Saʼ linkʼuulaʼalil xinwank chaq chixkʼatq Leipzig, li najteril República Democrática Alemana, li wank chixkʼatq Polonia ut li tenamit li nawbʼil ru anaqwan joʼ República Checa. Naq wank 6 chihabʼ we xookoho Brasil xbʼaan li xkʼanjel linyuwaʼ ut moqon Ecuador.

Naq wank 14 chihabʼ we, linnaʼ linyuwaʼ xineʼxtaqla wiʼ chik Alemania chi tzolok saʼ jun li tzolebʼaal bʼarwiʼ xinkanaak chaq. Saʼ xkʼabʼaʼ naq wankin injunes laaʼin tento tinsikʼ kʼaru tinbʼaanu. Maaʼani nataqlank we ut maakʼaʼ nawaj re wi li ninbʼaanu naxchʼiʼchʼiʼi ebʼ li junchʼol.

Naq wank 17 chihabʼ we, linnaʼ linyuwaʼ xeʼsutqʼiik wiʼ chik Alemania. Xbʼeenwa xinwank rikʼinebʼ. Abʼan saʼ xkʼabʼaʼ naq kʼaynaqin chi wank injunes xchʼaʼajkoʼk chiwu wank rikʼinebʼ ut naq wank 18 chihabʼ we, xinkanabʼ li wochoch.

Xʼok inkʼaʼuxl chirix kʼaru xyaalal li yuʼam. Naq ak xintzʼili rix li jalan jalanq chi chʼuut ut molam xchʼolaak chiwu naq us raj naq twoksi linyuʼam re xbʼeninkil li chʼinaʼusil Ruuchichʼochʼ naq toj maajiʼ nasacheʼk xbʼaan li winq.

Joʼkan naq xinloqʼ linmoot ut xkohin África. Abʼan, moqon xinsutqʼiik wiʼ chik Europa xbʼaan naq xpoʼeʼk linmoot. Naq ak xinyiibʼ xkohin chire li palaw aran Portugal. Aran xinkʼoxla naq inkʼaʼ chik twoksi linmoot, tinbʼihajik bʼan chik saʼ jukubʼ.

Xinʼokenk saʼ xyanq jun chʼuut chi saaj li yookebʼ xkawresinkil ribʼ re xik chi bʼihajik saʼ li palaw Atlántico. Saʼ xyanqebʼ wank li xLaurie, li xkanaak choʼq wixaqil. Xoobʼihajik toj saʼ li palaw re Caribe, xoowank bʼayaq Puerto Rico ut moqon xoosutqʼiik wiʼ chik Europa. Rochbʼen li xLaurie xqaj xtawbʼal jun li jukubʼ bʼarwiʼ tooruuq chi wank. Chiru oxibʼ po xqasikʼ li jukubʼ abʼan inkʼaʼ chik xqabʼaanu li naqaj xbʼaan naq xineʼxbʼoq ebʼ laj puubʼ re Alemania.

Xinkʼanjelak 15 po rikʼinebʼ laj puubʼ li wankebʼ saʼ palaw ut chiru li qʼehil aʼan, xoosumlaak. Inkʼaʼ naqaj xkanabʼankil bʼihajik. Naq toj maajiʼ ninʼok chi kʼanjelak rikʼinebʼ laj puubʼ xqaloqʼ jun li kayuuk ut naq wankin rikʼinebʼ laj puubʼ timil timil xooʼok xyiibʼankil joʼ jun li jukubʼ. Li xqaj aʼan wank chisaʼ ut bʼihajik saʼ chixjunil li ruuchichʼochʼ. Naq tojeʼ tinʼelq rikʼinebʼ laj puubʼ ut maajiʼ naqachoy xyiibʼankil li jukubʼ ebʼ laj testiiw re li Jehobʼa xooʼeʼraatina ut xooʼok xtzolbʼal li Santil Hu.

Xinkʼoxla naq maakʼaʼ chik tinjal saʼ linyuʼam: xbʼaan naq xinsumlaak rikʼin li ixq li wankin wiʼ ut inkʼaʼ chik ninmayibʼk (Efesios 5:5). Xinkʼoxla naq us yookin roksinkil linyuʼam naq ninbʼihajik saʼ chixjunil li ruuchichʼochʼ re rilbʼal li xyobʼtesihom li Yos.

Abʼan li xyaalalil aʼan naq toj tento tinjal chanru ninnaʼlebʼak. Toj ninnimobʼresi wibʼ ut inkʼaʼ nawulak chiwu naq teʼxye we li tinbʼaanu, nawulak chiwu xkʼutbʼesinkil li xseebʼal linchʼool ut naq us ninʼelk. Kaʼajwiʼ chiwix ninkʼe inchʼool.

Saʼ jun kutan xinyaabʼasi li seeraqʼ li kixye li Jesús saʼ xbʼeen li tzuul (Mateo, tasal 5 toj 7). Moko kintaw ta ru kʼaru kiraj xyeebʼal li Jesús chirix li sahil chʼoolejil. Jun eetalil, kixye naq li sahil chʼoolejil aʼan choʼq rehebʼ li yookebʼ xtzʼokajik ut teʼchaqiq re (Mateo 5:6). Xinʼok xkʼoxlankil, chanru junaq li kristiʼaan li wank chi joʼkaʼin sahaq saʼ xchʼool? Naq yookin xtzolbʼal li Santil Hu xinkʼe reetal naq naʼajmank li Yos saʼ li qayuʼam, abʼan tento tqakubʼsi qibʼ re xtawbʼal aʼin. Joʼkan tzʼaqal kixye li Jesús: «Us xaq rehebʼ li nebʼaʼebʼ li xchʼool» (Mateo 5:3, Li Santil Hu, Sociedad Bíblica de Guatemala).

Rochbʼen li xLaurie xooʼok xtzolbʼal li Santil Hu Alemania, moqon xookoho Francia ut chirix chik aʼan Italia. Yalaq bʼar wankebʼ laj Testiiw. Li nawulak chiwu aʼan naq nekeʼxra ribʼ chiribʼilebʼ ribʼ ut wankebʼ saʼ junajil. Xinkʼe reetal naq wankebʼ joʼ jun li junkabʼal saʼ chixjunil li ruuchichʼochʼ (Juan 13:​34, 35). Chirix chik aʼan xkubʼeek qahaʼ.

Usta ak xkubʼeek inhaʼ toj naʼajmank naq tinjal innaʼlebʼ. Rochbʼen li xLaurie xqaye naq toobʼihajiq saʼ li palaw re África, tqaqʼax li palaw re Atlántico toj reetal toowulaq Estados Unidos. Naq wanko saʼ xyi li palaw, saʼ jun li chʼina jukubʼ, xinkʼe reetal naq maakʼaʼ qawankil chiru laj Yobʼtesinel. Wank naabʼal linhoonal (saʼ li palaw maakʼaʼ inkʼanjel) joʼkan naq xinʼok rilbʼal xsaʼ li Santil Hu. Li xwulak chiwu aʼan li resil xyuʼam li Jesús naq kiwank saʼ Ruuchichʼochʼ. Usta tzʼaqal re ru li xyuʼam ut qʼaxal chaabʼil nanaʼlebʼak maajunwa kixnimobʼresi ribʼ. Li wank xwankil saʼ li xyuʼam aʼan li Xyuwaʼ.

Naq xintzʼil rix li xyuʼam li Jesús, xinkʼe reetal naq aajel ru naq tinkʼe chiʼubʼej saʼ linyuʼam li Xʼawabʼejilal li Yos (Mateo 6:33). Naq xoowulak Estados Unidos xqaye naq tqakanabʼ bʼihajik ut tqakʼe qachʼool chi kʼanjelak chiru li Yos.

Junxil, naq kaʼajwiʼ chiwix ninkʼe inchʼool, moko chʼolchʼo ta chiwu ma tintaw rusilal li tinbʼaanu. Anaqwan wank ani chik nakʼehok innaʼlebʼ (Isaías 48:​17, 18). Joʼkan ajwiʼ, xintaw xyaalal linyuʼam: xloqʼoninkil ru li Yos ut xtenqʼankil ebʼ li qas qiitzʼin re naq teʼxnaw ru.

Xʼusaak chik li qasumlajik, xbʼaan naq naqayuʼami li naʼlebʼ li naxkʼe li Santil Hu. Joʼkan ajwiʼ li Jehobʼa xoorosobʼtesi rikʼin jun li qakoʼ, li naxra ut naxloqʼoni ru.

Relik chi yaal, wank li chʼaʼajkilal saʼ li qayuʼam. Abʼanan, li Jehobʼa maajunwa nokooxkanabʼ ut chʼolchʼo chiqu naq junelik tookʼanjelaq chiru (Proverbios 3:5, 6).