1, 2. Joʼ naxchʼolobʼ Hechos 8:27-31, 35-38, kʼaʼut naq xkubʼsi xhaʼ li xnimal ru winq aj Etiopía?

MA NAKAAWAJ xkubʼsinkil aahaʼ ut wank choʼq xtzolom li Kriist? Li rahok ut li bʼanyoxink naʼekʼasink rehebʼ naabʼal li poyanam chi xbʼaanunkil aʼin. Kʼoxla li eetalil chirix li xnimal ru winq li nakʼanjelak chaq chiru li xnaʼebʼ li tenamit re Etiopía.

² Naq li winq aʼin kixtaw ru li naxchʼolobʼ li Santil Hu chirix li kubʼihaʼ, saʼ junpaat kixkubʼsi xhaʼ (taayaabʼasi Hechos 8:27-31, 35-38). Kʼaʼut? Chʼolchʼo naq naroxloqʼi chaq li Raatin li Yos, xbʼaan naq yook chaq chi rilbʼal xsaʼ li hu li kixtzʼiibʼa li propeet Isaías naq yook chi xik saʼ li xbʼelebʼaal chʼiichʼ. Ut naq laj Felipe kixchʼolobʼ chiru li kixbʼaanu li Jesús saʼ xkʼabʼaʼ, kʼajoʼ naq kixbʼanyoxi. Naqanaw ajwiʼ naq ak naxra chaq li Jehobʼa, xbʼaan naq yook chaq chi sutqʼiik Jerusalén chi loqʼonink. Chanchan tawiʼ naq ak kixtzʼeqtaana chik li xnajteril paabʼal ut natzʼaqonk chik saʼ xyanq li xtenamit li tzʼaqal Yos. Li xrahom chirix li Jehobʼa kiʼekʼasink re chi xbʼaanunkil jun chik li naʼlebʼ li jwal wank xwankil, xkubʼsinkil xhaʼ ut wank choʼq xtzolom li Kriist (Mat. 28:19).

3. Kʼaru naru naramok chiru junaq li kristiʼaan xkubʼsinkil xhaʼ? (Chaawil li kaaxukuut « Rikʼin kʼaru xpaayil ru li chʼochʼ naru nakaajuntaqʼeeta wiʼ laachʼool?»).

³ Laarahom chirix li Jehobʼa naru naʼekʼasink aawe chi xkubʼsinkil aahaʼ. Abʼan wank jalan chik li rahok li naru naxram  chaawu xbʼaanunkil li naʼlebʼ aweʼ. Jun eetalil, maare qʼaxal nakaara ebʼ laakomon ut ebʼ laawamiiw li maawaʼebʼ aj Testiiw, ut nakaakʼoxla naq wi nakubʼeek aahaʼ inkʼaʼ chik tateʼxra (Mat. 10:37). Malaj nawulak chaawu xbʼaanunkil junaq li yibʼ aj naʼlebʼ li xikʼ naril li Yos ut kʼajoʼ nachʼaʼajkoʼk chaawu xkanabʼankil (Sal. 97:10, Li Santil Hu, Wycliffe Bible Translators, [Wy]. Akʼ tzʼiibʼ). Joʼkan ajwiʼ, maare kʼaynaqat chaq chi xnimankil ebʼ li ninqʼe li nachalk saʼ li bʼalaqʼil paabʼal, ut joʼkan naq nachʼaʼajkoʼk chaawu xtzʼeqtaanankil ebʼ li ninqʼe aweʼ li inkʼaʼ nawulak chiru li Jehobʼa (1 Cor. 10:20, 21). Li tento taakʼoxla rix aʼan kʼaru malaj ani qʼaxal taara.

4. Bʼar wank li naʼlebʼ li t-ekʼasinq tzʼaqal aawe chi xkubʼsinkil aahaʼ?

⁴ Relik chi yaal naq wank naabʼal li naʼlebʼ li nakaara ut nakaawoxloqʼi ut aʼin us xbʼaanunkil. Jun eetalil, maare naq toj maajiʼ nakaatikibʼ tzolok rikʼinebʼ laj Testiiw re li Jehobʼa ak nakaawoxloqʼi chaq li Santil Hu. Maare nakaara ajwiʼ chaq li Jesús. Ut anaqwan naq ak nakaanaw chik anihebʼ laj Testiiw re li Jehobʼa, qʼaxal nawulak tana chaawu wank rikʼinebʼ. Abʼan, li naʼlebʼ aʼin moko trekʼasi ta laachʼool chi xqʼaxtesinkil laayuʼam chiru li Jehobʼa ut xkubʼsinkil aahaʼ. Li t-ekʼasinq tzʼaqal aawe chi xkubʼsinkil aahaʼ, aʼan laarahom chirix li Yos. Wi qʼaxal nakaara li Jehobʼa, inkʼaʼ taakanabʼ naq kʼaruhaq chi moko anihaq tixram chaawu kʼanjelak chiru. Joʼkan naq, wi naqara li Jehobʼa moko kaʼaj tawiʼ nokoorekʼasi chi xkubʼsinkil qahaʼ, nokooxtenqʼa ajwiʼ re naq junelik tookʼanjelaq chiru.

5. Kʼaru tqatzʼil rix saʼ li tzolom aʼin?

⁵ Li Jesús kixye naq tento tqara li Jehobʼa chi anchal li qachʼool, chi anchal li qaanm, chi anchal li qakʼaʼuxl ut chi anchal li qametzʼew (Mar. 12:30). Chanru taatzol xraabʼal ut roxloqʼinkil li Jehobʼa chi joʼkaʼin? Xkʼoxlankil rix joʼnimal nokooxra (1 Juan 4:19). Li tzolom aweʼ tixtzʼil rix naabʼal li naʼlebʼ li ttenqʼanq aawe chi xbʼaanunkil aʼin. Joʼkan ajwiʼ, naxchʼolobʼ kʼaru chik taabʼaanu ut taawekʼa naq qʼaxal taara li Jehobʼa. *

6. Joʼ naxye Romanos 1:20, bʼar wank jun rehebʼ li naʼlebʼ re xnawbʼal ru li Jehobʼa?

⁶ Naw ru li Jehobʼa rikʼin xkʼoxlankil rix li xyobʼtesihom (taayaabʼasi Romanos 1:20; Apoc. 4:11). Kʼoxla rix li choxahil naʼlebʼ li nakʼutunk saʼ li yobʼtesihom, joʼ chanru yiibʼanbʼilebʼ li rax pim ut li xul. Sikʼ xkomon li naʼlebʼ chirix chanru yiibʼanbʼil li qajunxaqalil (Sal. 139:14). Ut kʼoxla rix chixjunil li metzʼew li kixkʼe li Jehobʼa saʼ li Saqʼe, ut jultikaq aawe naq li Saqʼe aʼan yal jun rehebʼ li miyon chi chahim li wank saʼ li choxachʼochʼ (Is. 40:26). * Naq taabʼaanu aʼin, taakʼe reetal naq qʼaxal nakaawoxloqʼi chik li Jehobʼa. Abʼanan, xtawbʼal ru naq li Jehobʼa wank xchoxahil naʼlebʼ ut nim xwankil t-ekʼasinq aawe chi wank saʼ amiiwil rikʼin. Re naq taara chi anchal aawaanm, tento naq taakʼe aachʼool chi xnawbʼal ru chiʼus.

7. Re naq tatruuq chi xraabʼal li Jehobʼa chi anchal aawaanm, kʼaru tento taapaabʼ chi anchal aachʼool?

⁷ Naʼajmank naq taapaabʼ chi anchal aachʼool naq li Jehobʼa naxkʼe xchʼool chaawix. Ma nachʼaʼajkoʼk chaawu xpaabʼankil naq laj Yobʼtesinel re li choxa ut li Ruuchichʼochʼ nakatxkʼoxla ut naxkʼe xchʼool chaawix? Wi joʼkan, jultikaq aawe naq li Jehobʼa «moko najt ta wank qikʼin chiqajunjunqal» (Hech. 17: 26-28). Joʼ kixye laj David re laj Salomón, «li Qaawaʼ nalajxtzʼili li xchʼool chixjunilebʼ». Li Jehobʼa naxye naq, wi laaʼat nakaasikʼ, aʼan tixkʼut ribʼ chaawu (1 Crón. 28:9). Relik chi yaal, wi laaʼat yookat xtzolbʼal li Santil Hu, naraj naxye naq li Jehobʼa xsikʼok aawu joʼ naxye saʼ Jeremías 31:3. Naq yooqat xtawbʼal ru chiʼus li kixbʼaanu li Jehobʼa saʼ aakʼabʼaʼ, qʼaxal yooq chi kʼiik laarahom chirix.

8. Chanru naru nakaakʼutbʼesi naq nakaabʼanyoxi naq nakatxra li Jehobʼa?

⁸ Jun li naʼlebʼ li naru nakaabʼaanu re xbʼanyoxinkil naq nakatxra li Jehobʼa aʼan tijok chiru. Kʼajoʼ naq tkʼiiq laarahom chirix naq taaye re li xkʼaʼuxl wiʼ aachʼool ut naq taabʼanyoxi re chixjunil li naxbʼaanu saʼ aakʼabʼaʼ. Ut tatwanq tzʼaqal saʼ amiiwil rikʼin naq taakʼe reetal naq naxsume laatij (Sal. 116:1). Taapaabʼ chi anchal aachʼool naq li Yos naxtaw ru li nakaawekʼa. Abʼanan, re naq tatjiloq chiʼus chixkʼatq li Jehobʼa, aajel ru naq taataw ru chanru nakʼoxlak ut kʼaru naroybʼeni naq taabʼaanu. Ut tatruuq xbʼaanunkil aʼin naq taatzol xsaʼ li Santil Hu.

9. Chanru tatruuq xkʼutbʼesinkil naq nakaawoxloqʼi li Santil Hu?

⁹ Tzol roxloqʼinkil li Raatin li Yos. Kaʼajwiʼ saʼ li Santil Hu wank li yaal chirix li Jehobʼa ut li kʼaru naraj choʼq aawe. Chanru tatruuq xkʼutbʼesinkil naq nakaawoxloqʼi? Rikʼin rilbʼal xsaʼ rajlal kutan, xkawresinkil aawibʼ naq nakaakʼul laatzolbʼal ut naq nakaayuʼami li nakaatzol (Sal. 119:97, 99; Juan 17:17). Ma ak xaaxaqabʼ junaq li hoonal re rilbʼal xsaʼ li Santil Hu rajlal kutan ut ma nakaabʼaanu?

10. Bʼar wank li naʼlebʼ li natawmank kaʼajwiʼ saʼ li Santil Hu?

¹⁰ Kaʼajwiʼ saʼ li Raatin li Yos natawmank li xeʼxseeraqʼi ebʼ li poyanam li xeʼril ru li Jesús, ut kaʼajwiʼ li Santil Hu nachʼolobʼank re chi tzʼaqal re ru li kixbʼaanu li Jesús saʼ aakʼabʼaʼ. Naq taatzol li kixbʼaanu ut li kixye li Jesús, taawaj wank choʼq ramiiw.

11. Kʼaru ttenqʼanq aawe re naq qʼaxal taara li Jehobʼa?

¹¹ Tzol xraabʼal li Jesús. Aʼin ttenqʼanq aawe re naq qʼaxal taara li Jehobʼa, xbʼaan naq li Jesús naxkʼutbʼesi chi tzʼaqal re ru li xnaʼlebʼ li Xyuwaʼ (Juan 14:9). Joʼkan utan, wi inkʼaʼ  nakaakanabʼ xnawbʼal ru li Jesús, taataw ru chiʼus chanru li xnaʼlebʼ li Jehobʼa ut qʼaxal wiʼ chik taara. Kʼoxla rix chanru kixtoqʼobʼa ru ebʼ li poyanam li tzʼeqtaananbʼilebʼ, joʼebʼ li nebʼaʼ, li yaj ut li inkʼaʼ nekeʼruuk xkolbʼal ribʼ xjunes. Kʼoxla ajwiʼ li chaabʼil naʼlebʼ li naxkʼe aawe ut chanru naxchaabʼilobʼresi ru laayuʼam naq nakaapaabʼ (Mat. 5:1-11; 7:24-27).

12. Naq taanaw ru li Jesús, kʼaru naru naʼalaak saʼ aachʼool xbʼaanunkil?

¹² Laarahom chirix li Jesús qʼaxal tnimanq naq taakʼoxla rix naq kixmayeja ribʼ re naq tkuymanq tsachmanq li qamaak (Mat. 20:28). Naq taataw ru naq aʼan kixkʼulubʼa kamk saʼ aakʼabʼaʼ, aʼin naru naʼekʼasink aawe chi xyotʼbʼal aachʼool ut chi xpatzʼbʼal xkuybʼal aamaak chiru li Jehobʼa (Hech. 3:19, 20; 1 Juan 1:9). Ut wi qʼaxal nakaara li Jehobʼa ut li Jesús, qʼaxal taawaj wank rikʼinebʼ li nekeʼrahok ajwiʼ rehebʼ joʼ laaʼat.

13. Kʼaru ak xkʼe aawe li Jehobʼa?

¹³ Tzol xraabʼal li xjunkabʼal li Jehobʼa. Maare laakomon li maawaʼebʼ aj Testiiw ut ebʼ laanajteril amiiw inkʼaʼ teʼxtaw ru kʼaʼut nakaawaj xqʼaxtesinkil laayuʼam chiru li Yos, ut maare xikʼ tateʼril. Abʼan li Jehobʼa tixkʼe choʼq aajunkabʼal ebʼ laawechpaabʼanel. Wi laaʼat junelik wankat saʼ li junkabʼal aweʼ, tateʼxra ut tateʼxtenqʼa joʼ naʼajmank chaawu (Mar. 10:29, 30; Heb. 10:24, 25). Ut maare saʼ jun kutan ebʼ laakomon teʼkʼanjelaq ajwiʼ chiru li Jehobʼa ut teʼxyuʼami li xchaqʼrabʼ (1 Ped. 2:12).

14. Joʼ naxye saʼ 1 Juan 5:3, kʼaru xaakʼe reetal laaʼat chirix li xchaqʼrabʼ li Jehobʼa?

¹⁴ Tzol roxloqʼinkil ut xpaabʼankil li xchaqʼrabʼ li Yos. Naq toj maajiʼ nakaanaw ru li Jehobʼa, maare laaʼat nakaabʼeresi chaq laayuʼam joʼ chanru nawulak chaawu, abʼan anaqwan nakaakʼe reetal naq li xchaqʼrabʼ li Jehobʼa jwal us choʼq aawe (Sal. 1:1-3; taayaabʼasi 1 Juan 5:3). Kʼoxla rix li naʼlebʼ li naxkʼe li Santil Hu choʼq rehebʼ li bʼeelomej, li ixaqilbʼej, li naʼbʼej yuwaʼbʼej ut li alal kʼajolbʼej (Efes. 5:22–6:4). Ma xaakʼe reetal li rusilal li naxkʼam chaq saʼ laajunkabʼal naq nekeeyuʼami li xchaqʼrabʼ li Yos? Ma chaabʼil chik laanaʼlebʼ saʼ xkʼabʼaʼ naq anaqwan nakaapaabʼ li taql li naxye naq tento taasikʼebʼ ru chiʼus laawamiiw? Ma nakaawekʼa naq anaqwan jwal sa saʼ laachʼool? (Prov. 13:20; 1 Cor. 15:33). Maare laaʼat taaye naq joʼkan.

15. Kʼaru naru nakaabʼaanu wi nakaawaj xnawbʼal chanru xyuʼaminkil li naʼlebʼ li naxkʼe li Santil Hu?

¹⁵ Maare wank sut inkʼaʼ taanaw chanru xyuʼaminkil li naʼlebʼ li naxkʼe li Santil Hu li yookat xtzolbʼal. Joʼkan naq li Jehobʼa naroksi li xmolam re xkʼebʼal aawe li naʼlebʼ li isinbʼil chaq saʼ li Santil Hu li tatxtenqʼa chi xkʼebʼal reetal bʼar wank li us ut li inkʼaʼ us (Heb. 5:13, 14). Naq taawil ut taatzol li naʼlebʼ aʼin, taakʼe reetal naq qʼaxal nakʼanjelak chaawu, ut relik chi yaal naq taawaj wank saʼ li xmolam li Jehobʼa.

16. Chanru xkʼubʼ li xtenamit li Jehobʼa?

¹⁶ Tzol xraabʼal ut tzʼaqonk saʼ li xmolam li Yos. Li Jehobʼa xkʼubʼ li xtenamit chi chʼuut ut li Jesús, aʼ li Ralal, najolomink rehebʼ (Efes. 1:22; 5:23). Joʼkan ajwiʼ, li Jesús ak kixxaqabʼ jun chʼina chʼuut chi winq li yulbʼilebʼ ru rikʼin santil musiqʼej re naq teʼxkʼubʼ li kʼanjel li naraj naq tbʼaanumanq saʼebʼ li qakutan. Li Jesús kixkʼabʼaʼi li chʼuut aweʼ joʼ «li moosej tiik xchʼool ut wank xnaʼlebʼ», ut ebʼ laj paabʼanel aʼin nekeʼxkʼe xchʼool chi xbʼaanunkil li kʼanjel tenebʼanbʼil saʼ xbʼeenebʼ re xkawubʼresinkil ut xkolbʼal rix laapaabʼal (Mat. 24:45-47). Jun li naʼlebʼ li naxbʼaanu li moosej tiik xchʼool re xkolbʼal rix laapaabʼal aʼan naq naxxaqabʼ ebʼ li cheekel winq saʼebʼ li chʼuut (Is. 32:1, 2; Heb. 13:17; 1 Ped. 5:2, 3). Aʼanebʼ kaw nekeʼkʼanjelak re xkawubʼresinkil  laachʼool ut re aatenqʼankil chi jilok chixkʼatq li Jehobʼa. Abʼan li xnimal ru naʼlebʼ li teʼruuq aatenqʼankil wiʼ aʼan xkʼutbʼal chaawu aatinak chirix li Jehobʼa rikʼin jalanebʼ chik poyanam (Efes. 4:11-13).

17. Joʼ naxye saʼ Romanos 10:10, 13, 14, kʼaʼut naq nokooʼaatinak rikʼinebʼ li poyanam chirix li Jehobʼa?

¹⁷ Tenqʼa jalanebʼ chik re naq teʼxtzol xraabʼal li Jehobʼa. Li Jesús kixye rehebʼ li xtzolom naq tento teʼaatinaq chirix li Yos rikʼin jalan chik kristiʼaan (Mat. 28:19, 20). Li taql aʼin naru nakaapaabʼ chi minbʼil aawu. Abʼan, wi rajlal yook chi kʼiik laarahom chirix li Jehobʼa, taawekʼa aawibʼ joʼ li apóstol Pedro ut li apóstol Juan, naq xeʼxye: «Inkʼaʼ naru tqakanabʼ aatinak chirix li qilom ut qabʼihom» (Hech. 4:20). Jun rehebʼ li naʼlebʼ li qʼaxal naxkʼam chaq li sahil chʼoolejil aʼan xtenqʼankil junaq li poyanam chi xraabʼal li Jehobʼa. Peʼyaal naq kʼajoʼ tana kisahoʼk saʼ xchʼool laj Felipe naq kixtenqʼa li xnimal ru winq aj Etiopía chi xtzolbʼal li yaal ut chi xkubʼsinkil xhaʼ? Naq taakʼam aawe rikʼin laj Felipe ut naq taapaabʼ li taql li kixkʼe li Jesús re xik chi puktesink, taakʼutbʼesi naq nakaawaj wank choʼq aj Testiiw re li Jehobʼa (taayaabʼasi Romanos 10:10, 13, 14). Tojaʼ naq, maare taakʼoxla li patzʼom li kixye li xnimal ru winq aj Etiopía: «Kʼaru taaramoq chiwu xkubʼik inhaʼ?» (Hech. 8:36).

18. Kʼaru tqil saʼ li jun chik tzolom?

¹⁸ Naq taakawresi laachʼool re xkubʼsinkil aahaʼ, relik chi yaal naq aweʼ li naʼlebʼ li qʼaxal wank xwankil chiru chixjunil li taabʼaanu saʼ laayuʼam. Saʼ xkʼabʼaʼ naq moko bʼatzʼunk ta li taabʼaanu, tento naq taakʼoxla rix chiʼus chixjunil li naʼlebʼ li naʼokenk chisaʼ li kubʼihaʼ. Abʼanan, kʼaru tento taanaw chirix li kubʼihaʼ? Ut kʼaru tento taabʼaanu naq toj maajiʼ ut naq ak xkubʼeek chik aahaʼ? Tqil aʼin saʼ li jun chik tzolom.