1, 2. a) Joqʼe qʼaxal naqajultika xkamik jun li qakomon malaj qamiiw? b) Kʼaru kixxaqabʼ li Jesús naq jun qʼoqyink chik ma nakamk?

 NAQ nakamk junaq li qakomon malaj qamiiw, usta ak xnumeʼk naabʼal chihabʼ, junelik naqajultika. Qʼaxal chik nakʼulmank aʼin naq naqajultika li xchihabʼil li xkamik.

² Rajlal chihabʼ, chi miyon ebʼ li poyanam saʼ chixjunil li Ruuchichʼochʼ naqachʼutubʼ qibʼ re xnimankil li xkamik li Jesukriist li qʼaxal raaro qabʼaan (1 Ped. 1:8). Naqabʼaanu re xjultikankil li kixqʼaxtesi li xyuʼam re qakolbʼal chiru li maak ut li kamk (Mat. 20:28). Li Jesús kiraj naq ebʼ li xtzolom teʼxjultika li xkamik. Naq jun qʼoqyink chik ma nakamk, kixbʼaanu jun li waʼak ut kixkʼe li chaqʼrabʼ aʼin: «Chebʼaanu aʼin re xnimankil injultikankil» (Luc. 22:19).

3. Kʼaru tqatzʼil rix saʼ li tzolom aʼin?

³ Saʼ xyanqebʼ li miyon chi poyanam li nekeʼwulak chi xnimankil li xkamik li Kriist, jun chʼina chʼuut ajwiʼ rehebʼ aʼin nekeʼroybʼeni xik saʼ choxa, abʼan li xkʼihalil nekeʼroybʼeni wank arin saʼ li Ruuchichʼochʼ. Saʼ li tzolom aʼin, tqil naabʼal li xyaalal kʼaʼut naq li wiibʼ chi chʼuut aʼin nekeʼraj rajlal chihabʼ xnimankil li xkamik li Jesús. Tqatzʼil ajwiʼ rix kʼaru rusilal naqataw naq nokoowulak. Qatikibʼaq xtzʼilbʼal rix kʼaʼut naq li yulbʼilebʼ ru nekeʼwulak saʼ li chʼutam aʼin.

4. Kʼaʼut naq nekeʼtzʼaqonk li yulbʼilebʼ ru chi xwaʼbʼal li kaxlanwa ut chi rukʼbʼal li bʼiin saʼ xnimankil li xkamik li Jesús?

⁴ Jun li xyaalal naq li yulbʼilebʼ ru nekeʼraj wulak rajlal chihabʼ chi xnimankil li xkamik li Jesús, aʼan re naq teʼtzʼaqonq chi xwaʼbʼal li kaxlanwa ut chi rukʼbʼal li bʼiin. Kʼaʼut naq nekeʼruuk xbʼaanunkil aʼin? Re xnawbʼal li xsumenkil, qajultikaq li kixbʼaanu li Jesús naq jun qʼoqyink aj chik kiwank arin saʼ Ruuchichʼochʼ. Naq ak kixnima li Paswa, kixxaqabʼ jun chik li waʼak li nawbʼil ru anaqwan joʼ xnimankil li xkamik li Jesús. Kixnumsi li kaxlanwa ut li bʼiin rehebʼ li 11 chi xʼapóstol ut kixye rehebʼ naq teʼxwaʼ ut teʼrukʼ. Kiʼaatinak chirix wiibʼ li sumwank: li akʼ sumwank ut li xsumwank li Xʼawabʼejilal li Yos (Luc. 22:19, 20, 28-30). b Ebʼ li sumwank aʼin, kixbʼaanu naq ebʼ li apóstol aʼin ut jun chʼina chʼuut chik aj paabʼanel teʼwanq joʼ awabʼej ut joʼ aj tij saʼ choxa (Apoc. 5:10; 14:1). Li yulbʼilebʼ ru li toj wankebʼ saʼ Ruuchichʼochʼ nekeʼtzʼaqonk saʼ li wiibʼ chi sumwank aʼin, joʼkan naq kaʼajwiʼ ebʼ aʼan nekeʼokenk chi xwaʼbʼal li kaxlanwa ut chi rukʼbʼal li bʼiin saʼ xnimankil li xkamik li Jesús.

5. Kʼaru nekeʼxnaw li yulbʼilebʼ ru chirix li roybʼenihomebʼ?

⁵ Jun chik li xyaalal naq li yulbʼilebʼ ru nekeʼwulak chi xnimankil li xkamik li Jesús, xbʼaan naq naxkʼe li hoonal chiruhebʼ re naq teʼxkʼoxla rix li roybʼenihomebʼ. Li Jehobʼa ak kixkʼe rehebʼ jun chaqʼal ru osobʼtesihom: teʼwanq xyuʼam saʼ choxa li inkʼaʼ nalajk naʼosoʼk ut maajunwa teʼkamq, teʼawabʼejinq rochbʼen li Jesús ut li junchʼol chik ebʼ li 144,000, ut li jwal loqʼ, aʼan naq teʼwanq chiru li Jehobʼa (1 Cor. 15:51-53; 1 Juan 3:2). Li yulbʼilebʼ ru nekeʼxnaw naq xeʼsikʼeʼk ru re naq teʼruuq xkʼulbʼal li osobʼtesihom aʼin. Abʼan re naq teʼxik saʼ choxa tento naq tiikaqebʼ xchʼool toj saʼ li xkamikebʼ (2 Tim. 4:7, 8). Kʼajoʼ nekeʼsahoʼk saʼ xchʼool naq nekeʼxkʼoxla rix li roybʼenihomebʼ (Tito 2:13). Ut, kʼaru naru tqaye chirixebʼ li jalan chik karneer? (Juan 10:16). Kʼaʼut nekeʼwulak chi xnimankil li xkamik li Jesús? Qilaq wiibʼ oxibʼ li xyaalal.

6. Kʼaʼut naq nekeʼwulak rajlal chihabʼ li junchʼol chik chi karneer xnimankil li xkamik li Jesús?

⁶ Jun chik li xyaalal naq li junchʼol chik chi karneer nekeʼwulak xnimankil li xkamik li Jesús, aʼan re ilok, maawaʼ re tzʼaqonk. Saʼ li chihabʼ 1938, aʼan li xbʼeen sut naq keʼyeheʼk re li teʼwanq xyuʼam arin saʼ li Ruuchichʼochʼ naq teʼwulaq saʼ li chʼutam aʼin. Li hu La Torre del Vigía re li po abril re li chihabʼ 1938 kixye naq «qʼaxal xkʼulubʼebʼ» naq ebʼ li junchʼol chik chi karneer «teʼwulaq saʼ li chʼutam aʼin ut teʼril li tbʼaanumanq». Ut kixye ajwiʼ: «Aʼan ajwiʼ li xhoonalil re li sahil chʼoolejil choʼq rehebʼ». Joʼ naq li bʼoqbʼilebʼ saʼ jun li sumlaak, sahebʼ saʼ xchʼool naq nekeʼril li nabʼaanumank, li junchʼol chik chi karneer sahebʼ ajwiʼ saʼ xchʼool naq nekeʼril naq nanimaak li xkamik li Jesús.

7. Kʼaʼut naq li junchʼol chik chi karneer nekeʼraj rabʼinkil li seeraqʼ chirix xnimankil li xkamik li Jesús?

⁷ Li junchʼol chik chi karneer nekeʼxkʼoxla ajwiʼ rix li roybʼenihomebʼ. Nekeʼraj rabʼinkil li seeraqʼ chirix xnimankil li xkamik li Jesús, xbʼaan naq naʼaatinak chirix li tixbʼaanu li Kriist ut ebʼ li 144,000 chirixebʼ li tiikebʼ xchʼool naq teʼawabʼejinq chiru jun  mil chihabʼ. Rubʼel xwankil li Jesukriist, joʼ Awabʼej, li teʼawabʼejinq rochbʼen teʼtenqʼanq re naq tchʼinaʼusoʼq li Ruuchichʼochʼ ut naq li teʼxpaabʼ li Yos tzʼaqalaq chik re ru li xyuʼamebʼ. Kʼajoʼ tana nekeʼsahoʼk saʼ xchʼool ebʼ li miyon chi poyanam li nekeʼwulak chi xnimankil li xkamik li Jesús naq nekeʼxkʼoxla rix naq ttzʼaqloq ru ebʼ li propesiiy joʼ li natawmank saʼ Isaías 35:5, 6; 65:21-23 ut Apocalipsis 21:3, 4. Naq nekeʼxkʼoxla rix naq teʼwanq rochbʼen li xkomonebʼ saʼ li akʼ ruuchichʼochʼ, nakawuuk li roybʼenihomebʼ ut maajunwa nekeʼxkʼoxla xkanabʼankil kʼanjelak chiru li Jehobʼa (Mat. 24:13; Gál. 6:9).

8. Kʼaru jun chik xyaalal naq li junchʼol chik chi karneer nekeʼwulak chi xnimankil li xkamik li Jesús?

⁸ Li junchʼol chik chi karneer nekeʼwulak ajwiʼ chi xnimankil li xkamik li Jesús xbʼaan naq nekeʼxra ut nekeʼraj xtenqʼankilebʼ li yulbʼilebʼ ru. Li Raatin li Yos kixye naq li yulbʼilebʼ ru ut li teʼwanq arin saʼ Ruuchichʼochʼ teʼwanq saʼ junajil. Qilaq wiibʼ oxibʼ li propesiiy li naxkʼutbʼesi aʼin.

9. Joʼ naxye li propesiiy re Zacarías 8:23, kʼaru nekeʼrekʼa li junchʼol chik chi karneer chirix li yulbʼilebʼ ru?

⁹ (Taayaabʼasi Zacarías 8:23). Rikʼin jun chʼinaʼusil eetalil, li propesiiy aʼin naxchʼolobʼ li nekeʼrekʼa li junchʼol chik chi karneer chirix li yulbʼilebʼ ru. Li aatin «aj Judá» ut «cherix» naʼaatinak chirix jun ajwiʼ li chʼuut: li yulbʼilebʼ ru li toj wankebʼ saʼ Ruuchichʼochʼ (Rom. 2:28, 29). Li «lajeebʼ chi winq li jalan jalanq raatinobʼaal ut xtenamitebʼ» aʼanebʼ li junchʼol chik chi karneer. Kaw nekeʼxchap li raqʼ li yulbʼilebʼ ru malaj inkʼaʼ nekeʼxtzʼeqtaanahebʼ ut saʼ junajil nekeʼxloqʼoni ru li Jehobʼa. Saʼ li qʼoqyink naq nanimaak xkamik li Jesús, li junchʼol chik chi karneer nekeʼxkʼutbʼesi naq wankebʼ saʼ junajil rikʼinebʼ li yulbʼilebʼ ru naq nekeʼrochbʼeni saʼ li hoonal aʼan.

10. Kʼaru ak kixbʼaanu li Jehobʼa re naq ttzʼaqloq ru li propesiiy re Ezequiel 37:15-19, 24, 25?

¹⁰ (Taayaabʼasi Ezequiel 37:15-19, 24, 25). Li Jehobʼa kixbʼaanu naq ttzʼaqloq ru li propesiiy aʼin, kixbʼaanu naq li yulbʼilebʼ ru ut li junchʼol chik chi karneer teʼkʼanjelaq tzʼaqal saʼ junajil. Li propesiiy naʼaatinak chirix wiibʼ li cheʼ. Li nekeʼroybʼeni xik saʼ choxa chanchanebʼ li xcheʼ «laj Judá» (li teep bʼarwiʼ nekeʼsikʼeʼk ru li awabʼej re Israel). Ut li nekeʼroybʼeni wanq arin saʼ Ruuchichʼochʼ chanchanebʼ li xcheʼ «laj Efraín». c Li Jehobʼa tixjunaji ru li wiibʼ chi chʼuut aʼin re naq «junajaq aj chik chi cheʼ». Aʼin naraj xyeebʼal naq teʼkʼanjelaq saʼ junajil naq li Jesukriist twanq joʼ Awabʼej. Rajlal chihabʼ li yulbʼilebʼ ru ut li junchʼol chik chi karneer nekeʼwulak chi xnimankil li xkamik li Jesús, moko joʼ wiibʼ ta chi chʼuut, xbʼaan naq li Santil Hu naxye naq «jun chʼuutaqebʼ aj chik naq teʼwanq, ut junaq ajwiʼ laj kʼaakʼalehom rehebʼ» (Juan 10:16).

11. Chanru nekeʼtenqʼaak li riitzʼin li Kriist xbʼaanebʼ li junchʼol chik chi «karneer» li naxye saʼ Mateo 25:31-36, 40?

¹¹ (Taayaabʼasi Mateo 25:31-36, 40). Ebʼ li «karneer» li naʼaatinak saʼ li jaljokil ru aatin aʼin, aʼan reetalil li tiikebʼ xchʼool li wankebʼ saʼ li rosoʼjik li kutan aʼin ut nekeʼroybʼeni wank arin saʼ li Ruuchichʼochʼ, malaj li junchʼol chik chi karneer. Inkʼaʼ nekeʼxkanabʼ xtenqʼankil li yulbʼilebʼ ru, li riitzʼin li Kriist, li toj wankebʼ saʼ Ruuchichʼochʼ re xbʼaanunkil jun li nimla kʼanjel: xkʼebʼal chi naweʼk li Raatin li Yos saʼ chixjunil li Ruuchichʼochʼ ut xtzolbʼalebʼ li kristiʼaan (Mat. 24:14; 28:19, 20).

12, 13. Kʼaru chik nekeʼxbʼaanu li junchʼol chik chi karneer re xtenqʼankilebʼ li riitzʼin li Kriist?

¹² Rajlal chihabʼ, naq toj maajiʼ nawulak xnimankil  li xkamik li Jesús, li junchʼol chik chi karneer nekeʼxkʼutbʼesi naq nekeʼxtenqʼa ebʼ li riitzʼin li Kriist. Chanru? Naq nekeʼxkʼe xchʼool chi tzʼaqonk saʼ li nimla kʼanjel li nabʼaanumank saʼ chixjunil li Ruuchichʼochʼ re xbʼoqbʼalebʼ li kristiʼaan re naq teʼwulaq chi xnimankil li xkamik li Jesús (chaawil li kaaxukuut « Ma yookat xkawubʼresinkil aawibʼ re xnimankil li xkamik li Jesús?»). Saʼ chixjunil li Ruuchichʼochʼ nekeʼxkawubʼresi ribʼ re xnimankil li xkamik li Jesús usta saʼebʼ li xchʼuut maakʼaʼ junaq li yulbʼil ru. Li junchʼol chik chi karneer, jwal sa saʼ xchʼoolebʼ naq nekeʼruuk chi xtenqʼankilebʼ li riitzʼin li Kriist. Chʼolchʼo chiruhebʼ naq li Jesús naxnaw naq chixjunil li nekeʼxbʼaanu chirixebʼ li yulbʼilebʼ ru, nekeʼxbʼaanu choʼq re li Jesús (Mat. 25:37-40).

¹³ Kʼaru xyaalal wank chiqu re naq chiqajunilo toowulaq chi xnimankil li xkamik li Jesús aʼ yal li qoybʼenihom?

14. Chanru xeʼxkʼutbʼesi li Jehobʼa ut li Jesús naq jwal nokooʼeʼxra?

¹⁴ Xbʼaan naq naqabʼanyoxi li xrahom li Jehobʼa ut li Jesús. Li Jehobʼa naxkʼutbʼesi naq nokooxra rikʼin naabʼal li naʼlebʼ. Abʼan li qʼaxal wank xwankil aʼan naq kixtaqla chaq li Ralal chi rahobʼtesiik ut chi kamk saʼ qakʼabʼaʼ (Juan 3:16). Li Jesús kixkʼutbʼesi ajwiʼ li xrahom naq kiraj xkʼebʼal li xyuʼam saʼ qakʼabʼaʼ (Juan 15:13). Yaal naq maajunwa tooruuq xtojbʼal chixjunil li keʼxbʼaanu xbʼaan naq nokooʼeʼxra, abʼan tooruuq xbʼanyoxinkil chiruhebʼ joʼ chanru naqabʼeresi li qayuʼam (Col. 3:15). Naq nokoowulak chi xnimankil li xkamik li Jesús, naqabʼanyoxi li xrahomebʼ ut naqakʼutbʼesi naq naqarahebʼ.

15. Kʼaʼut naq li yulbʼilebʼ ru ut li junchʼol chik chi karneer qʼaxal nekeʼxbʼanyoxi li xkamik li Jesús?

¹⁵ Xbʼaan naq qʼaxal naqabʼanyoxi li xkamik li Jesús (Mat. 20:28). Li yulbʼilebʼ ru nekeʼxbʼanyoxi naq li Jesús kixkʼe li xyuʼam saʼ xkʼabʼaʼebʼ xbʼaan naq aʼin naxbʼaanu naq wanq roybʼenihomebʼ. Saʼ xkʼabʼaʼ naq nekeʼxpaabʼ naq li Jesús kixkʼe li xyuʼam saʼ xkʼabʼaʼebʼ, li Jehobʼa naxye naq tiikebʼ xchʼool ut naxkʼulubʼa joʼ ralalebʼ (Rom. 5:1; 8:15-17, 23). Li junchʼol chik chi karneer nekeʼxbʼanyoxi naq li Jesús kixkʼe li xyuʼam saʼ xkʼabʼaʼebʼ xbʼaan naq nekeʼxpaabʼ naq kixhoy li xkikʼel saʼ xkʼabʼaʼebʼ joʼkan naq naru teʼxtaw li rusilal li Yos, teʼkʼanjelaq chiru ut teʼkoleʼq saʼ li nimla rahilal (Apoc. 7:13-15). Naq li wiibʼ chi chʼuut aʼin nekeʼwulak chi xnimankil li xkamik li Jesús rajlal chihabʼ, nekeʼxkʼutbʼesi naq nekeʼxbʼanyoxi li xkamik.

16. Bʼar wank jun chik li xyaalal naq nokoowulak chi xnimankil li xkamik li Jesús?

¹⁶ Xbʼaan naq naqaj abʼink chiru li Jesús. Maakʼaʼ naxye li qoybʼenihom, chiqajunilo naqapaabʼ li taql li kixkʼe li Jesús saʼ li qʼoqyink naq kixye: «Chebʼaanu aʼin re xnimankil injultikankil» (1 Cor. 11:23, 24).

17. Kʼaʼut naq jwal nokoonachʼok chixkʼatq li Jehobʼa naq nokoowulak chi xnimankil li xkamik li Jesús?

¹⁷ Xbʼaan naq jwal nokoonachʼok chixkʼatq li Jehobʼa (Sant. 4:8). Joʼ ak xqil, naq nokoowulak chi xnimankil li xkamik li Jesús, naxkʼe li qahoonal re xkʼoxlankil rix li qoybʼenihom li naxkʼe li Jehobʼa ut li xnimal xrahom li kixkʼutbʼesi chiqix (Jer. 29:11; 1 Juan 4:8-10). Chʼolchʼo chiqu li oybʼenihom aʼin ut naq li xrahom maajunwa naʼosoʼk. Naq naqakʼoxla rix aʼin, qʼaxal naqara li Jehobʼa ut qʼaxal wiʼ chik nokoonachʼok chixkʼatq (Rom. 8:38, 39).

18. Chanru nokooxtenqʼa xkʼoxlankil rix li kixbʼaanu li Jesús?

 ¹⁸ Xbʼaan naq nokoorekʼasi chi xkʼambʼal qe rikʼin li Jesús (1 Ped. 2:21). Naq toj maajiʼ nawulak li xkutankil re xnimankil li xkamik li Jesús, naqatzʼil rix li naxye li Santil Hu naq jun xamaan aj chik kiwank arin saʼ Ruuchichʼochʼ, li xkamik ut li xwaklijik wiʼ chik chi yoʼyo. Moqon, saʼ li qʼoqyink naq naqanima li xkamik li Jesús, li seeraqʼ naxjultika chiqu naq li Jesús nokooxra (Efes. 5:2; 1 Juan 3:16). Naq naqil chixjunil li kixbʼaanu li Jesús saʼ qakʼabʼaʼ ut nokoonaʼlebʼak chirix aʼin, nokoorekʼasi chi wank «joʼ naq kiwank li Jesus» (1 Juan 2:6).

19. Kʼaru tento tqabʼaanu re naq junelik toowanq saʼ li xrahom li Yos?

¹⁹ Xbʼaan naq nokooxtenqʼa re naq junelik toowanq saʼ li xrahom li Yos (Jud. 20, 21). Naq naqabʼaanu chixjunil li wank saʼ quqʼ re abʼink chiru, naqasantobʼresi li xkʼabʼaʼ ut naqasahobʼresi li xchʼool, nokoowank saʼ li xrahom (Prov. 27:11; Mat. 6:9; 1 Juan 5:3). Naq nokoowulak chi xnimankil li xkamik li Jesús, nokoorekʼasi chi xyeebʼal re li Jehobʼa rajlal kutan rikʼin li qabʼaanuhom: «Nawaj wank choʼq aawamiiw chi junelik!».

20. Kʼaru xyaalal wank chiqu re naq toowulaq chi xnimankil li xkamik li Jesús?

²⁰ Maakʼaʼ naxye ma tooxik saʼ choxa malaj toowanq arin saʼ li Ruuchichʼochʼ, wank naabʼal xyaalal chiqu re naq toowulaq chi xnimankil li xkamik li Jesús rajlal chihabʼ. Naq naqachʼutubʼ qibʼ, naqajultika li xkamik li Jesukriist, li qʼaxal naqara. Ut li qʼaxal wank xwankil, aʼan naq naqajultika li xnimal xrahom li Jehobʼa naq kixkʼe li xyuʼam li Ralal re qakolbʼal. Saʼ li chihabʼ aʼin, li xnimankil li xkamik li Jesús tbʼaanumanq saʼ li qʼoqyink viernes 15 re abril 2022. Naqara li Jehobʼa ut li Ralal. Joʼkan bʼiʼ, maakʼaʼ chik junaq naʼlebʼ li qʼaxal wank xwankil joʼ wank saʼ li chʼutam aʼin re xnimankil li xkamik li Jesús.