LI XCHAQʼRABʼ laj Moisés naxye naq li Jehobʼa naxkʼulubʼa ebʼ li kʼookʼobʼ ut li mukuy choʼq mayej. Naq li chaqʼrabʼ naʼaatinak chirixebʼ li mayej aʼin, naʼaatinak chirixebʼ li wiibʼ chi kokʼ xul aʼin. Wi ebʼ laj Israel inkʼaʼ nekeʼxtaw li kʼookʼobʼ, naru nekeʼxyeechiʼi li mukuy (Lev. 1:14; 12:8; 14:30). Us chaq aʼin xbʼaan naq moko junelik ta natawmank ebʼ li kʼookʼobʼ. Qilaq li xyaalal.

Ebʼ li kʼookʼobʼ nekeʼxik saʼ jalan jalanq li tenamit ut nekeʼwank saʼ li tenamit Israel chiruhebʼ li po bʼarwiʼ yook li saqʼehil. Saʼ li po octubre, ebʼ li kokʼ xul aʼin nekeʼxik bʼarwiʼ naʼok li iqʼ saʼebʼ li tenamit bʼarwiʼ yook li saqʼehil ut nekeʼkʼaj naq maakʼaʼ chik li ke (Cant. 2:11, 12; Jer. 8:7). Joʼkan naq, saʼ li habʼalqʼe nachʼaʼajkoʼk chiruhebʼ laj Israel xtawbʼal ebʼ li kʼookʼobʼ choʼq re li mayej.

Aʼut ebʼ li mukuy maabʼar nekeʼxik, joʼkan naq natawmank chiru chixjunil li chihabʼ aran Israel. Nekeʼwank ajwiʼ saʼebʼ li ochoch (juntaqʼeeta rikʼin Juan 2:14, 16). Jun li tasal hu naxye naq saʼ chixjunil li kʼalebʼaal ut tenamit re li naʼajej aʼan, «ebʼ li kristiʼaan nekeʼkʼiresink mukuy. Saʼ chixjunil li ochoch wank xnaʼajebʼ li xul aʼin chiru li tzʼak bʼarwiʼ nekeʼruuk chi wank» (juntaqʼeeta rikʼin Isaías 60:8).

Kʼaru naxkʼut chiqu aʼin chirix li Jehobʼa? Naq aʼan jun li Yos li narahok ut natawok u xbʼaan naq naxkʼulubʼa naq ebʼ laj Israel teʼxyeechiʼi li kokʼ xul li nekeʼruuk xtawbʼal chiru chixjunil li chihabʼ.