Usta li Santil Hu moko aʼan ta jun li hu li naʼaatinak chirix chanru tatbʼaneʼq, li naʼlebʼ li wank chisaʼ naru naxtenqʼa li kristiʼaan. Qilaq wiibʼ oxibʼ rehebʼ aʼin.

«Inkʼaʼ nekeʼraj aj bʼanonel li kawebʼ, aʼebʼ bʼan li yaj nekeʼajok re» (MATEO 9:12).

Li Santil Hu naxye naq wank sut naʼajmank xtenqʼ ebʼ laj bʼanonel. Naabʼalebʼ li kristiʼaan li wankebʼ xyajel li xkʼaʼuxl nekeʼxtaw xtenqʼ naq nekeʼxsikʼ xkomon li naʼlebʼ chirix li xyajelebʼ joʼ ajwiʼ naq nekeʼwulak rikʼin laj bʼanonel.

«Us naq tqatzol qibʼ chi xchʼolaninkil qibʼ re naq kawaqo» (1 TIMOTEO 4:8, Wy).

Xkawresinkil li qajunxaqalil naru nokooxtenqʼa re naq sa wanq li qakʼaʼuxl. Wiibʼ oxibʼ li naʼlebʼ li tento xbʼaanunkil, aʼan xkawresinkil rajlal li qajunxaqalil, xwaʼbʼal li tzekemq li nakʼehok kawilal malaj li wank xbʼitamiin ut wark chiʼus.

«Li sahil chʼoolej aʼan chanchan li bʼan nakʼehok kawilal; abʼan li rahil chʼoolej naʼoksink yajel» (PROVERBIOS 17:22).

Xyaabʼasinkil ebʼ li xraqal li Santil Hu li naxwaklesi qachʼool ut xsikʼbʼal li tooruuq xbʼaanunkil tooxtenqʼa re naq sa tqekʼa qibʼ. Wi naqakʼe qachʼool chirix li chaabʼil naʼlebʼ li  naqakʼul saʼ li qayuʼam ut chʼolchʼo chiqu naq tchaabʼiloʼq saʼ li kutan chalk re, aʼin naru tooxtenqʼa re naq sa wanq li qakʼaʼuxl.

«Li ani naxkubʼsi ribʼ, aʼan wank xnaʼlebʼ» (PROVERBIOS 11:2).

Maare t-ajmanq chaawu xtenqʼ ebʼ li junchʼol re naq tatruuq xbʼaanunkil wiibʼ oxibʼ li naʼlebʼ, joʼkan naq kʼulubʼa li tenqʼ aʼin. Chʼolchʼo naq ebʼ laawamiiw ut laajunkabʼal nekeʼraj aatenqʼankil abʼan maare inkʼaʼ nekeʼxnaw chanru xbʼaanunkil. Ye rehebʼ chi chʼolchʼo ru li naʼajmank chaawu, chiwanq aanaʼlebʼ ut misach saʼ aachʼool xbʼanyoxinkil chiruhebʼ chixjunil li nekeʼxbʼaanu re aatenqʼankil.

Li xNicole a li wank jun xyajel li naxbʼaanu naq saʼ junpaat najalaak li xnaʼlebʼ ut li narekʼa (trastorno bipolar), naxye: «Xinkʼe reetal naq moko us ta wankin, joʼkan naq xkohin rikʼin laj bʼanonel. Aʼan kixchʼolobʼ chiwu li yookin xkʼulbʼal ut xinxtenqʼa chi rilbʼal naq wank jun inyajel. Kixye ajwiʼ we kʼaru li bʼan tento tinket choʼq re linyajel».

Laj Peter li nachʼiʼchʼiʼiik xbʼaan li rahil chʼoolej (depresión), naxye: «Xyaabʼasinkil li Santil Hu rajlal kutan wochbʼeen li wixaqil jwal nikinxtenqʼa. Chi joʼkan nintikibʼ li kutan rikʼin chaabʼil kʼaʼuxej li naxwaklesi inchʼool. Xinkʼe reetal naq saʼebʼ li kutan naq moko sa ta nawekʼa wibʼ, junelik wank jun xraqal li Santil Hu li nawulak chiwu».

Li xJi-yoo li wank jun xyajel li xkʼaʼuxl li naxbʼaanu naq inkʼaʼ twaʼaq joʼ naʼajmank chiru (trastorno alimenticio), naxye: «Saʼ xtiklajik naxkʼe inxutaan xseeraqʼinkil re jalan chik li chʼaʼajkilal li ninkʼul. Abʼan jun li wamiiw li nikinxra ut naxtaw wu, xinxtenqʼa chi xkʼebʼal reetal naq moko wankin ta injunes ut re naq sa twekʼa wibʼ».

Laj Timothy li wank jun xyajel li xkʼaʼuxl li naxbʼaanu naq junelik chʼiʼchʼiʼi trekʼa ribʼ (trastorno obsesivo compulsivo), naxye: «Saʼ xkʼabʼaʼ li Santil Hu, anaqwan ninkʼe saʼ xnaʼaj li kʼanjelak ut li hilank. Ebʼ li naʼlebʼ li wank chisaʼ nikinxtenqʼa re naq inkʼaʼ chik tinkʼe saʼ inchʼool ebʼ li chʼaʼajkilal».