Li eetalil naxkʼutbʼesi li nekeʼxkʼoxla naabʼal li kristiʼaan li tkʼulmanq saʼ xkutankil li Raqok Aatin. Naabʼalebʼ nekeʼxkʼoxla naq chi miyon ebʼ li qas qiitzʼin teʼxchʼutubʼ ribʼ chiru li xkʼojaribʼaal li Yos re naq traqmanq aatin saʼ xbʼeenebʼ: wiibʼ oxibʼ teʼqʼajkamuuq re naq teʼwanq saʼ choxa ut junchʼol chik re naq teʼxik saʼ xbʼalbʼa. Li Santil Hu naxkʼut naq li xkutankil li Raqok Aatin aʼan re risinkil chi junajwa li maaʼusilal li wank saʼ ruuchichʼochʼ (Salmo 96:13). Li Jesús aʼan li Awabʼej li kixsikʼ li Yos re naq tixkʼam chaq li tuqtuukilal saʼ ruuchichʼochʼ (taayaabʼasi Isaías 11:1-5 ut Hechos 17:31).

Laj Adán, li xbʼeen winq kixqʼet ribʼ chiru li Jehobʼa. Saʼ xkʼabʼaʼ li kixbʼaanu, ebʼ li ralal xkʼajol nekeʼmaakobʼk ut nekeʼkamk (Romanos 5:12). Re xtuqubʼankil ru li chʼaʼajkilal aʼin, li Jesús tixwaklesi wiʼ chik chi miyon ebʼ li kristiʼaan. Li hu Apocalipsis naxkʼut naq aʼin tkʼulmanq chiru li mil chihabʼ naq li Jesús t-awabʼejinq (taayaabʼasi Apocalipsis 20:4, 11, 12).

Traqmanq aatin saʼ xbʼeenebʼ li teʼwakliiq wiʼ chik chi yoʼyo abʼan moko saʼ xkʼabʼaʼ ta li xeʼxbʼaanu naq toj maajiʼ nekeʼkamk, tbʼaanumanq bʼan rikʼin li naʼlebʼ li wank saʼebʼ li hu li naʼaatinak wiʼ li tasal 20 re li hu Apocalipsis (Romanos 6:7). Naq li apóstol Pablo kiʼaatinak chirix «li tiikebʼ xchʼool ut ebʼ laj maak» yook chi aatinak chirix li teʼwakliiq wiʼ chik chi yoʼyo li teʼwanq xhoonal chi xnawbʼal ru li Yos (taayaabʼasi Hechos 24:15, Li Santil Hu, Sociedad Bíblica de Guatemala, SBG).

Ebʼ li kristiʼaan li xeʼkamk ut inkʼaʼ xeʼxnaw ru li Yos teʼwanq xhoonal re naq teʼxbʼaanu li rajom. Wi chaabʼil teʼnaʼlebʼaq, teʼxkʼutbʼesi naq «teʼwakliiq chi yoʼyo re li yuʼam». Abʼanan, li teʼwakliiq wiʼ chik chi yoʼyo ut inkʼaʼ teʼabʼinq chiru li Yos teʼxkʼutbʼesi naq «teʼwakliiq chi yoʼyo re li tojbʼamaak» (taayaabʼasi Juan 5:28, 29, SBG ut Isaías 26:10; 65:20).

Naq traqeʼq li xkutankil li Raqok Aatin li twanq chiru jun mil chihabʼ, li Jehobʼa tixkʼe wiʼ chik rehebʼ li kristiʼaan li yuʼam li tzʼaqal re ru (1 Corintios 15:​24-​28). Qʼaxal chʼinaʼus li qʼajkamunkil li teʼxkʼul li teʼabʼinq! Chiru li jun mil chihabʼ aʼan, laj Tza twanq chi tzʼaptzʼo saʼ li siwan abʼanan t-achʼabʼaaq. Aʼan tixbʼaanu chixjunil li wank saʼ ruqʼ re xnajtobʼresinkil ebʼ li kristiʼaan rikʼin li Jehobʼa, abʼanan li teʼxqʼax ru li yaleʼk aʼin teʼruuq chi wanq chi junelik saʼ Ruuchichʼochʼ (taayaabʼasi Isaías 25:8 ut Apocalipsis 20:​1, 7-9).

Li Santil Hu naʼaatinak chirix jun chik li kutan re raqok aatin. Aʼan bʼarwiʼ tsacheʼq li maaʼus aj ruuchichʼochʼ aʼin. Maakʼaʼaqebʼ saʼ xchʼool ebʼ li kristiʼaan naq tchalq li kutan aʼin, joʼ naq kichalk li Bʼutʼihaʼ saʼ xkutankil laj Noé, bʼarwiʼ keʼsacheʼk chixjunilebʼ li kristiʼaan li maaʼusebʼ xnaʼlebʼ. Chi seebʼ naq teʼsacheʼq li kristiʼaan li maaʼusebʼ xnaʼlebʼ tooruuq chik wanq saʼ jun li ruuchichʼochʼ «bʼarwiʼ taawanq li tiikilal» (taayaabʼasi 2 Pedro 3:6, 7, 13, SBG).