1, 2. a) Joʼ naxye saʼ Proverbios 16:31, chanru tqilebʼ li hermaan li ak cheekebʼ chik? b) Kʼaru ebʼ li patzʼom tqasume saʼ li tzolom aʼin?

SAʼ JUN li parke re Arkansas (Estados Unidos), naru natawmank li xchaqʼalil ru pek chiru chʼochʼ. Usta ebʼ li pek aʼin naʼilmank chi kutankil, abʼan moko tenbʼil ta, joʼkan naq maare li nekeʼwulak saʼ li parke teʼnumeʼq chixkʼatq ut inkʼaʼ teʼxkʼe reetal naq jwal terto xtzʼaq li pek li yookebʼ chi rilbʼal.

² Ebʼ li hermaan li ak cheekebʼ chik chanchanebʼ li xchaqʼalil ru pek: jun xnimal ru maatan. Li Raatin li Yos naxjuntaqʼeeta li saqil ismal rikʼin jun li koroon (taayaabʼasi Proverbios 16:31; 20:29). Abʼan wank sut maare inkʼaʼ tqakʼe reetal li xwankil. Ebʼ li saaj li nekeʼxnaw roxloqʼinkil li ak cheekebʼ chik naabʼal li chaabʼil naʼlebʼ nekeʼxtaw rikʼinebʼ. Saʼ li tzolom aʼin tqatzʼil rix ebʼ li oxibʼ chi patzʼom aweʼ: kʼaʼut naq li Jehobʼa narilebʼ li ak cheekebʼ chik joʼ jun xnimal ru maatan?, chanru narilebʼ saʼ li xmolam? ut, kʼaru tooruuq xbʼaanunkil re naq tqataw rusilal li xnaʼlebʼebʼ?

3. Joʼ naxye saʼ Salmo 92:13-16, kʼaʼut naq oxloqʼ naril li Jehobʼa ebʼ li hermaan li ak cheekebʼ chik?

³ Li Jehobʼa qʼaxal oxloqʼ narilebʼ li hermaan li ak cheekebʼ chik. Naxnaw chanru li xnaʼlebʼebʼ ut oxloqʼ chiru. Sa saʼ xchʼool chi rilbʼal naq nekeʼxkʼut chiruhebʼ li saaj li choxahil naʼlebʼ li xeʼxtzol chalen naq xeʼok chi kʼanjelak chiru (Job 12:12; Prov. 1:1-4). Oxloqʼ ajwiʼ naril naq wankebʼ xkuyum (Mal. 3:16). Usta nekeʼxkʼul ebʼ li chʼaʼajkilal, junelik nekeʼxkʼutbʼesi naq kawebʼ li xpaabʼal chirix li Jehobʼa. Anaqwan jwal kʼojkʼo  chik li xchʼoolebʼ chirix li naxyeechiʼi li Yos moko joʼ ta naq xeʼxnaw chaq li yaal. Ut li Jehobʼa naxrahebʼ xbʼaan naq inkʼaʼ nekeʼxkanabʼ aatinak chirix li xkʼabʼaʼ toj «saʼ xtiixilalebʼ» (taayaabʼasi Salmo 92:13-16).

4. Kʼaru twaklesinq re xchʼoolebʼ li ak cheekebʼ chik?

⁴ Wi laaʼat yookat chi cheekobʼk, chʼolchʼooq chaawu naq li Jehobʼa inkʼaʼ nasach saʼ xchʼool li kʼanjel li ak xaabʼaanu chaq choʼq re (Heb. 6:10). Chi anchal aachʼool xaakʼe chaq chi naweʼk li yaal, ut aʼin naxsahobʼresi xchʼool li qachoxahil Yuwaʼ. Ak xyaleʼk rix laapaabʼal, maare wank sut jwal ra xaakʼul, ak xaakol rix li yaal li wank saʼ li Santil Hu, ak xaabʼaanu li kʼanjel kʼebʼil saʼ aawuqʼ ut ak xaakawresihebʼ li junchʼol. Nakaayal aaqʼe chi kʼanjelak rikʼin li xmolam li Jehobʼa li jwal kaw yook chi kʼanjelak. Joʼkan ajwiʼ, ak xaatenqʼahebʼ ut ak xaawaklesihebʼ xchʼool li nekeʼxkʼe chixjunil li xhoonal saʼ li xkʼanjel li Yos. Li Jehobʼa qʼaxal nakatxra xbʼaan li xtiikilal laachʼool, ut aʼan naxyeechiʼi naq «inkʼaʼ naxkanabʼ xjunesebʼ li nekeʼpaabʼank re» (Sal. 37:28). Naxye ajwiʼ aawe: «Naq ak saqaq chik leejolom, texinchʼoolani ajwiʼ» (Is. 46:4). Joʼkan naq, maakʼoxla naq saʼ xkʼabʼaʼ laacheekelal moko oxloqʼat ta chik saʼ li xmolam li Jehobʼa. Oxloqʼat bʼan!

5. Kʼaru tento teʼxjultika ebʼ li hermaan li ak cheekebʼ chik?

⁵ Ebʼ li hermaan li ak cheekebʼ chik kʼajoʼ nekeʼtenqʼank. Usta maare yook chi lajk chi osoʼk li xmetzʼewebʼ, abʼan naabʼal li xnawomebʼ. Li Jehobʼa naru naroksihebʼ saʼ jalan jalanq li naʼlebʼ joʼ kikʼulmank chaq junxil qʼe kutan ut saʼebʼ li qakutan.

6, 7. Aatinan chirix wiibʼ oxibʼ aj kʼanjel chiru li Jehobʼa li ak cheekebʼ chik li xeʼosobʼtesiik xbʼaan li xtiikilalebʼ xchʼool.

⁶ Li Santil Hu naʼaatinak chirixebʼ li kristiʼaan li junelik xeʼkʼanjelak chiru li Jehobʼa usta cheekebʼ chik. Jun rehebʼ aʼan laj Moisés, naq wank tana 80 chihabʼ re, kiwank joʼ propeet ut xjolomi li tenamit Israel. Li jun chik aʼan laj Daniel, li numenaq tana 90 chihabʼ wank re, abʼan toj kikʼanjelak joʼ propeet chiru li Jehobʼa. Ut chanchan naq li apóstol Juan numenaq ajwiʼ 90 chihabʼ wank re, naq kixtzʼiibʼa li hu Apocalipsis.

 ⁷ Naabʼalebʼ chik aj kʼanjel chiru li Yos inkʼaʼ nawbʼilebʼ chaq ru chiʼus, ut ebʼ li kristiʼaan inkʼaʼ mas nekeʼxnaw chaq chirixebʼ. Abʼan li Jehobʼa kixkʼe xchʼool chirixebʼ ut kixqʼajkamuhebʼ xbʼaan li xtiikilalebʼ xchʼool. Jun eetalil, li Santil Hu inkʼaʼ mas naʼaatinak chirix «jun li winq, aj Simehón xkʼabʼaʼ: li winq aʼan tiik xchʼool ut aj paabʼanel», abʼan li Jehobʼa naxnaw chaq ru chiʼus ut kixkanabʼ naq tril ru li Jesús saʼ xkachʼinal ut naq tixye jun li propesiiy chirix li Jesús ut chirix li xnaʼ (Luc. 2:22, 25-35). Qakʼoxlaq ajwiʼ chirix li xʼAna li kiwank chaq joʼ propeet. Aʼan chaq jun li xmalkaʼan li wank 84 chihabʼ re ut «inkʼaʼ naxkanabʼ li rochoch li Yos». Li Jehobʼa kixqʼajkamu xbʼaan li xtiikilal xchʼool naq kixkanabʼ naq tril ru li Jesús saʼ xkachʼinal. Chʼolchʼo naq oxloqʼ chaq laj Simeón ut li xʼAna chiru li Jehobʼa (Luc. 2:36-38).

8, 9. Chanru nekeʼtenqʼank ebʼ li hermaan li kamenaqebʼ xbʼeelom?

⁸ Saʼebʼ li qakutan, wankebʼ naabʼal li hermaan li ak cheekebʼ chik li naru nekeʼkʼanjelak joʼ jun chaabʼil eetalil choʼq rehebʼ li saaj. Qilaq li kixkʼul li xLois Didur jun li hermaan. Naq wank chaq 21 chihabʼ re, kiʼok joʼ aj kʼamolbʼe saʼ li puktesink li naxbʼaanu 130 hoor aran Canadá. Moqon, li xLois ut laj John, aʼ li xbʼeelom, naabʼal chihabʼ xeʼrulaʼani ebʼ li chʼuut. Moqon chik, xeʼkʼanjelak saʼ li Betel re Canadá numenaq 20 chihabʼ. Naq li xLois wank chik 58 chihabʼ re, xeʼxnaw naq teʼtaqlaaq chi kʼanjelak aran Ucrania. Kʼaru raj teʼxbʼaanu? Ma teʼxkʼoxla raj naq xikenaqebʼ chik xchihabʼ joʼkan naq inkʼaʼ teʼruuq chi qʼaxonk saʼ jalan chik tenamit? Xeʼxkʼulubʼa li xkʼanjelebʼ, ut laj John kixaqabʼaak saʼ xyanq li chʼuut li naril li qakʼanjel saʼ li tenamit aʼan. Wuqubʼ chihabʼ chirix aʼan, kikamk laj John, abʼan li xLois inkʼaʼ kixkanabʼ li xkʼanjel. Anaqwan 81 chihabʼ wank re ut inkʼaʼ naxkanabʼ kʼanjelak chiru li Jehobʼa chi anchal xchʼool saʼ li Betel re Ucrania, ut chixjunilebʼ qʼaxal nekeʼxra.

⁹ Joʼ li xLois, maare wankebʼ ajwiʼ li hermaan li inkʼaʼ chik mas nawbʼilebʼ ru naq nekeʼkamk li xbʼeelom, abʼan jwal oxloqʼebʼ chiru li Jehobʼa. Qʼaxal oxloqʼ naril naq chiru naabʼal chihabʼ xeʼxtenqʼa li xbʼeelom ut inkʼaʼ nekeʼxkanabʼ kʼanjelak chiru li Jehobʼa (1 Tim. 5:3). Kʼajoʼ ajwiʼ naq nekeʼxwaklesi xchʼool ebʼ li saaj.

10. Kʼaru naqatzol rikʼin laj Tony?

¹⁰ Wankebʼ naabʼal li hermaan li ak cheekebʼ chik li nekeʼwank saʼebʼ li naʼaj bʼarwiʼ nekeʼileʼk li cheek, ut aʼanebʼ ajwiʼ jun li xnimal ru maatan. Joʼkaʼin tzʼaqal naxkʼul laj Tony jun li hermaan. Saʼ agosto re li chihabʼ 1942 kikubʼeek xhaʼ naq wank 20 chihabʼ re aran Pensilvania (Estados Unidos). Moqon, inkʼaʼ kiraj wank joʼ aj puubʼ joʼkan naq kikʼeheʼk saʼ tzʼalam wiibʼ chihabʼ rikʼin waqibʼ po. Laj Tony ut li xHilda,  aʼ li rixaqil, xeʼxkʼiresi li wiibʼ chi xkokʼal saʼ li yaal. Chiru naabʼal chihabʼ, laj Tony kiwank joʼ li cheekel winq li naxkʼubʼ li kʼanjel saʼ xyanqebʼ li cheekel winq saʼ oxibʼ chi chʼuut ut kixjolomi ajwiʼ ebʼ li nimla chʼutam li naʼuxmank anaqwan chiru jun kutan. Joʼkan ajwiʼ, kixjolomi ebʼ li chʼutam li naʼuxmank saʼ jun li tzʼalam ut kixtzolebʼ chirix li Santil Hu li wankebʼ aran. Anaqwan naq wank 98 chihabʼ re, inkʼaʼ naxkʼoxla hilank saʼ li xkʼanjel chiru li Yos. Qʼaxal naxyal bʼan xqʼe chi kʼanjelak chiru li Jehobʼa ut tenqʼank saʼ li xchʼuut.

11. Chanru tqakʼutbʼesi naq oxloqʼ chiqu ebʼ li hermaan li wankebʼ saʼ li naʼaj bʼarwiʼ nekeʼileʼk li cheek malaj li inkʼaʼ chik nekeʼruuk chi elk saʼebʼ li rochoch?

¹¹ Chanru tqakʼutbʼesi naq oxloqʼ naqilebʼ li hermaan li wankebʼ saʼ li naʼaj bʼarwiʼ nekeʼileʼk li cheek malaj li inkʼaʼ chik nekeʼruuk chi elk saʼebʼ li rochoch? Wi naruhank, ebʼ li cheekel winq naru nekeʼxtenqʼahebʼ re naq teʼpuktesinq ut re naq teʼwulaq saʼebʼ li chʼutam malaj re naq teʼrabʼi. Naru tqakʼutbʼesi naq naqakʼe qachʼool chirixebʼ wi naqulaʼanihebʼ malaj nokooʼaatinak rikʼinebʼ saʼ bʼideoyamaad. Jwal us naq tqakʼe qachʼool chirixebʼ li najt wankebʼ rikʼin ebʼ li rechpaabʼanel. Miqatzʼeqtaanahebʼ. Maare wankebʼ tchʼaʼajkoʼq chiruhebʼ malaj inkʼaʼ teʼraj aatinak chirix li yookebʼ xkʼulbʼal. Abʼan qʼaxal tkʼanjelaq chiqu wi naqakʼe qahoonal chi xpatzʼbʼal rehebʼ chirix li chaabʼil naʼlebʼ li xeʼxkʼul saʼ li xkʼanjelebʼ chiru li Jehobʼa ut naqakʼe qachʼool chi rabʼinkil li teʼxseeraqʼi qe.

12. Kʼaru naru tqakʼe reetal saʼ li qachʼuut?

¹² Maare tsachq qachʼool chi xkʼebʼal reetal naq saʼ li qachʼuut wankebʼ ajwiʼ li hermaan li ak cheekebʼ chik li nekeʼxyal xqʼe chi kʼanjelak chiru li Jehobʼa. Li xHarriette, jun li hermaan re Estados Unidos, kikʼanjelak naabʼal chihabʼ chiru li Jehobʼa saʼ li xchʼuut aran Nueva Jersey. Abʼan moqon xkoho chi wank rikʼin li xkoʼ. Ebʼ li hermaan xeʼxkʼe xchʼool chi xnawbʼal ru ut xeʼxkʼe reetal naq aʼan jun li xnimal ru maatan. Aʼan kixseeraqʼi rehebʼ chirix li kixkʼul saʼ li puktesink chiruhebʼ li chihabʼ 1920 naq kixnaw li yaal. Chiruhebʼ li chihabʼ aʼan, li xHarriette junelik naxkʼam jun li sepiiy re xchʼajbʼal saʼ re, naq naxik chi puktesink, xbʼaan naq naxkʼoxla naq naru tkʼeheʼq saʼ tzʼalam. Ut joʼkan kikʼulmank, saʼ li chihabʼ 1933, wiibʼ sut kikʼeheʼk saʼ tzʼalam chiru jun xamaan. Naq li xHarriette wank chaq saʼ tzʼalam, li xbʼeelom li maawaʼ aj Testiiw, naxtenqʼa ut narilebʼ chaq li oxibʼ chi xkokʼal. Relik chi yaal, xkʼulubʼebʼ naq oxloqʼ tqil li ak cheekebʼ chik li nekeʼxyal xqʼe chi kʼanjelak chiru li Jehobʼa joʼ li xHarriette.

13. Kʼaru xqatzol chirixebʼ li hermaan li ak cheekebʼ chik li wankebʼ saʼ li xmolam li Jehobʼa?

¹³ Ebʼ li qechpaabʼanel li ak cheekebʼ chik jwal oxloqʼebʼ saʼ li xmolam li Jehobʼa. Ak xeʼxkʼe reetal chanru naq li Jehobʼa qʼaxal narosobʼtesi li xmolam ut ebʼ aʼan ajwiʼ. Ak xeʼxtzol ajwiʼ xnaʼlebʼebʼ rikʼinebʼ li xpaltil. Joʼkan bʼiʼ, qatawaq qanaʼlebʼ rikʼinebʼ ut qatawaq rusilal li xnawomebʼ (Prov. 18:4). Wi naqakʼe qahoonal re xnawbʼal ruhebʼ chiʼus, tkawuuq li qapaabʼal ut tqataw xkomon li qanawom.

14. Kʼaru li naʼlebʼ natawmank saʼ Deuteronomio 32:7 choʼq rehebʼ li saaj?

¹⁴ Qasikʼaq ebʼ li hermaan li ak cheekebʼ chik ut chooʼaatinaq rikʼinebʼ (taayaabʼasi Deuteronomio 32:7). Yaal naq maare anaqwan inkʼaʼ chik mas saqenk nekeʼilok, nachʼaʼajkoʼk chiruhebʼ bʼeek ut aatinak. Abʼan toj nekeʼraj kʼanjelak chiru li Yos ut chaabʼil nekeʼileʼk xbʼaan li Jehobʼa (Ecl. 7:1). Qajultikaq kʼaʼut naq li Jehobʼa oxloqʼ narilebʼ  ut miqakanabʼ xkʼebʼal xloqʼalebʼ. Qakʼamaq qe rikʼin laj Eliseo, aʼan inkʼaʼ kixkanabʼ xjunes laj Elías naq jun kutan aj chik kirochbʼeni. Oxibʼ sut kixye re: «Inkʼaʼ tatinkanabʼ chi xik aajunes» (2 Rey. 2:2, 4, 6).

15. Kʼaru naru tqapatzʼ rehebʼ li qechpaabʼanel li ak cheekebʼ chik?

¹⁵ Qakʼoxlaq chiʼus kʼaru tqapatzʼ rehebʼ li qechpaabʼanel li ak cheekebʼ chik re xkʼutbʼesinkil naq relik chi yaal naq naqakʼe qachʼool chirixebʼ (Prov. 1:5; 20:5). Jun eetalil, naru raj tqapatzʼ rehebʼ: «Naq toj saajat chaq, kʼaʼut naq xaapaabʼ naq xaataw li yaal?», «kʼaru ebʼ li naʼlebʼ xaakʼul chaq li kixbʼaanu naq qʼaxal tatjiloq chixkʼatq li Jehobʼa?», «kʼaru natenqʼank aawe re naq inkʼaʼ taakanabʼ kʼanjelak chiru li Jehobʼa chi sa saʼ laachʼool?» (1 Tim. 6:6-8). Chirix chik aʼan, qabʼihaq li teʼxseeraqʼi qe.

16. Naq junaq li saaj naʼaatinak rikʼin jun li cheek, kʼaʼut naq xkabʼichalebʼ nekeʼkawuuk xchʼool?

¹⁶ Naq junaq li saaj naʼaatinak rikʼin jun li qechpaabʼanel li ak cheek chik, xkabʼichalebʼ nekeʼkawuuk xchʼool (Rom. 1:12). Li saaj tixpaabʼ chi anchal xchʼool naq li Jehobʼa narilebʼ laj kʼanjel chiru, ut li cheek trekʼa naq naraheʼk ut kʼajoʼ twulaq chiru xseeraqʼinkil chanru kitenqʼaak xbʼaan li Jehobʼa.

17. Kʼaʼut nayeemank naq rajlal chihabʼ qʼaxal chʼinaʼusebʼ li ak cheekebʼ chik?

¹⁷ Relik chi yaal, usta chʼinaʼus naʼilok junaq li kristiʼaan, abʼan naq nacheekobʼk naʼosoʼk aʼin. Abʼan rajlal chihabʼ, li Jehobʼa qʼaxal chʼinaʼus narilebʼ laj kʼanjel chiru (1 Tes. 1:2, 3). Kʼaʼut? Xbʼaan naq chiru naabʼal chihabʼ xeʼxkanabʼ naq li xsantil musiqʼej tixjal ut tixchaabʼilobʼresi li xnaʼlebʼebʼ. Wi qʼaxal tqanaw ruhebʼ li qechpaabʼanel li ak cheekebʼ chik ut tqatzol qanaʼlebʼ rikʼinebʼ, qʼaxal tqilebʼ joʼ jun li xnimal ru maatan.

18. Kʼaru tqil saʼ li jun chik tzolom?

¹⁸ Abʼanan, li chʼuut moko kaʼaj tawiʼ nakawuuk naq ebʼ li saaj oxloqʼ nekeʼril ebʼ li cheek, nakawuuk ajwiʼ naq ebʼ li cheek joʼkan nekeʼxbʼaanu rikʼinebʼ li saaj. Saʼ li jun chik tzolom tqil kʼaru naru teʼxbʼaanu ebʼ li cheek re xkʼutbʼesinkil naq oxloqʼ nekeʼril ebʼ li qechpaabʼanel li saajebʼ.