NAʼLEBʼ RE LI SANTIL HU LI CHʼOLOBʼANBʼIL
«Li paabʼal moko re ta chixjunilebʼ»
Re xsahobʼresinkil xchʼool li Jehobʼa aajel ru naq wanq qapaabʼal. Abʼan li Santil Hu naxye naq «li paabʼal moko re ta chixjunilebʼ» (2 Tes. 3:2). Naq li apóstol Pablo kixtzʼiibʼa ebʼ li aatin aʼin, yook chi aatinak chirixebʼ li winq maaʼusebʼ xnaʼlebʼ li xeʼraj xkamsinkil. Abʼanan li kixye chirix li paabʼal naru nayeemank re jalanebʼ chik. Jun eetalil, wankebʼ li kristiʼaan li moko nekeʼraj ta xpaabʼankil naq li Yos kiyobʼtesink re chixjunil (Rom. 1:20). Jalanebʼ chik nekeʼxpaabʼ li Yos abʼan xpaabʼankil aʼin moko tzʼaqal ta re xsahobʼresinkil xchʼool li Yos.
Re naq tsahoʼq xchʼool li Yos qikʼin tento naq tqapaabʼ naq yoʼyo ut naq naxqʼajkamuhebʼ li kawebʼ xpaabʼal (Heb. 11:6). Li paabʼal aʼan jun li naʼlebʼ li naruuchi li santil musiqʼej. Wi naqaj naq li Jehobʼa tixkʼe qe li xsantil musiqʼej aajel ru naq tqatzʼaama re saʼ li qatij (Luc. 11:9, 10, 13). Joʼkan ajwiʼ, aajel ru naq tqayaabʼasi li Santil Hu ut tqakʼe qachʼool re xnaʼlebʼankil rix li naxye ut xyuʼaminkil. Chi joʼkan, li xsantil musiqʼej li Jehobʼa tkʼanjelaq saʼ li qayuʼam ut tooxtenqʼa re naq kawaq li qapaabʼal re xsahobʼresinkil xchʼool li Jehobʼa.