Xinkʼiik Warialda (Nueva Gales del Sur). Saʼ li chʼina teep aʼin wank naabʼal li karneer, li wakax ut nekeʼawok. Joʼkan ajwiʼ moko naabʼal ta li maaʼusilal ut junelik saq ru li qateep.

Laaʼin li asbʼej saʼ xyanq li 10 chi alal kʼajolbʼej. Xinʼok chi kʼanjelak naq wank we 13 chihabʼ re xtenqʼankil linjunkabʼal. Xintikibʼ kʼanjelak bʼarwiʼ nekeʼxkʼiresi naabʼal li ketomq, moko xintzolok ta chiʼus saʼ li tzolebʼaal. Ut naq wank we 15 chihabʼ ninkʼaakʼale ebʼ li ketomq ut nintzolebʼ li kawaay re kʼicheʼ.

Ebʼ li naʼaj aʼin wank xchʼaʼajkilal ut li rusilal. Abʼan nawulak chiwu li ninbʼaanu ut bʼarwiʼ ninkʼanjelak. Saʼ li qʼoqyink ninchulaak chixkʼatq li xaml ut nawil li po ut ebʼ li chahim naq li iqʼ naxkʼam chaq xsununkil xbʼook li pim. Jultik we xkʼoxlankil naq wank ani kiyobʼtesink re chixjunil aʼin. Abʼan moko chaabʼilebʼ ta xnaʼlebʼ ebʼ li wech aj kʼanjel. Wankebʼ nekeʼroksi li yibʼru aj aatin, nekeʼmayibʼk ut xinkʼam we rikʼinebʼ.

Naq wank we 18 chihabʼ xinqʼaxonk Sydney. Xinyal okenk saʼ xyanqebʼ laj puubʼ abʼan inkʼaʼ xinʼeʼxkʼulubʼa xbʼaan naq moko xintzolok ta saʼ li tzolebʼaal. Xintaw inkʼanjel ut xinkanaak aran chiru jun chihabʼ. Aran xinnawebʼ ru laj testiiw re li Jehobʼa xbʼeen sut. Xinkʼulubʼa li bʼoqom re xik saʼebʼ li xchʼutam ut aran xinkʼe reetal naq aʼan li yaal.

Moqon xinsutqʼiik wiʼ chik saʼ kʼalebʼaal. Xinkanaak Goondiwindi (Queensland). Xintaw inkʼanjel, xinsumlaak ut ra xyeebʼal xinʼok chi kalaak.

Xwank wiibʼ li qakokʼal. Naq ak xeʼyoʼlaak xinʼok xkʼoxlankil rix chiʼus kʼaru yookin rikʼin linyuʼam. Tojaʼ naq kijultikoʼk we li xwabʼi saʼ li chʼutam saʼ Sydney ut xinkʼoxla naq wank kʼaru tento tinbʼaanu.

Xintaw li hu Laj Kʼaakʼalehom li ak junxil kijekʼimank. Aran xintaw xnaʼaj li xmolam ebʼ laj testiiw re li Jehobʼa li wank Australia ut xintzʼiibʼa re xpatzʼbʼal intenqʼ. Moqon jun aj Testiiw li narahok ut li tuulan xchʼool xinrulaʼani ut xʼok xtzolbʼal li Santil Hu wikʼin.

Naq yookin chi tzolok xinkʼe reetal naq tento tinjal linyuʼam. Jun xraqal li Santil Hu li kixtochʼ inchʼool aʼan: 2 Corintios 7:​1, Li Santil Hu, Sociedad Bíblica de Guatemala, SBG, bʼarwiʼ naxye qe naq tqisi «chixjunil li tzʼajnil wank chiqix».

Xinkʼoxla xkanabʼankil li mayibʼk ut kalaak. Kichʼaʼajkoʼk chiwu xbʼaan naq kʼaynaqin xbʼaanunkil. Abʼan nawaj roksinkil linyuʼam joʼ chanru naraj li Yos. Li kitenqʼank we aʼan xyuʼaminkil Romanos 12:​2, SBG, li naxye: «Meekʼam eere rikʼin li ruuchichʼochʼ aʼin, chejal bʼan leeyuʼam, cheʼakʼobʼresi leenaʼlebʼ». Xinkʼe reetal naq re xjalbʼal innaʼlebʼ tento tinjal chanru ninkʼoxlak ut rilbʼal chanru naril li Yos: joʼ jun li yibʼru aj naʼlebʼ. Rikʼin xtenqʼ xinruuk xqʼaxbʼal ru aʼin.

Li xchʼaʼajkoʼk chiwu aʼan xkanabʼankil roksinkil li yibʼru aj aatin. Ninnaw li naxye li Santil Hu saʼ Efesios 4:29, SBG: «Miʼelk chi xtzʼuumal eere yibʼ aj aatin», usta joʼkan kixkʼam naabʼal hoonal re naq tinqʼax ru li chʼaʼajkilal aʼin. Li xinxtenqʼa aʼan xkʼoxlankil rix li naxye Isaías 40:26, SBG. Saʼ li raqal aʼin naʼaatinak chirixebʼ li chahim, naxye: «Taqsihomaq leerilobʼaal saʼ choxa ut ilomaq: ani xkʼuubʼank re chixjunil aʼan? Aʼ li najekʼink rehebʼ li chahim chi tzol saʼ xnaʼaj ut naxbʼoqebʼ li junjunq rikʼin xkʼabʼaʼ. Qʼaxal nim xwankil ut kʼajoʼ li xkawilal, ut maajun rehebʼ naxmuq ribʼ chiru». Wi nim xwankil li Yos re xyiibʼankil li choxa ut li Ruuchichʼochʼ, li nawulak chiwu rilbʼal, joʼkan ajwiʼ naru tinxtenqʼa re xjalbʼal linnaʼlebʼ ut xbʼaanunkil li nawulak chiru. Rikʼin tijok ut xyalbʼal inqʼe xinruuk xtzʼeqtaanankil li yibʼru aj aatin.

Moko naabʼalebʼ ta li kristiʼaan nekeʼkʼanjelak bʼarwiʼ ninkʼaakʼalenk ketomq. Joʼkan naq moko mas ta ninʼaatinak rikʼinebʼ, abʼan xbʼaan li xintzol saʼebʼ li xchʼutam ebʼ laj testiiw re li Jehobʼa xintzol chanru aatinak chi anchal inchʼool. Saʼ xyanq chixjunil aʼin li xintzol aʼan aatinak rikʼin li kristiʼaan chirix li Xnimajwal Awabʼejilal li Yos (Mateo 6:​9, 10; 24:14).

Saʼ xnumikebʼ li chihabʼ xineʼxxaqabʼ joʼ cheekel winq saʼ li chʼuut. Oxloqʼ chiwu naq naru tinkʼanjelaq rochbʼeenebʼ li wechpaabʼanel.

Ninbʼanyoxi re li Jehobʼa naq kixkanabʼ naq tintzol chirix usta moko naabʼal ta lintzolbʼal saʼ li tzolebʼaal (Isaías 54:13). Chi anchal inchʼool ninkʼulubʼa li aatin li wank saʼ Proverbios 10:22, SBG: «Li rosobʼtesihom li Qaawaʼ nabʼihomobʼresink».