Li Santil Hu kixjalebʼ xyuʼam
Li Santil Hu kixjalebʼ xyuʼam
CHANRU kixtaw xyaalal li xyuʼam jun li chʼina ixqaʼal li ra kixkʼul chaq? Kʼaʼut jun li winq li qʼaxal josqʼ ut naxqʼet ribʼ chiru li awabʼej kiʼok joʼ aj puktesinel re li chaabʼil esilal? Qakanabʼaq naq aʼanebʼ teʼxseeraqʼi qe kʼaru xeʼxkʼul chaq.
«Ninrahi naq tineʼxra ut naq sa tineʼril» (INNA LEZHNINA)
KIYOʼLAAK SAʼ LI CHIHABʼ: 1981
TENAMIT: RUSIA
XTZʼAQOBʼ LI NAʼLEBʼ: RA XKʼUL CHAQ SAʼ LI XKACHʼINAL
LI XINKʼUL CHAQ: Linnaʼ linyuwaʼ inkʼaʼ nekeʼruuk chi abʼink joʼkan naq, joʼkan ajwiʼ xinyoʼlaak laaʼin. Li xbʼeen waqibʼ chihabʼ re linyuʼam sa chaq saʼ linchʼool abʼan linnaʼ linyuwaʼ xeʼxraq li xsumlajik. Usta toj kachʼinin chaq, xintaw ru li yook chi kʼulmank ut aʼin kʼajoʼ kixrahobʼtesi inchʼool. Naq xeʼxkanabʼ ribʼ, linyuwaʼ rochbʼen li was keʼkanaak aran Troick ut linnaʼ xinxkʼam chirix aran Cheliabisnk. Saʼ xnumikebʼ li kutan linnaʼ kisumlaak wiʼ chik. Li xkabʼ linyuwaʼ nakalaak ut rajlal nokooxsakʼ.
Saʼ 1993 li was kikamk naq kiʼok chi haʼ, aʼin jwal kixrahobʼtesi qachʼool. Linnaʼ kixtikibʼ kalaak ut rajlal ajwiʼ nikinxsakʼ. Laaʼin ninrahi chaq naq tchaabʼiloʼq linyuʼam. Qʼaxal ninrahi chaq naq tineʼxra ut naq sa tineʼril. Xinsikʼ xkʼojobʼankil inchʼool saʼebʼ li iklees abʼan maakʼaʼ xintaw.
CHANRU KIXJAL LINYUʼAM LI SANTIL HU: Naq wank chaq 13 chihabʼ we, jun li wechtzolom aj testiiw re li Jehobʼa kixseeraqʼi we wiibʼ oxibʼ li eetalil li wank saʼ li Santil Hu. Nawulak chiwu xtzolbʼal chirix laj Noé ut laj Job usta chʼaʼaj chaq li xwanjikebʼ, abʼan xeʼkʼanjelak chiru li Yos. Saʼ xnumikebʼ li kutan xintikibʼ xtzolbʼal li Santil Hu ut xinʼok chi xik saʼ li chʼutam.
Xintzol naabʼal li chaabʼil naʼlebʼ saʼ li Santil Hu. Jwal xsahoʼk inchʼool xnawbʼal naq li Yos wank xkʼabʼaʼ (Salmo 83:18, La Biblia. Traducción del Nuevo Mundo, 2019 saʼ español). Kisach inchʼool rilbʼal naq li Santil Hu naxye chi tzʼaqal re ru li tkʼulmanq «saʼ rosoʼjikebʼ li kutan» (2 Timoteo 3:1-5, Li Santil Hu, Sociedad Bíblica de Guatemala, SBG). Qʼaxal kisahoʼk inchʼool rabʼinkil naq teʼwakliiq wiʼ chik chi yoʼyo li kamenaq. Aʼin naraj xyeebʼal naq: twil wiʼ chik ru li was! (Juan 5:28, 29).
Abʼanan, moko chixjunilebʼ ta keʼsahoʼk xchʼool rabʼinkil aʼin. Linnaʼ ut li xkabʼ linyuwaʼ xikʼ nekeʼril ebʼ laj testiiw re li Jehobʼa. Rajlal nekeʼxmin wu naq tinkanabʼ xtzolbʼal li Santil Hu. Abʼan laaʼin sa chaq inchʼool rikʼin li yookin xtzolbʼal ut maajoqʼe xnumeʼk saʼ inchʼool xkanabʼankil.
Kichʼaʼajkoʼk chiwu xqʼaxbʼal ru li xikʼ ileʼk li ninkʼul rikʼin linjunkabʼal. Abʼan kikʼulmank jun chik li nimla rahilal, li wiitzʼin li naxik chiwix saʼ chʼutam kikamk naq kiʼok ajwiʼ chi haʼ. Abʼan, ebʼ laj Testiiw maajunwa xineʼxkanabʼ injunes. Rikʼinebʼ aʼan xintaw li rahok li junelik xinsikʼ chaq. Xchʼolaak chiwu naq aʼan li tzʼaqal paabʼal, joʼkan naq saʼ li chihabʼ 1996 kikubʼeek inhaʼ.
KʼARU RUSILAL XINTAW: Ak waqibʼ chihabʼ insumlajik rikʼin laj Dmitry. Anaqwan saʼ kabʼichal nokookʼanjelak saʼ jun rehebʼ li qamolam aran San Petersburgo. Saʼ xnumikebʼ li chihabʼ, linnaʼ linyuwaʼ keʼok xkʼulubʼankil li ninpaabʼ.
Qʼaxal ninbʼanyoxi naq xinnaw ru li Jehobʼa! Kʼanjelak chiru kixkʼe xyaalal linyuʼam.
«Yook inkʼaʼuxl chirixebʼ linpatzʼom» (RAUDEL RODRÍGUEZ RODRÍGUEZ)
KIYOʼLAAK SAʼ LI CHIHABʼ: 1959
TENAMIT: CUBA
XTZʼAQOBʼ LI NAʼLEBʼ: NAXQʼET RIBʼ CHIRU LI AWABʼEJ
LI XINKʼUL CHAQ: Xinyoʼlaak saʼ li tenamit La Habana (Cuba), li teep bʼarwiʼ xinkʼiik chaq nebʼaʼ ut rajlal wank li pleet saʼ bʼe. Naq saajin chaq kiwulak chiwu xtzolbʼal ebʼ li bʼatzʼunk bʼarwiʼ nekeʼxsakʼ ribʼ.
Saʼ xkʼabʼaʼ naq us yookin chi elk saʼ li tzolebʼaal, linnaʼ linyuwaʼ xeʼxwaklesi inchʼool re naq tinxik saʼ li nimla tzolebʼaal. Aran xinʼok xpaabʼankil naq tento tjalmanq chanru nekeʼawabʼejink saʼ lintenamit, joʼkan naq xinqʼet wibʼ chiruhebʼ li nekeʼjolomink saʼ lintenamit. Rochbʼen jun li wechtzolom xqasakʼ jun li polisiiy re xmaqʼbʼal chiru li xpuubʼ ut xqatochʼ chi kaw li xjolom. Xbʼaan aʼin, xooʼeʼxchʼik saʼ tzʼalam ut xeʼxye qe naq tooʼeʼxkamsi chi puubʼanbʼil. Kaʼajwiʼ wank junmay chihabʼ we ut okebʼ re inkamsinkil!
Naq wankin injunes saʼ li tzʼalam xinʼok xkʼoxlankil kʼaru tinbʼaanu naq tinwanq chiruhebʼ laj puubʼ li tineʼxkamsi, xbʼaan naq moko twaj ta xkʼutbʼal chiruhebʼ naq yook inxiw. Abʼan yook ajwiʼ inkʼaʼuxl xbʼaan naq wank naabʼal linpatzʼom. Ninkʼoxla: «Kʼaʼut wank naabʼal li rahilal saʼ ruuchichʼochʼ? Ma kaʼajwiʼ aʼin rusil li yuʼam?
CHANRU KIXJAL LINYUʼAM LI SANTIL HU: Saʼ xnumikebʼ li kutan xeʼxjal li keʼxtenebʼ saʼ qabʼeen, inkʼaʼ chik tooʼeʼxkamsi abʼan tookanaaq 30 chihabʼ saʼ tzʼalam. Saʼ li hoonal aʼan, xinnaw ru ebʼ laj testiiw re li Jehobʼa li wankebʼ aran saʼ xkʼabʼaʼ li xpaabʼal. Kisach inchʼool rilbʼal naq inkʼaʼ nekeʼxuwak ut tuqtu xchʼoolebʼ. Wankebʼ aran usta maakʼaʼ maaʼusilal keʼxbʼaanu abʼan moko yookebʼ ta xjosqʼil.
Ebʼ laj Testiiw xeʼxchʼolobʼ chiwu naq wank kʼaru naraj li Yos choʼq re li ruuchichʼochʼ. Rikʼin li Santil Hu xeʼxkʼut chiwu naq li Yos tixchʼinaʼusa li ruuchichʼochʼ, maakʼaʼaq chik li rahilal chi moko li maaʼusilal ut ebʼ li poyanam teʼruuq wanq chi junelik chi sahebʼ saʼ xchʼool (Salmo 37:29).
Nawulak chiwu li yookin xtzolbʼal, abʼan moko juntaqʼeet ta linnaʼlebʼ rikʼinebʼ. Xinkʼoxla naq maajunwa tinkanabʼ tzʼaqonk saʼ xnaʼlebʼebʼ li awabʼej ut inkʼaʼ tinkʼulubʼa li keʼxye we, joʼkan naq xinʼok xtzolbʼal li Santil Hu injunes. Naq xinchoy xtzolbʼal, xintaw ru naq kaʼajwiʼ ebʼ laj testiiw re li Jehobʼa nekeʼnaʼlebʼak joʼebʼ li xbʼeen aj paabʼanel.
Xtzolbʼal li Santil Hu xinxtenqʼa chi rilbʼal naq aajel ru naq tinjal linnaʼlebʼ. Tento tinjal chanru ninʼaatinak xbʼaan naq kʼajoʼ ninye li tzʼaj aj aatin. Joʼkan ajwiʼ, tento tinkanabʼ mayibʼk ut inkʼaʼ chik tintzʼaqonq saʼ xnaʼlebʼebʼ li awabʼej. Kichʼaʼajkoʼk chiwu, abʼan rikʼin li xtenqʼ li Jehobʼa xinruuk xbʼaanunkil.
Jun li naʼlebʼ li nachʼaʼajkoʼk chiwu, aʼan naq saʼ junpaat nachalk injosqʼil. Rajlal ninpatzʼ re li Jehobʼa naq tinxtenqʼa re xkuybʼal wibʼ. Nikinxtenqʼa ebʼ li raqal re li Santil Hu joʼ li natawmank saʼ Proverbios 16:32, SBG, li naxye: «Qʼaxal us naq wanq aakuyum chiru li xkawilal aawibʼ; ut jwal us xkuybʼal aawibʼ chiru reechaninkilebʼ li kʼiila tenamit».
Saʼ li chihabʼ 1991 kikubʼeek inhaʼ joʼ aj testiiw re li Jehobʼa saʼ jun tonel aran saʼ tzʼalam. Saʼ li jun chik chihabʼ, wiibʼ oxibʼ li wanko saʼ tzʼalam xooʼisiik ut xooʼeʼxtaqla saʼ li tenamit España, xbʼaan naq wankebʼ li qakomon aran. Naq xinwulak xinʼok chi xik saʼebʼ li chʼutam rehebʼ laj testiiw re li Jehobʼa, jwal sa xineʼxkʼul, chanchan tawiʼ naq junxil nekeʼxnaw wu. Aʼanebʼ xineʼxtenqʼa re naq tinkʼayq saʼ li akʼ wanjik.
KʼARU RUSILAL XINTAW: Anaqwan jwal sa inchʼool ut ninkʼanjelak chiru li Yos rikʼin li wixaqil ut ebʼ linrabʼin. Ninwoksi naabʼal linhoonal re xkʼutbʼal chiruhebʼ li poyanam li naxye li Santil Hu ut aʼin jun li nimla maatan choʼq we. Wank sut, ninjultika li saaj al li kachʼin chik ma xeʼxkamsi ut ninbʼanyoxi naq chalen li kutan aʼan naabʼal usilal xintaw. Moko kaʼaj tawiʼ yoʼyokin, wank ajwiʼ li woybʼenihom. Nawoybʼeni li kutan bʼarwiʼ toowanq saʼ li chʼinaʼusil naʼajej ut maakʼaʼaq chik li rahilal ut «inkʼaʼ chik taawanq kamk» (Apocalipsis 21:3, 4, SBG).
[Naxye]
«Jwal xsahoʼk inchʼool xnawbʼal naq li Yos wank xkʼabʼaʼ»
[Jalam u]
Kʼajoʼ nawulak chiqu xkʼutbʼal li yaal chiruhebʼ li inkʼaʼ nekeʼabʼink