SAʼ LI miércoles 18 re enero 2023, kiyeemank jun esil saʼ jw.org: li hermaan Gage Fleegle ut Jeffrey Winder keʼxaqabʼaak re naq teʼwanq saʼ xyanq li Nekeʼjolomink re Xmolam li Jehobʼa. Saʼ kabʼichal ak naabʼal chihabʼ rokikebʼ chi kʼanjelak chiru li Jehobʼa.

Li hermaan Fleegle kikʼiik Pensilvania (Estados Unidos). Li xnaʼ xyuwaʼ keʼxkʼut chiru li yaal. Naq saaj chaq, kiqʼaxonk saʼ jun li chʼina kʼalebʼaal bʼarwiʼ naʼajmank aj tenqʼ re naq teʼpuktesinq. Moqon kikubʼeek xhaʼ, saʼ li 20 re noviembre 1988.

Li xnaʼ xyuwaʼ junelik nekeʼxwaklesi xchʼool re naq tixkʼe chixjunil li xhoonal re kʼanjelak chiru li Jehobʼa. Nekeʼxbʼoq saʼebʼ li rochoch ebʼ li cheekel winq li nekeʼulaʼanink chʼuut ut li wankebʼ Betel ut chi joʼkan kixkʼe reetal naq ebʼ li hermaan aʼin kʼajoʼ naq sahebʼ saʼ xchʼool. Saʼ li 1 re septiembre 1989, naq tojeʼ kikubʼeek xhaʼ, kiʼok joʼ aj kʼamolbʼe saʼ li puktesink joʼ li nekeʼxbʼaanu 50 hoor saʼ li qakutan. Ut wiibʼ chihabʼ moqon, kixbʼaanu li kixye naq wank chaq re kabʼlaju chihabʼ: kʼanjelak saʼ Betel. Kixtikibʼ li xkʼanjel saʼ li Betel re Brooklyn saʼ octubre 1991.

Aran kikʼanjelak re xkʼebʼal rix ebʼ li tasal hu chiru waqxaqibʼ chihabʼ ut moqon keʼxye naq twanq rikʼinebʼ li nekeʼril li kʼanjel. Saʼ li qʼehil aʼan, chiru wiibʼ oxibʼ chihabʼ kitenqʼank saʼ li chʼuut re li aatinobʼaal ruso. Saʼ li 2006 kisumlaak rikʼin li xNadia ut chalen aran saʼ kabʼichal yookebʼ chi kʼanjelak saʼ Betel. Saʼ kabʼichal xeʼkʼanjelak saʼ li aatinobʼaal portugués ut numenaq lajeebʼ chihabʼ saʼ kaxlan aatin. Naq ak xnumeʼk naabʼal chihabʼ tenqʼank rikʼinebʼ li nekeʼril li kʼanjel, li hermaan Fleegle kitaqlaak saʼ li ofisiin re li chʼuut li naril li natzolmank ut moqon saʼ li ofisiin re li chʼuut li naril li puktesink. Saʼ marzo 2022 kixaqabʼaak joʼ li natenqʼank saʼ li chʼuut li naril li puktesink re li Nekeʼjolomink re Xmolam li Jehobʼa.

Li hermaan Winder kikʼiik Murrieta (California).  Li xnaʼ xyuwaʼ ebʼ aj Testiiw, keʼxkʼut chiru li yaal ut kikʼubʼeek xhaʼ saʼ li 29 re marzo 1986. Jun po chirix aʼin kiʼok joʼ aj kʼamolbʼe saʼ li puktesink joʼ li nekeʼxbʼaanu 30 hoor saʼ li qakutan ut kʼajoʼ kiwulak chiru, joʼkan naq inkʼaʼ chik kiraj xkanabʼankil. Saʼ li 1 re octubre 1986, wiibʼ oxibʼ po moqon, kiʼok joʼ aj kʼamolbʼe saʼ li puktesink joʼ li nekeʼxbʼaanu 50 hoor saʼ li qakutan.

Naq saaj chaq, kiwulak rulaʼaninkil wiibʼ rehebʼ li ras li nekeʼkʼanjelak saʼ Betel saʼebʼ li kutan aʼan. Aʼin kixbʼaanu naq traj xnujtesinkil li hu re kʼanjelak Betel naq twulaq li xchihabʼ. Ut saʼ mayo 1990 keʼxbʼoq re naq tkʼanjelaq saʼ Betel re Wallkill.

Aran kiwank jalan jalanq li xkʼanjel, joʼ li nekeʼril li saabʼesink, li nekeʼril li kʼaʼaq re ru re li qamolam ut li Ofisiin re Betel. Saʼ 1997 kisumlaak rikʼin li xʼAngela ut chalen aran saʼ kabʼichal nekeʼkʼanjelak Betel. Saʼ 2014 keʼtaqlaak Warwick, bʼarwiʼ li hermaan Winder kitenqʼank re xkabʼlankil li nimla molam. Saʼ 2016 keʼqʼaxonk Patterson, saʼ li nimla tzolebʼaal Watchtower ut aran kikʼanjelak re xkʼanjelankil li xyaabʼ kuxej ut bʼideo. Kaahibʼ chihabʼ chirix aʼin xeʼsutqʼiik wiʼ chik Warwick ut li hermaan Winder kixaqabʼaak re kʼanjelak saʼ li ofisiin re li chʼuut li naril li wankebʼ Betel. Saʼ marzo 2022 kixaqabʼaak joʼ li natenqʼank saʼ li chʼuut re rilbʼal li wankebʼ Betel re li Nekeʼjolomink re Xmolam li Jehobʼa.

Ebʼ li winq aʼin aʼan jun li maatan li naxkʼe qe li Jehobʼa (Efes. 4:8). Nokootijok re naq teʼosobʼtesiiq xbʼaan li kawil kʼanjel li nekeʼxbʼaanu chirix li Awabʼejilal.