Naq nakʼulmank aʼin, li chʼuut tixkʼoxla naq li winq kixraq li xsumlajik naq kisumlaak wiʼ chik ut li xkabʼ xsumlajik wank xwankil. Re xtawbʼal ru kʼaʼut nakʼoxlamank aʼin, qatzʼilaq rix li kixye li Jesús chirix xraqbʼal ru li sumlajik ut sumlaak wiʼ chik.

Saʼ Mateo 19:9, Wy, li Jesús kixye joqʼe naruhank xraqbʼal li sumlajik: «Yalaq ani tixkanabʼ rixaqil chi maawaʼ xmaak yumbʼeetak, ut tixkʼam jalan chik ixq, li jun aʼan tixmux ru li xsumlajik». Rikʼin li kixye li Jesús naqatzol 1) naq kaʼajwiʼ li yumbʼeetak malaj koʼbʼeetak naxraq ru li sumlajik ut 2) naq li winq li naxraq li xsumlajik wi inkʼaʼ saʼ xkʼabʼaʼ li koʼbʼeetak ut nasumlaak wiʼ chik, naxmux li xbʼeen xsumlajik. a

Ma kixye li Jesús naq li Santil Hu naxkʼulubʼa naq naru tsumlaaq wiʼ chik li winq li nakoʼbʼeetak ut naxraq li xsumlajik? Moko joʼkan ta tzʼaqal. Naq li bʼeelomej malaj li ixaqilbʼej naxmux li xsumlajik, li maakʼaʼ xmaak yaal re ma tixkuy xmaak. Wi inkʼaʼ tixkuy xmaak ut tixraq li xsumlajik chiru li chaqʼrabʼ, li junjunq naru teʼsumlaaq wiʼ chik naq ak xeʼxraq ru li xsumlajikebʼ.

Joʼkan ajwiʼ, maare li ixaqilbʼej inkʼaʼ naraj xraqbʼal li xsumlajik ut tixye naq tixkuy xmaak li xbʼeelom. Abʼan, kʼaru nakʼulmank wi li bʼeelomej inkʼaʼ naxkʼulubʼa naq li rixaqil tixkuy xmaak ut kaʼajwiʼ aʼan tixraq li xsumlajik chiru li chaqʼrabʼ? Saʼ xkʼabʼaʼ naq li ixaqilbʼej naraj xkuybʼal xmaak ut inkʼaʼ naraj xraqbʼal ru li xsumlajik, li Santil Hu inkʼaʼ naxkʼulubʼa naq li bʼeelomej tsumlaaq wiʼ chik. Abʼan wi naraj xraqbʼal ru li xsumlajik chi maakʼaʼ xyaalal ut nasumlaak rikʼin jalan chik chi inkʼaʼ naxkʼulubʼa li Santil Hu, naxmux wiʼ chik li xsumlajik. Ebʼ li cheekel winq tento teʼraqoq ajwiʼ aatin saʼ xbʼeen (1 Cor. 5:1, 2; 6:9, 10).

Wi junaq li winq nasumlaak wiʼ chik chi inkʼaʼ naxkʼulubʼa li Santil Hu, chanru naril li chʼuut li xbʼeen xsumlajik ut li xkabʼ? Ma naxkʼut li Santil Hu naq toj wank xwankil li xbʼeen xsumlajik? Ma toj truuq li ixaqilbʼej xkuybʼal xmaak li kiwank choʼq xbʼeelom? Ma naru xyeebʼal naq ak muxbʼil li xkabʼ xsumlajik li winq?

Junxil li chʼuut naxkʼoxla naq li akʼ sumlajik aʼin muxbʼil raj ru wi toj yoʼyo li maakʼaʼ xmaak, wi inkʼaʼ tsumlaaq chi moko tyumbʼeetaq malaj tkoʼbʼeetaq. Abʼanan, naq li Jesús kiʼaatinak chirix xraqbʼal li sumlajik ut sumlaak wiʼ chik, moko kaʼaj tawiʼ kiʼaatinak chirix li maakʼaʼ xmaak. Kixchʼolobʼ bʼan naq li winq li naxraq ru li xsumlajik chi maakʼaʼ xyaalal ut nasumlaak wiʼ chik, naxmux li xsumlajik. Wi joʼkan nakʼulmank, li winq li naxraq ru li xsumlajik ut nasumlaak wiʼ chik, naxraq ru chi junajwa li xbʼeen sumlajik xbʼaan naq li Jesús kixkʼut naq chi joʼkaʼin kimuxmank ru li sumlajik.

 Naq jun li kristiʼaan naxraq li xsumlajik ut nasumlaak wiʼ chik, li ixaqilbʼej malaj li bʼeelomej li maakʼaʼ xmaak moko aʼan ta chik yaal re ma tixkuy xmaak malaj inkʼaʼ. Joʼkan naq moko tenebʼanbʼil ta chik saʼ xbʼeen xbʼaanunkil aʼin. Li chʼuut moko tixjal ta chanru tril li xkabʼ sumlajik saʼ xkʼabʼaʼ naq li maakʼaʼ xmaak toj yoʼyo, inkʼaʼ nasumlaak malaj inkʼaʼ nayumbʼeetak malaj nakoʼbʼeetak. b

Saʼ li eetalil li xooʼaatinak saʼ xtiklajik, li bʼeelomej kikoʼbʼeetak ut saʼ xkʼabʼaʼ aʼin kixraq ru li xsumlajik. Abʼan, kʼaru tkʼulmanq wi li bʼeelomej tixraq ru li xsumlajik usta inkʼaʼ kikoʼbʼeetak ut tsumlaaq wiʼ chik? Malaj, kʼaru tkʼulmanq wi li bʼeelomej inkʼaʼ kikoʼbʼeetak naq toj maajiʼ naxraq ru li xsumlajik, abʼan moqon kixbʼaanu, ut xsumlaak wiʼ chik usta li ixaqilbʼej kiraj xkuybʼal xmaak? Wi joʼkan nanaʼlebʼak, naq naxraq ru li xsumlajik ut nasumlaak wiʼ chik, yook xmuxbʼal li xsumlajik, ut aʼin naxraq chi junajwa li xbʼeen xsumlajik. Li xkabʼ sumlajik wank xwankil chiru li chaqʼrabʼ. Saʼ li hu Laj Kʼaakʼalehom 15 re febrero 1980, perel 30, kixchʼolobʼ naq junaq li qas qiitzʼin kixtikibʼ wiʼ chik jun li akʼ sumlajik «joʼkan naq moko truuq ta xraqbʼal yal chi joʼkan ut tsutqʼiiq wiʼ chik saʼ li xbʼeen xsumlajik, xbʼaan naq li xbʼeen xsumlajik ak xraqeʼk chik naq xraqmank ru, naq kikoʼbʼeetak malaj kiyumbʼeetak ut naq kisumlaak wiʼ chik».

Joʼ chanru natawmank ru anaqwan li naʼlebʼ aʼin, moko naxsach ta xwankilal li sumlajik chi moko naxkʼulubʼa ta li koʼbʼeetak yumbʼeetak. Wi jun li qas qiitzʼin naxraq li xsumlajik chi inkʼaʼ naxkʼulubʼa li Santil Hu ut nasumlaak wiʼ chik, ebʼ li cheekel winq tento teʼraqoq aatin xbʼaan naq kixmux li xsumlajik. (Wi aj paabʼanel ajwiʼ li ixq li kisumlaak wiʼ, tento ajwiʼ teʼraqoq aatin saʼ xbʼeen xbʼaan naq kimuxuk sumlaak). Usta li xbʼeen sumlajik inkʼaʼ raj naʼilmank joʼ muxbʼil, abʼan chiru naabʼal chihabʼ, li bʼeelomej inkʼaʼ naru naq twanq junaq li xkʼanjel saʼ li chʼuut. Tento naq toj t-oybʼenimanq naq tsachq saʼ xchʼoolebʼ li kristiʼaan chixjunil li kixbʼaanu. Joʼkan ajwiʼ, tkʼoxlamanq rix li ixaqilbʼej li kikʼateʼk roq xbʼaan naq li xbʼeelom yal kiraj xbʼaanunkil ut ebʼ li alal kʼajolbʼej li maare xeʼkanabʼaak xbʼaan li bʼeelomej li kimaakobʼk (Mal. 2:14-16).

Joʼ naqakʼe reetal, xraqbʼal li sumlajik ut sumlaak wiʼ chik chi inkʼaʼ naxkʼulubʼa li Santil Hu naxkʼam chaq li rahilal, us naq tqakʼam qe rikʼin li Jehobʼa, ut tento tqil li sumlajik joʼ qʼaxal saant (Ecl. 5:4, 5; Heb. 13:4).