LI AATIN saʼ griego li najalmank joʼ «bʼelebʼaal chʼiichʼ» saʼ Li Santil Hu choʼq rehebʼ li Teʼwanq saʼ li Akʼ Ruuchichʼochʼ maare yook chi aatinak chirix jalan jalanq li bʼelebʼaal chʼiichʼ (Hech. 8:​28, 29, 38). Chanchan naq li bʼelebʼaal chʼiichʼ bʼarwiʼ yook chi bʼihajik li winq aj Etiopía moko aʼan ta jun li bʼelebʼaal chʼiichʼ li nekeʼroksi ebʼ laj puubʼ malaj li nekeʼroksi re aanilak, aʼan bʼan jun li nimla bʼelebʼaal chʼiichʼ. Qilaq wiibʼ oxibʼ li xyaalal kʼaʼut naqakʼoxla aʼin.

Li winq aj Etiopía aʼan jun li winq li nim xwankil ut najt kixbʼeni ribʼ. Aʼan «jun li winq aj Etiopía li nakʼanjelak chiru li awabʼej. Li winq aʼin wank chaq xwankil ut nakʼanjelak chiru li xCandace li awabʼej rehebʼ laj Etiopía ut xaqabʼanbʼil chi rilbʼal li xbʼihomal li xCandace» (Hech. 8:27). Saʼ li qʼehil aʼan, li tenamit Etiopía wank bʼarwiʼ wank anaqwan Sudán ut saʼ li teep li wank saʼ relebʼl iq bʼarwiʼ wank anaqwan Egipto. Chʼolchʼo tana naq li winq aj Etiopía kiroksi jalan jalanq li bʼelebʼaal chʼiichʼ re bʼihajik, tento kixkʼam naabʼal li kʼaʼaq re ru re li bʼihaaj aʼan. Saʼ xkutankilebʼ li apóstol naʼoksimank jalan jalanq li bʼelebʼaal chʼiichʼ re xkʼambʼalebʼ li kristiʼaan. Jun rehebʼ aʼan li carruaje li wank kaahibʼ xyantil ut tzʼaptzʼo ru. Jun li tasal hu re xtzolbʼal li Santil Hu naxye: «Saʼ li bʼelebʼaal chʼiichʼ aʼin naru xkʼambʼal naabʼal li kʼaʼaq re ru, sa bʼihajik chisaʼ ut maare tatruuq bʼihajik chi najt» (Acts—An Exegetical Commentary).

Li winq aj Etiopía yook xyaabʼasinkil jun li hu naq laj Felipe kijilok chixkʼatq. Li Santil Hu naxye naq «Laj Felipe yook chi aanilak chixkʼatq li bʼelebʼaal chʼiichʼ ut kirabʼi naq li winq aʼin yook xyaabʼasinkil saʼ kawil kuxej li xhu laj Isaías» (Hech. 8:30). Ebʼ li bʼelebʼaal chʼiichʼ bʼarwiʼ nekeʼxkʼam li kristiʼaan moko yiibʼanbʼilebʼ ta re naq teʼbʼihajiq saʼ junpaat ebʼ aʼin nekeʼxik timil. Aʼin kixbʼaanu naq li winq aj Etiopía truuq xyaabʼankil li hu ut naq laj Felipe t-aanilaq re xtawbʼal.

Li winq aj Etiopía «kixtzʼaama re laj Felipe naq ttaqeʼq ut tchunlaaq chixkʼatq» (Hech. 8:31). Saʼ jun li bʼelebʼaal chʼiichʼ re aanilak ebʼ li nekeʼbʼeresink re nekeʼxik chi xaqxo. Abʼanan, saʼebʼ li bʼelebʼaal chʼiichʼ bʼarwiʼ nekeʼxkʼam ebʼ li kristiʼaan wank tzʼaqal li naʼajej re naq txik chi chunchu li winq aj Etiopía ut re naq truuq chi chunlaak laj Felipe.

Saʼ xkʼabʼaʼ li naxye li tasal waqxaqibʼ re li hu Hechos ut ebʼ li naʼlebʼ li xtzʼilmank rix inkʼaʼ chik naqakʼe saʼebʼ li qatasal hu li winq aj Etiopía saʼ jun li bʼelebʼaal chʼiichʼ re laj puubʼ malaj re aanilak naqakʼe bʼan saʼ jun li nimla bʼelebʼaal chʼiichʼ.