NAʼLEBʼ RE TZOLOK 10
Kʼaʼut tkubʼeeq aahaʼ?
«Chikubʼeeq eehaʼ chejunjunqal» (HECH. 2:38).
BʼICH 35 Qakʼehaq xwankil li qʼaxal chaabʼil
RUʼUJIL LI TZOLOM a
1, 2. a) Kʼaru nakʼulmank naq junaq nakubʼeek xhaʼ? b) Kʼaru tqil saʼ li tzolom aʼin?
MA AK aawilom li nekeʼkubʼeek xhaʼ? Chi anchalebʼ xchʼool nekeʼxsume li wiibʼ chi patzʼom li naxbʼaanu laj kʼehol seeraqʼ. Jwal sahebʼ saʼ xchʼool li xjunkabʼal ut ebʼ li ramiiw. Sahebʼ saʼ xchʼool naq nekeʼelk saʼ haʼ ut nekeʼxpoqʼpoqʼi ruqʼebʼ li yookebʼ chi ilok. Chi mil li kristiʼaan nekeʼxsubʼ ribʼ saʼ haʼ rajlal xamaan. Chi joʼkan nekeʼxkʼutbʼesi naq qʼaxtesinbʼil chik li xyuʼam chiru li Jehobʼa ut nekeʼok joʼ aj Testiiw.
2 Wi yookat xkʼoxlankil naq tkubʼeeq aahaʼ, naraj xyeebʼal naq yookat xsikʼbʼal «li Yos» ut naxbʼaanu naq moko taakʼam ta aawe rikʼin li ruuchichʼochʼ (Sal. 14:1, 2). Li tzolom aʼin kikawresimank choʼq qe chiqajunilo. Arin tqatzol oxibʼ li naʼlebʼ kʼaʼut tento tqaloqʼoni ru li Jehobʼa. Li tzolom aʼin tooxtenqʼa re naq tookʼanjelaq chiru li Jehobʼa chi junelik wi ak kubʼenaq chik qahaʼ.
LAARAHOM CHIRIX LI YAAL UT LI TIIKILAL
Ak naabʼal chihabʼ laj Tza naxye li tikʼtiʼ chirix xkʼabʼaʼ li Jehobʼa. (Chaawil li raqal 3 ut 4).
3. Kʼaʼut naqara li yaal ut li tiikilal? (Salmo 119:128, 163).
3 Li Jehobʼa naxye rehebʼ li xmoos: «Cherahaq bʼiʼ li tiikilal» (Zac. 8:19). Li Jesús kixkʼe ajwiʼ xwankil chanru naq tqasikʼ li tiikilal (Mat. 5:6). Aʼin naraj xyeebʼal naq tqayal qaqʼe xbʼaanunkil li nawulak chiru li Yos. Ma nakaara li yaal ut li tiikilal? Chʼolchʼo naq joʼkan. Joʼkan naq xikʼ nakaawil li tikʼtiʼ, li bʼalaqʼil naʼlebʼ ut li maaʼusilal (taayaabʼasi Salmo 119:128, 163). Li ani natikʼtiʼik naxkʼam re rikʼin laj Tza, li najolomink re li ruuchichʼochʼ (Juan 8:44; 12:31). Li naraj laj Tza aʼan xtzʼajninkil ru xkʼabʼaʼ li Jehobʼa. Chalen chaq saʼ xtiklajik junelik naxye tikʼtiʼ chirix li Yos, naxye naq li Yos kaw nataqlank, aj tikʼtiʼ ut naxram chiqu li us (Gén. 3:1, 4, 5). Saʼ xkʼabʼaʼ li xtikʼtiʼ naabʼal li kristiʼaan nekeʼxkʼoxla naq yibʼru xnaʼlebʼ. Naq ebʼ li kristiʼaan inkʼaʼ nekeʼxra li yaal, laj Tza naroksihebʼ re xbʼaanunkil yalaq kʼaru chi maaʼusilal (Rom. 1:25-31).
4. Chanru naxkʼutbʼesi li Jehobʼa naq aʼan li Yos tiik xchʼool? (Chaawil li jalam u).
4 Li Jehobʼa aʼan li Yos tiik xchʼool ut naxkʼut li yaal chiruhebʼ li nekeʼxra (Sal. 31:6). Naxbʼaanu aʼin naq naxtenqʼahebʼ re naq inkʼaʼ teʼbʼalaqʼiiq xbʼaan li xtikʼtiʼ laj Tza. Joʼkan ajwiʼ li Jehobʼa naxkʼut chiruhebʼ li xmoos naq teʼxye li yaal ut tiikaqebʼ xchʼool ut aʼin naxbʼaanu naq teʼwanq saʼ sahil chʼoolejil ut tuqtuukilal (Prov. 13:5, 6). Ma aawilom aʼin chalen naq xat-ok xtzolbʼal li Santil Hu? Xaakʼe reetal naq li Jehobʼa jwal us nokooxbʼeresi (Sal. 77:14). Ut saʼ xkʼabʼaʼ aʼin nakaawaj xpaabʼankil li xchaqʼrabʼ li Jehobʼa (Mat. 6:33). Joʼkan ajwiʼ nakaawaj xkolbʼal li yaal ut xkʼutbʼesinkil naq chixjunil li kixye laj Tza chirix li Jehobʼa tikʼtiʼ. Chankiru taabʼaanu?
5. Kʼaru tatruuq xbʼaanunkil re xkolbʼal li yaal ut li tiikilal?
5 Rikʼin laabʼaanuhom taakʼutbʼesi naq nakaatzʼeqtaana li xtikʼtiʼ laj Tza, oxloqʼ chaawu li yaal, naq li Jehobʼa aʼanaq laaʼawabʼej ut nakaapaabʼ li xchaqʼrabʼ. Re naq tatruuq xbʼaanunkil aʼin tento naq taaye re li Jehobʼa saʼ jun li tij naq tatkʼanjelaq chiru chi junelik. Moqon chik naq taasubʼ aawibʼ saʼ haʼ taakʼutbʼesi naq qʼaxtesinbʼil chik laayuʼam chiru. Wi taara li yaal ut li tiikilal t-alaaq saʼ laachʼool xsubʼal aawibʼ saʼ haʼ.
LAARAHOM CHIRIX LI JESUKRIIST
6. Joʼ naxye Salmo 45:5, kʼaru wiibʼ oxibʼ xyaalal naq tqara li Jesukriist?
6 Kʼaʼut nakaara li Jesukriist? Natawmank wiibʼ oxibʼ li xyaalal saʼ Salmo 45:5 (taayaabʼasi). Li Jesús naxkol rix li yaal, li kubʼsink ibʼ ut li tiikilal. Joʼkan bʼiʼ, wi nakaara li yaal ut li tiikilal, nakaara ajwiʼ li Jesús. Kʼoxla chanru li Jesús kixkol rix li yaal ut li tiikilal (Juan 18:37). Chanru kixkʼutbʼesi li Jesús naq naxkubʼsi ribʼ?
7. Kʼaru nawulak chaawu naq li Jesús naxkubʼsi ribʼ?
7 Li Jesús kixkʼutbʼesi naq naxkubʼsi ribʼ rikʼin li xbʼaanuhom. Aʼan maajunwa kixsikʼ xloqʼal; naxkʼe bʼan xloqʼal li Xyuwaʼ (Mar. 10:17, 18; Juan 5:19). Kʼaru nakaakʼoxla chirix naq naxkubʼsi ribʼ li Jesús? Peʼyaal naq aʼin naxbʼaanu naq taara li Jesús ut taawaj xtaqenkil? Chʼolchʼo naq joʼkan. Kʼaʼut naq naxkubʼsi ribʼ? Xbʼaan naq li Jehobʼa naxkubʼsi ribʼ ut li Jesús naxra Xyuwaʼ ut naxkʼam re rikʼin (Sal. 18:36; Heb. 1:3). Peʼyaal naq aʼin naxbʼaanu naq tatjiloq chixkʼatq li Jesús?
8. Kʼaʼut nawulak chiqu naq li Jesús aʼan li Qaʼawabʼej?
8 Qʼaxal nawulak chiqu naq li Jesús aʼan li Qaʼawabʼej xbʼaan naq jwal chaabʼil naʼawabʼejink. Li Jehobʼa kixkawresi ut kixxaqabʼ choʼq Awabʼej (Is. 50:4, 5). Li Jesús kixkʼutbʼesi naq jwal nokooxra (Juan 13:1). Tento tqara li Jesús xbʼaan naq aʼan li Qaʼawabʼej. Aʼan kixye ajwiʼ naq li nekeʼxra li yaal nekeʼxkʼutbʼesi li xrahom chiru ut wankebʼ choʼq ramiiw li nekeʼxpaabʼ li xchaqʼrabʼ (Juan 14:15; 15:14, 15). Jwal oxloqʼ chiqu naq li Jesús wank choʼq qamiiw!
9. Chanru naq juntaqʼeet bʼayaq xkubʼik xhaʼ li Jesús rikʼinebʼ li xtzolom?
9 Li Jesús kixye rehebʼ li xtzolom naq tento teʼkubʼeeq xhaʼ (Mat. 28:19, 20). Aʼan kikʼamok qabʼe. Usta wank xjalanil li xkubʼik xhaʼ li Jesús rikʼinebʼ li xtzolom, wank ajwiʼ xjuntaqʼeetil (chaawil li kaaxukuut « Xjalanil li xkubʼik xhaʼ li Jesús rikʼin li xtzolom»). Naq li Jesús kixkubʼsi xhaʼ, kiʼok xbʼaanunkil li rajom li Jehobʼa (Heb. 10:7). Joʼkan ajwiʼ nekeʼxbʼaanu li xtzolom. Naq nekeʼxkubʼsi xhaʼ nekeʼxkʼutbʼesi naq xeʼxqʼaxtesi xyuʼam chiru li Jehobʼa ut chalen saʼ li kutan aʼan li wank xwankil chiruhebʼ aʼan xbʼaanunkil li rajom li Yos. Chi joʼkan nekeʼxtaqe li Jesús.
10. Kʼaru xyaalal naq nakaara li Jesús ut kʼaru tatrekʼasi xbʼaanunkil?
10 Chʼolchʼo chaawu naq li Jesús aʼan Ralal li Jehobʼa ut aʼan kisikʼok ru re naq T-awabʼejinq saʼ qabʼeen. Nakaanaw naq li Jesús naxkubʼsi xwankil ut naxkʼam re rikʼin li Xyuwaʼ. Xaatzol ajwiʼ naq kixkʼe xwahebʼ li nekeʼtzʼokaak, kixkʼojobʼebʼ xchʼool li nekeʼchʼinaak xchʼool ut kixkʼirtasihebʼ li yaj (Mat. 14:14-21). Nakaakʼe reetal naq aʼan nabʼeresink re xmolam li Jehobʼa saʼebʼ li qakutan (Mat. 23:10). Nakaanaw ajwiʼ naq aʼan li Awabʼej saʼ li Xʼawabʼejilal li Yos ut tixkʼe qe naabʼal li osobʼtesihom saʼ li kutan chalkebʼ re. Chanru taakʼutbʼesi laarahom chirix? Naq nakaakʼam aawe rikʼin (Juan 14:21). Joʼkan naq aajel ru naq taaqʼaxtesi laayuʼam chiru li Jehobʼa ut taasubʼ aawibʼ saʼ haʼ.
LAARAHOM CHIRIX LI JEHOBʼA
11. Bʼar wank xyaalal li wank xwankil re naq tkubʼeeq aahaʼ ut kʼaʼut?
11 Bʼar wank xyaalal li wank xwankil re naq tkubʼeeq aahaʼ? Naqataw ru aʼin chirix li kixye li Jesús saʼ li xnimal ru chaqʼrabʼ. Kixye: «Taara li Qaawaʼ laaYos chi anchal aachʼool, chi anchal aawaanm, chi anchal aakʼaʼuxl ut chi anchal aametzʼew» (Mar. 12:30). Ma joʼkan ajwiʼ nakaawekʼa aawibʼ chirix li Jehobʼa?
Chixjunil li kʼaru wank aawe ut li taawechani saʼ li kutan chalk re, aʼan jun maatan chalenaq rikʼin li Jehobʼa. (Chaawil li raqal 12 ut 13).
12. Kʼaʼut nakaara li Jehobʼa? (Chaawil ebʼ li jalam u).
12 Wank naabʼal xyaalal re xraabʼal li Jehobʼa. Xaatzol naq aʼan «li xyoʼlebʼaal li yuʼam» ut naq naxkʼe «chixjunil li usilal kʼeebʼil qe ut chixjunil li qamaatan li tzʼaqal re ru» (Sal. 36:10; Sant. 1:17). Chixjunil li chaabʼil echej li wank aawe chalenaq rikʼin li Jehobʼa li nakʼehok ut qʼaxal nokooxra.
13. Kʼaʼut naq li xkamik li Jesús aʼan jun nimla maatan?
13 Li xkamik li Jesús aʼan jun nimla maatan li kixkʼe qe li Jehobʼa. Abʼan, kʼaʼut naqaye aʼin? Qakʼoxlaq chirix chanru li Jehobʼa ut li Jesús nekeʼxra ribʼ. Li Jesús kixye: Nikinxra «li Yuwaʼbʼej» ut «Ninra li Yuwaʼbʼej» (Juan 10:17; 14:31). Saʼ xnumikebʼ li chihabʼ kinimank li rahom li nekeerekʼa chiribʼilebʼ ribʼ (Prov. 8:22, 23, 30). Kʼoxla chirix chanru kirekʼa ribʼ li Jehobʼa naq kixkʼe chi kamk li Ralal. Abʼan kixbʼaanu xbʼaan naq nokooxra ut naraj naq twanq qayuʼam chi junelik (Juan 3:16; Gál. 2:20). Ma wank junaq chik li naʼlebʼ chiru aʼin re naq tqara li Yos?
14. Kʼaru li qʼaxal chaabʼil naru nakaasikʼ saʼ laayuʼam?
14 Laarahom chirix li Jehobʼa naru tkawuuq naq yooqat xtzolbʼal chirix. Chʼolchʼo naq nakaawaj naq laaʼamiiwil rikʼin tkʼiiq anaqwan ut chi junelik ut naruhank xbʼaanunkil. Naru nakaasahobʼresi xchʼool li Jehobʼa rikʼin laawaatin ut laabʼaanuhom. Ut li Jehobʼa naraj naq taabʼaanu aʼin (Prov. 23:15, 16). Li taabʼaanu rikʼin laayuʼam tixkʼutbʼesi ma relik chi yaal nakaara li Jehobʼa (1 Juan 5:3). Aʼin li qʼaxal chaabʼil li naru taasikʼ saʼ laayuʼam.
15. Chankiru taakʼutbʼesi laarahom chiru li Jehobʼa?
15 Chankiru taakʼutbʼesi laarahom chiru li Jehobʼa? Naq taaqʼaxtesi laayuʼam chiru li Nimajwal Yos saʼ jun li tij (Sal. 40:9). Moqon, taakubʼsi laahaʼ re xkʼutbʼesinkil naq xaaqʼaxtesi laayuʼam chiru li Jehobʼa. Joʼ xqil saʼ li tzolom aʼin, li xkubʼik aahaʼ naxkʼe xsahil aachʼool ut naxjal laayuʼam. Chalen saʼ li kutan aʼan kaʼaj chik li rajom li Jehobʼa tat-oq xbʼaanunkil saʼ laayuʼam (Rom. 14:8; 1 Ped. 4:1, 2). Maare tchʼaʼajkoʼq chaawu xbʼaanunkil aʼin, abʼan wi taabʼaanu taataw naabʼal xsahil aachʼool. Qilaq kʼaʼut.
16. Joʼ naxye Salmo 41:13, chanru trosobʼtesihebʼ li Jehobʼa li nekeʼkʼanjelak chiru?
16 Maaʼani chik nakʼehok joʼ li Jehobʼa. Maakʼaʼ naxye kʼaru taakʼe re, aʼan qʼaxal naabʼal chik tixkʼe aawe (Mar. 10:29, 30). Usta wanko saʼ rosoʼjik li Jehobʼa tixkʼe aawe jun chaabʼil yuʼam. Aʼin yal xtiklajik. Li xbʼehil li kʼanjelak chiru li Jehobʼa natiklaak rikʼin li kubʼihaʼ; naru tatkʼanjelaq chiru chi junelik. Laarahom chirix li Jehobʼa ut li narekʼa chaawix tkʼiiq ut naru tatwanq chi junelik joʼ aʼan (taayaabʼasi Salmo 41:13).
17. Kʼaru maakʼaʼ wank re li Jehobʼa ut naru taayeechiʼi re?
17 Naru nakaakʼe jun xnimal ru maatan re li Jehobʼa naq nakaaqʼaxtesi laayuʼam chiru ut nakubʼeek aahaʼ. Li Jehobʼa kikʼehok aawe chixjunil li kʼaru wank aawe ut xsahil laachʼool. Naru nakaayeechiʼi re laj Yobʼtesinel li kʼaru maakʼaʼ re: li xtiikilal aachʼool ut kʼanjelak junelik chiru (Job 1:8; 41:11; Prov. 27:11). Aʼin li qʼaxal chaabʼil li tatruuq xbʼaanunkil. Laarahom chirix li Jehobʼa t-ekʼasinq aawe re xkubʼsinkil aahaʼ.
MA AK KAWRESINBʼILAT RE XKUBʼSINKIL AAHAʼ?
18. Kʼaru ebʼ li patzʼom naru nakaakʼoxla rix?
18 Ma tkubʼeeq aahaʼ rikʼin li ak xqatzʼil rix? Kaʼajwiʼ laaʼat tatruuq xsumenkil aʼin. Abʼan li naru tatxtenqʼa aʼan xkʼoxlankil: «Ma ak kawresinbʼilin re xkubʼsinkil inhaʼ?» (Hech. 8:36). Jultika li oxibʼ chi naʼlebʼ li xqatzʼil rix. Xbʼeen, laarahom chirix li yaal ut li tiikilal. Kʼoxla aʼin: «Ma nawaj rilbʼal li kutan naq chixjunilebʼ teʼxye li yaal ut teʼxbʼaanu li us?». Xkabʼ, laarahom chirix li Jesukriist. Kʼoxla aʼin: «Ma nawaj naq li Jesús twanq choʼq Inʼawabʼej ut tintaqe li xbʼe?». Ut rox, li qʼaxal wank xwankil aʼan laarahom chirix li Jehobʼa. Kʼoxla aʼin: «Ma nawaj xsahobʼresinkil xchʼool li Jehobʼa naq ninkʼanjelak chiru?». Wi xaasume joʼkan re li junjunq chi patzʼom aʼin, kʼaʼut naq toj maajiʼ nakubʼeek aahaʼ? Kʼaru naramok chaawu? (Hech. 16:33).
19. Kʼaʼut naq inkʼaʼ twiibʼanq aachʼool chi xkubʼsinkil aahaʼ? Kʼe jun li eetalil (Juan 4:34).
19 Wi toj maajiʼ chʼolchʼo chaawu ma tkubʼeeq aahaʼ, kʼoxla li eetalil li kixkʼe li Jesús (taayaabʼasi Juan 4:34). Li Jesús kixye naq li rajom li Xyuwaʼ chanchan li xtzekemq. Kʼaʼut? Xbʼaan naq li tzekemq nokooxtenqʼa. Li Jesús naxnaw naq chixjunil li naxpatzʼ qe li Jehobʼa us choʼq qe. Inkʼaʼ tixpatzʼ qe xbʼaanunkil junaq li naʼlebʼ li tooxrahobʼtesi. Li naraj li Jehobʼa aʼan naq tkubʼeeq aahaʼ (Hech. 2:38). Joʼkan naq chʼolchʼooq chaawu naq us tat-elq wi nakaapaabʼ li naxye aawe. Wi teʼxkʼe aawe jun li tzekemq li jwal nawulak chaawu, ma tatbʼayq chi xtzakankil? Chʼolchʼo naq inkʼaʼ, joʼkan naq miwiibʼank aachʼool chi xkubʼsinkil aahaʼ.
20. Kʼaru tqil saʼ li jun chik tzolom?
20 Kʼaʼut wankebʼ nekeʼchʼaʼajkoʼk chiru xbʼaanunkil aʼin? Maare nekeʼxkʼoxla naq moko kawresinbʼilebʼ ta. Li qʼaxal wank xwankil saʼ laayuʼam aʼan xqʼaxtesinkil aayuʼam chiru li Jehobʼa. Joʼkan bʼiʼ, kʼe aahoonal chi xkʼoxlankil rix ut chi xkawresinkil aawibʼ. Abʼan, wi taawaj xkubʼsinkil aahaʼ, kʼaru ttenqʼanq aawe chi xbʼaanunkil? Tqil saʼ li jun chik tzolom.
BʼICH 28 Chanru toowanq choʼq ramiiw li Jehobʼa
a Aajel ru naq teʼkubʼeeq xhaʼ li nekeʼxtzol li Santil Hu. Kʼaru ttenqʼanq rehebʼ re naq teʼxbʼaanu aʼin? Li rahok. Saʼ li tzolom aʼin tqil ani ut kʼaru teʼxra. Tqatzʼil ajwiʼ rix chankiru xyuʼam li kubʼenaq chikan xhaʼ.
