1. Kʼaru li patzʼom maare naqabʼaanu?

MA NAʼOK aaxiw chi xkʼoxlankil chirix li nimla naʼlebʼ li tkʼulmanq chi seebʼ, joʼ li xsachik li bʼalaqʼil paabʼal, naq laj Gog re Magog tooxrahobʼtesi ut li Armagedón? Maare wank sut nakaakʼoxla, ma kawaq tawiʼ laapaabʼal naq tkʼulmanq chixjunil aʼin? Wi joʼkan, qʼaxal tatxtenqʼa li aatin li kixye li Jesús, li natawmank saʼ li raqal li naxjolomi li tzolom aʼin. Li Jesús kixye rehebʼ li xtzolom: «Misachk eechʼool chi kʼoxlak. Chepaabʼ li Yos» (Juan 14:1). Wi kawaq li qapaabʼal, maakʼaʼaq qaxiw chirix li tkʼulmanq chi seebʼ.

2. Chanru tooruuq xkawresinkil li qapaabʼal, ut kʼaru tqatzʼil rix saʼ li tzolom aʼin?

² Jun li naʼlebʼ re xkawresinkil li qapaabʼal re naq tooruuq xnumsinkil ebʼ li chʼaʼajkilal li tkʼulmanq chi seebʼ, aʼan xtzʼilbʼal rix chanru naqakuy anaqwan. Chi joʼkan tooruuq rilbʼal kʼaru li naʼlebʼ chirix li qapaabʼal tento tqakawresi qibʼ. Naq nokooruuk xnumsinkil junaq li chʼaʼajkilal, qʼaxal nakawuuk wiʼ chik li qapaabʼal. Ut aʼin tooxtenqʼa chi xkuybʼal li tkʼulmanq chi seebʼ. Saʼ li tzolom aʼin, tqil kaahibʼ li naʼlebʼ li tixkʼutbʼesi naq toj naʼajmank chaq xtzʼaqobʼ li xpaabʼal ebʼ li xtzolom li Jesús. Tqil ajwiʼ chanru tooruuq xkuybʼal ebʼ li chʼaʼajkilal joʼ aʼin ut chanru tooxkawresi chirix li tkʼulmanq chi seebʼ.

3. Joʼ naxye saʼ Mateo 6:30, 33, kʼaru kixkanabʼ chi chʼolchʼo ru li Jesús chirix li paabʼal?

³ Ak re naq li bʼeelomej naraj xkʼebʼal re li rixaqil ut ebʼ li ralal xkʼajol li xtzakahemq, raqʼebʼ ut rochochebʼ. Wank sut qʼaxal chʼaʼaj xbʼaanunkil aʼin saʼebʼ li qakutan. Wankebʼ li hermaan keʼisiik saʼ li xkʼanjelebʼ ut, inkʼaʼ nekeʼxtaw jalan chik,  usta nekeʼxyal xqʼe chi xsikʼbʼal. Wankebʼ ajwiʼ inkʼaʼ nekeʼxkʼulubʼa li kʼanjel xbʼaan naq inkʼaʼ naxchap ribʼ rikʼin li naxye li Jehobʼa. Maakʼaʼ naxye li tkʼulmanq, tento naq tqapaabʼ naq li Jehobʼa tixkʼe qe li t-ajmanq chiqu. Li Jesús kixkanabʼ chi chʼolchʼo chiruhebʼ li xtzolom saʼ li seeraqʼ li kixkʼe saʼ li tzuul (taayaabʼasi Mateo 6:30, 33). Wi relik chi yaal naq kʼojkʼo qachʼool naq li Jehobʼa maajunwa tooxkanabʼ, tooruuq xkʼebʼal qachʼool chirix li wank xwankil: kʼanjelak chirix li Xʼawabʼejilal li Yos. Ut, naq naqil chanru li Jehobʼa naxkʼe qe li naʼajmank saʼ li qayuʼam, qʼaxal nokoojilok chixkʼatq ut li qapaabʼal qʼaxal nakawuuk.

4, 5. Kʼaru kitenqʼank re jun li junkabʼal naq yookebʼ chaq xkʼaʼuxl chi xsikʼbʼal li naʼajmank saʼ li xyuʼamebʼ?

⁴ Qilaq li kixkʼul li junkabʼal Castro, li wank saʼ li tenamit Venezuela. Ak xeʼxkʼe reetal chanru li Jehobʼa kixtenqʼahebʼ naq yookebʼ chaq xkʼaʼuxl chi xsikʼbʼal li naʼajmank chiruhebʼ. Maakʼaʼ napaltoʼk chaq chiruhebʼ xbʼaan naq nekeʼxkʼanjela ru li chʼochʼ. Abʼan, saʼ jun kutan, ebʼ laj elqʼ li xuwajel ru xnaʼlebʼebʼ, xeʼxmaqʼ li xnaʼajebʼ ut xeʼaanilasiik. Laj Miguel, li yuwaʼbʼej, naxye: «Anaqwan kaʼajwiʼ naqawenteni qibʼ rikʼin jun chʼina peraas li naʼajej li xeʼxtoʼoni qe. Li ninpatzʼ xbʼeenwa re li Jehobʼa rajlal kutan, aʼan naq tixkʼe qe li naʼajmank chiqu re li kutan aʼan». Chʼaʼaj li xwanjikebʼ li junkabʼal Castro, abʼan chʼolchʼo chiruhebʼ naq li xchoxahil Yuwaʼ, li qʼaxal narahok, tixkʼe rehebʼ li naʼajmank chiruhebʼ rajlal kutan. Joʼkan naq inkʼaʼ nekeʼxkanabʼ xik saʼ li chʼutam ut tzʼaqonk saʼ li puktesink. Nekeʼxsikʼ xbʼeenwa li Xʼawabʼejilal li Yos saʼ xyuʼamebʼ, ut li Jehobʼa junelik naxchʼolanihebʼ.

⁵ Chiruhebʼ li hoonal aʼan, laj Miguel ut li xYurai, li rixaqil, nekeʼril chanru li Jehobʼa maajunwa naxkanabʼebʼ. Wank sut li Jehobʼa naroksi ebʼ li hermaan re xkʼebʼal li naʼajmank chiruhebʼ malaj xtenqʼankil laj Miguel chi xtawbʼal junaq li xkʼanjel. Wank sut, kiroksi li chʼuut li kixxaqabʼ li qamolam li naʼilok re, naq nawank junaq li rahilal, chi xkʼebʼal rehebʼ li naʼajmank chiruhebʼ. Li Jehobʼa junelik naxtenqʼahebʼ. Joʼkan naq li xpaabʼal li junkabʼal aʼin qʼaxal kikawuuk. Naq li xYoselin, li xbʼeen xkoʼ, kiʼaatinak chirix chanru keʼtenqʼaak xbʼaan li Jehobʼa naq keʼxkʼul jun li chʼaʼajkilal, naxye: «Narekʼasi inchʼool rilbʼal chanru li Jehobʼa nikinxtenqʼa. Nawil joʼ jun li wamiiw li maajunwa nikinxkanabʼ injunes». Naxye ajwiʼ: «Li chʼaʼajkilal li xqanumsi joʼ junkabʼal tooxtenqʼa chi xnumsinkil li tchalq moqon».

6. Chanru tatruuq xkawresinkil laapaabʼal wi nachʼaʼajkoʼk chaawu xtawbʼal laatumin?

⁶ Ma nachʼaʼajkoʼk chaawu xtawbʼal laatumin anaqwan? Wi joʼkan, aʼin chʼaʼaj xnumsinkil. Usta chʼaʼaj, tatruuq roksinkil laahoonal re xkawresinkil laapaabʼal. Tijon chiru li Jehobʼa, yaabʼasi li kixye li Jesús saʼ Mateo 6:25-34 ut naʼlebʼa rix. Kʼoxla rix li xyuʼamebʼ  li hermaan li nekeʼxkʼutbʼesi naq li Jehobʼa naʼilok rehebʼ xbʼaan naq nekeʼxkʼe xchʼool chi kʼanjelak chiru (1 Cor. 15:58). Aʼin tatxtenqʼa re naq chʼolchʼooq chaawu naq li Jehobʼa tatxtenqʼa ajwiʼ laaʼat. Aʼan naxnaw li kʼaru nakaawaj ut naxnaw ajwiʼ chanru xkʼebʼal. Naq taawil chanru li Jehobʼa nakatxtenqʼa, tkawuuq laapaabʼal ut tatruuq xkuybʼal ebʼ li nimla chʼaʼajkilal li tchalq moqon (Hab. 3:17, 18).

7. Chanru kixkʼutbʼesi jun li kaqsut-iqʼ chanru wankebʼ li xpaabʼal ebʼ li xtzolom li Jesús, joʼ naxye saʼ Mateo 8:23-26?

⁷ Saʼ jun kutan li Jesús ut ebʼ li xtzolom yookebʼ chi xik saʼ jun li jukubʼ naq kichalk jun li kaqsut-iqʼ. Ut saʼ li hoonal aʼan, li Jesús kixtenqʼahebʼ chi rilbʼal naq toj wank naʼajmank saʼ li xpaabʼalebʼ (taayaabʼasi Mateo 8:23-26). Kaw li kaqsut-iqʼ, joʼkan naq li haʼ kiʼok saʼ li jukubʼ, abʼan li Jesús sa yook chi wark. Kʼajoʼ keʼxuwak li xtzolom, ut xkohebʼ chi rajsinkil re naq tixtenqʼahebʼ. Chi maakʼaʼ xxiw li Jesús, kixye rehebʼ: «Kʼaʼut naq nekexxiwak laaʼex li jwal kachʼin leepaabʼaal?». Ebʼ li xtzolom li Jesús tento raj teʼxnaw naq li Jehobʼa truuq xkolbʼal li Jesús joʼ ajwiʼ li wankebʼ rikʼin. Kʼaru naxkʼut chiqu aʼin? Wi kaw li qapaabʼal tooruuq xnumsinkil li kaqsut-iqʼ malaj li chʼaʼajkilal li najuntaqʼeetamank rikʼin li kaqsut-iqʼ.

8, 9. Chanru kiyaleʼk rix li xpaabʼal li xʼAnel, ut kʼaru kitenqʼank re?

⁸ Qilaq li kixkʼul li xʼAnel, jun li hermaan li toj wank xjunes, li wank saʼ li tenamit Puerto Rico, naq kixnumsi jun li nimla rahilal. Saʼ xkʼabʼaʼ li nimla kaqsut-iqʼ María, li kikʼulmank saʼ li tenamit Puerto Rico chiru li chihabʼ 2017, li xʼAnel kikanaak chi maakʼaʼ rochoch chi moko xkʼanjel. Naxye: «Chiruhebʼ li kutan aʼan, kʼajoʼ naq kiʼok linxiw. Abʼan xintzol xkʼojobʼankil inchʼool rikʼin li Jehobʼa saʼ xkʼabʼaʼ li tij ut inkʼaʼ xinkanabʼ naq linxiw tnumtaaq saʼ inbʼeen».

⁹ Li xʼAnel naxye naq wank kʼaru chik kitenqʼank re chiru li rahilal aʼin: li abʼink. Naxye: «Xbʼaanunkil li naxye li xmolam li Jehobʼa, xinxtenqʼa re naq ttuqlaaq inchʼool. Xwil chanru xinxtenqʼa li Jehobʼa naq li hermaan xeʼxkawresi linpaabʼal ut xeʼxkʼe we li naʼajmank chiwu». Ut naxye ajwiʼ: «Qʼaxal wiʼ chik kixkʼe we li Jehobʼa chiru li xinkʼoxla raj, ut qʼaxal kikawuuk linpaabʼal».

10. Kʼaru tatruuq xbʼaanunkil wi yookat xnumsinkil jun li nimla rahilal chanchan li kaqsut-iqʼ?

¹⁰ Ma yookat xnumsinkil jun li nimla rahilal chanchan jun li kaqsut-iqʼ? Maare yookat xkʼulbʼal li rahilal saʼ xkʼabʼaʼ jun li kaqsut-iqʼ. Malaj li «kaqsut-iqʼ» li yookat xnumsinkil, aʼan jun li nimla yajel li naxchʼina laachʼool ut inkʼaʼ nakaanaw kʼaru xbʼaanunkil. Maare wank sut qʼaxal naʼok aakʼaʼuxl, abʼan maakanabʼ xkʼojobʼankil laachʼool rikʼin li Jehobʼa. Te laawaanm chiru ut ye re chixjunil li  nakaawekʼa. Naru nakaakawresi laapaabʼal wi nakaakʼoxla rix chanru xatxtenqʼa chaq li Jehobʼa junxil (Sal. 77:12, 13). Chʼolchʼooq chaawu naq li Jehobʼa maajunwa tatxkanabʼ.

11. Kʼaʼut naq tento tooʼabʼinq chiruhebʼ li xaqabʼanbʼilebʼ saʼ li xmolam li Jehobʼa?

¹¹ Kʼaru chik ttenqʼanq aawe re xnumsinkil ebʼ li rahilal? Joʼ kixye li xʼAnel, li abʼink. Tzol xkʼojobʼankil aachʼool rikʼinebʼ li xaqabʼanbʼilebʼ xbʼaan li Jehobʼa ut li Jesús re xbʼaanunkil li xkʼanjel. Wank sut, ebʼ li xaqabʼanbʼilebʼ xbʼaan li Jehobʼa saʼ li xmolam maare teʼxye aawe junaq li naʼlebʼ li taakʼoxla naq maakʼaʼ xyaalalil saʼ li hoonal aʼan. Abʼan jultikaq aawe naq li Jehobʼa narosobʼtesi li naʼabʼink. Li Raatin li Yos ut li nekeʼxkʼul li nekeʼkʼanjelak chiru naxkʼut chiqu naq li abʼink nakolok yuʼam (Éx. 14:1-4; 2 Crón. 20:17). Kʼoxla rix aʼan ut chi joʼkan moko tchʼaʼajkoʼq ta chaawu xpaabʼankil li naxye aawe li xmolam li Jehobʼa anaqwan ut saʼebʼ li kutan chalk re (Heb. 13:17). Chi joʼkan, maakʼaʼ tkʼehoq re aaxiw chiru li nimla rahilal li tkʼulmanq chi seebʼ (Prov. 3:25).

12. Joʼ naxye Lucas 18:1-8, chanru naxchap ribʼ li paabʼal rikʼin xkuybʼal li maaʼusilal li naqakʼul chi maakʼaʼ xyaalal?

¹² Li Jesús naxnaw naq li maaʼusilal li teʼxkʼul li xtzolom chi maakʼaʼ xyaalal, tixyal rix li xpaabʼalebʼ. Re xtenqʼankilebʼ chi xkuybʼal, kixye jun li naʼlebʼ li natawmank saʼ li hu Lucas. Aʼan kiʼaatinak chirix jun li xmalkaʼan li naxtzʼaama li xtenqʼ re jun aj raqol aatin, li moko naraqok ta aatin saʼ tiikilal. Chʼolchʼo chiru naq ttenqʼaaq xbʼaan laj raqol aatin wi inkʼaʼ naxkanabʼ xpatzʼbʼal. Ut joʼkan kikʼulmank. Kʼaru naqatzol? Li Jehobʼa naraqok aatin saʼ tiikilal. Joʼkan naq, li Jesús kixye: «Ma tojaʼ ta chik li Yos inkʼaʼ tixkolebʼ li sikʼbʼilebʼ ru xbʼaan, li nekeʼyaabʼank re li xkʼabʼaʼ chi qʼeq ut chi kutan [...]?» (taayaabʼasi Lucas 18:1-8). Li Jesús kixye ajwiʼ: «Naq tolʼelq li Kʼajolbʼej, ma tolxtaw li paabʼaal saʼ ruuchichʼochʼ?». Tento tqakʼutbʼesi naq kaw li qapaabʼal joʼ kixbʼaanu li xmalkaʼan aʼin, wi wank qakuyum ut inkʼaʼ naqakanabʼ xpatzʼbʼal li qatenqʼ naq naqakʼul junaq li maaʼusilal. Naq kaw li qapaabʼal, chʼolchʼooq chiqu naq li Jehobʼa tooxtenqʼa saʼ xhoonalil. Chʼolchʼooq ajwiʼ chiqu naq li Jehobʼa tixsume li qatij. Wank sut, tixsume li qatij joʼ maajunwa xqakʼoxla.

13. Chanru keʼtenqʼaak xbʼaan li tij naq jun li junkabʼal kixkʼul li maaʼusilal?

¹³ Qilaq li kixkʼul li xVero, jun li hermaan li wank saʼ li tenamit República Democrática del Congo rochbʼen li xbʼeelom, li maawaʼ aj Testiiw, ut li xkoʼ li wank 15 chihabʼ re. Saʼ oxibʼal xeʼxkanabʼ li xkʼalebʼaalebʼ naq xeʼrahobʼtesiik xbʼaanebʼ laj puubʼ. Naq yookebʼ chi elelik, xeʼxtaw saʼ bʼe jun chʼuut aj puubʼ li inkʼaʼ nekeʼnumsink rehebʼ ut xeʼyeheʼk rehebʼ  naq teʼkamsiiq. Li xVero kiʼok chi yaabʼak, abʼan li xkoʼ kiʼok chi tijok saʼ kawil kuxej, ut naabʼal sut kixye li xkʼabʼaʼ li Jehobʼa re xkʼojobʼankil xchʼool li xnaʼ. Naq kiraqeʼk chi tijok, li najolomink rehebʼ laj puubʼ kixye re: «Ani kikʼutuk chaawu tijok?». Aʼan kixye: «Linnaʼ, joʼ kixtzol saʼ Mateo 6:9 toj 13». Li winq kixye re: «Ayu saʼ tuqtuukilal rikʼin laanaʼ laayuwaʼ, ut aʼ taxaq li Jehobʼa laaYos ttenqʼanq eere».

14. Kʼaru naru tixyal rix li qapaabʼal, ut kʼaru tooxtenqʼa chi xkuybʼal?

¹⁴ Li xeʼxkʼul li hermaan aʼin naxkʼut chiqu naq wank xwankil li tijok. Abʼan, wi li Yos inkʼaʼ naxsume laatij saʼ junpaat malaj joʼ nakaawoybʼeni? Joʼ li xmalkaʼan li kixseeraqʼi li Jesús, maakanabʼ tijok ut chʼolchʼooq chaawu naq li Jehobʼa maajunwa tatxkanabʼ ut tatxtenqʼa saʼ xhoonalil. Maakanabʼ xpatzʼbʼal re li Jehobʼa naq tatxtenqʼa rikʼin li xsantil musiqʼej (Filip. 4:13). Jultikaq aawe naq chi seebʼ qʼaxal tatrosobʼtesi ut maajunwa chik taajultika li xaakʼul chaq. Naq nakaakuy xnumsinkil ebʼ li rahilal rikʼin li xtenqʼ li Jehobʼa, aʼin ttenqʼanq aawe rikʼin li tkʼulmanq moqon (1 Ped. 1:6, 7).

15. Joʼ naxye saʼ Mateo 17:19, 20, kʼaru napaltoʼk chaq chiruhebʼ li xtzolom li Jesús?

¹⁵ Li Jesús kixkʼut chiruhebʼ li xtzolom naq li xpaabʼal ttenqʼanq rehebʼ chi xnumsinkil li chʼaʼajkilal (taayaabʼasi Mateo 17:19, 20). Wank sut, xeʼruuk risinkil ebʼ li maaʼus aj musiqʼej, abʼan jun sut inkʼaʼ xeʼruuk xbʼaanunkil. Kʼaʼut inkʼaʼ xeʼruuk? Li Jesús kixye naq toj naʼajmank xtzʼaqobʼ li xpaabʼalebʼ. Kixye rehebʼ naq teʼruuq xqʼaxbʼal ru ebʼ li xninqal ru chʼaʼajkilal joʼ li ninqi tzuul wi kawebʼ li xpaabʼal. Saʼebʼ li qakutan, laaʼo ajwiʼ tooruuq xqʼaxbʼal ru ebʼ li nimla chʼaʼajkilal li naqakʼoxla naq inkʼaʼ tooruuq xkuybʼal qajunes.

16. Chanru kitenqʼaak li xGeydi xbʼaan li xpaabʼal naq kixkʼul jun li nimla rahilal?

¹⁶ Qilaq li kixkʼul li xGeydi, jun li hermaan re li tenamit Guatemala. Naq yookebʼ chaq chi sutqʼiik saʼ li chʼutam, xeʼxkamsi laj Edi, li xbʼeelom. Aʼan naxye naq li xpaabʼal natenqʼank re chi xkuybʼal li xrahil xchʼool: «Naq nintijok, ninkanabʼ chixjunil saʼ ruqʼ li Jehobʼa ut aʼin naxtuqubʼ ru inchʼool. Ninkʼe reetal chanru naroksihebʼ linkomon ut ebʼ li hermaan re intenqʼankil. Naq laatzʼ wu saʼ li xkʼanjel li Jehobʼa naxkotz linrahilal ut aʼin natenqʼank we re naq inkʼaʼ t-oq inkʼaʼuxl chirix li tkʼulmanq moqon. Li xinkʼul xkʼut chiwu naq tinruuq xnumsinkil ebʼ li chʼaʼajkilal rikʼin xtenqʼ li Jehobʼa, li Jesús ut li xmolam, maakʼaʼ naxye li tchalq saʼ inbʼeen».

17. Kʼaru tooruuq xbʼaanunkil naq naqanumsi ebʼ li chʼaʼajkilal li chanchan jun li nimla tzuul?

¹⁷ Ma xkamk junaq laakomon? Re xkawresinkil laapaabʼal kʼe aahoonal chi rilbʼal li Santil Hu chirixebʼ li kristiʼaan li xeʼwaklesiik wiʼ chik chi yoʼyo. Ma qʼaxal ra saʼ laachʼool  naq kiʼisiik junaq laakomon saʼ li chʼuut? Tzol xkomon laanaʼlebʼ re naq chʼolchʼooq chaawu naq li qʼusuk li naxkʼe li Yos qʼaxal us. Maakʼaʼ naxye li chʼaʼajkilal li yookat xnumsinkil, aʼin tatxtenqʼa chi xkawresinkil laapaabʼal. Te laachʼool chiru li Jehobʼa ut maanajtobʼresi aawibʼ rikʼinebʼ li hermaan (Prov. 18:1). Kʼe aachʼool chi xbʼaanunkil li xkʼanjel li Yos, ut aʼin tatxtenqʼa chi xkuybʼal ebʼ li chʼaʼajkilal, usta ra laachʼool xbʼaan li xaakʼul chaq (Sal. 126:5, 6). Maakanabʼ xik saʼebʼ li chʼutam, xkʼebʼal resil li Raatin li Yos ut rilbʼal xsaʼ li Santil Hu. Maakanabʼ xkʼoxlankil rix li chʼinaʼusil osobʼtesihom li naxyeechiʼi aawe li Jehobʼa. Naq nakaakʼe reetal chanru nakatxtenqʼa li Jehobʼa, laapaabʼal junelik yooq chi kawuuk.

18. Wi nakaakʼe reetal naq toj naʼajmank xtzʼaqobʼ laapaabʼal, kʼaru tatruuq xbʼaanunkil?

¹⁸ Michʼinaak aachʼool wi toj naʼajmank xtzʼaqobʼ laapaabʼal xbʼaan li chʼaʼajkilal li xaakʼul chaq malaj li yookat xkʼulbʼal. Il bʼan joʼ jun li naʼlebʼ li naru tixkawresi laapaabʼal. Tzʼaama li keʼxye ebʼ li xʼapóstol li Jesús: «Kʼe xtzʼaqobʼ li qapaabʼaal» (Luc. 17:5). Kʼoxla ajwiʼ rix li xqil saʼ li tzolom aʼin. Joʼ laj Miguel ut li xYurai, kʼoxla rix chanru xatxtenqʼa li Jehobʼa. Joʼ li xʼAnel ut li xkoʼ li xVero, tijon chi anchal aachʼool chiru li Jehobʼa, qʼaxal chik naq yooqat xnumsinkil ebʼ li chʼaʼajkilal. Joʼ li xGeydi, kʼulubʼa chanru li Jehobʼa nakatxtenqʼa naq naroksihebʼ li hermaan malaj laajunkabʼal. Wi nakaakanabʼ naq li Jehobʼa tatxtenqʼa chi xnumsinkil ebʼ li chʼaʼajkilal anaqwan, qʼaxal kʼojkʼooq ajwiʼ aachʼool naq aʼan ttenqʼanq aawe chi xnumsinkil ebʼ li chʼaʼajkilal li tkʼulmanq moqon.

19. Kʼaru chʼolchʼo chaq chiru li Jesús, ut kʼaru ajwiʼ chʼolchʼooq chaawu?

¹⁹ Li Jesús kixye rehebʼ li xtzolom bʼar naʼajmank naq teʼxkawresi li xpaabʼal, abʼan chʼolchʼo chiru naq rikʼin li xtenqʼ li Jehobʼa teʼruuq xnumsinkil ebʼ li chʼaʼajkilal li teʼxkʼul moqon (Juan 14:1; 16:33). Chʼolchʼo ajwiʼ chiru, naq kʼajoʼ xkʼihalebʼ li kristiʼaan teʼkoleʼq saʼ li nimla rahilal xbʼaan naq kawaqebʼ li xpaabʼal (Apoc. 7:9, 14). Ma wanqat saʼ xyanqebʼ? Tatruuq chi wank saʼ xkʼabʼaʼ li ruxtaan li Jehobʼa wi nakaakawresi laapaabʼal anaqwan (Heb. 10:39).