Xpatzʼom ebʼ laj ilol hu
Chanru natawmank ru li naxye Salmo 12:8?
Saʼ Salmo 12:2-5 laj David kixye naq «xlajeʼosoʼk chixjunilebʼ li tiikebʼ xchʼool». Ut saʼ Salmo 12:6-8 naxye:
«Aʼut laaʼat xaye rehebʼ: “Saʼ xkʼabʼaʼ naq rahobʼtesinbʼil li toqʼobʼ ru,
saʼ xkʼabʼaʼ naq yo chi yaabʼak li nebʼaʼ,
laaʼin tinwakliiq anaqwan
ut tinkol li naroybʼeni xkolbʼal”.
Li raatin li Qaawaʼ aʼan tzʼaqal yaal,
chanchan li plaat saqobʼresinbʼil ru saʼ xam wuqubʼ sut.
At Qaawaʼ, laaʼat tattenqʼanq qe,
laaʼat tatkoloq qe chiruhebʼ li tenamit aʼan chi junelik».
Li raqal waqibʼ naxye naq li Yos tixkolebʼ chixjunilebʼ li kristiʼaan li rahobʼtesinbʼilebʼ.
Joʼ aj paabʼanel naqapaabʼ li naxye li raqal wuqubʼ: «Li raatin li Qaawaʼ aʼan tzʼaqal yaal, chanchan li plaat saqobʼresinbʼil ru» (Sal. 18:31; 119:140).
Saʼ wiibʼ oxibʼ li Santil Hu, saʼ Salmo 12:8 naxye: «Laaʼat tatkoloq rehebʼ».
Xbʼaan naq li naxye li Jehobʼa wank saʼ li raqal wuqubʼ, wankebʼ naru nekeʼxye naq aʼin naraj xyeebʼal naq li Yos tixkol li raatin. Abʼan naqanaw naq li Yos ak kixkol li Santil Hu chiruhebʼ li xeʼraj xsachbʼal (Is. 40:8; 1 Ped. 1:25).
Abʼan li Jehobʼa ak kixtenqʼa li rahobʼtesinbʼilebʼ joʼ naxye li raqal waqibʼ. Ut toj yook ajwiʼ xtenqʼankilebʼ li xikʼ nekeʼileʼk (Job 36:15; Sal. 6:5; 31:2, 3; 54:9; 145:20).
Joʼkan naq chirix kʼaru malaj chirix ani yook chi aatinak wiʼ li raqal waqxaqibʼ?
Naq naqatzʼil rix chiʼus li tasal kabʼlaju re li hu Salmo naqataw ru naq yook chi aatinak chirixebʼ li kristiʼaan.
Saʼ Salmo 12:2, 3 laj David naʼaatinak chirixebʼ li xmoos li Yos li xeʼbʼalaqʼiik. Ut li raqal kaahibʼ naxye naq li Yos traqoq aatin saʼ xbʼeenebʼ li kristiʼaan li nekeʼxye tzʼaj aj aatin. Li hu Salmo naxye naq tooruuq xkʼojobʼankil qachʼool naq li Yos tixkol li xtenamit xbʼaan naq yaal li naxye.
Joʼkan naq li raqal waqxaqibʼ naxye naq li Yos tixkolebʼ li kristiʼaan li rahobʼtesinbʼilebʼ xbʼaan li maaʼusebʼ li xnaʼlebʼ.
Joʼkan bʼiʼ, kʼaʼut naq wiibʼ oxibʼ li Santil Hu naxjal li raqal aʼin joʼ: «Laaʼat tatkoloq rehebʼ»? Aʼin naxkʼutbʼesi naq xnumsimank chi chaabʼil li wank saʼ li Santil Hu li tzʼiibʼanbʼil saʼ hebreo. Abʼan saʼ li Septuaginta li wank saʼ li aatinobʼaal griego naʼoksimank ebʼ li aatin joʼ «aʼan taakoloq qe», joʼkan naq aʼin naxkʼutbʼesi naq yook chi aatinak chirixebʼ li tiikebʼ xchʼool li nekeʼrahobʼtesiik, aʼanebʼ kolbʼilaqebʼ chiruhebʼ li maaʼusebʼ xnaʼlebʼ (Sal. 12:8, 9). Naq kijalmank li raqal aʼin saʼ li aatinobʼaal arameo naxye: «At QAAWAʼ, laaʼat tatkoloq rehebʼ li tiikebʼ xchʼool, taakolebʼ chalen anaqwan chiruhebʼ li maaʼusebʼ xnaʼlebʼ ut chi junelik». Chixjunil aʼin naxkʼut naq li Salmo 12:8 moko yook ta chi aatinak chirix li raatin li Yos.
Joʼkan naq li raqal aʼin naxye rehebʼ «li tiikebʼ xchʼool» naq li Yos tixkolebʼ.