1, 2. Kʼaʼut naq inkʼaʼ tchʼinaaq aachʼool wi toj maajiʼ kawresinbʼilat re xsubʼal aawibʼ saʼ haʼ? (Chaawil ebʼ li jalam u chiru li hu).

 WI XAAKʼOXLA xkubʼsinkil aahaʼ, naqakʼe xsahil aachʼool. Ma ak kawresinbʼilat re xkubʼsinkil aahaʼ? Wi chʼolchʼo chaawu ut chiruhebʼ li cheekel winq miwiibʼank aachʼool. Chi joʼkan sahaq aachʼool chi kʼanjelak chiru li Jehobʼa.

² Abʼan, michʼinaak laachʼool wi nakaakʼoxla malaj xeʼxye aawe naq moko kawresinbʼilat ta re naq tkubʼeeq aahaʼ. Toj naru naq taakawresi aawibʼ re naq tatruuq xsubʼal aawibʼ saʼ haʼ, maakʼaʼ naxye ma saajat malaj cheekat chik.

3. Kʼaru kixye li winq aj Etiopía re laj Felipe ut kʼaru li patzʼom nabʼaanumank? (Hechos 8:36, 38).

³ (Taayaabʼasi Hechos 8:36, 38). Li winq re Etiopía kixye re laj Felipe: «Kʼaru taaramoq chiwu xkubʼik inhaʼ?». Chʼolchʼo naq naraj naq tkubʼeeq xhaʼ. Abʼan, ma ak kawresinbʼil re naq tkubʼeeq xhaʼ?

4. Chanru kixkʼutbʼesi laj Etiopía naq kiraj xnawbʼal xkomon xnaʼlebʼ?

⁴ Li winq laj Etiopía «kiwulak Jerusalén chi loqʼonink» (Hech. 8:27). Chʼolchʼo naq kixkʼulubʼa li xpaabʼal ebʼ laj judiiy. Naxnaw chaq li Najter Chaqʼrabʼ ut chi joʼkan kixnaw ru li Jehobʼa. Abʼan kiraj xnawbʼal xkomon. Kʼaru yook xbʼaanunkil naq laj Felipe kixtaw saʼ li bʼe?  Yook xyaabʼasinkil li xhu laj Isaías (Hech. 8:28). Aʼan chaq jun xnimal ru naʼlebʼ. Li winq aʼin kiraj xnawbʼal xkomon.

5. Kʼaru kixbʼaanu li winq re Etiopía rikʼin li kixtzol?

⁵ Li winq aʼin nakʼanjelak choʼq re li xCandace, awabʼej re Etiopía. «Aj ilol re chixjunil li xbʼihomal» (Hech. 8:27). Chʼolchʼo naq laatzʼ ru chi kʼanjelak. Abʼan kixsikʼ xhoonal re xloqʼoninkil ru li Jehobʼa. Moko kaʼaj tawiʼ kixtzol li yaal; kixyuʼami bʼan. Kibʼihajik toj Jerusalén re xloqʼoninkil ru li Jehobʼa. Kixsach naabʼal li hoonal ut li tumin saʼ li bʼihaaj aʼin, abʼan naraj xloqʼoninkil ru li Jehobʼa maakʼaʼ naxye kʼaru chʼaʼajkilal kixnumsi.

6, 7. Kʼaru kixbʼaanu li winq re Etiopía re naq tkʼiiq xrahom chirix li Jehobʼa?

⁶ Laj Felipe kixkʼut chiru li winq aʼin li yaal li inkʼaʼ naxnaw joʼ naq li Jesús aʼan li Mesiiy (Hech. 8:34, 35). Chʼolchʼo naq aʼin kixtochʼ xchʼool laj Etiopía chi xtzolbʼal kʼaru kixbʼaanu li Jesús choʼq re. Kʼaru tixbʼaanu? Naru naq maakʼaʼ raj tixbʼaanu ut tkanaaq joʼ jun aj judiiy li oxloqʼinbʼil ru. Abʼan, li xrahom chirix li Jehobʼa ut li Jesús kikʼiik ut aʼin kixbʼaanu naq tkubʼeeq xhaʼ re naq twanq choʼq xtzolom li Kriist. Laj Felipe kixkʼe reetal naq ak kawresinbʼil chik re naq tkubʼeeq xhaʼ joʼkan naq kixkubʼsi xhaʼ.

⁷ Li reetalil laj Etiopía tatxtenqʼa re naq taakawresi aawibʼ re naq tkubʼeeq aahaʼ. Joʼ li winq aʼan, naru nakaaye chi anchal aachʼool: «Kʼaru taaramoq chiwu xkubʼik inhaʼ?». Anaqwan tqil chanru tatruuq chi naʼlebʼak joʼ li winq re Etiopía: naq yooqat chi tzolok, xyuʼaminkil li nakaatzol ut xkawresinkil laarahom chirix li Jehobʼa.

8. Joʼ naxye Juan 17:3, kʼaru tento taabʼaanu?

⁸ (Taayaabʼasi Juan 17:3). Ma naxwaklesi aachʼool li kixye li Jesús re naq taatikibʼ xtzolbʼal li Santil Hu? Aʼin xeʼxkʼul ebʼ li junchʼol. Ebʼ li aatin aʼin naxwaklesi qachʼool re naq tootzoloq wulaj wulaj. Maajunwa tqakanabʼ xtzolbʼal chirix li «tzʼaqal Yos» (Ecl. 3:11). Junelik yooqo chi tzolok. Naq yooqo xnawbʼal ru li Jehobʼa toojiloq chixkʼatq (Sal. 73:28).

9. Kʼaru tento tqabʼaanu naq ak xqatzol li naʼlebʼ li moko chʼaʼaj ta li wank saʼ li Santil Hu?

⁹ Naq junaq li kristiʼaan naʼok xtzolbʼal  chirix li Jehobʼa naxtzol li naʼlebʼ li moko chʼaʼaj ta, li apóstol Pablo naxye naq aʼin «li naʼlebʼ xetzol saʼ xtiklajik» naq kixtzʼiibʼa li esilhu choʼq rehebʼ laj hebreo. Moko yook ta risinkil xwankil «li xbʼeen tzolok»; naxjuntaqʼeeta bʼan rikʼin li leech li nakʼeheʼk re li kʼuulaʼal (Heb. 5:12; 6:1). Kixwaklesihebʼ xchʼool laj paabʼanel re naq teʼxtzol li xninqal ru yaal li wank saʼ li Santil Hu ut moko kaʼaj tawiʼ li nekeʼxnaw saʼ xtiklajik. Ma taawaj xnawbʼal li naxye li Santil Hu? Ma taawaj xyalbʼal aaqʼe re naq taanaw chirix li Jehobʼa ut li rajom?

10. Kʼaʼut naq wankebʼ nekeʼchʼaʼajkoʼk chiru xtzolbʼal li Santil Hu?

¹⁰ Wankebʼ nekeʼchʼaʼajkoʼk chiru tzolok. Ut laaʼat? Ma xeʼxkʼut chaawu ilok ru hu saʼ li tzolebʼaal? Ma xwulak chaawu xbʼaanunkil? Malaj nakaakʼoxla naq rilbʼal xsaʼebʼ li tasal hu moko nawulak ta chaawu? Wi joʼkan, moko aajunes ta, li Jehobʼa tatxtenqʼa xbʼaanunkil. Xbʼaan naq aʼan tzʼaqal re ru xyuʼam ut chaabʼil choʼq aj kʼutunel.

11. Kʼaʼut naq li Jehobʼa aʼan «laj Tzolol» qe?

¹¹ Li Jehobʼa aʼan «laj Tzolol» qe (Is. 30:20, 21). Wank xkuyum, qʼun xchʼool, natawok u ut junelik naril li xchaabʼil naʼlebʼ li xtzolom (Sal. 130:3). Maajunwa naxpatzʼ qe li inkʼaʼ tooruuq xbʼaanunkil. Qajultikaq naq kixkʼe qe jun chaabʼil maatan, aʼ li qulul (Sal. 139:14). Xooxyobʼtesi ajwiʼ re naq t-alaaq saʼ qachʼool naq tootzoloq, naraj naq tqabʼaanu chi junelik ut tqayal xsahil. Joʼkan naq qakʼehaq qachʼool chi xnawbʼal li yaal li wank saʼ li Santil Hu (1 Ped. 2:2). Chanru taabʼaanu? Xsikʼbʼal junaq li naʼlebʼ li nakaawaj saʼ laayuʼam ut xyaabʼasinkil li Santil Hu wulaj wulaj (Jos. 1:8). Rikʼin xtenqʼ li Jehobʼa taayal xsahil rilbʼal ut xtzolbʼal li xnaʼlebʼ li Jehobʼa.

12. Kʼaʼut naq aajel ru naq tqatzol li xyuʼam ut li xkʼanjel li Jesús naq kiwank saʼ Ruuchichʼochʼ?

¹² Sikʼ laahoonal re xkʼoxlankil rix li xyuʼam ut li xkʼanjel li Jesús naq kiwank saʼ Ruuchichʼochʼ. Joʼkan naq aajel ru naq tqakʼam qe rikʼin li Jesús wi naqaj kʼanjelak chiru li Jehobʼa anaqwan naq wanko saʼ rosoʼjik li kutan (1 Ped. 2:21). Li Jesús kixye rehebʼ li xtzolom kʼaru ebʼ li chʼaʼajkilal teʼxkʼul (Luc. 14:27, 28). Abʼan naxnaw naq tiikaqebʼ xchʼool joʼ aʼan (Juan 16:33). Chaatzol li xyuʼam li Jesús ut yal aaqʼe rajlal kutan chi xkʼambʼal aawe rikʼin.

13. Kʼaru raj tento taapatzʼ re li Jehobʼa ut kʼaʼut?

¹³ Moko kaʼaj tawiʼ naqaj xtzolbʼal li Santil Hu. Naqaj xnawbʼal, xraabʼal ut xpaabʼankil li Jehobʼa (1 Cor. 8:1-3). Naq yooqat xnawbʼal ru li Jehobʼa, maakanabʼ xpatzʼbʼal re naq tixkʼe xtzʼaqobʼ laapaabʼal (Luc. 17:5). Ut naru tixkʼe aawe. Wi nakaanaw ru chiʼus li Jehobʼa, tkʼiiq laapaabʼal (Sant. 2:26).

14. Chanru kixjultika li apóstol Pedro naq tqayuʼami li naqatzol? (Chaawil li jalam u).

¹⁴ Li apóstol Pedro kixjultika chiruhebʼ li xtzolom li Kriist naq aajel ru naq teʼxyuʼami li nekeʼxtzol. Kixchʼolobʼ rikʼin li reetalil laj Noé. Li Jehobʼa kixye re laj Noé naq tixtaqla chaq li bʼutʼihaʼ chi xsachbʼal chixjunil li maaʼusebʼ xnaʼlebʼ. Re naq teʼkoleʼq laj Noé ut li xjunkabʼal moko tzʼaqal ta xnawbʼal  naq tchalq li bʼutʼihaʼ. Laj Pedro kiroksi li aatin «yo chaq chi xyiibʼankil li jukubʼ kabʼl» re aatinak chirix li kikʼulmank rubʼelaj li Bʼutʼihaʼ (1 Ped. 3:20). Laj Noé ut li xjunkabʼal xeʼxbʼaanu li kixye li Jehobʼa rehebʼ naq xeʼxyiibʼ li nimla jukubʼ kabʼl (Heb. 11:7). Moqon chik laj Pedro kixjuntaqʼeeta li kubʼihaʼ rikʼin li kixbʼaanu laj Noé. Kixye: «Li haʼ aʼan reetalil li kubʼihaʼ kolbʼilex wiʼ laaʼex anaqwan» (1 Ped. 3:21). Li nakaabʼaanu anaqwan re xkawresinkil aawibʼ re naq tkubʼeeq aahaʼ chanchan tawiʼ li kixbʼaanu laj Noé ut li xjunkabʼal naq keʼxyiibʼ li jukubʼ kabʼl. Joʼkan naq, kʼaru tento taabʼaanu naq tkubʼeeq aahaʼ?

15. Kʼaru naraj xyeebʼal xyotʼbʼal aachʼool?

¹⁵ Jun li naʼlebʼ li tento tqabʼaanu aʼan xyotʼbʼal qachʼool xbʼaan naq laaʼo aj maak (Hech. 2:37, 38). Xyotʼbʼal qachʼool naraj xyeebʼal xjalbʼal li qayuʼam. Ma xaakanabʼ xbʼaanunkil li inkʼaʼ nawulak chiru li Jehobʼa joʼ li muxuk ibʼ, xyeebʼal li yibʼru aj aatin, li mayibʼk malaj li hobʼok? (1 Cor. 6:9, 10; 2 Cor. 7:1; Efes. 4:29). Wi toj maajiʼ nakaabʼaanu, kʼe aachʼool chi xbʼaanunkil. Naru nakat-aatinak rikʼin li natzolok aawe chirix li Santil Hu malaj rikʼinebʼ li cheekel winq re naq tateʼxtenqʼa ut teʼxkʼe aanaʼlebʼ. Wi toj saajat ut wankat saʼ rochoch laanaʼ laayuwaʼ patzʼ naq tateʼxtenqʼa chi xqʼaxbʼal ru li yibʼru aj naʼlebʼ li naxram chaawu xkubʼik aahaʼ.

16. Kʼaru naqabʼaanu re xloqʼoninkil ru li Jehobʼa rajlal kutan?

¹⁶ Aajel ru naq tqaloqʼoni ru li Jehobʼa rajlal. Aʼin naraj xyeebʼal xik saʼebʼ li chʼutam ut tzʼaqonk (Heb. 10:24, 25). Ut naq tateʼxxaqabʼ joʼ aj puktesinel li maajiʼ nakubʼeek xhaʼ, puktesin rajlal. Wi taabʼaanu sahaq saʼ laachʼool (2 Tim. 4:5). Wi toj wankat rikʼin laanaʼ laayuwaʼ, kʼoxla: «Ma rajlal nekeʼxye we naq tinxik saʼebʼ li chʼutam malaj chi puktesink? Malaj naʼalaak saʼ linchʼool xbʼaanunkil?». Naq nakaabʼaanu aʼin nakaakʼutbʼesi naq wank laapaabʼal, nakaara  li Jehobʼa ut nakaabʼanyoxi chixjunil li naxkʼe aawe. Chixjunil nabʼaanumank «rikʼin paabʼank»; ut chanchan tawiʼ nakaakʼe jun xmaatan li Jehobʼa (2 Ped. 3:11; Heb. 13:15). Li Jehobʼa nawulak chiru naq naqakʼe li xmaatan chi inkʼaʼ minbʼil qu (juntaqʼeeta rikʼin 2 Corintios 9:7). Nasahoʼk saʼ qachʼool xkʼebʼal re li Jehobʼa chixjunil li wank saʼ quqʼ.

17, 18. Kʼaru li naʼlebʼ tatxtenqʼa re naq tkawresi aawibʼ re li kubʼihaʼ ut kʼaʼut? (Proverbios 3:3-6).

¹⁷ Maare nakaataw ebʼ li chʼaʼajkilal wi nakaawaj xsubʼal aawibʼ saʼ haʼ. Wankebʼ tateʼxseʼe malaj tateʼxrahobʼtesi xbʼaan li nakaapaabʼ (2 Tim. 3:12). Maare nakaawaj xkanabʼankil jun li yibʼru aj naʼlebʼ ut wank sut nakattʼaneʼk wiʼ chik chisaʼ malaj nakaakʼoxla naq moko kawresinbʼilat ta re naq tkubʼeeq aahaʼ, aʼin naru tixbʼaanu naq tchʼinaaq aachʼool. Li tatxtenqʼa re naq inkʼaʼ tchʼinaaq aachʼool aʼan laarahom chirix li Jehobʼa.

¹⁸ Li qʼaxal chaabʼil aʼan naq nakaara li Jehobʼa (taayaabʼasi Proverbios 3:3-6). Wi nakaara li Jehobʼa chi anchal aachʼool tatruuq xnumsinkil yalaq kʼaru chi chʼaʼajkilal. Li Santil Hu naxye naq li Jehobʼa qʼaxal naxrahebʼ aj kʼanjel chiru. Aʼin naraj xyeebʼal naq maajunwa tooxkanabʼ (Sal. 100:5). Yobʼtesinbʼilat joʼ xjalam u li Yos (Gén. 1:26). Joʼkan bʼiʼ, chanru taakʼutbʼesi li rahok aʼin?

19. Kʼaru tatruuq xbʼaanunkil re xkʼutbʼesinkil naq oxloqʼ chaawu li naxbʼaanu li Jehobʼa choʼq aawe? (Gálatas 2:20).

¹⁹ Xbʼeenwa aajel ru naq tatbʼanyoxinq (1 Tes. 5:18). Kʼoxla rix aʼin wulaj wulaj: «Chanru naxkʼutbʼesi chiwu li Jehobʼa naq nikinxra?». Naq tattijoq bʼanyoxi chiru li Jehobʼa chixjunil li kixkʼe aawe. Taw ru naq li Jehobʼa naxbʼaanu li chaabʼilal choʼq aawe xbʼaan naq nakatxra, joʼ kixbʼaanu li apóstol Pablo (taayaabʼasi Gálatas 2:20). Ut kʼoxla aʼin: «Ma nawaj xkʼutbʼesinkil chiru li Jehobʼa naq ninra?». Laarahom choʼq re li Jehobʼa tatxtenqʼa re naq taatzʼeqtaana yalaq kʼaru chi yalbʼaʼix ut chʼaʼajkilal, aʼin tixbʼaanu naq junelik taawaj xloqʼoninkil ru li Jehobʼa. Chi kamaʼin taakʼutbʼesi naq nakaara laachoxahil Yuwaʼ.

20. Kʼaru naraj xyeebʼal xqʼaxtesinkil aayuʼam chiru li Jehobʼa ut kʼaʼut naq wank xwankil aʼin?

 ²⁰ Saʼ xnumikebʼ li kutan laarahom chirix li Jehobʼa tixbʼaanu naq taaqʼaxtesi aawibʼ chiru saʼ jun li tij. Ut naq ak xaabʼaanu chikan, tatkanaaq rubʼel xwankil li Jehobʼa chi junelik. Naq xaaqʼaxtesi laayuʼam chiru li Jehobʼa xaaye re naq tatkʼanjelaq chiru maakʼaʼ naxye ma wank chʼaʼajkilal malaj inkʼaʼ. Junsut ajwiʼ nabʼaanumank li yeechiʼom aʼin. Yaal, xqʼaxtesinkil laayuʼam chiru li Jehobʼa jwal wank xwankil. Chaajultika naq aʼin li qʼaxal chaabʼil li tatruuq xbʼaanunkil saʼ laayuʼam (Sal. 50:14). Laj Tza tixyal xkehobʼresinkil laarahom chiru li Jehobʼa. Abʼan maakanabʼ naq tixbʼaanu (Job 27:5, TNM). Laarahom chiru li Jehobʼa ttenqʼanq aawe re xbʼaanunkil li xaayeechiʼi re, chi joʼkan tatnachʼoq chixkʼatq.

21. Kʼaʼut naqaye naq li xkubʼik qahaʼ aʼan xtiklajik kʼanjelak chiru li Jehobʼa?

²¹ Naq ak xaaqʼaxtesi aayuʼam chiru li Jehobʼa aatinan rikʼinebʼ li cheekel winq re xnawbʼal kʼaru tento taabʼaanu. Abʼan jultika naq li xkubʼik aahaʼ moko aran ta naraqeʼk chixjunil, aran bʼan natiklaak kʼanjelak chiru li Jehobʼa. Joʼkan naq, kʼe aachʼool xkawresinkil laarahom chirix li Jehobʼa ut sikʼ kʼaru xbʼaanunkil re naq tnimanq aʼin. Aʼan ttenqʼanq aawe naq taakubʼsi aahaʼ ut maajunwa tsachq saʼ laachʼool. Aʼan yal xtiklajik. Joʼkan bʼiʼ, junelik yooq chi kʼiik laarahom chirix li Jehobʼa ut li Jesús.