1. Kʼaʼut inkʼaʼ nasach qachʼool chi rilbʼal naq ebʼ li kristiʼaan inkʼaʼ nekeʼxnaw chirix ani teʼxkʼojobʼ xchʼool?

 SAʼ LI ruuchichʼochʼ li naxjolomi laj Tza, naabʼalebʼ inkʼaʼ nekeʼxnaw chirix ani teʼxkʼojobʼ xchʼool. Rajlal nekeʼbʼalaqʼiik xbʼaan ebʼ li xninqal ru aj yakonel, ebʼ li nekeʼawabʼejink saʼ xbʼeen li ruuchichʼochʼ ut ebʼ laj kʼamolbʼe saʼebʼ li paabʼal. Joʼkan ajwiʼ nekeʼxkʼul rikʼinebʼ li rechkabʼal, li ramiiw ut li xjunkabʼal. Inkʼaʼ nasach qachʼool chi rilbʼal aʼin xbʼaan naq li Santil Hu naxye naq «saʼ rosoʼjikebʼ li kutan» li kristiʼaan inkʼaʼ teʼrahoq, teʼtikʼtiʼiq ut teʼbʼalaqʼiq. Teʼxkʼutbʼesi li xnaʼlebʼ li xyosil li ruuchichʼochʼ aʼin li maajunwa tqakʼojobʼ qachʼool rikʼin (2 Tim. 3:1-4; 2 Cor. 4:4).

2. a) Chirix ani tqakʼojobʼ qachʼool? b) Kʼaru naru naxkʼoxla junaq?

² Joʼ tzʼaqal aj paabʼanel naqanaw naq tento tqakʼojobʼ qachʼool chirix li Jehobʼa (Jer. 17:7, 8). Chʼolchʼo chiqu naq nokooxra ut naq maajunwa tixtzʼeqtaanahebʼ li ramiiw (Sal. 9:11). Joʼkan ajwiʼ tqakʼojobʼ qachʼool rikʼin li Jesús xbʼaan naq aʼan kixkʼe li xyuʼam saʼ qakʼabʼaʼ (1 Ped. 3:18). Ut naqil naq li naʼlebʼ li naxkʼe li Santil Hu paabʼajel (2 Tim. 3:16, 17). Chʼolchʼo chiqu naq tooruuq xkʼojobʼankil qachʼool rikʼin li Jehobʼa, li Jesús ut li Santil Hu. Abʼanan, ma naru naq junelik tqakʼojobʼ qachʼool rikʼinebʼ li hermaan saʼ li chʼuut? Wi joʼkan, qilaq kʼaʼut.

3. Kʼaru li nimla maatan wank choʼq qe? (Marcos 10:29, 30).

³ Li Jehobʼa kixkʼe jun li qanimla maatan naq wanko saʼ li xjunkabʼal. Saʼ xkʼabʼaʼ aʼin naabʼal li osobʼtesihom naqakʼul  (taayaabʼasi Marcos 10:29, 30). Saʼ chixjunil li ruuchichʼochʼ wankebʼ li hermaan li nekeʼxra ut nekeʼxyal xqʼe chi xbʼaanunkil li nawulak chiru li Jehobʼa. Maare jalan jalanq li qaatinobʼaal, li qawanjik malaj joʼ chanru naqatiqibʼ qibʼ, abʼanan qʼaxal naqarahebʼ li qahermaan naq naqanawebʼ ru. Ut nawulak chiqu xloqʼoninkil li Jehobʼa saʼ junajil (Sal. 133:1).

4. Kʼaʼut aajel ru ebʼ li xtenqʼ li hermaan?

⁴ Anaqwan xhoonalil re naq toowanq saʼ junajil. Wank sut ebʼ li qahermaan nokooʼeʼxtenqʼa chi xnumsinkil ebʼ li chʼaʼajkilal (Rom. 15:1; Gál. 6:2). Joʼkan ajwiʼ nokooʼeʼxtenqʼa re naq inkʼaʼ tqakanabʼ kʼanjelak chiru li Jehobʼa ut naq kawaqo saʼ li qapaabʼal (1 Tes. 5:11; Heb. 10:23-25). Ra raj tqekʼa wi li chʼuut inkʼaʼ tooʼeʼxtenqʼa re xqʼaxbʼal ru li xik nekeʼilok qe: laj Tza ut li nekeʼtaqenk re. Chi seebʼ tooʼeʼxrahobʼtesi. Saʼ li hoonal aʼan, qʼaxal tqabʼanyoxi naq wanqebʼ li qahermaan chiqakʼatq.

5. Kʼaʼut nekeʼchʼaʼajkoʼk chiru wiibʼ oxibʼ xkʼojobʼankil xchʼool rikʼinebʼ li junchʼol?

⁵ Maare wankebʼ nekeʼchʼaʼajkoʼk chiru xkʼojobʼankil xchʼool rikʼinebʼ li hermaan. Kʼaʼut? Maare kixye re junaq li naʼlebʼ li yook xkʼulbʼal ut aʼin kixye re jalan chik. Ut maare xeʼxye naq teʼxbʼaanu junaq li naʼlebʼ ut inkʼaʼ xeʼxbʼaanu. Malaj junaq li hermaan kixye malaj kixbʼaanu junaq li naʼlebʼ li kixrahobʼtesi. Kʼaru ttenqʼanq qe chi xkʼojobʼankil qachʼool rikʼinebʼ li hermaan?

6. Chanru nokooxtenqʼa li rahok chi xkʼojobʼankil qachʼool rikʼinebʼ li qahermaan? (1 Corintios 13:4-8).

⁶ Li xkʼojobʼankil qachʼool nachalk rikʼin li rahok. Saʼ li tasal 13 re 1 Corintios naqataw naabʼal li naʼlebʼ li naʼaatinak  chirix li rahok li tooxtenqʼa re xkʼojobʼankil qachʼool ut wank wiʼ chik saʼ usilal rikʼinebʼ (taayaabʼasi 1 Corintios 13:4-8). Saʼ li raqal 4 naxye naq «li rahok wank xkuyum saʼ chixjunil; aʼan chaabʼil». Li Jehobʼa qʼaxal wank xkuyum qikʼin usta xoomaakobʼk chiru. Joʼkan ajwiʼ tento tqabʼaanu wi ebʼ li qahermaan xeʼmaakobʼk chiqu malaj xeʼxbʼaanu junaq li naʼlebʼ li xooxrahobʼtesi. Li raqal 5 naxye naq li rahok «inkʼaʼ napoʼk» ut «inkʼaʼ naxkʼe saʼ xchʼool li inkʼaʼ us naxkʼul». Inkʼaʼ naqaj xxokbʼal saʼ qachʼool li kʼaru xeʼxbʼaanu qe. Eclesiastés 7:9 naxye naq inkʼaʼ toopoʼq saʼ junpaat. Tqabʼaanu bʼan li naxye Efesios 4:26: «Mixulqʼi li saqʼe chi toj yooq leejosqʼil».

7. Chanru nokooxtenqʼa Mateo 7:1-5 re xkʼojobʼankil qachʼool rikʼinebʼ li hermaan?

⁷ Jun chik li naʼlebʼ li tooxtenqʼa chi xkʼojobʼankil qachʼool rikʼinebʼ li hermaan aʼan rilbʼal chanru li Jehobʼa narilebʼ. Aʼan naxrahebʼ ut inkʼaʼ naxkʼe saʼ xchʼool li maak li nekeʼxbʼaanu. Joʼkan ajwiʼ tento tqabʼaanu (Sal. 130:3). Moko tqakʼe ta saʼ qachʼool li yibʼru li nekeʼxbʼaanu, chirix bʼan li chaabʼil naʼlebʼ li nekeʼxbʼaanu ut rilbʼal li teʼruuq xbʼaanunkil (taayaabʼasi Mateo 7:1-5). Tqapaabʼ chixjunil li nekeʼxye xbʼaan naq li rahok «chixjunil naxpaabʼ» (1 Cor. 13:7). Aʼin moko naraj ta xyeebʼal naq li Jehobʼa naxye qe naq tqapaabʼ yal chi joʼkan ebʼ li junchʼol. Naraj bʼan naq tqapaabʼebʼ xbʼaan naq xeʼxkʼutbʼesi naq naru naqakʼojobʼ qachʼool rikʼinebʼ. b

8. Kʼaru tatruuq xbʼaanunkil re naq taakʼojobʼ aachʼool rikʼinebʼ li junchʼol?

⁸ Li xpaabʼankilebʼ li junchʼol moko nakʼulmank ta saʼ junpaat. Kʼaru tatruuq xbʼaanunkil re naq taakʼojobʼ aachʼool rikʼinebʼ li junchʼol? Nawebʼ ru chiʼus. Aatinan rikʼinebʼ saʼ li chʼutam. Kʼe aahoonal wank rikʼinebʼ saʼ li puktesink. Wankaq aakuyum rikʼinebʼ ut kʼehebʼ xhoonal re naq teʼxkʼutbʼesi naq paabʼajelebʼ. Maare xbʼeenwa tchʼaʼajkoʼq chaawu xnawbʼal ru junaq malaj xyeebʼal re junaq li naʼlebʼ li nakaakʼul. Abʼanan, naq yook chi numeʼk li kutan sa chik taawekʼa aawibʼ rikʼin ut aʼin tixbʼaanu naq taaye re chanru nakaawekʼa aawibʼ (Luc. 16:10). Abʼanan, kʼaru taabʼaanu wi junaq tixseeraqʼi li nakaaye re? Maatzʼeq saʼ junpaat laaʼamiiwil rikʼin, kʼe bʼan xhoonal. Maakanabʼ naq aʼin tixbʼaanu naq inkʼaʼ chik taakʼojobʼ aachʼool rikʼinebʼ li junchʼol. Li tooxtenqʼa aʼan xtzʼilbʼal rix li xeʼxbʼaanu ebʼ laj kʼanjel chiru li Jehobʼa usta kichʼaʼajkoʼk chiruhebʼ, abʼan nekeʼxkʼojobʼ xchʼool rikʼinebʼ li junchʼol.

9. a) Kʼaru kixbʼaanu xʼAna usta yibʼebʼ ru li xnaʼlebʼ li wankebʼ choʼq ruuchil li Jehobʼa? b) Kʼaru nakaatzol rikʼin li xʼAna? (Chaawil li Jalam u).

⁹ Ma xchʼina aachʼool li kixbʼaanu junaq li hermaan li wank xkʼanjel saʼ li chʼuut? Wi joʼkan, li kixkʼul li xʼAna tatxtenqʼa. Saʼ xkutankilebʼ laj Israel, li wank xwankil aʼan laj Elí li xyuwaʼil aj tij. Abʼan li xjunkabʼal moko nekeʼxkanabʼ ta jun chaabʼil eetalil. Ebʼ li ralal xkʼajol, aʼanebʼ ajwiʼ xyuwaʼil aj tij, nekeʼyumbʼeetak koʼbʼeetak, abʼan laj Elí moko kaw ta kixqʼusebʼ. Abʼan, li Jehobʼa moko saʼ junpaat ta kirisi  laj Elí saʼ li xkʼanjel. Kʼaru kixbʼaanu li xʼAna? Usta laj Elí aʼan xyuwaʼil aj tij, li xʼAna moko kixkanabʼ ta xik xloqʼoninkil ru li Jehobʼa saʼ li rochoch. Naq li xʼAna yook chi tijok xbʼaan naq ra saʼ xchʼool laj Elí kixye naq tkalaaq ut kaw kiraatina (1 Sam. 1:12-16). Li xʼAna kixye re li Jehobʼa, wi twanq junaq li xyum, tixqʼaxtesi re naq tkʼanjelaq chiru saʼ li rochoch. Kixbʼaanu li kixye re li Jehobʼa usta li xyum wanq rubʼel xwankil laj Elí (1 Sam. 1:11). Ma aajel ru xqʼusbʼalebʼ li ralal xkʼajol laj Elí? Joʼkan, abʼan li Jehobʼa kixbʼaanu saʼ li xhoonalil (1 Sam. 4:17). Li Jehobʼa kirosobʼtesi li xʼAna rikʼin jun li xyum, laj Samuel (1 Sam. 1:17-20).

10. Chanru kixkʼutbʼesi laj David naq toj naxkʼojobʼ xchʼool rikʼinebʼ li junchʼol usta kirahobʼtesiik xchʼool?

¹⁰ Ma xatxrahobʼtesi junaq laawamiiw? Wi joʼkan, kʼoxla li kixkʼul li awabʼej David. Naq laj Absalón, li ralal, kixyal rechaninkil li awabʼejilal, laj Ahitofel, li ramiiw laj David, kiʼokenk chirix. Aʼin kʼajoʼ kixrahobʼtesi laj David xbʼaan naq kitzʼeqtaanaak xbʼaan li ralal ut li ramiiw. Abʼan aʼin moko kixbʼaanu ta naq laj David inkʼaʼ chik tixkʼojobʼ xchʼool rikʼinebʼ li junchʼol. Kixkʼojobʼ xchʼool rikʼin laj Husái, li ramiiw li tiik xchʼool rikʼin, xbʼaan naq aʼin kixkʼe li xyuʼam saʼ xiwxiwal re xtenqʼankil (2 Sam. 17:1-16).

11. Chanru kixkʼutbʼesi li xmoos laj Nabal naq naxkʼojobʼ xchʼool rikʼinebʼ li junchʼol?

¹¹ Qakʼoxlaq li kixbʼaanu jun li xmoos laj Nabal, jun aj Israel li bʼihom. Laj David ut ebʼ li nekeʼochbʼenink re chaabʼil xeʼnaʼlebʼak rikʼinebʼ li xmoos laj Nabal ut xeʼxkol rix. Saʼ xnumikebʼ li kutan, laj David kixpatzʼ li xtzekemq ebʼ li winq li nekeʼochbʼenink re, abʼan laj Nabal inkʼaʼ kixkʼe, kʼajoʼ kijosqʼoʼk laj David joʼkan naq kixye naq tixkamsi chixjunil li wank saʼ rochoch laj Nabal. Jun rehebʼ li xmoos laj Nabal kixye re li xʼAbigaíl li kikʼulmank, li rixaqil laj Nabal. Naxnaw naq li tixbʼaanu li xʼAbigaíl, tixkol li xyuʼamebʼ. Moko kiʼelelik ta. Kixkʼojobʼ xchʼool rikʼin li xʼAbigaíl xbʼaan naq nawbʼil ru naq chaabʼil nanaʼlebʼak ut chaabʼil kiʼelk  naq kixbʼaanu aʼin. Li xʼAbigaíl inkʼaʼ kixuwak re aatinak rikʼin laj David re naq inkʼaʼ tixbʼaanu li yook xkʼoxlankil (1 Sam. 25:2-35). Ut aʼan, naxnaw naq laj David tixkʼoxla chiʼus li tixbʼaanu.

12. Chanru kixkʼutbʼesi li Jesús naq naxkʼojobʼ xchʼool rikʼinebʼ li xʼapóstol usta xeʼpaltoʼk?

¹² Li Jesús kixkʼojobʼ xchʼool rikʼinebʼ li xtzolom usta aʼanebʼ xeʼpaltoʼk (Juan 15:15, 16). Naq laj Santiago ut laj Juan xeʼxpatzʼ re li xnaʼajebʼ saʼ li Xʼawabʼejilal, li Jesús moko kirisihebʼ ta choʼq xtzolom chi moko kixpatzʼ rehebʼ kʼaʼut yookebʼ xloqʼoninkil ru li Jehobʼa (Mar. 10:35-40). Saʼ li qʼoqyink naq kichapeʼk, li xtzolom xeʼxkanabʼ xjunes (Mat. 26:56). Abʼan li Jesús moko kixtzʼeqtaana ta li ramiiwil rikʼinebʼ. Naxnaw li xpaltilebʼ, ut «kixrahebʼ […] toj saʼ rosoʼjik» (Juan 13:1). Ut, naq ak kiwakliik wiʼ chik chi yoʼyo, kixkʼe rehebʼ li junlaju chi apóstol li nimla kʼanjel re xbʼeresinkil li puktesink ut rilbʼalebʼ li xkarneer (Mat. 28:19, 20; Juan 21:15-17). Wank xyaalal kʼaʼut kixkʼojobʼ xchʼool rikʼinebʼ li winq aʼin. Chixjunilebʼ tiikebʼ xchʼool toj saʼebʼ li xkamik. Joʼ xqil, li xʼAna, laj David, li xmoos laj Nabal, li xʼAbigaíl ut li Jesús keʼxkʼojobʼ xchʼool rikʼinebʼ li kristiʼaan li moko tzʼaqal ta re ru xyuʼamebʼ. Ut nekeʼxkanabʼ jun chaabʼil eetalil choʼq qe.

13. Kʼaʼut naq tchʼaʼajkoʼq chiqu xkʼojobʼankil qachʼool rikʼinebʼ li junchʼol?

¹³ Ma xaaye re junaq li hermaan li xaakʼul saʼ laayuʼam ut moqon xaanaw naq kixye rehebʼ li junchʼol? Relik chi yaal, ra xkʼulbʼal aʼin. Jun li hermaan kixye re jun li cheekel winq li yook xkʼulbʼal saʼ li xyuʼam. Wulajaq chik li rixaqil li cheekel winq kixbʼoq li hermaan re xwaklesinkil xchʼool, aʼin kikʼulmank xbʼaan naq li cheekel winq kixye re li rixaqil li kirabʼi. Aʼin kixbʼaanu, naq li hermaan inkʼaʼ chik kixkʼojobʼ xchʼool rikʼin li cheekel winq aʼin. Abʼan li hermaan chaabʼil kinaʼlebʼak ut kixsikʼ xtenqʼ. Kiʼaatinak rikʼin jalan chik cheekel winq, ut aʼin kitenqʼank re, re naq tixkʼojobʼ xchʼool wiʼ chik rikʼinebʼ li cheekel winq.

14. Kʼaru kitenqʼank re li hermaan re xkʼojobʼankil wiʼ chik xchʼool rikʼinebʼ li cheekel winq?

¹⁴ Chiru naabʼal hoonal, jun li hermaan yook xjosqʼil rikʼin wiibʼ li cheekel winq li naxkʼoxla naq moko paabʼajelebʼ ta. Abʼan kixjultika naq jun li hermaan li naroxloqʼi kixye jun li aatin li wank xwankil: «Li xikʼ naʼilok qe aʼan laj Tza, maawaʼ ebʼ li qahermaan». Li hermaan kiʼok xkʼoxlankil li naʼlebʼ aʼin ut kitijok. Chirix chik aʼan kiruuk xkʼambʼal ribʼ saʼ usilal rikʼinebʼ li wiibʼ chi cheekel winq.

15. Kʼaʼut naʼajmank hoonal re xkʼojobʼankil wiʼ chik aachʼool? Ye li kixkʼul li xGrete.

¹⁵ Ma xateʼrisi saʼ laakʼanjel saʼ li chʼuut? Qʼaxal ra xkʼulbʼal aʼin. Saʼ li chihabʼ 1930, li xGrete ut li xnaʼ keʼkʼanjelak chaq chiru li Jehobʼa aran Alemania, bʼarwiʼ ramro li qakʼanjel. Ut kitenqʼank re risinkil chi huhil li hu Laj Kʼaakʼalehom choʼq rehebʼ li hermaan. Abʼan ebʼ li hermaan xeʼxnaw naq li xyuwaʼ li xGrete xikʼ naril li yaal. Ut xeʼxkʼoxla naq naru naq teʼjiteʼq. Saʼ xkʼabʼaʼ aʼin, xeʼrisi saʼ li xkʼanjel. Abʼan moko kaʼaj tawiʼ aʼin kixkʼul. Saʼ li xkabʼ nimla yalok u, ebʼ li hermaan inkʼaʼ nekeʼxkʼe li tasal hu re li xGrete ut li xnaʼ, chi moko nekeʼraatinahebʼ naq nekeʼileʼk ru. Ra xkʼulbʼal aʼin! Ut aʼin kichʼinaak wiʼ xchʼool li xGrete, xbʼaan aʼin kichʼaʼajkoʼk  chiru xkuybʼalebʼ xmaak li hermaan ut xkʼojobʼankil wiʼ chik xchʼool rikʼinebʼ. Saʼ xnumikebʼ li chihabʼ, kixkʼe reetal naq li Jehobʼa kixkuyebʼ xmaak li hermaan aʼin, ut joʼkan ajwiʼ, tento tixbʼaanu. c

16. Kʼaʼut tento tqayal qaqʼe chi xkʼojobʼankil wiʼ chik qachʼool rikʼinebʼ li qechpaabʼanel?

¹⁶ Ma numsihom junaq li chʼaʼajkilal joʼ aʼin? Wi joʼkan, yal aaqʼe chi xkʼojobʼankil wiʼ chik aachʼool rikʼinebʼ li hermaan. Maare naabʼal hoonal t-ajmanq chaawu re xbʼaanunkil aʼin, abʼan wank rusilal. Kʼoxla li eetalil aʼin. Wi junaq li tzekemq naxkʼe qayajel, weent tqabʼaanu rikʼin li naqatzeka, abʼan moko saʼ xkʼabʼaʼ ta aʼin tqakanabʼ tzekank. Joʼkan ajwiʼ, inkʼaʼ tqakanabʼ naq junaq li chʼaʼajkilal tixbʼaanu naq inkʼaʼ chik tqakʼojobʼ qachʼool rikʼinebʼ li qechpaabʼanel, xbʼaan naq chiqajunilo aj maak. Abʼan wi naqayal qaqʼe chi xkʼojobʼankil wiʼ chik qachʼool rikʼinebʼ, qʼaxal sahaq wiʼ chik saʼ qachʼool ut tqabʼaanu chixjunil li wank saʼ quqʼ re naq saʼ li chʼuut kʼojkʼooq wiʼ chik qachʼool.

17. a) Kʼaʼut naq aajel ru tqakʼojobʼ qachʼool rikʼinebʼ li junchʼol? b) Kʼaru tqil saʼ li jun chik tzolom?

¹⁷ Saʼ li xruuchichʼochʼ laj Tza, ebʼ li poyanam inkʼaʼ chik nekeʼxkʼojobʼ xchʼool chiribʼilebʼ ribʼ. Abʼan saʼ xtenamit li Jehobʼa naru naqakʼojobʼ qachʼool, xbʼaan naq naqara qibʼ chiqibʼil qibʼ. Xbʼaan aʼin, sa saʼ qachʼool ut wanko saʼ junajil. Ut rikʼin aʼin, naru tqakol qibʼ chiru li chʼaʼajkilal li tchalq moqon. Abʼan, kʼaru tqabʼaanu wi junaq li hermaan, xooxrahobʼtesi ut inkʼaʼ chik naqakʼojobʼ qachʼool rikʼin? Naru naqakʼojobʼ wiʼ chik qachʼool, wi naqil li naʼlebʼ joʼ chanru naril li Jehobʼa, xyuʼaminkil li naxye li Santil Hu, rilbʼal junjunq li eetalil saʼebʼ li tasal hu ut xraabʼal ebʼ li qechpaabʼanel. Wi joʼkan tqabʼaanu, tqataw naabʼal ebʼ li qamiiw joʼ «junaq asbʼej» (Prov. 18:24). Abʼan moko kaʼaj tawiʼ tqakʼojobʼ qachʼool rikʼinebʼ li junchʼol; aajel ru naq tqakʼutbʼesi ajwiʼ naq aʼanebʼ naru nekeʼxkʼojobʼ xchʼool qikʼin. Saʼ li jun chik tzolom tqatzʼil rix chanru teʼruuq xbʼaanunkil aʼin.