Usta joʼkan, li Jehobʼa naraj naq wank qakuyum ut naq tqoybʼeni naq twulaq li hoonal li kixxaqabʼ re naq tixbʼaanu li kixyeechiʼi. Kʼaʼut naraj li Jehobʼa naq tqabʼaanu aʼin? Ut kʼaru tooxtenqʼa re naq sahaq qachʼool chi oybʼenink?

KʼAʼUT NARAJ LI JEHOBʼA NAQ TOOʼOYBʼENINQ

Li Santil Hu naxye: «Li Qaawaʼ yo roybʼeninkil li honal re rusilankil eeru. Taawakliiq chaq chi xtoqʼobʼankil eeru, xbʼaan naq tiik xchʼool li Qaawaʼ. Us xaq rehebʼ li kʼojkʼo xchʼoolebʼ rikʼin!» (Is. 30:18). Saʼ xtiklajik laj Isaías kixye li aatin aʼin rehebʼ laj judiiy li xeʼxqʼet ribʼ (Is. 30:1). Abʼan saʼebʼ li kutan aʼan, wankebʼ ajwiʼ ebʼ laj judiiy li tiikebʼ xchʼool. Ebʼ li aatin aʼin kixkʼe roybʼenihomebʼ ut saʼ li qakutan naru ajwiʼ tixkʼe qoybʼenihom.

Abʼan, kʼaʼut tento tooʼoybʼeninq? Xbʼaan naq li Jehobʼa ajwiʼ yook chi oybʼenink. Ak kixtzʼiibʼa li kutan ut li hoonal naq tixsach li maaʼusebʼ xnaʼlebʼ ut yook roybʼeninkil naq twulaq li kutan aʼan (Mat. 24:36). Naq twulaq li kutan aʼan, chʼolchʼo ru tkanaaq naq tikʼtiʼ li kixye laj Tza chirix li Jehobʼa ut chirixebʼ laj kʼanjel chiru. Tixsach laj Tza ut ebʼ li nekeʼtaqenk re. Abʼan xyeechiʼi «xtoqʼobʼankil» ruhebʼ laj kʼanjel chiru.

Naq yooko chi oybʼenink maare li Jehobʼa inkʼaʼ trisi chixjunil li qachʼaʼajkilal. Abʼan, naxye qe naq naru naq sahaq qachʼool. Joʼ kixye laj Isaías, naru naq sahaq qachʼool naq yooko roybʼeninkil li naqaj (Is. 30:18). a Chanru xbʼaanunkil? Qilaq kaahibʼ li naʼlebʼ li tooruuq xbʼaanunkil.

CHANRU SAHAQ QACHʼOOL NAQ NOKOOʼOYBʼENINK

Qakʼehaq reetal li us. Li awabʼej David kiril naabʼal li maaʼusilal saʼ li xyuʼam (Sal. 37:35). Usta joʼkan, kixtzʼiibʼa: «Hilan rikʼin li Qaawaʼ, chiwanq aawoybʼenihom rikʼin; matjosqʼoʼk xbʼaan li winq li us naʼelk saʼ chixjunil, chi moko xbʼaanebʼ li tenamit li junes raaxiikʼ nekeʼxyoobʼ» (Sal. 37:7). Laj David kixyuʼami li naʼlebʼ aʼin. Chanru? Wank saʼ xchʼool naq li Jehobʼa kixyeechiʼi re naq tixkol. Ut joʼkan ajwiʼ, kiroxloqʼi chixjunil li kixbʼaanu li Yos  chirix (Sal. 40:6). Wi naqakʼe qachʼool chirix li us li wank saʼ li qasutam ut maawaʼ chirix li inkʼaʼ us, moko tchʼaʼajkoʼq ta chiqu roybʼeninkil naq li Jehobʼa tixbʼaanu li kixyeechiʼi.

Qoksihaq chixjunil li hoonal re xkʼebʼal xloqʼal li Jehobʼa. Chanchan naq laj David kitzʼiibʼank re li Salmo 71, aʼan kixye re li Jehobʼa: «Kʼojkʼooq inchʼool aawikʼin ut qʼaxal chik tinnima aaloqʼal» (Sal. 71:14). Kʼaru naxbʼaanu re xkʼebʼal xloqʼal? Naʼaatinak chirix li Jehobʼa ut nabʼichank chiru (Sal. 71:​16, 23). Naru tqakʼam qe rikʼin laj David ut xkʼebʼal xloqʼal li Jehobʼa naq nokoopuktesink, naq nokooʼaatinak chirix li Jehobʼa rikʼinebʼ li qamiiw ut li qajunkabʼal ut naq naqabʼicha ebʼ li qabʼich. Joʼkan naq, saʼ li jun sut chik naq tbʼicha jun li bʼich re li Awabʼejilal, kʼe aachʼool chirix li chaabʼil naʼlebʼ li naxye li nawaklesink chʼoolej. Chixjunil aʼin tixbʼaanu naq sahaq saʼ li qachʼool naq yooko roybʼeninkil naq li Jehobʼa tixbʼaanu li kixyeechiʼi.

Qanumsihaq hoonal rikʼinebʼ li qahermaan. Naq laj David kiwank xchʼaʼajkilal, kixye re li Jehobʼa: «Kʼojkʼo linchʼool aawikʼin xbʼaan laachaabʼilal chiruhebʼ chixjunil li nekeʼrahok aawe» (Sal. 52:11). Joʼ laj David kixsikʼ wank saʼ aamiiwil rikʼinebʼ laj kʼanjel chiru li Jehobʼa ut chi joʼkan kiwaklesiik xchʼool, laaʼo ajwiʼ naru tqasikʼ wank saʼ aamiiwil rikʼinebʼ li qahermaan saʼ li chʼutam, saʼ li puktesink ut yalaq joqʼe (Rom. 1:​11, 12).

Qakawresihaq li qoybʼenihom. Saʼ Salmo 62:6 naxye: «Rikʼin li Yos ninhilank, xbʼaan naq aʼan li woybʼenihom». Qʼaxal wank xwankil naq yoʼyo li qoybʼenihom, qʼaxal wiʼ chik wi li rosoʼjik inkʼaʼ nakʼulunk joʼ xqakʼoxla. Maakʼaʼ naxye joʼnimal tooʼoybʼeninq, tento naq chʼolchʼooq chiqu naq li Jehobʼa tixbʼaanu li naxyeechiʼi. Ut chanru naqakawresi li qoybʼenihom? Naq naqatzol li Raatin li Yos ut naq naqakʼe reetal ebʼ li xpropesiiy, chanru natzʼaqlok ru ut chixjunil li naʼlebʼ li naxkʼut chiqu chirix li Jehobʼa (Sal. 1:​2, 3). Joʼkan ajwiʼ inkʼaʼ tqakanabʼ tijok chiru li Jehobʼa ut xtzʼaamankil re li xsantil musiqʼej re naq tooxtenqʼa re wank saʼ amiiwil rikʼin naq yooko roybʼeninkil naq ttzʼaqloq ru li xyeechiʼom re li junelik yuʼam (Jud. 20, 21).

Joʼ li awabʼej David, chʼolchʼo chiqu naq li Jehobʼa naxkʼe xchʼool chirixebʼ li nekeʼroybʼeni naq aʼan tixbʼaanu li naxyeechiʼi ut aʼan naxkʼutbʼesi li xrahom chirixebʼ (Sal. 33:​18, 22). Joʼkan bʼiʼ, re naq sahaq qachʼool re roybʼeninkil naq li Jehobʼa tixbʼaanu li kixye qe, qakʼehaq qachʼool chirix li us, qakʼehaq xloqʼal li Jehobʼa, qanumsihaq hoonal rikʼinebʼ li qahermaan ut qakawresihaq li qoybʼenihom.