1. Kʼaru nekeʼrekʼa wiibʼ oxibʼ naq nekeʼelk chi puktesink? (Chaawil li jalam u).

 JOʼ AJ kʼanjel chiru li Jehobʼa nokoopuktesink xbʼaan naq naqara li qachoxahil Yuwaʼ ut naqaj naq ebʼ li poyanam teʼxnaw ru. Naabʼalebʼ li hermaan nekeʼwulak chiru puktesink, abʼan junchʼol chik nekeʼchʼaʼajkoʼk chiru xyalbʼal xsahil. Kʼaʼut nekeʼxkʼul aʼin? Wankebʼ inkʼaʼ nekeʼelk ru chi aatinak ut nekeʼxkʼoxla naq inkʼaʼ teʼruuq xbʼaanunkil aʼin. Jalanebʼ chik moko sa ta nekeʼrekʼa ribʼ rulaʼaninkil ebʼ li kristiʼaan wi inkʼaʼ xeʼbʼoqeʼk. Wankebʼ nekeʼxuwak naq teʼtzʼeqtaanaaq. Ut jalanebʼ chik xeʼkʼuteʼk chiru naq rikʼin maaʼani teʼwechʼinq. Chixjunilebʼ kʼajoʼ nekeʼxra li Jehobʼa, abʼan nekeʼchʼaʼajkoʼk chiru xyeebʼal li chaabʼil esil rehebʼ li inkʼaʼ nekeʼxnaw ru. Xbʼaan naq nekeʼxnaw naq jwal wank xwankil li kʼanjel aʼin, rajlal nekeʼxbʼaanu. Qʼaxal nasahoʼk xchʼool li Jehobʼa rikʼinebʼ!

2. Kʼaʼut inkʼaʼ raj tchʼinaaq aachʼool wi nachʼaʼajkoʼk chaawu xyalbʼal xsahil li puktesink?

² Ut laaʼat? Ma nachʼaʼajkoʼk chaawu xyalbʼal xsahil li puktesink? Wi joʼkan, michʼinaak aachʼool. Li nakaawekʼa maare naxkʼutbʼesi naq nakaakubʼsi aawibʼ. Maare inkʼaʼ nakaawaj naq ebʼ li poyanam teʼxik xchʼool chaawix malaj inkʼaʼ nakaawaj wechʼok rikʼinebʼ. Joʼkan ajwiʼ, maaʼani nawulak chiru naq ttzʼeqtaanaaq, qʼaxal wiʼ chik wi li naraj aʼan tenqʼank. Laachoxahil Yuwaʼ naxtaw ru chiʼus li nakaawekʼa ut naraj aatenqʼankil (Is. 41:13). Saʼ li tzolom aʼin tqatzʼil rix oobʼ li naʼlebʼ li tooxtenqʼa chi xqʼaxbʼal ru li naqekʼa ut re naq qʼaxal wiʼ chik tqayal xsahil li puktesink.

 KʼUL AAMETZʼEW RIKʼIN LI RAATIN LI YOS

3. Bʼar kixtaw laj Jeremías li metzʼew re puktesink?

³ Saʼ xnumikebʼ li chihabʼ, li esil li naxkʼe li Yos kixkawresi ebʼ laj kʼanjel chiru naq keʼxbʼaanu jun li kʼanjel li jwal chʼaʼaj. Qilaq li kixkʼul laj Jeremías. Naq li Jehobʼa kixtaqla chi puktesink, kixuwak ut kixye: «Toj saajin chi us ut inkʼaʼ ninnaw aatinak» (Jer. 1:6). Chanru kixqʼax li xxiw? Kixkʼul xmetzʼew rikʼin li raatin li Yos. Kixye: Li raatin kisutqʼiik joʼ «jun li xam lochlo saʼ linchʼool, li naxkʼat chaq xsaʼebʼ linbʼaqel» (Jer. 20:​8, 9). Chʼaʼaj puktesink saʼ li teep bʼarwiʼ wank chaq laj Jeremías, abʼan li esil li tixye kixkʼe li metzʼew li naʼajmank chiru re xbʼaanunkil li xkʼanjel.

4. Kʼaru rusilal naqataw naq naqayaabʼasi li Raatin li Yos ut naqanaʼlebʼa rix? (Colosenses 1:​9, 10).

⁴ Li Raatin li Yos nokooxkawresi joʼ aj paabʼanel. Naq kixtzʼiibʼa li esilhu rehebʼ laj Colosas, li apóstol Pablo kixye naq li tzʼaqal nawom t-ekʼasinq rehebʼ chi xkʼebʼal «xloqʼal li Jehobʼa» ut naq teʼkʼiiq «saʼ chixjunil li chaabʼil kʼanjel» (yaabʼasi Colosenses 1:​9, 10). Ut xkʼebʼal chi naweʼk li chaabʼil esil, aʼan jun chaabʼil kʼanjel. Joʼ naqil, xyaabʼasinkil li Raatin li Yos ut xnaʼlebʼankil rix naxkawresi li qapaabʼal chirix li Jehobʼa ut naqataw ru kʼaʼut wank xwankil xkʼebʼal chi naweʼk li esil chirix li Awabʼejilal.

5. Kʼaru tooxtenqʼa chi xtawbʼal rusilal li Santil Hu?

⁵ Re xtawbʼal rusilal li Raatin li Yos, inkʼaʼ tqayaabʼasi, tqatzol ut tqanaʼlebʼa rix saʼ junpaat. Jun eetalil, kʼaru taabʼaanu wi inkʼaʼ nakaataw ru junaq raqal re li Santil Hu? Us naq inkʼaʼ taakanabʼ chi joʼkan, sikʼ xyaalal li raqal aʼin saʼ li hu Índice de las publicaciones Watch Tower malaj Li hu li natenqʼank rehebʼ laj testiiw re li Jehobʼa. Wi nakaakʼe aahoonal re xtzolbʼal, qʼaxal taakʼojobʼ aachʼool chirix li Raatin li Yos (1 Tes. 5:21). Ut naq qʼaxal taakʼojobʼ aachʼool rikʼin li Santil Hu, qʼaxal twulaq chaawu xwotzbʼal li naʼlebʼ rikʼinebʼ li junchʼol.

KAWRESI AAWIBʼ CHIʼUS CHOʼQ RE LI PUKTESINK

6. Kʼaʼut tento tqakawresi qibʼ chiʼus choʼq re li puktesink?

⁶ Wi taakawresi aawibʼ chiʼus choʼq re li puktesink chʼolchʼo naq sa taawekʼa aawibʼ naq tat-aatinaq rikʼinebʼ li poyanam. Li Jesús kixkawresi ebʼ li xtzolom  naq toj maajiʼ kixtaqlahebʼ chi puktesink (Luc. 10:​1-11). Saʼ xkʼabʼaʼ naq xeʼxyuʼami li kixkʼut li Jesús chiruhebʼ, sa xeʼrekʼa ribʼ xbʼaan li xeʼxbʼaanu (Luc. 10:17).

7. Chanru tooruuq xkawresinkil qibʼ choʼq re li puktesink? (Chaawil li jalam u).

⁷ Chanru tooruuq xkawresinkil qibʼ choʼq re li puktesink? Qakʼoxlaq chanru tooruuq xyeebʼal li esil chirix li yaal rikʼin li aatin li kʼaynaqo roksinkil. Joʼkan ajwiʼ, rubʼelaj qakʼoxlaq wiibʼ oxibʼ li naʼlebʼ li nekeʼxye li poyanam saʼ li teep ut li tooruuq xyeebʼal saʼ li junjunq chi naʼlebʼ. Chi joʼkan, naq tooʼaatinaq rikʼinebʼ sa tqekʼa qibʼ, tooseʼeq ut tooʼaatinaq saʼ tuulanil.

8. Kʼaʼut ebʼ laj paabʼanel chanchanebʼ li pakʼbʼil sekʼ?

⁸ Li apóstol Pablo kiroksi jun li eetalil re xkʼutbʼesinkil bʼar wank li qakʼanjel saʼ li puktesink. Kixye: «Li Yos kixkʼe qe li nimla kʼanjel aʼin, usta laaʼo chanchano li pakʼbʼil sekʼ bʼarwiʼ naxokmank li qʼaxal loqʼ» (2 Cor. 4:7). Abʼan, kʼaru li nimla kʼanjel aʼin? Aʼan xpuktesinkil li chaabʼil esil chirix li Awabʼejilal, jun li kʼanjel li nakolok yuʼam (2 Cor. 4:1). Ut kʼaru ebʼ li pakʼbʼil sekʼ? Aʼanebʼ laj kʼanjel chiru li Yos li nekeʼxkʼam li chaabʼil esil. Saʼ xkutankil laj Pablo, ebʼ laj kʼayinel nekeʼxkʼam saʼ pakʼbʼil sekʼ ebʼ li kʼaʼaq re ru li jwal loqʼ joʼebʼ li tzekemq, li bʼiin malaj li tumin. Saʼ li qakutan, li Jehobʼa ajwiʼ kixkʼe choʼq qe jun li kʼanjel li qʼaxal loqʼ: li chaabʼil esil. Rikʼin li xtenqʼ wanq qametzʼew re xbʼaanunkil chiʼus li kʼanjel li kʼebʼil qe.

TZʼAAMA RE LI YOS NAQ INKʼAʼ TATXUWAQ

9. Chanru tooruuq xqʼaxbʼal xxuwankil ruhebʼ li winq ut naq inkʼaʼ tooʼeʼxtzʼeqtaana? (Chaawil li jalam u).

⁹ Wank sut nokooxuwak naq tooʼeʼxtzʼeqtaana malaj naqaxuwa ebʼ li winq. Chanru tooruuq xqʼaxbʼal aʼin? Qakʼoxlaq chirix li tij li xeʼxbʼaanu ebʼ li apóstol naq xeʼyeeheʼk re naq inkʼaʼ chik teʼpuktesinq. Inkʼaʼ xeʼxkanabʼ naq li xiw t-echaninq rehebʼ. Keʼxtzʼaama re li Jehobʼa naq teʼtenqʼaaq re naq junelik teʼaatinaq chirix li raatin «chi maakʼaʼebʼ xxiw». Ut aʼan kixsume li xtij saʼ junpaat (Hech. 4:​18, 29, 31). Naq yook qaxiw xbʼaan li winq, qatzʼaamaq ajwiʼ li xtenqʼ li Jehobʼa. Tzʼaama re naq tixkawresi laarahom chirixebʼ  li kristiʼaan re naq inkʼaʼ tatxuwaq chi xyeebʼal li chaabʼil esil.

10. Kʼaru li tenqʼ wank qe re naq tooruuq xbʼaanunkil li qakʼanjel joʼ aj testiiw re li Jehobʼa? (Isaías 43:​10-12).

¹⁰ Li Jehobʼa xooxxaqabʼ joʼ Xtestiiw (yaabʼasi Isaías 43:​10-12). Ut naxye naq tooxtenqʼa re naq inkʼaʼ tooxuwaq. Qatzʼilaq kaahibʼ li naʼlebʼ chirix chanru naxbʼaanu. Xbʼeen, li Jesús wank qikʼin naq naqapuktesi li chaabʼil esil (Mat. 28:​18-20). Xkabʼ, li Jehobʼa kixxaqabʼ ebʼ li ánjel re naq tooʼeʼxtenqʼa (Apoc. 14:6). Rox, li Jehobʼa naxkʼe qe li xsantil musiqʼej, aʼan nokooxtenqʼa chi xjultikankil li xqatzol (Juan 14:​25, 26). Ut xka, li Jehobʼa kixkʼe ebʼ li qahermaan re naq tooʼeʼrochbʼeeni. Rikʼin xtenqʼ li Jehobʼa ut ebʼ li qahermaan, wank li naʼajmank chiqu re naq us tooʼelq.

KʼE SAʼ AJL WIIBʼ OXIBʼ LI NAʼLEBʼ UT NAʼLEBʼAN CHIʼUS

11. Kʼaru tatruuq xbʼaanunkil re xkʼambʼal li esil re naabʼalebʼ chik li poyanam? (Chaawil li jalam u).

¹¹ Ma naxchʼina aachʼool naq moko wankebʼ ta li kristiʼaan saʼ rochoch? Wi joʼkan, kʼoxla: «Bʼar wankebʼ saʼ li hoonal aʼan?» (Hech. 16:13). Ma yookebʼ chi kʼanjelak malaj chi loqʼok? Joʼkan bʼiʼ, kʼaʼut inkʼaʼ naqakʼoxla puktesink saʼ li bʼe? Laj Joshua, jun li hermaan naxye: «Us ninʼelk naq ninpuktesi saʼebʼ li kʼayil, saʼebʼ li kʼayibʼaal ut bʼar nekeʼxaqli ebʼ li bʼelebʼaal chʼiichʼ». Rochbʼeen li xBridget, li rixaqil, nekeʼxtaw naabʼal li poyanam saʼebʼ li rochoch naq nekeʼrulaʼanihebʼ ewu ut domingo numeʼk waʼlebʼ (Efes. 5:​15, 16).

12. Chanru tooruuq xnawbʼal li nekeʼxpaabʼ ebʼ li poyanam ut li nawulak chiruhebʼ?

¹² Wi ebʼ li kristiʼaan inkʼaʼ nekeʼxkʼe xchʼool chi rabʼinkil li esil li naqakʼam, qatzʼilaq rix kʼaru nekeʼxpaabʼ ut kʼaru naxkʼe xkʼaʼuxebʼ. Naq nekeʼxtiqibʼ aatinak, laj Joshua ut li xBridget nekeʼroksi ebʼ li patzʼom li wank chiru ebʼ li tratado. Jun eetalil, naq nekeʼxyeechiʼi li tratado Kʼaru nakaakʼoxla chirix li Santil Hu?, nekeʼxye: «Wankebʼ li poyanam nekeʼxye naq li Santil Hu chalenaq rikʼin li Yos ut jalanebʼ nekeʼxye naq inkʼaʼ. Ut laaʼat, kʼaru nakaakʼoxla?». Naq nekeʼxbʼaanu  chi joʼkan, naabʼal sut nekeʼruuk aatinak rikʼinebʼ li poyanam.

13. Kʼaʼut naqaye naq us nokooʼelk saʼ li puktesink usta maaʼani kiʼabʼink qe? (Proverbios 27:11).

¹³ Usta ebʼ li poyanam inkʼaʼ tooʼeʼrabʼi naq nokoopuktesink, moko naraj ta xyeebʼal naq inkʼaʼ xooʼelk chiʼus. Kʼaʼut? Xbʼaan naq li wank xwankil aʼan xbʼaanunkil li naraj li Jehobʼa ut li Ralal: xkʼebʼal chi naweʼk li chaabʼil esil (Hech. 10:42). Joʼkan naq miʼok qakʼaʼuxl wi maaʼani kiʼabʼink qe malaj wi xeʼxtzʼeqtaana li esil. Sa tqekʼa qibʼ xbʼaan naq xqasahobʼresi xchʼool li qachoxahil Yuwaʼ (yaabʼasi Proverbios 27:11).

14. Chanru naqekʼa qibʼ naq jun laj puktesinel naxtaw junaq li naraj rabʼinkil li yaal ut kʼaʼut?

¹⁴ Nasahoʼk ajwiʼ qachʼool naq ebʼ li junchʼol chik aj puktesinel nekeʼxtaw junaq li naraj rabʼinkil li esil. Li hu Laj Kʼaakʼalehom kixjuntaqʼeeta li kʼanjel li naqabʼaanu rikʼin xsikʼbʼal junaq li chʼinaʼal li kisach. Naabʼalebʼ nekeʼokenk chi xsikʼbʼal ut nekeʼxsikʼ saʼ naabʼal ebʼ li teep. Naq natawmank li chʼinaʼal moko kaʼaj tawiʼ nasahoʼk xchʼool li natawok re, chixjunilebʼ nekeʼsahoʼk xchʼool. Joʼkan ajwiʼ, xsikʼbʼal li kristiʼaan joʼ xtzolom li Kriist, aʼan jun li kʼanjel li naqabʼaanu saʼ junajil. Chiqajunilo nokooʼokenk saʼ li kʼanjel aʼin ut nasahoʼk qachʼool naq li yook chi tzolok naʼok chi wulak saʼebʼ li chʼutam.

KʼE AACHʼOOL CHIRIX LI RAHOK

15. Kʼaru tooxtenqʼa re naq tkʼiiq li sahil chʼoolejil li naqekʼa? (Mateo 22:​37-39; chaawil li jalam u).

¹⁵ Wi naqakʼe qachʼool chirix li qarahom chiru li Jehobʼa ut li qas qiitzʼin, qʼaxal tkʼiiq li sahil chʼoolejil li naqekʼa saʼ li puktesink (yaabʼasi Mateo 22:​37-39). Kʼoxla li sahil chʼoolejil li narekʼa li Jehobʼa naq naril naq yooko chi puktesink ut li sahil chʼoolejil li nekeʼrekʼa li poyanam naq nekeʼok xtzolbʼal li Santil Hu. Ut misach saʼ aachʼool naq ebʼ li teʼxkʼulubʼa li yaal teʼkoleʼq (Juan 6:40; 1 Tim. 4:16).

16. Chanru tooruuq xyalbʼal xsahil li puktesink usta inkʼaʼ nokooʼelk saʼ ochoch? Ye junaq eetalil.

¹⁶ Ut wi inkʼaʼ nakatruuk chi elk saʼ laawochoch? Wi joʼkan, kʼe aachʼool chirix  li tatruuq xbʼaanunkil re xkʼutbʼesinkil laarahom chiru li Jehobʼa ut ebʼ li qas qiitzʼin. Chiru li COVID-19, laj Samuel ut li xDania inkʼaʼ nekeʼruuk chi elk saʼ li rochoch. Saʼ li hoonal aʼan li chʼaʼaj xnumsinkil, nekeʼpuktesink saʼ selular, nekeʼxtzʼiibʼa li esilhu ut nekeʼkʼehok tzolom saʼ Zoom. Joʼkan ajwiʼ, laj Samuel naxkʼe chi naweʼk li chaabʼil esil saʼ li naʼaj bʼarwiʼ nabʼaneʼk rikʼin li kanser. Aʼan naxye: «Ebʼ li chʼaʼajkilal tatxtawasi saʼ laajunxaqalil, saʼ laakʼaʼuxl ut saʼ laapaabʼal. Joʼkan naq naʼajmank li sahil chʼoolejil li naxkʼe kʼanjelak chiru li Jehobʼa». Naq xkʼulmank chixjunil aʼin, li xDania kitʼaneʼk ut kiwank chiru chʼaat chiru oxibʼ po. Moqon, tento kiroksi jun li kʼanjelobʼaal re naq truuq chi bʼeek chiru waqibʼ po. Aʼan naxye: «Xinbʼaanu chixjunil li ninruuk. Xinpuktesink rikʼin jun rehebʼ li naʼilok rehebʼ li yaj ut rikʼinebʼ li nekeʼchalk chi kʼayink. Xinruuk ajwiʼ aatinak rikʼin ruuchil li nekeʼkʼayink bʼan». Yaal naq laj Samuel ut li xDania xbʼaan li xwanjikebʼ moko naabʼal ta nekeʼruuk xbʼaanunkil, abʼan saʼ xkʼabʼaʼ naq nekeʼxbʼaanu chixjunil li nekeʼruuk sahebʼ saʼ xchʼool.

17. Joqʼe tkʼanjelaq ebʼ li naʼlebʼ li natawmank saʼ li tzolom aʼin?

¹⁷ Ebʼ li naʼlebʼ li natawmank saʼ li tzolom aʼin, jwal tkʼanjelaq wi naʼoksimank chixjunil. Li junjunq chi naʼlebʼ chanchan li naxkʼe xsahil jun li tzekemq. Naq najunajimank chixjunil, jwal sa naʼelk. Wi naqayuʼami chixjunil ebʼ li naʼlebʼ aʼin, tooruuq xtzʼeqtaanankil li naʼlebʼ li nachʼinank re qachʼool ut xyalbʼal xsahil li puktesink.