naq twakliiq chi yoʼyo re naq tkanaaq choʼq «xnimal ru pek» (w17.12-S, perel 9 ut 10).

Ma aajel ru li xbʼeen alalbʼejil re wank choʼq xxeʼtoonil li Sikʼbʼil Ru?

Wank sut, li xxeʼtoonil li Jesus nachalk chirix li xbʼeen alalbʼej, abʼan moko junelik ta. Ebʼ laj Judiiy xeʼxnaw aʼin ut xeʼxkʼulubʼa, jun eetalil, nekeʼxnaw naq li Kriist tchalq chirix laj David, li xchʼiʼip laj Jese (w17.12-S, perel 14 ut  15).

Kʼaru li naʼlebʼ wank saʼ li Santil Hu chirix li bʼanok?

Li chaqʼrabʼ kixye chaq naq chiru kaʼkʼaal kutan teʼxtzʼap ribʼ li kaqebʼ xyajel, teʼxchʼaj li ruqʼ naq teʼxchʼeʼ junaq kamenaq ut naq teʼrisi li kʼot. Kixye ajwiʼ, naq teʼxset ruʼuj xtzʼejwal ebʼ li kokʼal naq waqxaqibʼ kutan xyoʼlajikebʼ, aʼin xqʼehil naq natʼoqlaak li kikʼ ut naʼok chi kʼanjelak (wp18.1-S, perel 7).

Usta us naq laj paabʼanel tixra ribʼ, kʼaʼut inkʼaʼ tixqʼax ru li tixbʼaanu?

Tento tqara ebʼ li poyanam joʼ naqara qibʼ (Mar. 12:31). Ebʼ li bʼeelomej tento «teʼxra li rixaqil, kamaʼ naq nekeʼxra li xtzʼejwalebʼ» (Efes. 5:28). Yaal, xraabʼal qibʼ naru nokooxsach (w18.01-S, perel 23).

Kʼaru tqabʼaanu re naq tookʼiiq saʼ li qapaabʼal?

Tento tqatzol li Raatin li Yos, tookʼoxlaq chirix ut tqayuʼami li yooko xtzolbʼal. Tento tooxik saʼ li bʼe li naxkʼut li santil musiqʼej ut tqabʼanyoxi ut tqakʼulubʼa naq tooʼeʼxtenqʼa (w18.02-S, perel 26).

Kʼaʼut inkʼaʼ us naq tqil li kutan chaalel rikʼin li chahim ut li qʼehink?

Wank naabʼal xyaalal, abʼan li xnimal ru naq li Santil Hu naxtzʼeqtaana aʼin (wp18.2-S, perel 4 ut 5).

Naq ak xqakʼulubʼa xik saʼ junaq li waʼak, kʼaru tento tqabʼaanu?

Wi xqakʼulubʼa xik saʼ junaq li waʼak, tento tqabʼaanu li xqaye (Sal. 15:4). Inkʼaʼ tqaqʼet ru li qaatin yal rikʼin maakʼaʼ. Li xbʼoqok qe maare xkʼe xchʼool chi xkʼubʼankil junaq li tzakahemq (w18.03-S, perel 18).

Kʼaru teʼruuq xtzolbʼal rikʼin laj Timoteo li xaqabʼanbʼilebʼ chi kʼanjelak saʼ li chʼuut?

Kixkʼe xchʼool chirixebʼ li junchʼol ut kixkʼe xbʼeenwa li xkʼanjel li Yos. Kaw kikʼanjelak chiru li Jehobʼa ut kixyuʼami li kixtzol. Inkʼaʼ kixkanabʼ xkawresinkil li xpaabʼal ut kixkanabʼ naq li santil musiqʼej tbʼeresinq re. Moko kaʼaj tawiʼ ebʼ li cheekel winq, chiqajunilo bʼan tqakʼam qe rikʼin (w18.04-S, perel 13 ut 14).