Li Santil Hu moko juntaqʼeeta rikʼinebʼ li junchʼol chi hu xbʼaan naq chisaʼ naqataw li Raatin li Yos (2 Timoteo 3:16). Naru nakatxtenqʼa li esil li wank chisaʼ. Xbʼaan naq naxye: «Yoʼyo li Raatin li Yos ut kaw ribʼ» (Hebreos 4:12, SBG). Tatxtenqʼa saʼ wiibʼ li naʼlebʼ: re xchaabʼilobʼresinkil laayuʼam, re xnawbʼal ru li Yos ut li naxyeechiʼi qe (1 Timoteo 4:8; Santiago 4:8).

Tatxtenqʼa re xchaabʼilobʼresinkil laayuʼam. Li Santil Hu tixkʼe aanaʼlebʼ chirix laawanjik ut jalan chik ebʼ li naʼlebʼ.

• Chanru taakʼam aawibʼ rikʼinebʼ li junchʼol (Efesios 4:31, 32; 5:22, 25, 28, 33).

• Li xkawilal laajunxaqalil ut laakʼaʼuxl (Salmo 37:8; Proverbios 17:22).

• Ebʼ li chaabʼil naʼlebʼ (1 Corintios 6:9, 10).

• Chanru roksinkil chiʼus li tumin (Proverbios 10:4; 28:19; Efesios 4:28). *

Jun li sumal li wank Asia xkʼe reetal li rusilal li naxkʼam chaq xyuʼaminkil li naʼlebʼ li naxkʼe li Santil Hu. Joʼ nakʼulmank rikʼinebʼ li tojeʼ xeʼsumlaak aʼanebʼ xeʼchʼaʼajkoʼk chiru xkʼambʼal ribʼ saʼ usilal. Abʼan xeʼok xyuʼaminkil li xeʼxtzol saʼ li Santil Hu. Kʼaru rusilal xeʼxtaw? Laj Vicent naxye: «Rilbʼal li Santil Hu xinxtenqʼa re xkʼutbʼesinkil li rahok naq wank li chʼaʼajkilal saʼ qasumlajik. Xyuʼaminkil aʼin kixsahobʼresi qachʼool». Li xʼAnnalou li rixaqil naxye: «Rilbʼal ebʼ li eetalil li wankebʼ saʼ li Santil Hu xooxtenqʼa. Anaqwan sa chik inchʼool saʼ linsumlajik ut rikʼin li naqaj xtawbʼal».

Tatxtenqʼa re xnawbʼal ru li Yos. Laj Vicent naxye ajwiʼ: «Rilbʼal xsaʼ li Santil Hu nikinxtenqʼa re jilok chixkʼatq li Yos». Aʼin naxkʼutbʼesi naq li Santil Hu tatxtenqʼa re xnawbʼal ru chiʼus li Yos. Moko kaʼaj tawiʼ taataw rusilal rikʼin li naʼlebʼ naxkʼe aawe tatruuq bʼan chi wank saʼ amiiwil rikʼin. Taatzol ajwiʼ naq saʼ li Raatin naxye chanru naq saʼ li kutan chalk re tqataw li junelik yuʼam (1 Timoteo 6:19). Aʼin moko tatruuq ta chik xtawbʼal saʼ junaq chik li hu.

Wi nakaatikibʼ rilbʼal xsaʼ li Santil Hu ut nakaakʼaytesi aawibʼ, tchaabʼiloʼq laayuʼam anaqwan ut taanaw ru chiʼus li Yos. Abʼan maare naq taawil xsaʼ li Santil Hu wanq naabʼal laapatzʼom. Wi taakʼul aʼin bʼaanu joʼ kixbʼaanu li winq re Etiopía li kiwank numenaq wiibʼ mil chihabʼ anaqwan. Li winq aʼin wank naabʼal li xpatzʼom chirix li Santil Hu. Joʼkan naq laj Felipe, li xtzolom li Jesús kixpatzʼ re ma naxtaw ru li kʼaru yook xyaabʼasinkil. Joʼkan naq kixye: «Chanru naq tintaw xyaalal wi maaʼani taachʼolobʼanq chiwu?». Joʼkan naq kixkʼulubʼa li xtenqʼ laj Felipe, li naxnaw kʼutuk chirix li Santil Hu (Hechos 8:30, 31, 34, SBG). Joʼkan ajwiʼ, wi taawaj xtawbʼal ru chiʼus li Santil Hu tzʼiibʼa laakʼabʼaʼ saʼ Internet saʼ jw.org malaj saʼ jun rehebʼ xjayalil li wank saʼ li hu aʼin. Joʼkan ajwiʼ naru tat-aatinaq rikʼin jun laj testiiw re li Jehobʼa li wank saʼ laateep malaj ulaʼani jun li Chʼutlebʼaal Kabʼl. Ut anaqwan ajwiʼ naru taasikʼ junaq Laasantil Hu ut kanabʼ naq aʼin tixchaabʼilobʼresi laayuʼam.