1. Joʼ aj kʼanjel chiru li Jehobʼa, kʼaru ebʼ li yalbʼaʼix naqakʼul?

MA YOOKO xnumsinkil junaq li nimla yalbʼaʼix? Maare jun li qechpaabʼanel kixtochʼ qachʼool malaj ebʼ li qechtzolom malaj ebʼ li qechkʼanjelil nokooʼeʼxseʼe saʼ xkʼabʼaʼ naq nokookʼanjelak chiru li Jehobʼa (Sant. 3:2; 1 Ped. 4:3, 4). Ut maare jun li qakomon yook xrambʼal chiqu xik saʼebʼ li chʼutam malaj aatinak chirix li naqapaabʼ rikʼinebʼ li junchʼol (Mat. 10:35, 36). Wi qʼaxal ra li yooko xkʼulbʼal, maare inkʼaʼ chik tqaj xyalbʼal qaqʼe saʼ li xkʼanjel li Yos. Abʼan, chʼolchʼooq chiqu naq li Jehobʼa tixkʼe qe li choxahil naʼlebʼ ut li metzʼew re naq tooruuq xkuybʼal maakʼaʼ naxye kʼaru li yalbʼaʼix tchalq saʼ qabʼeen.

2. Joʼ naxye Romanos 15:4, kʼaru rusilal naqataw naq naqil xsaʼ li Santil Hu?

² Li Jehobʼa kixbʼaanu naq ttzʼiibʼamanq saʼ li Santil Hu chanru naq ebʼ li kristiʼaan li moko tzʼaqal ta re ru xyuʼamebʼ xeʼxkuy xnumsinkil ebʼ li yalbʼaʼix. Kixkanabʼ chi tzʼiibʼanbʼil re naq laaʼo tqakʼam qe rikʼinebʼ. Aʼan tzʼaqal li kixtzʼiibʼa li apóstol Pablo saʼ Romanos 15:4 (taayaabʼasi). Xyaabʼasinkil ebʼ li eetalil aʼin naxkʼojobʼ qachʼool ut naxkʼe qoybʼenihom. Abʼan, moko tzʼaqal ta naq kaʼajwiʼ tqayaabʼasi li Santil Hu, tento bʼan ajwiʼ tqakanabʼ naq li kʼaru tqayaabʼasi tixjal li qakʼaʼuxl ut twulaq toj saʼ xchamal li qachʼool. Naq tqaj qatenqʼankil re xnawbʼal kʼaru tqabʼaanu re xqʼaxbʼal ru junaq li chʼaʼajkilal, naru tqabʼaanu ebʼ li naʼlebʼ aʼin: 1) chootijoq, 2) qakʼoxlaq rix, 3) qanaʼlebʼaq rix ut 4) qayuʼamiq. Joʼkan bʼiʼ, qatzʼilaq rix chanru tooruuq xbʼaanunkil li junjunq chi naʼlebʼ aʼin. * Ut moqon, tqoksi aweʼ re  rilbʼal kʼaru li naʼlebʼ naqatzol rikʼin li kixkʼul li awabʼej David ut li apóstol Pablo.

3. Naq toj maajiʼ naqatikibʼ rilbʼal xsaʼ li Santil Hu, kʼaru raj tqabʼaanu, ut kʼaʼut?

³ 1) Chootijoq. Naq toj maajiʼ nokooʼok rilbʼal xsaʼ li Santil Hu, qatzʼaamaq qatenqʼ re li Jehobʼa re naq tqataw rusilal li tqayaabʼasi. Jun eetalil, wi yooko xsikʼbʼal junaq li naʼlebʼ re xtuqubʼankil ru junaq chʼaʼajkilal, qatzʼaamaq qatenqʼankil re li Yos re naq tqataw saʼ li Santil Hu junaq li naʼlebʼ li tkʼanjelaq chiqu (Filip. 4:6, 7; Sant. 1:5).

4. Kʼaru tooxtenqʼa re naq chanchan tawiʼ yooko chi rilbʼal li naqayaabʼasi saʼ li Santil Hu?

⁴ 2) Qakʼoxlaq rix. Li qakʼaʼuxl nokooxtenqʼa chi rilbʼal chi kutankil junaq li naʼlebʼ, ut aʼan jun li maatan li naxkʼe qe li Jehobʼa. Re naq chanchan tawiʼ yooko chi rilbʼal li naqayaabʼasi saʼ li Santil Hu, qakʼoxlaq li yook chi kʼulmank ut qakʼoxlaq naq laaʼo li kristiʼaan li naʼaatinak wiʼ li yooko chi xtzolbʼal. Qayalaq rilbʼal li kʼaru kiril ut rekʼankil li kʼaru kirekʼa.

5. Kʼaru naraj xyeebʼal xnaʼlebʼankil rix junaq li naʼlebʼ, ut chanru tooruuq xbʼaanunkil aʼin?

⁵ 3) Qanaʼlebʼaq rix. Xnaʼlebʼankil rix junaq li naʼlebʼ aʼan xkʼoxlankil rix chiʼus li naqayaabʼasi ut xkʼoxlankil li naxkʼut chiqu. Aʼin nokooxtenqʼa chi xjunajinkil chixjunil li naqayaabʼasi ut xtawbʼal ru chiʼus li xjolomil li naʼlebʼ. Naq naqil xsaʼ li Santil Hu ut inkʼaʼ naqanaʼlebʼa rix li naxye chanchan tawiʼ naq naqaj xkʼubʼankil junaq sahil tzekemq abʼan inkʼaʼ naqakʼe chixjunil li xbʼanol malaj li xyu. Abʼanan, naq naqanaʼlebʼa rix li yooko xtzolbʼal saʼ li Santil Hu chanchan tawiʼ naq yooko xjunajinkil chixjunil li xbʼanol malaj li xyu li tzekemq re naq saasa t-elq. Li ttenqʼanq qe chi xnaʼlebʼankil rix junaq li naʼlebʼ aʼan xtawbʼal xsumenkil ebʼ li patzʼom aweʼ: «Kʼaru kixbʼaanu li kristiʼaan aʼin re xtuqubʼankil ru li xchʼaʼajkilal? Chanru kitenqʼaak xbʼaan li Jehobʼa? Chanru tkʼanjelaq chiwu li yookin chi xtzolbʼal re naq tinkuy xnumsinkil li yalbʼaʼix li nachalk saʼ inbʼeen?».

6. Kʼaʼut tento tqayuʼami li naqatzol?

⁶ 4) Qayuʼamiq. Li Jesús kixye naq wi inkʼaʼ naqayuʼami li naqatzol chanchano li winq li nakabʼlak saʼ xbʼeen li samahibʼ. Kaw nakʼanjelak, abʼan maakʼaʼ aj e. Kʼaʼut? Xbʼaan naq, naq tchalq li kaqsut-iqʼ ut li bʼutʼ, telembʼak ru chʼochʼ li rochoch (Mat. 7:24-27). Kamaʼin ajwiʼ nakʼulmank qikʼin, wi nokootijok, naqakʼoxla ut naqanaʼlebʼa rix li naqatzol abʼan inkʼaʼ naqayuʼami, maakʼaʼ aj e naq xqayal qaqʼe. Moko kawaq ta li qapaabʼal naq tqakʼul li rahobʼtesiik ut li yalbʼaʼix. Abʼanan, wi nokootzolok ut naqayuʼami li naqatzol, tqanaw kʼaru xbʼaanunkil saʼ li qayuʼam, toowanq saʼ tuqtuukilal ut tkawuuq li qapaabʼal (Is. 48:17, 18). Anaqwan qabʼaanuhaq li kaahibʼ chi naʼlebʼ aweʼ re rilbʼal kʼaru tqatzol chirix li xyuʼam li awabʼej David.

7. Kʼaru li eetalil wank saʼ li Santil Hu ok qe xtzʼilbʼal rix?

⁷ Ma xtochʼ qachʼool junaq li qamiiw malaj qakomon? Wi joʼkan, us raj naq tqatzʼil rix li kixbʼaanu laj Absalón, li ralal li awabʼej David. Aʼan kixtzʼeqtaana li xyuwaʼ ut kiraj xmaqʼbʼal chiru li xʼawabʼejilal (2 Sam. 15:5-14, 31; 18:6-14).

8. Kʼaru tooruuq xbʼaanunkil re naq li Jehobʼa tooxtenqʼa?

⁸ 1) Chootijoq. Naq ak xqil li kixkʼul laj David, qayehaq re li Jehobʼa chanru tzʼaqal naqekʼa qibʼ xbʼaan naq xeʼxtochʼ qachʼool malaj xooʼeʼxrahobʼtesi (Sal. 6:7-10). Chirix chik aʼan, qatzʼaamaq re, naq tooxtenqʼa chi xtawbʼal junaq li naʼlebʼ li tixkʼut chiqu kʼaru xbʼaanunkil.

9. Chʼolobʼ rikʼin wiibʼ oxibʼ li aatin kʼaru kikʼulmank rikʼin laj David ut laj Absalón.

⁹ 2) Qakʼoxlaq rix. Naq yooqo xyaabʼasinkil,  qakʼoxlaq chanru kirekʼa ribʼ li awabʼej David naq yook xnumsinkil aʼan. Chiru naabʼal chihabʼ, laj Absalón kixbʼaanu chixjunil li wank saʼ ruqʼ re xqʼunbʼesinkilebʼ xchʼool li tenamit (2 Sam. 15:7). Naq kiwulak li hoonal chiru, kixtaqlahebʼ aj chʼuuk malaj aj kʼehol eetal saʼ chixjunil li tenamit Israel re xkawresinkilebʼ li kristiʼaan re naq txaqabʼaaq choʼq awabʼej. Kixqʼunbʼesi laj Ahitofel chi xqʼetbʼal ribʼ chiru laj David, laj Ahitofel ramiiw ut aj kʼehol chaq xnaʼlebʼ laj David. Laj Absalón kixkʼe ribʼ choʼq awabʼej ut kiraj xchapbʼal ut xkamsinkil laj David li maare nim chaq xyajel saʼebʼ li kutan aʼan (Sal. 41:1-9). Naq laj David kixnaw chixjunil aʼin, kiʼelk Jerusalén. Tojaʼ naq kiwank li yalok u, ebʼ li xsoldaad laj Absalón xeʼqʼaxeʼk ru xbʼaan ebʼ li xsoldaad laj David, ut kikamsiik laj Absalón.

10. Kʼaru raj kiruuk xbʼaanunkil li awabʼej David?

¹⁰ Anaqwan qakʼoxlaq chan tawiʼ ru kirekʼa ribʼ laj David. Kʼajoʼ naxra chaq laj Absalón ut kʼojkʼo chaq xchʼool chirix laj Ahitofel. Usta joʼkan, xkabʼichalebʼ xeʼxbʼalaqʼi laj David. Kʼajoʼ naq xeʼxrahobʼtesi ut xeʼraj xkamsinkil. Laj David kiruuk raj xkʼoxlankil naq ebʼ li junchʼol chi ramiiw xeʼokenk ajwiʼ chirix laj Absalón ut inkʼaʼ raj chik kixkʼojobʼ xchʼool chirixebʼ. Wi xkoho traj xchʼool chirix li yook xkʼoxlankil, xchʼina junes raj kiʼelelik. Malaj, maakʼaʼ raj kixbʼaanu re xkolbʼal ribʼ. Abʼan moko joʼkan ta kinaʼlebʼak. Kixqʼax bʼan ru li nimla chʼaʼajkilal aʼin. Chanru kixbʼaanu?

11. Kʼaru kixbʼaanu li awabʼej David naq yook chaq xkʼulbʼal jun li nimla chʼaʼajkilal?

¹¹ 3) Qanaʼlebʼaq rix. Kʼaru li naʼlebʼ naru tqatzol rikʼin li eetalil aʼin? Qakʼoxlaq: «Kʼaru kixbʼaanu laj David re xtuqubʼankil ru li xchʼaʼajkilal?». Moko qʼaxal kiʼok ta xxiw chi moko kixbʼaanu junaq li naʼlebʼ saʼ junpaat malaj chi maakʼaʼ xyaalal. Kixtzʼaama bʼan xtenqʼ re li Jehobʼa ut rehebʼ li ramiiw. Ut naq naxkʼubʼ junaq li naʼlebʼ, saʼ junpaat naxbʼaanu. Usta ra yook xkʼulbʼal, abʼan inkʼaʼ kipoʼk chi moko kixkanabʼebʼ li ramiiw. Junelik bʼan kixkʼojobʼ xchʼool rikʼin li Jehobʼa ut rikʼinebʼ li ramiiw.

12. Chanru kitenqʼaak laj David xbʼaan li Jehobʼa?

¹² Chanru kitenqʼaak laj David xbʼaan li Jehobʼa? Wi tqatzʼil bʼayaq chik li xyuʼam laj David, tqatzol chanru naq li Jehobʼa kixkʼe xmetzʼew re naq truuq xkuybʼal li yalbʼaʼix li yook xnumsinkil (Sal. 3:1-9). Li Jehobʼa kirosobʼtesi li kixbʼaanu laj David. Ut kixtenqʼahebʼ li ramiiw naq yookebʼ chi pleetik re xkolbʼal li xyuʼam laj David.

13. Chanru tooruuq xkʼambʼal qe rikʼin laj David naq junaq li qahermaan malaj qakomon tixtochʼ qachʼool malaj tooxrahobʼtesi? (Mateo 18:15-17).

¹³ 4) Qayuʼamiq. Qakʼoxlaq: «Chanru tinruuq xkʼambʼal we rikʼin laj David?». Jun li naʼlebʼ li tooruuq xbʼaanunkil aʼan xsikʼbʼal saʼ junpaat chanru xtuqubʼankil ru li qachʼaʼajkilal. Saʼ li hu Mateo tasal 18, li Jesús kixkʼe jun chaabʼil naʼlebʼ li naru tqayuʼami malaj aran tqataw li tkʼanjelaq chiqu aʼ yaal kʼaru yooko xkʼulbʼal saʼ li qayuʼam (taayaabʼasi Mateo 18:15-17). Abʼan moko us ta naq saʼ junpaat tqabʼaanu junaq li naʼlebʼ wi yook qajosqʼil. Qatzʼaamaq qachoxahil naʼlebʼ ut qatuqtuukilal re li Jehobʼa re naq tqanaw kʼaru xbʼaanunkil. Miqakanabʼ xkʼojobʼankil qachʼool chirixebʼ li qamiiw ut qakʼulubʼaq wi teʼraj qatenqʼankil (Prov. 17:17). Ut li qʼaxal wank xwankil: miqakanabʼ xyuʼaminkil li naʼlebʼ li naxkʼe qe li Jehobʼa saʼ li Raatin (Prov. 3:5, 6).

14. Joqʼe naru naxwaklesi qachʼool rilbʼal li naxye saʼ 2 Timoteo 1:12-16 ut 4:6-11, 17-22?

¹⁴ Ma xikʼ nokooril li qajunkabʼal xbʼaan naq nokookʼanjelak chiru li Jehobʼa, malaj saʼ li qatenamit ebʼ li awabʼej nokooʼeʼxchʼiʼchʼiʼi malaj nekeʼroksi li chaqʼrabʼ re xrambʼal chiqu li qakʼanjel chiru li Yos? Wi joʼkan, naru naxwaklesi  qachʼool rilbʼal li naxye saʼ 2 Timoteo 1:12-16 ut 4:6-11, 17-22. * Laj Pablo kixtzʼiibʼa li xtasal li Santil Hu aʼin naq wank chaq saʼ tzʼalam.

15. Kʼaru tooruuq xtzʼaamankil re li Jehobʼa?

¹⁵ 1) Chootijoq. Naq toj maajiʼ naqayaabʼasi ebʼ li raqal aʼin, chi chʼolchʼo ru qayehaq re li Jehobʼa li qachʼaʼajkilal ut chanru naqekʼa qibʼ. Chirix chik aʼan, qatzʼaamaq re li Jehobʼa naq chooxtenqʼaq chi xtawbʼal junaq li naʼlebʼ chirix li xyuʼam laj Pablo li tkʼanjelaq chiqu re xtuqubʼankil ru li qachʼaʼajkilal.

16. Kʼaru yook chaq xkʼulbʼal laj Pablo?

¹⁶ 2) Qakʼoxlaq rix. Qakʼoxlaq naq laaʼo yooko xkʼulbʼal li kixkʼul laj Pablo. Wank saʼ tzʼalam aran Roma. Moko aʼin ta li xbʼeen sut naq nawank saʼ tzʼalam. Abʼan anaqwan chʼolchʼo chiru naq tkamsiiq. Wiibʼ oxibʼ li ramiiw xeʼxkanabʼ xjunes ut maakʼaʼ chik xmetzʼew (2 Tim. 1:15).

17. Kʼaru raj kiruuk xbʼaanunkil laj Pablo?

¹⁷ Laj Pablo kiruuk raj xkʼoxlankil naq wi maajunwa raj kiʼok joʼ aj paabʼanel, inkʼaʼ raj xeʼxchʼik saʼ tzʼalam. Maare kijosqʼoʼk raj rikʼinebʼ li winq re Asia xbʼaan naq keʼxkanabʼ xjunes ut inkʼaʼ raj chik kixkʼojobʼ xchʼool chirixebʼ li ramiiw. Abʼan moko joʼkan ta kinaʼlebʼak. Kʼaʼut naq inkʼaʼ kixkanabʼ xkʼojobʼankil xchʼool rikʼin li Jehobʼa ut rikʼinebʼ li ramiiw?

18. Chanru kinaʼlebʼak laj Pablo?

¹⁸ 3) Qanaʼlebʼaq rix. Qakʼoxlaq: «Kʼaru kixbʼaanu laj Pablo re xtuqubʼankil ru li xchʼaʼajkilal?». Usta naxnaw naq chi seebʼ tkamsiiq, abʼan maajunwa kisach saʼ xchʼool naq li jwal wank xwankil aʼan xkʼebʼal xloqʼal li Jehobʼa. Joʼkan ajwiʼ, inkʼaʼ kixkanabʼ xsikʼbʼal chanru xwaklesinkilebʼ xchʼool li junchʼol ut chi anchal li raanm kitijok chiru li Jehobʼa (2 Tim. 1:3). Inkʼaʼ kixxok saʼ xchʼool li kiʼuxk re, naq xkanabʼaak xjunes, qʼaxal oxloqʼ bʼan chiru naq naraheʼk ut naq natenqʼaak xbʼaanebʼ li tzʼaqal ramiiw. Joʼkan ajwiʼ, junelik kixkʼe xqʼe chi xtzolbʼal li Raatin li Yos (2 Tim. 3:16, 17; 4:13). Ut li qʼaxal wank xwankil: chʼolchʼo chiru naq naraheʼk xbʼaan li Jehobʼa ut li Jesús, naq ebʼ aʼan maajunwa xeʼxkanabʼ xjunes ut naq tqʼajkamuuq xbʼaan li xtiikilal xchʼool.

19. Chanru kitenqʼaak laj Pablo xbʼaan li Jehobʼa?

¹⁹ Li Jehobʼa ak kixye chaq re laj Pablo naq trahobʼtesiiq saʼ xkʼabʼaʼ li Kriist (Hech. 21:11-13). Chanru kitenqʼaak laj Pablo xbʼaan li Jehobʼa? Naq kisumeek li xtij ut naq kikʼeheʼk xmetzʼew re xkuybʼal li yalbʼaʼix (2 Tim. 4:17). Kixye ajwiʼ re, naq relik chi yaal naq tqʼajkamuuq xbʼaan li xkawil kʼanjel. Li Jehobʼa kirekʼasihebʼ ajwiʼ xchʼool li ramiiw laj Pablo re naq teʼxtenqʼa joʼ t-ajmanq chiru.

20. Chanru tqakʼutbʼesi li paabʼal li kixkʼutbʼesi laj Pablo saʼ Romanos 8:38, 39?

²⁰ 4) Qayuʼamiq. Qakʼoxlaq: «Chanru tinruuq xkʼambʼal we rikʼin laj Pablo?». Joʼ laj Pablo, naqanaw naq toorahobʼtesiiq ajwiʼ xbʼaan li qapaabʼal (Mar. 10:29, 30). Re naq maajunwa tqatzʼeqtaana li Jehobʼa naq tchalq li yalbʼaʼix saʼ qabʼeen, tento naq chi anchal qachʼool tootijoq ut seebʼaqo chi tzolok. Misach saʼ qachʼool naq jun rehebʼ li naʼlebʼ li qʼaxal wank xwankil li naru tqabʼaanu aʼan xkʼebʼal xloqʼal li Jehobʼa. Chʼolchʼooq chiqu naq aʼan maajunwa tooxkanabʼ qajunes ut naq maaʼani tramoq chiru qaraabʼal (taayaabʼasi Romanos 8:38, 39; Heb. 13:5, 6).

21. Kʼaru kitenqʼank re li xʼAya ut laj Hector chi xqʼaxbʼal ru ebʼ li xchʼaʼajkilal?

²¹ Maakʼaʼ naxye kʼaru li chʼaʼajkilal yooko xkʼulbʼal saʼ li qayuʼam, ebʼ li eetalil li natawmank saʼ li Santil Hu naru naxkawubʼresi li qachʼool.  Jun eetalil, li xʼAya jun aj kʼamolbʼe saʼ li puktesink li wank Japón naxye naq li kixkʼul laj Jonás kitenqʼank re, re naq inkʼaʼ chik txuwaq chi puktesink bʼarwiʼ nekeʼnumeʼk naabʼal li kristiʼaan. Joʼkan ajwiʼ, laj Hector jun li saaj li wank Indonesia, li nakʼanjelak chiru li Jehobʼa usta li xnaʼ xyuwaʼ maawaʼebʼ aj Testiiw, naxye naq li kixbʼaanu li xRut narekʼasi xchʼool re naq inkʼaʼ tixkanabʼ xnawbʼal ru li Jehobʼa ut kʼanjelak chiru.

22. Chanru tqataw rusilal ebʼ li bʼideo, ebʼ li tzolom li natawmank saʼ li tasal hu Ebʼ li naʼlebʼ li nintzol saʼ li Santil Hu ut li xyaabʼasinkil li Santil Hu rikʼin xyaabʼ li son?

²² Bʼar naru tqataw xkomon li naʼlebʼ chirixebʼ li kristiʼaan li naʼaatinak wiʼ li Santil Hu li tixkawubʼresi li qachʼool? Ebʼ li bʼideo, ebʼ li tzolom li natawmank saʼ li tasal hu Ebʼ li naʼlebʼ li nintzol saʼ li Santil Hu ut li xyaabʼasinkil li Santil Hu rikʼin xyaabʼ li son naxbʼaanu naq chanchan tawiʼ yooko chi rilbʼal li yook chi kʼulmank. * Naq toj maajiʼ naqil, naqabʼi malaj naqayaabʼasi li naʼlebʼ aʼin, qatzʼaamaq re li Jehobʼa naq chooxtenqʼaq chi xtawbʼal junaq li naʼlebʼ li tkʼanjelaq chiqu saʼ li qayuʼam. Qakʼoxlaq naq laaʼo li kristiʼaan li naʼaatinak wiʼ li yooko chi xtzolbʼal. Qanaʼlebʼaq rix li kixbʼaanu ut chanru kitenqʼaak xbʼaan li Jehobʼa chi xqʼaxbʼal ru li xchʼaʼajkilal. Chirix chik aʼan, qayuʼamiq li naʼlebʼ li tkʼanjelaq chiqu aʼ yaal kʼaru yooko xkʼulbʼal saʼ li qayuʼam. Moqon, qabʼanyoxiq re li Jehobʼa naq xooxtenqʼa. Joʼkan ajwiʼ, qatenqʼaq ut qawaklesihaq xchʼool ebʼ li junchʼol re xkʼutbʼesinkil naq oxloqʼ chiqu li xtenqʼ li Jehobʼa.

23. Kʼaru naxyeechiʼi qe li Jehobʼa saʼ Isaías 41:10, 13?

²³ Chʼaʼaj wank saʼ li ruuchichʼochʼ aʼin li wank rubʼel xwankil laj Tza, ut wank sut inkʼaʼ tqanaw kʼaru xbʼaanunkil (2 Tim. 3:1). Abʼan miʼok qaxiw chi moko qakʼaʼuxl. Li Jehobʼa naxnaw li kʼaru yooko xkʼulbʼal. Naq t-ajmanq qatenqʼ, naxyeechiʼi qe naq kaw tooxchap rikʼin li xnim uqʼ (taayaabʼasi Isaías 41:10, 13). Chʼolchʼo chiqu naq li Jehobʼa tooxtenqʼa ut naq li Santil Hu tixkʼe qametzʼew re xqʼaxbʼal ru yalaq kʼaru chi chʼaʼajkilal.