1. Kʼaru nekeʼraj li naʼbʼej yuwaʼbʼej choʼq rehebʼ li xkokʼal?

 EX NAʼBʼEJ yuwaʼbʼej, naqanaw naq nekeeraj xtenqʼankil leeralal eekʼajol chi xnawbʼal ut xraabʼal li Jehobʼa. Abʼan xbʼaan naq inkʼaʼ naqil ru, kʼaru texruuq xbʼaanunkil re naq teʼxnaw ru ut teʼjiloq chixkʼatq? (Sant. 4:8).

2. Chanru naq ebʼ li naʼbʼej yuwaʼbʼej naru nekeʼxkʼut chiruhebʼ li ralal xkʼajol chirix li Jehobʼa ut li xnaʼlebʼ?

² Ebʼ li naʼbʼej yuwaʼbʼej naru nekeʼxtenqʼa ebʼ li ralal xkʼajol chi nachʼok rikʼin li Jehobʼa naq nekeʼxtzol li Santil Hu saʼ komonil (2 Tim. 3:14-17). Li Santil Hu naxkʼut jalan chik li naʼlebʼ li naru naxtenqʼa ebʼ li saaj re xnawbʼal ru li Jehobʼa. Saʼ li hu Proverbios, jun li yuwaʼbʼej naʼaatinak rikʼin li ralal ut naxwaklesi xchʼool re naq tixkʼe reetal li xnaʼlebʼ li Jehobʼa li nakʼutunk saʼ li xyobʼtesihom (Prov. 3:19-21). Saʼ li tzolom aʼin tqil chanru ebʼ li naʼbʼej yuwaʼbʼej naru nekeʼroksi li yobʼtesihom re xkʼutbʼal chiruhebʼ li ralal xkʼajol chirix li Jehobʼa ut li xnaʼlebʼ.

3. Chanru ebʼ li naʼbʼej yuwaʼbʼej teʼxtenqʼa ebʼ li ralal xkʼajol?

³ Li Santil Hu naxye «chalen chaq saʼ xkʼojlajik li ruuchichʼochʼ li kʼaʼaq re ru inkʼaʼ ilbʼil ru re li Yos [...] nakʼutunk chiruhebʼ li nekeʼkʼoxlak chirixebʼ li xbʼaanuhom» (Rom. 1:20). Peʼyaal naq nekeeyal xsahil naq nekexxik chi bʼeek rikʼinebʼ leeralal eekʼajol? Oksihomaq li hoonal aʼin re xtenqʼankilebʼ  chi rilbʼal chanru naxchap ribʼ li xyobʼtesihom li Jehobʼa rikʼin li xnaʼlebʼ. Qilaq kʼaru teʼxtzol ebʼ li naʼbʼej yuwaʼbʼej rikʼin li Jesús.

4. Chanru kiroksi li Jesús li yobʼtesihom re xtzolbʼalebʼ li xtzolom? (Lucas 12:24, 27-30).

⁴ Chaakʼe reetal chankiru li Jesús kiroksi li yobʼtesihom re kʼutuk. Saʼ jun kutan kixye re li xtzolom naq teʼril li tzʼoq ut li uutzʼuʼuj (taayaabʼasi Lucas 12:24, 27-30). Li Jesús kiruuk raj roksinkil jalan chik chi xul ut pim abʼanan kiroksi li nawno ru chiruhebʼ li xtzolom. Li Jesús maare kiril ebʼ li tzʼoq naq nekeʼrupupik chiru choxa ut li uutzʼuʼuj naq naʼelk li ratzʼum. Maare li Jesús kixkʼut aʼin naq yook chaq chi aatinak. Ut kʼaru kixbʼaanu li Jesús naq ak xchʼolobʼ li eetalil aʼin? Kixkʼut chiruhebʼ li xtzolom jun li xnimal ru naʼlebʼ: naq li Jehobʼa naru xchʼolaninkilebʼ li xmoos xbʼaan naq aʼan jun Yuwaʼbʼej li nakʼehok ut aj rahonel, joʼ naxbʼaanu rikʼinebʼ li tzʼoq ut li uutzʼuʼuj.

5. Kʼaru li eetalil chirix li yobʼtesihom naru teʼroksi li naʼbʼej yuwaʼbʼej re xtenqʼankil li ralal xkʼajol chi xnawbʼal ru li Jehobʼa?

⁵ Ex naʼbʼej yuwaʼbʼej chanru teekʼam eere rikʼin li Jesús naq nekexkʼutuk? Naru texʼaatinaq rikʼinebʼ chirix jun li yobʼtesihom li jwal nawulak cheeru, joʼ junaq xul malaj uutzʼuʼuj. Ut kʼutumaq chiruhebʼ kʼaru naxkʼut chirix li Jehobʼa. Moqon, naru taapatzʼ re laawalal bʼar wank li xul malaj li uutzʼuʼuj li jwal nawulak chiru. Naru naq tixkʼe xchʼool chaawabʼinkil naq nakat-aatinak chirix li xnaʼlebʼ li Jehobʼa wi nakaawoksi jun li yobʼtesihom li nawulak chiru.

6. Kʼaru naqatzol rikʼin li xnaʼ laj Christopher?

⁶ Aʼin moko naraj ta xyeebʼal naq ebʼ li naʼbʼej yuwaʼbʼej teʼxkʼe naabʼal li xhoonal xsikʼbʼal li xnaʼlebʼebʼ chirix jun li xul malaj uutzʼuʼuj. Li Jesús moko kixchʼolobʼ ta chanru nekeʼwaʼak ebʼ li tzʼoq malaj chanru nekeʼkʼiik ebʼ li uutzʼuʼuj. Maare laachʼinaʼal nawulak chiru xnawbʼal li xchamal li naʼlebʼ chirix li yobʼtesihom abʼan wi taasume rikʼin wiibʼ oxibʼ li aatin ut patzʼom, naru natenqʼank re. Laj Christopher jun li hermaan, naxye: «Linnaʼ naroksi li wank saʼ qasutam re xchʼolobʼankil chiqu junaq li naʼlebʼ ut aʼin kixbʼaanu naq oxloqʼaq chiqu li yobʼtesihom. Naq wanko chixkʼatq jun li tzuul naxye: “Kʼajoʼ chʼinaʼus li tzuul! Peʼyaal naq chaabʼil li xnaʼlebʼ li Jehobʼa?”. Ut naq wanko chixkʼatq li palaw naxye: “Ilomaq, kaw roq li palaw! Kʼajoʼ kaw ribʼ li Jehobʼa”». Laj Christopher naxye: «Usta yal wiibʼ oxibʼ li aatin naxye qe, naxbʼaanu naq tqakʼoxla rix li yobʼtesihom».

7. Kʼaru texruuq xbʼaanunkil re xkʼutbʼalebʼ chiru leeralal naʼlebʼak chirix li yobʼtesihom?

⁷ Naq yookebʼ chi kʼiik leekokʼal naru nekeetenqʼahebʼ chi naʼlebʼak chirix li yobʼtesihom ut xtzolbʼal li xnaʼlebʼ li Jehobʼa. Naru nekexʼaatinak chirix junaq li yobʼtesihom rikʼinebʼ leekokʼal ut patzʼ rehebʼ: «Kʼaru naxkʼut chaawu chirix li Jehobʼa?». Maare tsachq eechʼool chi rabʼinkil chanru teʼxsume (Mat. 21:16).

8. Kʼaru xeʼruuk xbʼaanunkil ebʼ laj Israel naq yookebʼ chi bʼeek rikʼinebʼ li ralal xkʼajol?

⁸ Xeʼyeeheʼk re laj Israel naq teʼxkʼut chiruhebʼ li xkokʼal li xchaqʼrabʼ li Jehobʼa naq wanqebʼ chiru li bʼe (Deut. 11:19). Saʼebʼ li bʼe li wank Israel naru naʼilmank  naabʼal li uutzʼuʼuj ut li xul. Ut aʼin naru teʼroksi ebʼ laj Israel re naq ebʼ li ralal xkʼajol teʼalaaq saʼ xchʼool xtzolbʼal li xnaʼlebʼ li Jehobʼa saʼ li xyobʼtesihom. Saʼ li qakutan ebʼ li naʼbʼej yuwaʼbʼej naru teʼxbʼaanu ajwiʼ aʼin. Qilaq kʼaru xeʼxbʼaanu wiibʼ oxibʼ rehebʼ.

9. Kʼaru nakaatzol chirix li xPunitha ut li xKatya?

⁹ Li xPunitha aʼan jun li naʼbʼej li wank India, naxye: «Naq li qajunkabʼal narulaʼani linkomon saʼ jun li teep, naqakʼam li hoonal aʼan re xkʼutbʼalebʼ chiruhebʼ li qakokʼal chirix li xyobʼtesihom li Yos. Nawekʼa naq nekeʼxtaw ru chiʼus chirix li yobʼtesihom naq wanko saʼ li naʼaj aʼan». Ex naʼbʼej yuwaʼbʼej leekokʼal maajunwa tsachq saʼ xchʼool naq nekeekʼe leehoonal chi wank rikʼinebʼ saʼ junaq li chʼinaʼusil naʼajej. Li xKatya li wank Moldavia, naxye: «Naq ninjultika li hoonal li xinnumsi rikʼin linnaʼ linyuwaʼ chanchan tawiʼ naq ewer xkʼulmank. Oxloqʼ chiwu naq xeʼxkʼut chiwu saʼ linkachʼinal li xyobʼtesihom li Jehobʼa ut chanru li xnaʼlebʼ».

10. Kʼaru naru teʼxbʼaanu ebʼ li naʼbʼej yuwaʼbʼej wi nachʼaʼajkoʼk chiruhebʼ xik saʼ junaq li teep? (Chaawil li kaaxukuut « Tenqʼ choʼq rehebʼ li naʼbʼej yuwaʼbʼej»).

¹⁰ Ut wi nachʼaʼajkoʼk cheeru xik saʼ junaq li teep? Laj Amol li wank India, naxye: «Bʼarwiʼ wankin ebʼ li naʼbʼej yuwaʼbʼej kaw nekeʼkʼanjelak ut chiru naabʼal hoonal ut terto xik saʼ junaq li teep. Abʼan tooruuq ajwiʼ aatinak chirix li xnaʼlebʼ li Jehobʼa saʼ jun li parke malaj saʼ xbʼeen li ochoch». Ex naʼbʼej yuwaʼbʼej, wi nekeekʼe eechʼool chi xsikʼbʼal, naru teetaw ebʼ li yobʼtesihom saʼ leesutam li naru teekʼut chiruhebʼ leeralal eekʼajol (Sal. 104:24). Maare teʼril ebʼ li xikʼanel xul, li kokʼ xul, ebʼ li awimq ut jalan chik. Li xKarina li wank Alemania, naxye: «Kʼajoʼ nawulak  chiru linnaʼ ebʼ li uutzʼuʼuj. Naq kachʼinin chaq, naxkʼut chiwu ebʼ li junjunq chi uutzʼuʼuj li jwal chʼinaʼusebʼ naq yooko chi bʼeek». Naru taawoksi ebʼ li tasal hu ut bʼideo chirix li yobʼtesihom li naxkʼe li xmolam li Jehobʼa. Maakʼaʼ naxye laawanjik naru taatenqʼa laawalal aakʼajol chi rilbʼal li xyobʼtesihom li Jehobʼa. Anaqwan qilaq junjunq li xnaʼlebʼ li Jehobʼa li naru tat-aatinaq wiʼ rikʼinebʼ laakokʼal.

11. Chanru ebʼ li naʼbʼej yuwaʼbʼej naru nekeʼxtenqʼa li xkokʼal chi rilbʼal li xrahom li Jehobʼa?

¹¹ Re xtenqʼankilebʼ laakokʼal chi rilbʼal li xrahom li Jehobʼa, naru taakʼutebʼ chiru chanru naq ebʼ li xul nekeʼxkʼaakʼale li ral (Mat. 23:37). Naru ajwiʼ nakat-aatinak chirix yalaq kʼaru chi yobʼtesihom ut li nawulak chaawu. Li xKarina, li xooʼaatinak wiʼ saʼ li raqal 10, naxye: «Naq ninʼelk chi bʼeek rochbʼeen linnaʼ, naxye we naq tinxaqliiq ut twil li xjalanil li junjunq chi uutzʼuʼuj ut chanru li xchaabʼilal naxkʼut li xrahom li Jehobʼa. Saʼ xnumikebʼ li chihabʼ toj nawil li xchʼinaʼusal, li xbʼonol ut chanru yiibʼanbʼilebʼ li uutzʼuʼuj. Chixjunil aʼin naxjultika chiwu li xrahom li Jehobʼa».

12. Kʼaru teʼruuq xbʼaanunkil li naʼbʼej yuwaʼbʼej re xkʼutbʼesinkil li xnimal xnaʼlebʼ li Jehobʼa? (Salmo 139:14; chaawil ebʼ li jalam u).

¹² Cheetenqʼa leeralal eekʼajol chi rilbʼal li xnimal xnaʼlebʼ li Jehobʼa, li naxqʼax ru li xnaʼlebʼ li winq (Rom. 11:33). Naru naq teeye rehebʼ leeralal eekʼajol naq li haʼ nasutqʼiik joʼ choql ut naxik yalaq bʼar (Job 38:36, 37, Wy). Joʼkan ajwiʼ naru teechʼolobʼ chanru yiibʼanbʼil li qajunxaqalil (taayaabʼasi Salmo 139:14). Qilaq kʼaru kixbʼaanu laj Vladimir jun yuwaʼbʼej. Aʼan naxye: «Saʼ jun kutan li qayum kitʼaneʼk saʼ bʼisikleet ut kixtochʼ ribʼ. Saʼ xnumikebʼ li kutan kikʼiraak li xtochʼolal. Xqachʼolobʼ chiru naq li Jehobʼa kixyobʼtesi li qajunxaqalil re naq tkʼiraaq xjunes. Xqaye ajwiʼ re naq moko juntaqʼeet ta rikʼin li nekeʼxyiibʼ ebʼ li kristiʼaan. Jun eetalil, naq jun li bʼelebʼaal chʼiichʼ naxtochʼ ribʼ rikʼin jalan chik inkʼaʼ naxyiibʼ ribʼ xjunes. Rikʼin li eetalil aʼin  li walal kiruuk xtawbʼal naq nim ru xnaʼlebʼ li Jehobʼa».

13. Kʼaru teʼruuq xbʼaanunkil li naʼbʼej yuwaʼbʼej re xtenqʼankilebʼ li ralal xkʼajol xkʼoxlankil li xwankilal li Jehobʼa? (Isaías 40:26).

¹³ Li Jehobʼa naraj naq tqil ebʼ li chahim re rilbʼal chanru nakʼanjelak li xwankilal (taayaabʼasi Isaías 40:26). Naru nekeeye rehebʼ leeralal eekʼajol re naq teʼril li choxa ut xkʼoxlankil rix. Li xTingting jun li hermaan re Taiwán naxjultika kʼaru kixkʼul naq toj kachʼin chaq. Naxye: «Jun sut laaʼin ut linnaʼ xookoho saʼ jun li naʼajej li najt chiru li tenamit, aran xqil li choxa nujenaq chi chahim. Saʼebʼ li hoonal aʼan ebʼ li wechtzolom nekeʼxyal xminbʼal wu ut ninxuwak xrahobʼtesinkil xchʼool li Jehobʼa. Linnaʼ kixjultika chiwu naq li Jehobʼa kiroksi li xwankil re xyiibʼankil li chahim ut kixye naq li Jehobʼa truuq ajwiʼ roksinkil li xwankilal re intenqʼankil. Naq xoowulak wiʼ chik saʼ qochoch xinkʼe inchʼool chi xnawbʼal ru li Jehobʼa ut kʼanjelak chiru maakʼaʼ naxye li tinkʼul».

14. Chanru naq ebʼ li naʼbʼej yuwaʼbʼej teʼroksi li yobʼtesihom chi xkʼutbʼal chanru naq li Jehobʼa aʼan jun Yos sa saʼ xchʼool?

¹⁴ Li xyobʼtesihom li Jehobʼa naxkʼut naq sa saʼ xchʼool. Li wankebʼ xnawom chirix aʼin nekeʼxye naq ebʼ li xul nekeʼbʼatzʼunk (Job 40:20). Maare ebʼ laakokʼal nekeʼseʼek naq nekeʼril junaq li mis yook chi bʼatzʼunk rikʼin noqʼ malaj ebʼ li kokʼ tzʼiʼ nekeʼbʼatzʼunk chiribʼilebʼ ribʼ. Naq taakʼe reetal chanru laawalal nasahoʼk saʼ xchʼool chi bʼatzʼunk rikʼin junaq li xul jultika chiru naq nokookʼanjelak chiru li Yos li sa saʼ xchʼool (1 Tim. 1:11, TNM).

15. Kʼaru ttenqʼanq rehebʼ li naʼbʼej yuwaʼbʼej re xnawbʼal kʼaru nekeʼxkʼoxla li ralal xkʼajol? (Proverbios 20:5; chaawil li jalam u).

¹⁵ Wank sut nachʼaʼajkoʼk chiruhebʼ li alal kʼajolbʼej xyeebʼal rehebʼ li xnaʼ xyuwaʼ li chʼaʼajkilal li nekeʼxkʼul. Wi nekeekʼul aʼin, kʼaru ttenqʼanq eere chi xnawbʼal li nekeʼxkʼoxla leeralal eekʼajol? (Taayaabʼasi Proverbios 20:5). Li natenqʼank rehebʼ  wiibʼ oxibʼ li yuwaʼbʼej aʼan aatinak rikʼinebʼ li xkokʼal naq yookebʼ chi rilbʼal li yobʼtesihom. Kʼaʼut? Xbʼaan naq aran maakʼaʼ tchʼiʼchʼiʼinq rehebʼ. Laj Masahiko jun yuwaʼbʼej aj Taiwán, naxye chi joʼkaʼin: «Naq nokooxik chire palaw malaj saʼ junaq li tzuul rikʼinebʼ li qalal qakʼajol sahebʼ saʼ xchʼool. Joʼkan naq moko chʼaʼaj ta aatinak ut rabʼinkil kʼaru nekeʼxkʼoxla chirix junaq li naʼlebʼ». Li xKatya, li xooʼaatinak wiʼ saʼ li raqal 9, naxye: «Naq ninraqeʼk chi tzolok, linnaʼ nikinxkʼam saʼ jun li chʼinaʼusil parke. Sa aatinak rikʼin linnaʼ saʼ li naʼajej aʼan chirix li ninkʼul saʼ li tzolebʼaal ut li naxkʼe inkʼaʼuxl».

16. Chanru teʼxyal xsahil li junkabʼal rilbʼal li xyobʼtesihom li Jehobʼa?

¹⁶ Li xyobʼtesihom li Jehobʼa naxbʼaanu ajwiʼ naq ebʼ li junkabʼal teʼruuq chi hilank ut aʼin naxbʼaanu naq teʼwanq saʼ junajil. Li Santil Hu naxye naq «wank xqʼehil li seʼek» ut «wank xqʼehil li xajok» (Ecl. 3:1, 4). Li Jehobʼa kixyiibʼ wiibʼ oxibʼ li chaabʼil naʼajej saʼ ruuchichʼochʼ re naq tqayal xsahil. Naabʼal li junkabʼal nawulak chiruhebʼ xik saʼ parke, saʼ tzuul malaj chire li palaw. Junjunq li kokʼal nawulak chiruhebʼ aanilak, rilbʼal ebʼ li xul malaj numxik saʼ nimaʼ malaj saʼ li palaw. Chʼolchʼo naq naru tqayal xsahil rilbʼal chixjunil li xyobʼtesihom li Jehobʼa.

17. Kʼaʼut naq ebʼ li naʼbʼej yuwaʼbʼej teʼxtenqʼa ebʼ li xkokʼal re xyalbʼal xsahil li xyobʼtesihom li Jehobʼa?

¹⁷ Saʼ li akʼ ruuchichʼochʼ ebʼ li junkabʼal teʼxyal xsahil li xyobʼtesihom li Jehobʼa chi junelik. Inkʼaʼ chik tqaxuwa ebʼ li xul, chi moko aʼanebʼ tooʼeʼxxuwa (Is. 11:6-9). Naabʼalaq qahoonal re xyalbʼal xsahil li xyobʼtesihom li Jehobʼa (Sal. 22:27). Ex naʼbʼej yuwaʼbʼej meeroybʼeni naq twulaq li hoonal aʼan re xtenqʼankilebʼ leeralal eekʼajol chi rilbʼal ut xtzolbʼal chirix li yobʼtesihom. Wi chalen chaq anaqwan nekeeyal eeqʼe chi xkʼutbʼal li chaabʼil naʼlebʼ naqatzol saʼ li xyobʼtesihom li Jehobʼa, chʼolchʼo naq teʼrekʼa joʼ kixye laj David: «Ani ta chik joʼ laaʼat saʼ xyanqebʼ chixjunilebʼ li yos? Maajun nabʼaanunk re joʼ li nakaabʼaanu laaʼat!» (Sal. 86:8).