NAABʼALEBʼ nekeʼxkʼoxla naq maakʼaʼ rusilal wi tattijoq. Abʼan li Santil Hu moko naxkʼut ta aʼin (Lucas 22:40; Santiago 5:13). Li tijok moko kaʼaj tawiʼ nokooxtenqʼa re nachʼok chixkʼatq li Jehobʼa nokooxtenqʼa ajwiʼ re naq sa tqekʼa qibʼ ut re naq us wanq li qajunxaqalil. Chanru nakʼulmank aʼin?

Jun eetalil: kʼaru nekeʼxye li naʼbʼej yuwaʼbʼej rehebʼ li xkokʼal naq teʼxbʼaanu naq nekeʼxkʼul junaq li maatan? Nekeʼxkʼut chiruhebʼ naq moko kaʼaj tawiʼ teʼroxloqʼi li kʼaru xeʼxkʼul tento bʼan naq teʼxbʼanyoxi. Naq naqabʼanyoxi rikʼin aatin li nekeʼxkʼe qe naqakʼutbʼesi naq jwal oxloqʼ chiqu. Joʼkan ajwiʼ nakʼulmank naq nokooʼaatinak rikʼin li Yos. Qilaq wiibʼ oxibʼ li naʼlebʼ chirix li tijok.

Li tij re bʼanyoxink. Naq naqabʼanyoxi re li Yos chixjunil li naxkʼe qe naqakʼe reetal ebʼ li osobʼtesihom. Joʼkan naq nachaabʼiloʼk qanaʼlebʼ, sa qachʼool ut nawulak chik chiqu bʼanyoxink (Filipenses 4:6).

Jun eetalil: Li Jesús kixbʼanyoxi re li Xyuwaʼ naq naʼabʼiik (Juan 11:41).

Li tij re kuyuk maak. Xtzʼaamankil re li Jehobʼa naq tixkuy qamaak xbʼaan li xqabʼaanu naxkotz xrahil qachʼool. Joʼkan ajwiʼ naqakʼe reetal kʼaru li us ut li inkʼaʼ us, naqayotʼ qachʼool ut naqakʼe reetal naq li aajel ru aʼan abʼink chiru li Jehobʼa.

Jun eetalil: Li xtij laj David naq kixyotʼ xchʼool (Salmo 51).

Li tij re naq tooxbʼeresi ut tixkʼe qachoxahil naʼlebʼ. Nokooxtenqʼa re naq tqakubʼsi qibʼ ut re naq tqakʼe reetal naq aajel ru naq li Jehobʼa tooxtenqʼa ut inkʼaʼ tqakʼojobʼ qachʼool qajunes qibʼ (Proverbios 3:​5, 6).

Jun eetalil: Li tij li kixbʼaanu laj Salomón re xtzʼaamankil xtenqʼ re li Yos re naq tkʼeheʼq xchoxahil xnaʼlebʼ ut chi joʼkan truuq xbʼeresinkil li tenamit Israel (1 Reyes 3:​5-12).

Li tij li naqabʼaanu naq ra qachʼool. Nokootijok chiru li Jehobʼa chi anchal qachʼool naq inkʼaʼ naqanaw kʼaru xbʼaanunkil. Chi joʼkan naqatzol xkʼojobʼankil qachʼool rikʼin li Jehobʼa (Salmo 62:9).

Jun eetalil: Li tij li kixbʼaanu li awabʼej Asá naq ok re chi pleetik rikʼin li xikʼ nekeʼilok re (2 Crónicas 14:11).

Li tij choʼq rehebʼ li nekeʼraj tenqʼ. Li tij aʼin nokooxtenqʼa re xqʼaxbʼal ru li xikʼ ilok ut naqayuʼami chik li uxtaanank ut li tawok u.

Jun eetalil: Li Jesús kitijok saʼ xkʼabʼaʼebʼ li xtzolom (Juan 17:9-17).

Li tij re loqʼonink. Naq naqakʼe xloqʼal li Jehobʼa rikʼin li xnaʼlebʼ ut li xyobʼtesihom nakʼiik li qarahom ut naqoxloqʼi ru. Ebʼ li tij aʼin naxbʼaanu naq toojiloq chixkʼatq li Jehobʼa, li Qayuwaʼ.

Jun eetalil: Laj David kixkʼe xloqʼal li Yos xbʼaan li xyobʼtesihom (Salmo 8).

Moko kaʼaj tawiʼ aʼin li rusilal li naqataw rikʼin li tijok naqataw ajwiʼ «li tuqtuukil usilal li nachalk rikʼin li Yos ut naxqʼax ru chixjunil li naʼlebʼ» (Filipenses 4:7, SBG). Chʼaʼaj xtawbʼal li tuqtuukil saʼ li ruuchichʼochʼ aʼin abʼan wi naqataw inkʼaʼ tooyajerq (Proverbios 14:30). Abʼan bʼar tqataw li tuqtuukilal aʼin? Ma tzʼaqal rikʼin naq kaʼajwiʼ naq tqayal qaqʼe malaj wank kʼaru chik naʼajmank?