1, 2. a) Kʼaʼut naq inkʼaʼ nasach qachʼool rilbʼal naq naqakʼul ebʼ li chʼaʼajkilal? b) Chirix kʼaru tooʼaatinaq saʼ li tzolom aʼin?

 JOʼ AJ kʼanjel chiru li Jehobʼa, moko nasach ta qachʼool naq naqakʼul ebʼ li chʼaʼajkilal. Li Santil Hu naxye: «Tento tqanumsi naabʼal rahilal re naq tooruuq tooʼok saʼ li xnimajwal awabʼejihom li Yos» (Hech. 14:22). Naqanaw ajwiʼ naq wankebʼ li chʼaʼajkilal li inkʼaʼ tsachmanq ru anaqwan, kaʼajwiʼ bʼan naq wanqo rubʼel li Xʼawabʼejilal li Yos, bʼarwiʼ maakʼaʼaq chik kamk, «chi moko yaabʼak, chi moko japok e malaj rahilal» (Apoc. 21:4).

² Li Jehobʼa moko tixbʼaanu ta naq inkʼaʼ tqakʼul ebʼ li chʼaʼajkilal, abʼanan tooxtenqʼa chi xkuybʼal. Qilaq li kixye li apóstol Pablo rehebʼ li rechpaabʼanel li wankebʼ Roma. Naq kiʼaatinak chirix li chʼaʼajkilal li yook xnumsinkil aʼan ut ebʼ li rechpaabʼanel, kixtzʼiibʼa: «Chixjunil aʼin naqaqʼax ru chi chaabʼil saʼ xkʼabʼaʼ Li kirahok qe» (Rom. 8:35-37). Aʼin naraj xyeebʼal naq li Jehobʼa naru tixbʼaanu naq us tooʼelq usta yooqo xnumsinkil ebʼ li chʼaʼajkilal. Qilaq chanru kixtenqʼa laj José re naq us t-elq ut chanru nokooxtenqʼa anaqwan.

3. Chanru kijalaak li xyuʼam laj José chi junajwa?

³ Laj Jacob naxkʼutbʼesi naq qʼaxal naxra chaq laj José (Gén. 37:3, 4). Aʼin kixbʼaanu naq ebʼ li ras xikʼ teʼril. Ut, naq kixkʼe ribʼ chiruhebʼ keʼxkʼayi rehebʼ laj Madián. Ebʼ li winq aʼin keʼxkʼam laj José aran Egipto, li najt nakanaak.  Ut aran keʼxkʼayi wiʼ chik re laj Potifar, li najolomink saʼ xbʼeenebʼ laj kʼaakʼalenel re laj faraón. Li xyuʼam laj José kijalaak chi junajwa; kiwank choʼq jun alalbʼej li kʼajoʼ naraheʼk ut anaqwan wank chik joʼ jun moos aran Egipto (Gén. 39:1).

4. Kʼaru ebʼ li chʼaʼajkilal kixkʼul laj José li naru tqakʼul ajwiʼ laaʼo?

⁴ Li Santil Hu naxye: «Inkʼaʼ naqanaw joʼqʼe tqakʼul junaq chʼaʼajkilal» (Ecl. 9:11, 12). Wank sut naqakʼul li nekeʼxkʼul chixjunil li kristiʼaan (1 Cor. 10:13). Malaj tqanumsi li eetzʼuuk, li xikʼ ileʼk ut li rahobʼtesink saʼ xkʼabʼaʼ naq naqataqe li Jesús (2 Tim. 3:12). Maakʼaʼ naxye kʼaru tqakʼul, li Jehobʼa naru tixbʼaanu naq us tooʼelq. Qilaq chanru kixtenqʼa laj José.

5. Kʼaru kixkʼe reetal laj Potifar? (Génesis 39:2-6).

⁵ (Taayaabʼasi Génesis 39:2-6). Laj Potifar kixkʼe reetal naq laj José aʼan jun saaj li qʼaxal wank xnaʼlebʼ ut aj kʼanjel. Laj Potifar kixtaw ru kʼaʼut naq joʼkaʼan. Kixkʼe reetal naq «li Qaawaʼ wank rikʼin laj José ut natenqʼank re, re naq us taaʼelq rikʼin chixjunil li naxbʼaanu». b Moqon, laj Potifar kixkʼe joʼ aj tenqʼanel re ut kixkanabʼ saʼ ruqʼ chixjunil li wank saʼ li rochoch. Xbʼaan aʼin, naabʼal li osobʼtesihom kixkʼul laj Potifar.

6. Chanru narekʼa chaq ribʼ laj José?

⁶ Qakʼehaq qibʼ saʼ xnaʼaj laj José. Kʼaru li naxrahi chaq ru? Ma naq t-uxtaanaaq ru xbʼaan laj Potifar re naq tkʼeheʼq li xmaatan? Li kiraj aʼan naq t-isiiq aran ut taaxik wiʼ chik saʼ rochoch li xyuwaʼ. Usta chaabʼil chaq li xkʼanjel toj wank choʼq xmoos laj Potifar li naxloqʼoni ebʼ li pechʼbʼil yos. Li Jehobʼa moko kixbʼaanu ta naq laj Potifar tixkol laj José. Ut qʼaxal ra wiʼ chik tixkʼul.

7. Kʼaʼut naq li kixkʼul laj José qʼaxal kinumtaak wiʼ chik? (Génesis 39:14, 15).

⁷ Joʼ naxchʼolobʼ Génesis 39, li rixaqil laj Potifar xkoho xchʼool chirix laj José ut naabʼal sut kixqʼunbʼesi. Abʼan  maajunwa kixkʼulubʼa. Li ixq aʼin kʼajoʼ naq kijosqʼoʼk joʼkan naq kixqʼabʼa chi xmuxbʼal ru (taayaabʼasi Génesis 39:14, 15). Naq laj Potifar kixnaw aʼin, kixkʼe saʼ tzʼalam laj José, bʼarwiʼ kiwank chiru wiibʼ oxibʼ chihabʼ (Gén. 39:19, 20). Chanru li wanjik saʼ li tzʼalam? Li aatin li kiroksi laj José re tzʼalam naru najalmank joʼ «jul» malaj «kumbʼ». Aʼin naraj xyeebʼal naq qʼaxal qʼoqyink chaq xsaʼ ut naxkʼe rahil chʼoolej (Gén. 40:15). Joʼkan ajwiʼ, li Santil Hu naxye naq xeʼxbʼakʼ li roq chi kareen ut xeʼxbʼakʼ xkux (Sal. 105:17, 18). Kijalaak li xwanjik; kiwank chaq joʼ jun moos li kanabʼanbʼil chixjunil saʼ ruqʼ ut anaqwan wank chik joʼ jun preex.

8. Kʼaru chʼolchʼooq chiqu usta tnumtaaq li chʼaʼajkilal?

⁸ Ma ak xaanumsi junaq li chʼaʼajkilal li kinumtaak usta ak xattijok chirix? Aʼin naru nakʼulmank. Li Jehobʼa inkʼaʼ naxram naq tkʼulmanq li chʼaʼajkilal xbʼaan naq laj Tza najolomink re li ruuchichʼochʼ (1 Juan 5:19). Chʼolchʼo chiqu naq li Qayuwaʼ naxkʼe xchʼool chiqix ut naril li naqakʼul (Mat. 10:29-31; 1 Ped. 5:6, 7). Naxye qe: «Inkʼaʼ tatinkanabʼ chi moko ta tintzʼeq chirix inchʼool» (Heb. 13:5). Rikʼin xtenqʼ li Jehobʼa tooruuq xnumsinkil ebʼ li chʼaʼajkilal li chanchan inkʼaʼ tooruuq xkuybʼal. Aʼin tzʼaqal li kixkʼul laj José.

9. Kʼaru nakʼutbʼesink re naq li Jehobʼa wank chaq rikʼin laj José naq kiwank saʼ li tzʼalam? (Génesis 39:21-23).

⁹ (Taayaabʼasi Génesis 39:21-23). Li Jehobʼa kixbʼaanu naq us t-elq laj José usta ra li yook chaq xkʼulbʼal. Kʼaʼut? Xbʼaan naq laj kʼaakʼalenel preex kixkʼojobʼ xchʼool ut kiroxloqʼi laj José joʼ naq kiwank chaq rikʼin laj Potifar, moko kibʼayk ta xxaqabʼankil laj José re xjolominkilebʼ laj preex. Li Santil Hu naxye «li xbʼeenil aj kʼaakʼalenel tzʼalam tik inkʼaʼ nakʼoxlak chirix li kʼaru qʼaxtesinbʼil saʼ ruqʼ laj José». Saʼ xkʼabʼaʼ aʼin, laj José laatzʼ ru chi kʼanjelak. Peʼyaal naq sachbʼachʼoolej rilbʼal naq teʼxkʼe xchaabʼil kʼanjel li winq aʼin, li qʼabʼanbʼil chaq chi xmuxbʼal ru rixaqil laj Potifar? Jun ajwiʼ li xyaalal. Joʼ naxye Génesis 39:23 «li Qaawaʼ wank rikʼin ut natenqʼank re chi elk chi chaabʼil rikʼin chixjunil li nalajxbʼaanu».

10. Kʼaʼut naq kixkʼoxla laj José naq moko us ta yook chi elk?

¹⁰ Qakʼehaq wiʼ chik qibʼ saʼ xnaʼaj laj José. Qakʼoxlaq: Ma tixye naq us yook chi elk naq wank chaq saʼ tzʼalam saʼ xkʼabʼaʼ jun li tikʼtiʼ? kʼaru naraj chaq chi anchal xchʼool laj José?, ma re naq us t-ileʼq xbʼaan laj kʼaakʼalenel tzʼalam? Li kʼaru naraj chaq aʼan naq teʼrisi li maak li xeʼxkʼe saʼ xbʼeen ut teʼxkʼanabʼ chi xik. Joʼkan ajwiʼ, kixye re jun li preex li chi seebʼ t-elq naq t-aatinaq chirix rikʼin laj faraón re naq teʼrisi saʼ li tzʼalam (Gén. 40:14). Abʼan, saʼ xkʼabʼaʼ naq li winq kibʼayk chi aatinak rikʼin laj faraón, laj José kikanaak wiibʼ chihabʼ chik saʼ tzʼalam (Gén. 40:23; 41:1, 14). Saʼ xkʼabʼaʼ li xtenqʼ li Jehobʼa, laj José us yook chi elk. Kʼaʼut?

11. Kʼaru li maatan kikʼeheʼk re laj José xbʼaan li Jehobʼa, ut chanru kitenqʼank aʼin re naq ttzʼaqloq ru li rajom li Jehobʼa?

¹¹ Naq laj José wank chaq saʼ tzʼalam, li Jehobʼa kixbʼaanu naq li awabʼej re Egipto tmatkʼeq wiibʼ sut. Laj faraón  naraj xnawbʼal kʼaru naraj xyeebʼal li xmatkʼ. Naq kirabʼi resil naq laj José naru xchʼolobʼankil li matkʼ, kixtaqla xbʼoqbʼal. Rikʼin xtenqʼ li Jehobʼa, laj José kixchʼolobʼ li matkʼ aʼin ut joʼkan ajwiʼ kixye re chanru tnaʼlebʼaq. Aʼin kʼajoʼ naq kiwulak chiru laj faraón. Rilbʼal naq laj José natenqʼaak xbʼaan li Jehobʼa, joʼkan naq kixkʼe joʼ xbʼeen laj jolominel re chixjunil li tzekemq aran Egipto (Gén. 41:38, 41-44). Moqon, kikʼulmank li weʼej Egipto ut Canaán, bʼarwiʼ wankebʼ li xjunkabʼal laj José. Saʼ xkʼabʼaʼ li xkʼanjel laj José, kiruuk xkolbʼalebʼ li xjunkabʼal, li xeʼwank joʼ xxeʼtoonil li Mesiiy.

12. Kʼaru kixbʼaanu li Jehobʼa re naq us t-elq laj José?

¹² Qakʼoxlaq li kixkʼul laj José saʼ li xyuʼam. Ani kibʼaanunk re, re naq laj Potifar sa tril laj José, usta yal jun moos? Ani kibʼaanunk re, re naq li najolomink li tzʼalam tixxaqabʼ laj José re naq tixjolomihebʼ li preex? Ani kibʼaanunk re, re naq laj faraón kimatkʼek ut naq laj José truuq xyeebʼal re li xmatkʼ? Ani kibʼaanunk re, re naq laj faraón tixkʼe laj José chi xjolominkil li tzekemq aran Egipto? (Gén. 45:5). Relik chi yaal naq li Jehobʼa kixbʼaanu naq laj José us t-elq saʼ chixjunil. Usta, ebʼ li ras laj José keʼraj xkamsinkil, li Jehobʼa kixjal li chʼaʼajkilal re naq ttzʼaqloq ru li rajom.

13. Ma naʼokenk li Jehobʼa saʼ chixjunil li chʼaʼajkilal li naqakʼul?

¹³ Li kixkʼul laj José naxkʼut chiqu jun chaabʼil naʼlebʼ. Ma naʼokenk li Jehobʼa saʼ chixjunil li chʼaʼajkilal li naqakʼul? Ma naxbʼaanu li Jehobʼa naq tqakʼul junaq li rahilal re naq wank kʼaru us t-elq? Li Santil Hu inkʼaʼ naxkʼut aʼin (Ecl. 8:9; 9:11). Abʼan wank kʼaru chʼolchʼo chiqu: naq naqakʼul li chʼaʼajkilal li Jehobʼa naxnaw ut narabʼi naq naqapatzʼ li qatenqʼ re (Sal. 34:16; 55:23; Is. 59:1). Ut moko kaʼaj tawiʼ aʼin. Nokooxtenqʼa chi xnumsinkil ebʼ li chʼaʼajkilal rikʼin sahil chʼoolejil. Chanru naxbʼaanu?

14. Chanru nokooxtenqʼa li Jehobʼa naq naqakʼul li chʼaʼajkilal?

 ¹⁴ Li Jehobʼa naxkʼojobʼ ut naxwaklesi qachʼool saʼ li hoonal li qʼaxal naʼajmank chiqu (2 Cor. 1:3, 4). Aʼin kixkʼe reetal laj Eziz, jun li hermaan li wank Turkmenistán li kiwank wiibʼ chihabʼ saʼ tzʼalam saʼ xkʼabʼaʼ li xpaabʼal. Aʼan naxye: «Saʼ li eqʼla naq okebʼ re chi raqok aatin saʼ inbʼeen, jun li hermaan kixkʼut chiwu li naxye Isaías 30:15: “Wi texwanq saʼ xyaalal chi kʼojkʼooq leeraanm, teetaw xkawubʼ leechʼool”. Aʼin xinxtenqʼa re naq moko yooq ta inxiw ut tinkʼojobʼ linchʼool rikʼin li Jehobʼa. Xkʼoxlankil rix li raqal aʼin kixkʼe inmetzʼew naq wankin chaq saʼ tzʼalam». Ma nachalk saʼ qachʼool joqʼe li Jehobʼa kixwaklesi ut kixkʼojobʼ qachʼool naq naʼajmank chiqu?

15, 16. Kʼaru naqatzol rikʼin li kixkʼul li xTori?

¹⁵ Wank sut, inkʼaʼ naqakʼe reetal chanru li Jehobʼa nokooxtenqʼa re xqʼaxbʼal ru jun li rahilal toj reetal naq ak xooʼelk chikan chisaʼ. Aʼin kixkʼul li xTori jun li hermaan. Laj Mason, li xyum, kitawasiik 6 chihabʼ xbʼaan li kanser toj reetal naq kikamk. Li xTori kʼajoʼ naq kirahoʼk saʼ xchʼool. Naxye: «Ninye naq maajun li naʼbʼej tixye naq inkʼaʼ jwal ra aʼin». Ut naxye ajwiʼ: «Chʼolchʼo naq chixjunilebʼ li naʼbʼej yuwaʼbʼej teʼxye naq qʼaxal ra rilbʼal naq junaq li alal kʼajolbʼej naxkʼul li rahilal chiru naq aʼanebʼ teʼkʼuluq re».

¹⁶ Li xTori kixkʼoxla chanru kitenqʼaak xbʼaan li Jehobʼa usta jwal ra xkʼul. Naxye: «Naq ninkʼoxla chixjunil li xinnumsi, xwil chanru li Jehobʼa xinxtenqʼa  naq yaj linyum. Jultik we, naq jwal yaj laj Mason ut inkʼaʼ naru xkʼulbʼalebʼ li ulaʼ, ebʼ li hermaan nekeʼbʼihajik wiibʼ hoor re wulak saʼ li bʼanlebʼaal. Junelik wankebʼ aran chi qatenqʼankil. Joʼkan ajwiʼ xooʼeʼxtenqʼa rikʼin tumin. Naq toj yooko xnumsinkil li chʼaʼajkilal, maajunwa kipaltoʼk li kʼaru qe». Li Jehobʼa kixtenqʼa li xTori ut laj Mason re xnumsinkil li rahilal aʼin (chaawil li kaaxukuut « Li Jehobʼa kixkʼe qe li naʼajmank chiqu»).

17, 18. Kʼaru tooxtenqʼa rilbʼal ut xbʼanyoxinkil li xtenqʼ li Jehobʼa naq naqakʼul junaq li rahilal? (Salmo 40:6).

¹⁷ (Taayaabʼasi Salmo 40:6). Li nataqsink tzuul naraj wulak toj taqeʼq. Abʼan naq yook chi xik naxaqliik ut naril li xchʼinaʼusal li wank saʼ li xsutam. Joʼkan ajwiʼ, naru naqakʼoxla chanru li Jehobʼa nokooxtenqʼa naq yooqo xnumsinkil junaq li rahilal. Naq xraqeʼk li kutan, qakʼoxlaq: «Kʼaru xtenqʼ li Jehobʼa xinkʼul? Usta toj wank li rahilal, rajlal kutan qayalaq qaqʼe re rilbʼal jun li osobʼtesihom li naxkʼe qe li Jehobʼa».

¹⁸ Us xpatzʼbʼal re li Jehobʼa naq trisi li rahilal li yooko xkuybʼal (Filip. 4:6). Abʼan misach saʼ qachʼool li osobʼtesihom li naxkʼe qe anaqwan. Li Jehobʼa naxye qe naq tooxtenqʼa chi xkuybʼal li rahilal. Junelik tqabʼanyoxi re li Jehobʼa naq nokooxtenqʼa. Wi naqabʼaanu tqil naq li Jehobʼa yook qatenqʼankil chi xkuybʼal li rahilal, joʼ kixbʼaanu rikʼin laj José (Gén. 41:51, 52).