XJOLOMIL LI NA‘LEB | CHANRU KIKOLE‘K LI SANTIL HU?
Kikoleʼk li Santil Hu chiru li poʼeʼk
LI CHʼAʼAJKILAL. Li keʼtzʼiibʼank re li Santil Hu ut ebʼ laj tzʼiibʼ keʼroksi li bʼayl ut li rix xul re xbʼaanunkil (2 Timoteo 4:13). Xbʼaan naq xeʼroksi aʼin re xtzʼiibʼankil, kʼaʼut naru nasachmank li Santil Hu?
Li bʼayl napejeʼk, napuchoʼk ut naqʼumetoʼk saʼ junpaat. Laj Richard Parkinson ut laj Stephen Quirke keʼxye naq: «Saʼ xnumikebʼ li kutan ebʼ li hu aʼin saʼ junpaat nekeʼosoʼk. Wi xokxo li hu naru namohon ut naqʼumetoʼk, ut wi muqmu rubʼel chʼochʼ naru naketeʼk xbʼaan ebʼ li xul, jun rehebʼ aʼan li saqi sank». Naq kitawmank wiibʼ oxibʼ re li hu aʼin saʼ junpaat xeʼosoʼk xbʼaan naq xeʼwank rubʼel li habʼ ut li saqʼe.
Li rix xul naxkuy chik bʼayaq chiru li bʼayl abʼan naʼosoʼk ajwiʼ, wi inkʼaʼ nekeʼxnaw roksinkil. Wi wank saʼ jun li naʼaj li jwal tiq, ke malaj chiru saqʼe. a Naketeʼk ajwiʼ xbʼaan ebʼ li kokʼ xul. Joʼkan naq li tasal hu Everyday Writing in the Graeco-Roman East (La escritura cotidiana en el Oriente Grecorromano) kixye chirixebʼ li najteril hu «chʼaʼaj xkolbʼalebʼ, saʼ junpaat bʼan nekeʼosoʼk». Wi li Santil Hu kisachmank raj kiʼosoʼk ajwiʼ raj li esil li wank chisaʼ.
CHANRU KIKOLEʼK LI SANTIL HU. Li Jehobʼa kixye rehebʼ li awabʼej re Israel naq «tento tixtzʼiibʼa reetalil li Chaqʼrabʼ» ebʼ li hu Génesis toj Deuteronomio (Deuteronomio 17:18, Li Santil Hu, Sociedad Bíblica de Guatemala, SBG). Joʼkan ajwiʼ saʼ xkutankilebʼ li apóstol ebʼ laj tzʼiibʼ ak xeʼxtzʼiibʼa naabʼal li najteril hu ut naru nekeʼtawmank saʼebʼ li chʼutlebʼaal kabʼl re Israel ut toj saʼ li tenamit Macedonia (Lucas 4:16, 17; Hechos 17:11). Chanru xeʼkoleʼk toj saʼ li qakutan ebʼ li najteril hu aʼin?
Li najteril hu li nawbʼil ru joʼ li bʼotbʼil hu re li Kamenaqil palaw xeʼkoleʼk chiru naabʼal chihabʼ saʼebʼ li kuk li yiibʼanbʼil rikʼin sebʼ saʼ jun li ochoch pek saʼ li chaqichʼochʼ.
Laj Philip Comfort li naxtzʼil rix li akʼ Chaqʼrabʼ naxye: «Nanawmank naq ebʼ laj judiiy nekeʼxxok saʼ li kuk li yiibʼanbʼil rikʼin sebʼ li najteril hu re naq inkʼaʼ teʼpoʼeʼq». Ut joʼkan ajwiʼ xeʼxbʼaanu ebʼ laj paabʼanel. Joʼkan naq ebʼ li najteril hu li nekeʼaatinak chirix li Santil Hu xeʼtawmank saʼebʼ li kuk li yiibʼanbʼil rikʼin sebʼ, li ochoch li qʼoqyink xsaʼ, li ochoch pek malaj saʼebʼ li chaqichʼochʼ.
LI RUSILAL. Maare wiibʼ mil chihabʼ xwanjikebʼ li xperaas li Santil Hu li toj wank saʼ li qakutan. Maakʼaʼ chik junaq li hu li kitzʼiibʼamank junxil joʼ li Santil Hu li natawmank resil saʼ naabʼal li najteril hu.
a Jun eetalil, li hu re li Independencia re Estados Unidos kitzʼiibʼamank rikʼin li hu li nayiibʼamank rikʼin rix li xul. Ak xnumeʼk tana 250 chihabʼ ut li tzʼiibʼ li wank chiru ak xʼok xbʼorbʼal ribʼ.
