NAʼLEBʼ RE TZOLOK 23
BʼICH 28 Chanru toowanq choʼq ramiiw li Jehobʼa
Li Jehobʼa naraj naq toowanq joʼ rulaʼ
«Saʼ xyanqebʼ taawanq linmuhebʼaal; laaʼinaq li xYosebʼ» (EZEQ. 37:27).
RUʼUJIL LI TZOLOM
Li tzolom aʼin tooxtenqʼa chi roxloqʼinkil wank joʼ rulaʼ li Jehobʼa ut chi xtawbʼal ru chanru nokooril saʼ li xmuhebʼaal.
1, 2. Kʼaru li maatan naxyeechiʼi qe li Jehobʼa?
WI TEʼXPATZʼ raj aawe ani li Jehobʼa choʼq aawe, maare taaye: «Li Jehobʼa aʼan li wamiiw, Linyuwaʼ ut Linyos». Malaj taawoksi jalan chik ebʼ li aatin. Abʼan, ma taaye raj naq li Jehobʼa aʼan laj kʼulul ulaʼ? Kʼaru naraj xyeebʼal li aatin kʼulul ulaʼ? Aʼan li kristiʼaan li naxbʼoq junaq re naq twulaq saʼ rochoch ut li kristiʼaan aʼin nawank joʼ rulaʼ.
2 Li awabʼej David kixjuntaqʼeeta li ramiiwil li wank li Jehobʼa ut ebʼ laj kʼanjel chiru rikʼin chanru naxkʼam ribʼ junaq laj kʼulul ulaʼ ut ebʼ li rulaʼ. Joʼkan naq kixpatzʼ: «At Qaawaʼ, ani truuq taahilanq saʼ laamuhebʼaal? Ani taawanq saʼ laaloqʼlaj tzuul?» (Sal. 15:1). Ebʼ li aatin aʼin naxjultika chiqu naq naru naq toowanq joʼ rulaʼ li Jehobʼa, naraj xyeebʼal wank joʼ ramiiw. Kʼajoʼ xchʼinaʼusal aʼin!
LI JEHOBʼA NOKOOXBʼOQ SAʼ LI XMUHEBʼAAL
3. Ani li xbʼeen rulaʼ li Jehobʼa ut chanru nekeʼrekʼa ribʼ chiribʼilebʼ ribʼ?
3 Chiru naabʼal chihabʼ li Jehobʼa kiwank xjunes, li Jesús kiwank joʼ li xbʼeen rulaʼ. Kʼajoʼ kisahoʼk saʼ xchʼool li Jehobʼa wank joʼ laj kʼulul ulaʼ! Li Santil Hu naxchʼolobʼ naq li jwal naxkʼe xsahil xchʼool li Jehobʼa aʼan li Ralal ut naq li Jesús jwal sa xchʼool wank joʼ li xbʼeen rulaʼ (Prov. 8:30, TNM).
4. Anihebʼ kixbʼoq li Jehobʼa saʼ li xmuhebʼaal?
4 Moqon chik, li Jehobʼa kixyobʼtesi ebʼ li ánjel ut kixbʼoqebʼ re naq teʼwanq saʼ li xmuhebʼaal. Li Santil Hu naxye naq aʼanebʼ ralal li Yos ut sahebʼ saʼ xchʼool wank rikʼin li Jehobʼa (Job 38:7; Dan. 7:10). Chiru naabʼal chihabʼ kaʼajwiʼ li wankebʼ saʼ choxa, xeʼruuk wank joʼ ramiiw li Jehobʼa. Moqon naq kixyobʼtesi ebʼ li qas qiitzʼin, kixboʼq wiibʼ oxibʼ rehebʼ re naq teʼoq saʼ li xmuhebʼaal. Saʼ xyanq li xeʼxkʼul li maatan aʼin, kiwank laj Enoc, laj Noé, laj Abrahán ut laj Job. Li Santil Hu naxye naq xeʼwank joʼ ramiiw li Jehobʼa xbʼaan naq xeʼwank «saʼ sumʼaatin rikʼin li Yos» (Gén. 5:24; 6:9; Job 29:4; Is. 41:8).
5. Kʼaru naxkʼut chiqu li propesiiy re Ezequiel 37:26, 27?
5 Chiru naabʼal chihabʼ li Jehobʼa kixbʼoq ebʼ li ramiiw re naq teʼwanq joʼ rulaʼ. Qilaq li propesiiy re Ezequiel 37:26, 27 (yaabʼasi). Li propesiiy aʼin naxkʼut chiqu naq li Jehobʼa naraj naq ebʼ laj kʼanjel chiru teʼwanq saʼ amiiwil rikʼin ut kixyeechiʼi rehebʼ naq tixbʼaanu «jun li sumwank rikʼinebʼ». Aʼin ttzʼaqloq ru naq ebʼ li yulbʼilebʼ ru ut li teʼwanq saʼ Ruuchichʼochʼ teʼwanq saʼ junajil saʼ li xmuhebʼaal li Yos (Juan 10:16). Li propesiiy aʼin yook chi tzʼaqlok ru saʼ li qakutan.
LI JEHOBʼA NOKOORIL Aʼ YAAL BʼAR WANKO
6. Joqʼe nokooʼok saʼ li xmuhebʼaal li Jehobʼa ut bʼar natawmank li muhebʼaal aʼin?
6 Saʼ najter qʼe kutan, ebʼ li muhebʼaal li yiibʼanbʼil rikʼin tʼikr aʼan jun li naʼaj bʼarwiʼ ebʼ li poyanam nekeʼruuk hilank ut xkolbʼal ribʼebʼ. Chʼolchʼo chiruhebʼ naq wi teʼwulaq joʼ ulaʼ saʼ jun li muhebʼaal teʼkʼutbʼesiiq li ochochnal chiruhebʼ. Joʼkan naq, nokooʼok saʼ li xmuhebʼaal li Jehobʼa naq naqaqʼaxtesi li qayuʼam chiru (Sal. 61:5). Aran naqataw li naʼlebʼ li naxkawresi li qapaabʼal ut nokoowank rikʼinebʼ li ramiiw li Jehobʼa. Abʼan li muhebʼaal bʼarwiʼ li Jehobʼa nokooxbʼoq moko wank ta saʼ jun ajwiʼ li naʼaj, ebʼ li qas qiitzʼin re chixjunilebʼ li tenamit naru nekeʼwank joʼ rulaʼ. Wi nokookʼanjelak chiru li Jehobʼa nokooruuk wank joʼ rulaʼ saʼ li xmuhebʼaal, aʼ yaal bʼar wanko (Apoc. 21:3).
7. Kʼaʼut tooruuq xyeebʼal naq ebʼ laj kʼanjel chiru li Jehobʼa li tiikebʼ xchʼool li akʼ xeʼkamk toj wankebʼ joʼ rulaʼ li Jehobʼa? (Chaawil li jalam u).
7 Ut kʼaru naru naqaye chirixebʼ laj kʼanjel chiru li Jehobʼa li tiikebʼ xchʼool li ak xeʼkamk? Ma toj wankebʼ joʼ rulaʼ li Jehobʼa? Joʼkan. Kʼaʼut naqaye aʼin? Xbʼaan naq li Santil Hu naxye naq li Jehobʼa toj naxjultikahebʼ. Li Jesús kixye: «Chirix li xwaklijik chi yoʼyo ebʼ li kamenaq, laj Moisés kixchʼolobʼ ajwiʼ aʼin naq li Yos kiraatina saʼ li cheʼ li kachʼin xteram. Aran laj Moisés kixye naq li Jehobʼa aʼan “li Xyos laj Abrahán, li Xyos laj Isaac ut li Xyos laj Jacob”. Aʼan maawaʼ Xyosebʼ li kamenaq, Xyos bʼan li yoʼyokebʼ. Xbʼaan naq choʼq re yoʼyokebʼ chixjunilebʼ» (Luc. 20:37, 38).
Tooruuq xyeebʼal naq ebʼ laj kʼanjel chiru li Jehobʼa li ak xeʼkamk toj wankebʼ saʼ li xmuhebʼaal. (Chaawil li raqal 7).
LI RUSILAL UT LI AAJEL RU XBʼAANUNKIL RE WANK JOʼ RULAʼ LI JEHOBʼA
8. Kʼaru rusilal naqataw wank saʼ li xmuhebʼaal li Jehobʼa?
8 Joʼ jun li muhebʼaal nakʼanjelak re hilank ut re xkolbʼal qibʼ, li xmuhebʼaal li Jehobʼa naxkʼe qoybʼenihom ut nokooxkol chiru li truuq xkʼebʼal saʼ chʼaʼajkilal li qapaabʼal. Naq nachʼ wanko chixkʼatq li Jehobʼa, laj Tza inkʼaʼ naru xbʼaanunkil qe junaq li maaʼusilal li twanq chi junelik (Sal. 31:24; 1 Juan 3:8). Saʼ li akʼ ruuchichʼochʼ, li Jehobʼa junelik tixkol ebʼ li ramiiw chiru li naʼlebʼ li tixkʼe saʼ chʼaʼajkilal li xpaabʼal ut tixkolebʼ ajwiʼ chiru li kamk (Apoc. 21:4).
9. Kʼaru tento teʼxbʼaanu ebʼ li rulaʼ li Jehobʼa?
9 Jun loqʼlaj maatan wank joʼ rulaʼ li Jehobʼa saʼ li xmuhebʼaal. Naru naq toowanq saʼ amiiwil rikʼin junqʼe junqʼe kutan. Abʼan, kʼaru tento tqabʼaanu re naq inkʼaʼ tqakanabʼ wank joʼ rulaʼ? Jun eetalil, maare tixye qe naq tqisi li qaxaabʼ xbʼaan naq tzʼaj ru ut inkʼaʼ toojosqʼoʼq chi xbʼaanunkil aʼin. Joʼkan ajwiʼ, joʼ rulaʼ li Jehobʼa naqaj xnawbʼal kʼaru naraj naq tqabʼaanu re wank saʼ li xmuhebʼaal. Saʼ xkʼabʼaʼ naq jwal naqara li Jehobʼa naqakʼe qachʼool chi xbʼaanunkil chixjunil li nawulak chiru (Col. 1:10). Yaal naq li Jehobʼa aʼan li qamiiw, abʼan aʼan ajwiʼ li Qayos ut li Qayuwaʼ ut xkʼulubʼ naq tqoxloqʼi (Sal. 25:14). Joʼkan naq, us raj naq maajunwa tsachq saʼ qachʼool aʼin. Xxuwankil ru li Jehobʼa tooxtenqʼa re naq inkʼaʼ tqabʼaanu junaq li naʼlebʼ li tixchʼina xchʼool ut junelik tqabʼaanu li nawulak chiru (Miq. 6:8).
JUNTAQʼEET KIRIL CHIXJUNILEBʼ SAʼ LI CHAQICHʼOCHʼ
10, 11. Kʼaru eetalil nokooxtenqʼa chi rilbʼal naq li Jehobʼa juntaqʼeet naril chixjunilebʼ laj kʼanjel chiru?
10 Li Jehobʼa juntaqʼeet naril chixjunilebʼ li rulaʼ (Rom. 2:11). Jun eetalil, qilaq chanru li Jehobʼa kirilebʼ laj Israel naq xeʼwank saʼ li chaqichʼochʼ aran Sinaí.
11 Moqon naq li Jehobʼa kirisi li xtenamit joʼ moos aran Egipto, kixxaqabʼ ebʼ laj tij re naq teʼkʼanjelaq saʼ li loqʼlaj naʼajej ut kixye rehebʼ laj Leví naq tento teʼxbʼaanu wiibʼ oxibʼ li kʼanjel aran. Ma kolbʼilebʼ chiʼus li nekeʼkʼanjelak saʼ li loqʼlaj naʼajej malaj li nachʼ wankebʼ aran? Inkʼaʼ, li Jehobʼa juntaqʼeet naril chixjunilebʼ.
12. Chanru kixkʼutbʼesi li Jehobʼa naq juntaqʼeet narilebʼ laj Israel saʼ li chaqichʼochʼ? (Éxodo 40:38; chaawil ebʼ li jalam u).
12 Naq wankebʼ saʼ li chaqichʼochʼ, chixjunilebʼ xeʼruuk wank joʼ ramiiw li Jehobʼa maakʼaʼ naxye li kʼanjel li tenebʼanbʼil saʼ xbʼeenebʼ malaj wi nachʼ wankebʼ bʼarwiʼ wank li loqʼlaj naʼajej. Li Jehobʼa kixbʼaanu naq chixjunil li tenamit truuq rilbʼal li choql ut li xaml li wank bʼarwiʼ nawank li loqʼlaj naʼajej (yaabʼasi Éxodo 40:38). Joʼkan naq, naq nekeʼril naq li choql naxjal xnaʼaj ut naxik saʼ jalan chik naʼajej, chixjunilebʼ laj Israel nekeʼxnaw naq tento teʼxxok ebʼ li kʼaʼaq re ru ut naq teʼxik (Núm. 9:15-23). Joʼkan ajwiʼ, naq nekeʼrabʼi xyaabʼ li wiibʼ chi trompeet re plaat, chixjunilebʼ nekeʼxnaw naq tento teʼxik (Núm. 10:2). Naqil chiʼus naq li Jehobʼa moko naxkʼoxla ta naq li nachʼ wankebʼ chiru li loqʼlaj naʼajej aʼanebʼ li tzʼaqal ramiiw. Chixjunilebʼ bʼan xeʼwank joʼ rulaʼ li Jehobʼa ut xeʼxtaw rusilal naq aʼan nabʼeresink rehebʼ ut naxkolebʼ. Aʼan ajwiʼ nakʼulmank saʼ li qakutan. Maakʼaʼ naxye bʼar wanko, chiqajunilo nokooruuk rilbʼal li xrahom li Jehobʼa ut chanru nokooxkol.
Li Jehobʼa kixkʼutbʼesi naq inkʼaʼ nasikʼok u naq kixkʼe li loqʼlaj naʼajej saʼ xyi li tenamit. (Chaawil li raqal 12).
LI JEHOBʼA MOKO NASIKʼOK TA U SAʼ LI QAKUTAN
13. Chan chik ru naxkʼutbʼesi li Jehobʼa naq inkʼaʼ nasikʼok u saʼ li qakutan?
13 Wiibʼ oxibʼ laj kʼanjel chiru li Jehobʼa, nachʼ wankebʼ bʼarwiʼ wank jun rehebʼ li qamolam ut junchʼol chik nekeʼkʼanjelak aran. Joʼkan naq nekeʼruuk chi tzʼaqonk saʼ jalan jalanq li kʼanjel li nabʼaanumank aran ut kʼanjelak rikʼinebʼ li hermaan li nekeʼbʼeresink re li kʼanjel. Wankebʼ ajwiʼ li nekeʼkʼanjelak joʼ li cheekel winq li naʼulaʼanink chʼuut malaj li nekeʼroksi chixjunil li xhoonal re kʼanjelak chiru li Yos. Abʼan, moko chixjunilebʼ ta laj kʼanjel chiru li Jehobʼa nekeʼruuk xbʼaanunkil aʼin. Wi aʼan li nakaakʼul chʼolchʼooq chaawu naq li Jehobʼa nakatxra, nakatxkʼul joʼ rulaʼ ut naxkʼe xchʼool chaawix (1 Ped. 5:7). Li Jehobʼa naxkʼe re chixjunilebʼ laj kʼanjel chiru li naʼlebʼ li naxkawresi li xpaabʼalebʼ, naxbʼeresihebʼ ut naxkolebʼ.
14. Kʼaru chik naxbʼaanu li Jehobʼa re xkʼutbʼesinkil naq inkʼaʼ nasikʼok u?
14 Li Jehobʼa naxkʼutbʼesi ajwiʼ naq inkʼaʼ nasikʼok u xbʼaan naq naxkʼe xchʼool re naq chixjunilebʼ li kristiʼaan teʼruuq rilbʼal li naxye li Santil Hu. Li Raatin li Yos kitzʼiibʼamank saʼ hebreo, arameo ut griego. Abʼan, aʼin moko naraj ta xyeebʼal naq ebʼ li qas qiitzʼin li nekeʼxtaw ru ebʼ li aatinobʼaal aʼin jwal nachʼ wankebʼ chixkʼatq li Yos (Mat. 11:25).
15. Kʼe jun chik eetalil bʼarwiʼ li Jehobʼa naxkʼutbʼesi naq inkʼaʼ nasikʼok u (chaawil ebʼ li jalam u).
15 Moko naqataw ta li rusilal li Jehobʼa saʼ xkʼabʼaʼ li qatzolbʼal malaj saʼ xkʼabʼaʼ naq naqataw ru ebʼ li aatinobʼaal li kiʼoksimank re xtzʼiibʼankil li Santil Hu. Li Jehobʼa moko naxkʼe ta li xchoxahil naʼlebʼ kaʼajwiʼ rehebʼ li kristiʼaan li wankebʼ xtzolbʼal, naxkʼe bʼan re chixjunilebʼ. Li Santil Hu natawmank saʼ naabʼal li aatinobʼaal, joʼkan naq chixjunilebʼ li kristiʼaan, aʼ yaal bʼar wankebʼ, naru nekeʼxtzol xnaʼlebʼ chisaʼ ut wank joʼ ramiiw li Yos (2 Tim. 3:16, 17).
Li Santil Hu natawmank saʼ naabʼal li aatinobʼaal, aʼin naxkʼutbʼesi naq li Jehobʼa inkʼaʼ nasikʼok u. (Chaawil li raqal 15).
MIQAKANABʼ WANK JOʼ RULAʼ LI JEHOBʼA
16. Anihebʼ naxkʼul li Jehobʼa saʼ li xmuhebʼaal? (Hechos 10:34, 35).
16 Jun loqʼlaj maatan wank saʼ li xmuhebʼaal li Jehobʼa. Maaʼani chik naxkʼutbʼesi li chaabʼilal, li rahok ut li ochochnal joʼ naxbʼaanu li Jehobʼa. Aʼan inkʼaʼ nasikʼok u ut naxkʼul chixjunilebʼ li kristiʼaan joʼ rulaʼ, maakʼaʼ naxye li xwanjik, li xtenamit, li xtzolbʼal malaj li xchihabʼ. Kaʼajwiʼ naxpatzʼ rehebʼ li rulaʼ naq teʼabʼinq chiru (yaabʼasi Hechos 10:34, 35).
17. Kʼaru tqil saʼ li jun chik tzolom?
17 Saʼ Salmo 15:1, laj David kixbʼaanu li patzʼom aʼin: «At Qaawaʼ, ani truuq taahilanq saʼ laamuhebʼaal? Ani taawanq saʼ laaloqʼlaj tzuul?». Moqon chik, rikʼin xtenqʼ li Jehobʼa kixsume ebʼ li patzʼom aʼin. Saʼ li jun chik tzolom tqatzʼil rix kʼaru chik tento tqabʼaanu re naq inkʼaʼ tqakanabʼ wank joʼ rulaʼ li Jehobʼa.
BʼICH 32 Kʼe aawibʼ chixkʼatq li Jehobʼa!