NAʼLEBʼ RE TZOLOK 20
BʼICH 67 «Chapuktesi li Aatin»
Xbʼaan li rahok inkʼaʼ naqakanabʼ puktesink
«Xbʼeenwa tento tkʼemanq resil li chaabʼil esil saʼ chixjunil li ruuchichʼochʼ» (MAR. 13:10).
RUʼUJIL LI TZOLOM
Chanru nokoorekʼasi li rahok re naq chi anchal qachʼool tqakʼe chi naweʼk li chaabʼil esil.
1. Kʼaru xqatzol saʼ li chʼutam li nawank jun sut chiru li chihabʼ re 2023?
SAʼ LI chʼutam li nawank jun sut chiru li chihabʼ re 2023, a kichʼolobʼamank wiibʼ oxibʼ li naʼlebʼ chirix li qapaabʼal ut li puktesink. Jun eetalil, kiyeemank naq maare wiibʼ oxibʼ li kristiʼaan teʼwanq xhoonal re okenk chirix li Jehobʼa naq ak xsachmank li Nimla Babilonia. Joʼkan ajwiʼ, kiyeemank naq chalen noviembre 2023 inkʼaʼ chik tkʼemanq resil chixjunil li hoonal li nabʼaanumank saʼ li puktesink. Chʼolchʼo naq aʼin inkʼaʼ naraj xyeebʼal naq moko aajel ta ut naq maakʼaʼ xwankil li puktesink joʼ junxil.
2. Kʼaʼut jwal aajel ru puktesink? (Marcos 13:10).
2 Saʼ xkʼabʼaʼ naq moko wank ta chik hoonal jwal aajel ru li puktesink. Qajultikaq li kixye li Jesús chirix li puktesink li t-uxmanq saʼ rosoʼjikebʼ li kutan joʼ naxye Marcos 13:10 (yaabʼasi). Li Jesús kixye ajwiʼ saʼ Mateo 24:14 naq li chaabʼil esil tpuktesimanq saʼ chixjunil li Ruuchichʼochʼ naq toj maajiʼ nawulak «li xraqik». Aʼin naraj xyeebʼal naq tsacheʼq li xruuchichʼochʼ laj Tza. Li Jehobʼa ak kixxaqabʼ li kutan ut li hoonal re xbʼaanunkil aʼin (Mat. 24:36; 25:13; Hech. 1:7). Saʼ xkʼabʼaʼ naq yook chi osoʼk li hoonal, tento toopuktesinq naq toj maajiʼ nawulak li rosoʼjik (Rom. 13:11).
3. Kʼaʼut nokoopuktesink?
3 Wank jun li naʼlebʼ li jwal wank xwankil naq tqakʼoxla: kʼaʼut naqakʼe chi naweʼk li chaabʼil esil? Xbʼaan naq nokoorahok. Naq nokoopuktesink naqakʼutbʼesi naq naqara li chaabʼil esil, ebʼ li kristiʼaan, li Jehobʼa ut li xkʼabʼaʼ. Tqatzʼil rix chiʼus li junjunq chi naʼlebʼ aʼin.
NOKOOPUKTESINK XBʼAAN NAQ NAQARA LI CHAABʼIL ESIL
4. Kʼaru naqabʼaanu naq naqabʼi jun chaabʼil esil?
4 Kʼoxla joqʼe keʼxkʼe aawe jun chaabʼil esil. Maare xeʼxye naq junaq laakomon xwank jun li xkʼuulaʼal malaj teʼxkʼe aawe li kʼanjel li yookat xsikʼbʼal. Chʼolchʼo naq xbʼaan xsahil aachʼool xaawaj xyeebʼal rehebʼ laakomon ut ebʼ laawamiiw. Joʼkan ajwiʼ xaawekʼa aawibʼ naq xaawabʼi li chaabʼil esil chirix li Xʼawabʼejilal li Yos.
5. Chanru xaawekʼa aawibʼ naq yookat xtzolbʼal li Santil Hu? (Chaawil ebʼ li jalam u).
5 Kʼoxla chanru xaawekʼa aawibʼ naq xat-ok xtzolbʼal li Santil Hu. Xaatzol naq li Jehobʼa nakatxra, naraj naq tat-okenq saʼ li xjunkabʼal, trisi li rahilal, li chʼaʼajkilal ut saʼ li akʼ ruuchichʼochʼ tixwaklesi chi yoʼyo ebʼ laakomon (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Chixjunil aʼin xtochʼ aachʼool (Luc. 24:32). Saʼ xkʼabʼaʼ naq xat-ok xraabʼal li ak xaatzol naʼalaak saʼ aachʼool xwotzbʼal (juntaqʼeeta rikʼin Jeremías 20:9).
Naq xqatzol li yaal saʼ li Santil Hu, xbʼaan xsahil qachʼool naqaj xwotzbʼal rikʼin chixjunilebʼ li kristiʼaan. (Chaawil li raqal 5).
6. Kʼaru naxkʼut chaawu li eetalil chirix laj Ernest ut li xRose?
6 Wank lajeebʼ chihabʼ re laj Ernest b naq kikamk li xyuwaʼ. Aʼan naxkʼoxla chaq: «Ma xkoho tawiʼ saʼ choxa malaj ma bʼar chik wank? Ninkaqalihebʼ li kokʼal li toj yoʼyokebʼ li xyuwaʼ». Chiru naabʼal chihabʼ rajlal kutan nawulak saʼ li muqlebʼaal kamenaq, naxwiqʼibʼ ribʼ chiru li naʼaj bʼarwiʼ muqmu li xyuwaʼ ut natijok chiru li Yos, naxye re: «At Inyos bʼaanu usilal nawaj xnawbʼal bʼar wank linyuwaʼ». Naq wank 27 chihabʼ re, keʼxyeechiʼi xtzolbʼal rikʼin li Santil Hu ut kixkʼulubʼa. Kiwulak chiru xnawbʼal naq ebʼ li kamenaq chanchan tawiʼ yookebʼ chi wark ut naq li Santil Hu naxye naq teʼwakliiq chi yoʼyo (Ecl. 9:5, 10; Hech. 24:15). Toj aran kixtaw xsumenkil ebʼ li xpatzʼom li kʼajoʼ naxkʼe xkʼaʼuxl, jwal sa xchʼool rikʼin li yaal li yook xtzolbʼal. Li xRose, li rixaqil, kiʼok ajwiʼ xtzolbʼal li Santil Hu ut nawulak ajwiʼ chiru li naxtzol. Saʼ 1978, xeʼkubʼeek xhaʼ. Xbʼaan li sahil chʼoolejil li nekeʼrekʼa xeʼok xwotzbʼal rehebʼ li xkomon, ebʼ li ramiiw ut jalan chik ebʼ li kristiʼaan li yookebʼ xtzolbʼal. Saʼ xnumikebʼ li kutan, laj Ernest ut li xRose ak xeʼxtenqʼa numenaq 70 li kristiʼaan re naq teʼxnaw ru li Jehobʼa ut teʼkubʼeeq xhaʼ.
7. Kʼaru tkʼulmanq wi naqara li naʼlebʼ li wank saʼ li Santil Hu? (Lucas 6:45).
7 Wi naqara li naʼlebʼ chirix li Santil Hu tqaj aatinak chirix (yaabʼasi Lucas 6:45). Naqekʼa qibʼ joʼebʼ laj paabʼanel saʼ xkutankilebʼ li apóstol naq keʼxye: «Inkʼaʼ naru naqakanabʼ aatinak chirix li xqil ut xqabʼi» (Hech. 4:20). Saʼ xkʼabʼaʼ naq naqara li yaal naqaj xwotzbʼal rikʼin chixjunilebʼ, aʼ yaal chanru naxkʼe ribʼ chiqu.
NOKOOPUKTESINK XBʼAAN NAQ NAQARAHEBʼ LI KRISTIʼAAN
8. Kʼaru naxbʼaanu naq naqakʼe chi naweʼk li chaabʼil esil? (Chaawil li kaaxukuut « Li rahok tatrekʼasi chi xtzolbʼalebʼ»; chaawil li jalam u).
8 Naqarahebʼ li kristiʼaan joʼ nekeʼxbʼaanu li Jehobʼa ut li Jesús (Prov. 8:31; Juan 3:16). Naquxtaana ruhebʼ li maakʼaʼ roybʼenihomebʼ ut moko wank ta li Yos rikʼinebʼ (Efes. 2:12). Ebʼ li kristiʼaan numtajenaqebʼ li xchʼaʼajkilal ut wank qikʼin li naʼajmank chiruhebʼ: li chaabʼil esil chirix li Xʼawabʼejilal li Yos. Li rahok ut toqʼobʼank u nokooxtenqʼa re xbʼaanunkil chixjunil li wank saʼ quqʼ re xkʼebʼal chi naweʼk li chaabʼil esil. Aʼin naxbʼaanu naq teʼwanq roybʼenihom, sahaqebʼ saʼ xchʼool anaqwan ut teʼxtaw «li tzʼaqal yuʼam», aʼ li junelik yuʼam saʼ li akʼ ruuchichʼochʼ (1 Tim. 6:19).
Li rahok ut li toqʼobʼank u nokoorekʼasi re xbʼaanunkil chixjunil li wank saʼ quqʼ re naq ebʼ li kristiʼaan teʼrabʼi li chaabʼil esil. (Chaawil li raqal 8).
9. Kʼaru naqaye rehebʼ li kristiʼaan ut kʼaʼut? (Ezequiel 33:7, 8).
9 Li rahok nokoorekʼasi re xyeebʼal rehebʼ li kristiʼaan naq chi seebʼ tchalq li rosoʼjik (yaabʼasi Ezequiel 33:7, 8). Narahoʼk qachʼool rilbʼal naq ebʼ li kristiʼaan ut ebʼ li qakomon li maawaʼebʼ aj Testiiw inkʼaʼ nekeʼxkʼe reetal li yook chi kʼulmank. Saʼ Mateo 24:21 naxye naq «twanq jun li nimla rahilal» ut naq «chalen chaq saʼ xtiklajik li ruuchichʼochʼ toj saʼebʼ li kutan aʼin, maajunwa kiwank chaq jun nimla rahilal joʼ aʼin chi moko twanq moqon». Naqaj xyeebʼal rehebʼ li tkʼulmanq saʼ xkutankil li raqok aatin: xbʼeenwa tsacheʼq li bʼalaqʼil paabʼal ut moqon saʼ li Armagedón tsacheʼq li xmaaʼusilal li ruuchichʼochʼ aʼin (Apoc. 16:14, 16; 17:16, 17; 19:11, 19, 20). Naqatzʼaama re li Jehobʼa naq naabʼalebʼ li kristiʼaan teʼraj rabʼinkil li chaabʼil esil ut teʼxsikʼ kʼanjelak chiru. Abʼan, kʼaru tkʼulmanq rikʼinebʼ li qakomon ut jalanebʼ chik li kristiʼaan li toj maajiʼ nekeʼraj rabʼinkil li chaabʼil esil?
10. Kʼaʼut aajel ru naq tqaye rehebʼ li kristiʼaan li tkʼulmanq?
10 Joʼ xqil saʼ li tzolom rubʼelaj, li Jehobʼa maare tixkolebʼ li kristiʼaan li teʼxjal xkʼaʼuxebʼ naq teʼril naq tsacheʼq li Nimla Babilonia. Joʼkan naq, aajel ru naq tqaye rehebʼ li tkʼulmanq, xbʼaan naq maare li tqaye aʼan li teʼxjultika saʼ li kutan chalk re (juntaqʼeeta rikʼin Ezequiel 33:33). Ut aʼin maare tixbʼaanu naq teʼraj kʼanjelak chiru li Jehobʼa naq toj wank hoonal re xbʼaanunkil. Jun eetalil, joʼ laj ilol tzʼalam re Filipos kixkʼulubʼa li yaal naq kiwank jun nimla hiik, maare ebʼ li kristiʼaan anaqwan inkʼaʼ teʼraj xkʼulubʼankil li yaal abʼan teʼxbʼaanu naq teʼril naq tchiqʼchiqʼiiq li ruuchichʼochʼ xbʼaan xsachik li Nimla Babilonia (Hech. 16:25-34).
NOKOOPUKTESINK XBʼAAN NAQ NAQARA LI JEHOBʼA UT LI XKʼABʼAʼ
11. Chanru naqanima ru, naqakʼe xloqʼal ut wankil li Jehobʼa? (Apocalipsis 4:11; chaawil ebʼ li jalam u).
11 Li xnimal ru xyaalal kʼaʼut nokoopuktesink aʼan xbʼaan naq naqara li Jehobʼa ut li xkʼabʼaʼ. Ut naq naqabʼaanu naqakʼe xloqʼal li Yos. Chʼolchʼo chiqu naq li Jehobʼa xkʼulubʼ chi «xkʼulbʼal li loqʼal, li nimaak ut li wankilal» (yaabʼasi Apocalipsis 4:11). Naqabʼaanu naq tkʼemanq xloqʼal ut tnimaaq ru, naq naqachʼolobʼ chiruhebʼ li kristiʼaan naq li Jehobʼa kiyobʼtesink re chixjunil ut kixkʼe qayuʼam. Naqakʼe xwankil naq naqoksi li qahoonal, li qametzʼew ut li kʼaru wank qe re puktesink joʼ naxkʼe ribʼ chiqu (Mat. 6:33; Luc. 13:24; Col. 3:23). Jwal nawulak chiqu aatinak chirix li Yos li naqara, chirix li xkʼabʼaʼ ut li naraj xyeebʼal. Kʼaʼut naqabʼaanu?
Naqakʼe xwankil li Jehobʼa naq naqoksi li qahoonal, li qametzʼew ut li kʼaru wank qe re puktesink joʼ naxkʼe ribʼ chiqu. (Chaawil li raqal 11).
12. Chanru naqasantobʼresi li xkʼabʼaʼ li Jehobʼa naq nokoopuktesink?
12 Saʼ xkʼabʼaʼ naq naqara li Jehobʼa naqaj xsantobʼresinkil li xkʼabʼaʼ (Mat. 6:9). Nokooʼokenk re xyeebʼal naq tikʼtiʼ li kixyoobʼ laj Tza chirix li Jehobʼa (Gén. 3:1-5; Job 2:4; Juan 8:44). Joʼkan naq, nokoopuktesink re xkolbʼal rix li Jehobʼa ut naqaye re chixjunilebʼ li kristiʼaan li yaal. Naqaj naq chixjunilebʼ teʼxnaw naq li xnimal ru naʼlebʼ li Jehobʼa aʼan li rahok, naq naʼawabʼejink saʼ tiikilal ut naq li Xʼawabʼejilal chi seebʼ trisi li rahilal, tixkʼam chaq tuqtuukilal ut sahil chʼoolejil choʼq rehebʼ chixjunilebʼ li kristiʼaan (Sal. 37:10, 11, 29; 1 Juan 4:8). Naq naqabʼaanu chixjunil aʼin, naqasantobʼresi li xkʼabʼaʼ. Jwal sa qachʼool xbʼaan naq yooko xbʼaanunkil li kʼanjel li tenebʼanbʼil saʼ qabʼeen joʼ xtestiiw. Kʼaʼut naqaye aʼin?
13. Kʼaʼut jwal loqʼ wank joʼ aj testiiw re li Jehobʼa? (Isaías 43:10-12).
13 Li Jehobʼa xooxsikʼ joʼ xtestiiw (yaabʼasi Isaías 43:10-12). Naabʼal chihabʼ rubʼelaj li Nekeʼjolomink re Xmolam li Jehobʼa keʼxye saʼ jun li esilhu: «Jun loqʼlaj maatan wank joʼ aj testiiw re li Jehobʼa». c Jun eetalil, qakʼoxlaq naq wank ani kixyoobʼ naq xqabʼaanu jun li yibʼru aj naʼlebʼ ut naʼajmank naq junaq li kristiʼaan t-aatinaq chiqix. Chʼolchʼo naq tqanaw ru chiʼus li kristiʼaan li tqasikʼ re naq t-aatinaq chiqix, tqakʼojobʼ qachʼool rikʼin ut nawbʼilaq ru naq chaabʼil xnaʼlebʼ re naq paabʼajelaq li tixye. Joʼkan ajwiʼ, li Jehobʼa xooxsikʼ re naq tqakʼe chi naweʼk naq kaʼajwiʼ aʼan li tzʼaqal Yos, xbʼaanu aʼin xbʼaan naq naxnaw qu ut naxkʼojobʼ xchʼool chiqix. Jwal loqʼ wank joʼ Xtestiiw, joʼkan naq naqoksi chixjunil li hoonal re xkʼebʼal chi naweʼk li xkʼabʼaʼ ut xyeebʼal naq tikʼtiʼ chixjunil li xyoobʼamank chirix. Chi joʼkan, naqabʼaanu chiʼus li qakʼanjel joʼ aj testiiw re li Jehobʼa (Sal. 83:19; Rom. 10:13-15).
TOOPUKTESINQ TOJ REETAL TWULAQ LI ROSOʼJIK
14. Kʼaru tkʼulmanq saʼebʼ li kutan chalk re?
14 Nasahoʼk qachʼool xkʼoxlankil li tkʼulmanq saʼ li kutan chalk re! Naqaj naq rikʼin xtenqʼ li Jehobʼa, naabʼalebʼ li kristiʼaan teʼxkʼulubʼa li yaal naq toj maajiʼ natiklaak li nimla rahilal. Joʼkan ajwiʼ, nasahoʼk qachʼool xnawbʼal naq maare chiru li nimla rahilal naabʼalebʼ li kristiʼaan teʼxtzʼeqtaana li xruuchichʼochʼ laj Tza ut saʼ junajil tqakʼe xloqʼal li Jehobʼa (Hech. 13:48).
15, 16. Kʼaru inkʼaʼ tqakanabʼ xbʼaanunkil ut toj joqʼe tqabʼaanu?
15 Naq toj maajiʼ nakʼulmank aʼin, toj wank jun li kʼanjel li tento tqabʼaanu: Xkʼebʼal chi naweʼk li chaabʼil esil chirix li Xʼawabʼejilal li Yos saʼ chixjunil li Ruuchichʼochʼ, jun li kʼanjel li inkʼaʼ chik tbʼaanumanq. Joʼkan ajwiʼ, tqaye resil naq chi seebʼ tchalq li rosoʼjik li ruuchichʼochʼ aʼin. Naq twulaq li xkutankil li raqok aatin, ebʼ li kristiʼaan teʼxkʼe reetal naq li esil li naqaye chalenaq rikʼin li Jehobʼa (Ezeq. 38:23).
16 Joʼkan naq chʼolchʼo chiqu naq saʼ xkʼabʼaʼ naq qʼaxal naqara li chaabʼil esil, ebʼ li kristiʼaan, li Jehobʼa ut li xkʼabʼaʼ inkʼaʼ naqaj xkanabʼankil puktesink chi anchal qachʼool toj reetal naq li Jehobʼa tixye naq inkʼaʼ chik tqabʼaanu.
BʼICH 54 «Aʼan aʼin li bʼe»
a Li chʼutam li nawank jun sut chiru li chihabʼ, kiwank saʼ li 7 re octubre 2023 saʼ li naʼaj bʼarwiʼ nawank li nimla chʼutam rehebʼ laj testiiw re li Jehobʼa saʼ Newburgh, Nueva York (Estados Unidos). Moqon, kiʼisimank li kʼanjel saʼ wiibʼ tasal saʼ JW Broadcasting®, li xbʼeen kiʼelk saʼ noviembre 2023 ut li xkabʼ saʼ enero 2024.
b Chaawil li tzolom «Li Santil Hu kixjalebʼ xyuʼam: Sachso inchʼool xinkanaak naq xwil li naxye li Santil Hu», li kiʼelk saʼ li hu Laj Kʼaakʼalehom 1 re febrero 2015.
c Chaawil li tasal hu Anuario de los testigos de Jehová 2007, perel 3.
