XJOLOMIL LI NA‘LEB | TAW XSAHIL XYAAB‘ASINKIL LI SANTIL HU
Kʼaʼut tinyaabʼasi li Santil Hu?
«Xinkʼoxla naq tchʼaʼajkoʼq chiwu rilbʼal xsaʼ li Santil Hu» (Jovy).
«Xinkʼoxla naq saʼ junpaat tintitzʼq» (Queennie).
«Naq xwil naq kʼajoʼ xnimal inkʼaʼ chik xwaj xyaabʼasinkil» (Ezekiel).
Ma joʼkan ajwiʼ xaakʼoxla laaʼat? Maare inkʼaʼ xaawil xsaʼ li Santil Hu xbʼaan naq wank kʼaru xramok chaawu. Wi taanaw raj naq xtzolbʼal li Santil Hu tatxtenqʼa re xchaabʼilobʼresinkil laayuʼam ut naq wank ebʼ li naʼlebʼ li tatxtenqʼa re naq twulaq chaawu rilbʼal xsaʼ li Santil Hu. Ma taakʼe raj aachʼool chi xbʼaanunkil?
Kʼe reetal li nekeʼxye wiibʼ oxibʼ ebʼ li kristiʼaan li xeʼok rilbʼal xsaʼ li Santil Hu ut li rusilal li xeʼxtaw.
Laj Ezekiel jun li saaj naxye: «Junxil chanchanin li kristiʼaan li moko chʼolchʼo ta chiru li xbʼe abʼan rilbʼal xsaʼ li Santil Hu xinxtenqʼa re xtawbʼal kʼaru nawaj xbʼaanunkil saʼ linyuʼam. Chisaʼ wank ebʼ li naʼlebʼ li tatxtenqʼa wulaj wulaj».
Li xFrieda naxye: «Junxil saʼ junpaat ninjosqʼoʼk abʼan xtzolbʼal li Santil Hu xinxtenqʼa re xkuybʼal linjosqʼil ut xjalbʼal linnaʼlebʼ. Anaqwan wankebʼ chik li wamiiw».
Li xʼEunice li numenaq 50 chihabʼ re naxye: «Xtzolbʼal li Santil Hu xinxtenqʼa re xjalbʼal linyibʼru aj naʼlebʼ».
Xtzolbʼal li Santil Hu tatxtenqʼa re xchaabʼilobʼresinkil laayuʼam joʼ xeʼxkʼul ebʼ li kristiʼaan aʼin ut jalanebʼ chik (Isaías 48:17, 18). Joʼkan ajwiʼ tatxtenqʼa re naq chaabʼil tatnaʼlebʼaq, taataw ebʼ laachaabʼil amiiw, taakotz laakʼaʼuxl ut li qʼaxal wank xwankil taatzol chirix laj Yobʼtesinel. Li naʼlebʼ li wank saʼ li Santil Hu chalenaq rikʼin li Yos joʼkan naq us tooʼelq wi naqayuʼami.
Li aajel ru aʼan xtikibʼankil rilbʼal xsaʼ li Santil Hu. Saʼebʼ li junchʼol chik chi tzolom taataw wiibʼ oxibʼ li naʼlebʼ li tatxtenqʼa re xtikibʼankil.
