WI CHIRUHEBʼ li chihabʼ li tojeʼ xeʼnumeʼk xatbʼihajik raj saʼ li naʼaj li sutsu chi haʼ re li naʼajej Sangir Besar (Indonesia) xaatawebʼ raj chaq oxibʼ li qahermaan ixq saʼ li naʼajej aʼan. Usta nawbʼil chaq ruhebʼ joʼ li nekeʼxtenqʼa li kristiʼaan chi xtawbʼal ru li Santil Hu, abʼan moko puktesink ta nekeʼxbʼaanu saʼ li naʼaj li sutsu chi haʼ. Joʼkan naq, kʼaru nekeʼxbʼaanu chaq aran?

Xbʼeenwa, nekeʼok saʼ li palaw chi xsikʼbʼal ninqi pek, chanchan joʼ xnimal jun li peloot li nekeʼroksi saʼ li bʼatzʼunk ut nekeʼxpaqo toj chire li palaw. Moqon chik nekeʼchunlaak saʼ kokʼ tem ut nekeʼroksi jun martiiy re xjorbʼal ebʼ li pek toj reetal nakachʼinoʼk joʼ xnimal jun chi mol. Moqon chik nekeʼxkʼe saʼebʼ li sekʼ re plástico ut nekeʼxkʼam saʼ rochochebʼ. Saʼ ninqi koxtal nekeʼxxok ebʼ li pek aʼin. Moqon chik ebʼ li kamiʼon nekeʼxkʼam ebʼ li koxtal aʼin ut ebʼ li pek nekeʼroksi re xyiibʼankil ebʼ li bʼe.

Li xHulda aʼan jun rehebʼ li hermaan. Aʼan naru xnumsinkil naabʼal li hoonal chi kʼanjelak chiruhebʼ li junchʼol. Rikʼin li xtojlebʼ naxtenqʼa li xjunkabʼal rikʼin li naʼajmank chiruhebʼ. Abʼan anaqwan naraj roksinkil li xtumin re xloqʼbʼal jun li xtableta re naq truuq chi ok saʼ JW Library^®. Li xHulda naxnaw naq li naʼlebʼ ut ebʼ li bʼideo li natawmank aran tixtenqʼa re puktesink chiʼus ut re naq tixtaw ru chiʼus li Santil Hu.

Li xHulda kikʼanjelak wiibʼ hoor rajlal kutan chiru jun po ut oʼlaju kutan. Rikʼin li pek li kixjor kixnujtesi jun chʼina kamiʼon. Chi joʼkaʼin kiruuk xloqʼbʼal li xtableta!

Li xHulda kixye: «Yaal naq xinlubʼ ut xrahoʼk linjunxaqalil xbʼaan xpukʼbʼal ebʼ li pek. Abʼan naq wank chik li tableta saʼ wuqʼ ut xwil naq naru twoksi re xkʼebʼal li esil ut xkawresinkil wibʼ chiʼus choʼq re li chʼutam, saʼ junpaat xsach saʼ inchʼool linrahilal». Kixye ajwiʼ naq li tableta kixtenqʼa naq kitiklaak li COVID-19, naq ebʼ chʼutam inkʼaʼ chik nabʼaanumank saʼ kristiʼaanil. Kʼajoʼ nasahoʼk qachʼool naq li xHulda kixtaw li kʼajoʼ narataw!