Li naxye saʼ Eclesiastés 5:8 nokooxkʼe chi kʼoxlak. Aran naxye: «Wi saʼ junaq tenamit taawil naq rahobʼtesinbʼilebʼ li nebʼaʼ ut inkʼaʼ naraqmank aatin saʼ tiikilal, misachk aachʼool xbʼaan aʼan. Aʼin nakʼulmank xbʼaan naq li ani wank saʼ xwankil, aʼan taqlanbʼil xbʼaan li nim xwankil chiru; ut li nim xwankil, aʼan taqlanbʼil ajwiʼ xbʼaan jalan chik qʼaxal nim wiʼ chik xwankil».

Junaq li kristiʼaan tixye raj naq li aatin aʼin naʼaatinak chirixebʼ li nekeʼtaqlank saʼ junaq awabʼejilal. Abʼanan, naxkʼut ajwiʼ chiqu jun li xnimal ru naʼlebʼ chirix li Jehobʼa li naxkʼojobʼ ut naxsahobʼresi qachʼool.

Saʼ Eclesiastés 5:8 naʼaatinak chirix jun li awabʼej li kaw nataqlank saʼ xbʼeenebʼ li nebʼaʼ ut naxbʼaanu rehebʼ li maaʼusilal. Li winq aʼan tento raj tixjultika naq maare anchal li nim xwankil chiru yook chi xkʼebʼal reetal li naxbʼaanu. Relik chi yaal, maare wankebʼ li qʼaxal nim wiʼ chik xwankilebʼ chiruhebʼ aʼan. Ra xyeebʼal, abʼan wank sut chixjunilebʼ li nekeʼtaqlank saʼ junaq li awabʼejilal ebʼ aj bʼalaqʼ ut ebʼ aj elqʼ, ut aʼ ebʼ chik li kristiʼaan nekeʼxtoj rix li maaʼusilal li nekeʼxbʼaanu.

Abʼan, naq chanchan tawiʼ maakʼaʼ chik naru xbʼaanunkil, naxkʼojobʼ qachʼool xnawbʼal naq li Jehobʼa naxkʼe ajwiʼ reetal li nekeʼxbʼaanu li nekeʼtaqlank saʼ junaq awabʼejilal. Naru naqatzʼaama qatenqʼankil chiru li Yos ut naru naqaye re chixjunil li xkʼaʼuxl wiʼ qachʼool (Sal. 55:23; Filip. 4:6, 7). Naqanaw naq «li Qaawaʼ naxbʼeeni chixjunil li ruuchichʼochʼ re xkawubʼresinkil xchʼoolebʼ li yoʼoonebʼ rikʼin» (2 Crón. 16:9).

Joʼkan bʼiʼ, li naxye saʼ Eclesiastés 5:8 naxjultika chiqu jun li xnimal ru naʼlebʼ: naq saʼ li xʼawabʼejilal li winq junelik wank junaq li qʼaxal nim xwankil. Ut li wank tzʼaqal xwankil aʼan naq li raqal aweʼ naxjultika chiqu naq li Jehobʼa aʼan li Nimajwal Yos saʼ xbʼeen li choxachʼochʼ. Saʼebʼ li qakutan li Jehobʼa yook chi awabʼejink xbʼaan naq naroksi li Jesukriist li Awabʼej saʼ li Xʼawabʼejilal. Li Nimajwal Yos li naril chixjunil li nakʼulmank qʼaxal tiik xchʼool ut joʼkan ajwiʼ li Ralal.