Kʼaʼut kixye «li winq» naq wi tsumlaaq rikʼin li xRut «twanq chʼaʼajkilal» rikʼin li xchʼochʼ? (Rut 4:1, 6).

Najter, wi jun li winq nakamk chi maakʼaʼ ralal xkʼajol, wank wiibʼ oxibʼ li patzʼom li nabʼaanumank. Kʼaru nakʼulmank rikʼin li xchʼochʼ? Ma taasach li xkʼabʼaʼ li xjunkabʼal? Li Xchaqʼrabʼ laj Moisés naxsume chixjunil li patzʼom aʼin.

Wi jun li winq nakamk malaj naxkʼayi li xchʼochʼ xbʼaan naq kiʼok saʼ nebʼaʼil, jun li ras malaj rech-alal naru naxloqʼ li xchʼochʼ. Chi joʼkan li chʼochʼ toj twanq saʼ li xjunkabʼal (Lev. 25:23-28; Núm. 27:8-11).

Chanru nakanaak chi junelik li xkʼabʼaʼ li kamenaq saʼ li xjunkabʼal? Naq li riitzʼin nasumlaak rikʼin li rixaqil re naq wanq junaq xkʼuulaʼal li tixkʼam li xkʼabʼaʼ li kamenaq ut trechani li xchʼochʼ. Li chaqʼrabʼ aʼin qʼaxal chaabʼil xbʼaan naq naxchʼolani ebʼ li malkaʼan (Deut. 25:5-7; Mat. 22:23-28).

Qatzʼilaq rix li kixkʼul li xNoemí. Sumsu rikʼin laj Elimélec. Abʼan, naq kikamk ut keʼkamk li wiibʼ li xyum, maakʼaʼ chik junaq li winq re xchʼolaninkil (Rut 1:1-5). Naq li xNoemí kisutqʼiik Judá kixye re li xRut li ralibʼ naq tixye re laj Boaz li rech-alal laj Elimélec naq tixloqʼ li xchʼochʼ (Rut 2:1, 19, 20; 3:1-4). Abʼan laj Boaz naxnaw naq wank jun li rech-alal li tenebʼanbʼil saʼ xbʼeen xloqʼbʼal li chʼochʼ (Rut 3:9, 12, 13). Li Santil Hu naxkʼabʼaʼi «li winq».

Li winq kiraj tenqʼank (Rut 4:1-4). Naxnaw naq tixsach li xtumin re xloqʼbʼal li chʼochʼ, abʼan naxnaw ajwiʼ naq ak cheek chik li xNoemí re naq twanq ralal xkʼajol li trechani li xchʼochʼ laj Elimélec. Li chʼochʼ aʼin tkʼemanq choʼq xtzʼaqobʼ li xchʼochʼ li winq. Chanchan tawiʼ aʼan jun chaabʼil naʼlebʼ.

Naq li winq kixkʼe reetal naq tento tsumlaaq rikʼin li xRut, inkʼaʼ chik kiraj xloqʼbʼal li chʼochʼ. Kixye: «Inkʼaʼ tinruuq xbʼaanunkil, xbʼaan naq inkʼaʼ nawaj naq twanq chʼaʼajkilal saʼ xyanqebʼ li walal inkʼajol» (Rut 4:5, 6). Kʼaʼut naq inkʼaʼ chik kiraj xbʼaanunkil?

Wi li winq aʼin malaj jalan chik tsumlaaq rikʼin li xRut ut aʼan twanq junaq li xkʼuulaʼal, li kʼuulaʼal trechani li xchʼochʼ laj Elimélec. Abʼan, chanru «twanq chʼaʼajkilal» rikʼin li xchʼochʼ li winq? Maakʼaʼ naxye li Santil Hu chirix abʼan qilaq wiibʼ oxibʼ xyaalal.

• Xbʼeen, maare kixkʼoxla naq yal tixsach li xtumin, xbʼaan naq li xchʼochʼ laj Elimélec tkanaaq choʼq re li ralal li xRut moko choʼq re ta.

• Xkabʼ, tento tixchʼolani li xRut ut li xNoemí.

• Rox, wi li xRut ut aʼan nekeʼwank xkomon li ralal xkʼajol, tento teʼxwotz li xchʼochʼ li winq.

• Xka, wi li winq aʼin maakʼaʼ chik junaq ralal xkʼajol, li ralal xkʼajol li xRut trechani li xchʼochʼ laj Elimélec joʼ ajwiʼ li xchʼochʼ li winq. Joʼkan naq, li xchʼochʼ tkanaaq rubʼel xwankil li alal kʼajolbʼej li naxkʼam xkʼabʼaʼ laj Elimélec maawaʼ re li winq. Ut aʼin moko kiraj ta xbʼaanunkil li winq joʼkan naq inkʼaʼ kixtenqʼa li xNoemí. Joʼkan naq, kixqʼaxtesi re laj Boaz li wank ajwiʼ xkʼulubʼ re xloqʼbʼal li chʼochʼ. Ut laj Boaz kixkʼulubʼa. Kʼaʼut? Xbʼaan naq kixye: «Re naq li xkʼabʼaʼ li kamenaqilq yoʼyooq junelik saʼ li reechanihom» (Rut 4:10).

Li qʼaxal wank xwankil chiru li winq aʼin, aʼan xkolbʼal li xkʼabʼaʼ ut li xchʼochʼ. Kʼajoʼ naq kixqʼetqʼeti ribʼ! Xbʼaan aʼin li xkʼabʼaʼ kisachmank chi junajwa. Inkʼaʼ kixkʼul li maatan li kixkʼul laj Boaz naq li xkʼabʼaʼ wank joʼ li xxeʼtoon li Jesukriist, li Mesiiy. Ra kixkʼul li winq aʼin, xbʼaan naq inkʼaʼ kiraj xtenqʼankil junaq li ras riitzʼin li wank saʼ rajbʼal ru (Mat. 1:5; Luc. 3:23, 32).