Laaʼat yaal aawe ma saʼ junpaat tattitzʼq malaj twulaq chaawu xyaabʼasinkil li Santil Hu. Qilaq kʼaru ttenqʼanq aawe.

Sikʼ junaq li Santil Hu li paabʼajel ut moko chʼaʼaj ta xtawbʼal ru. Moko sahaq ta saʼ laachʼool wi inkʼaʼ nakaataw ru li yookat xyaabʼasinkil. Joʼkan naq, sikʼ junaq li Santil Hu li moko chʼaʼaj ta xtawbʼal ru re naq tixtochʼ laachʼool. Joʼkan ajwiʼ tento naq paabʼajel ut tzʼaqalaq re ru. *

Oksi li Internet. Anaqwan li Santil Hu moko kaʼaj tawiʼ natawmank chi huhil, wank ajwiʼ saʼ Internet. Naru nakaayaabʼasi aran malaj taakubʼsi saʼ laaʼululchʼiichʼ, tablet malaj selular. Wank ebʼ li Santil Hu saʼ Internet li nakatxtenqʼa re naq taawil junaq chik li raqal chirix li naʼlebʼ li yookat rilbʼal, naru ajwiʼ taasikʼ saʼ junaq chik li Santil Hu. Ut wi inkʼaʼ nakaawaj xyaabʼasinkil wankebʼ li Santil Hu li tatruuq rabʼinkil rikʼin xyaabʼ kuxej. Wankebʼ nekeʼwulak chiru rabʼinkil naq yookebʼ chi xik chi kʼanjelak, naq yookebʼ chi puchʼuk malaj xbʼaanunkil junaq li kʼanjel. Yal xbʼaanunkil junaq rehebʼ li naʼlebʼ aʼin.

Sikʼ xkomon li naʼlebʼ. Ebʼ li tasal hu li naxtzʼil rix li Santil Hu tatxtenqʼa naq yookat chi tzolok. Saʼebʼ li hu aʼin wank reetalil li naʼajej li tatxtenqʼa re rilbʼal bʼar ut joqʼe kikʼulmank li yookat xtzolbʼal. Wankebʼ li tzolom saʼ li tasal hu aʼin saʼ Internet ut saʼ jw.org bʼarwiʼ naxye «Li naxkʼut li Santil Hu» li tatxtenqʼa chi xtawbʼal ru li yookat xtzolbʼal.

Oksi jalan jalanq li naʼlebʼ. Wi nakatxuwak xbʼaan naq nim ru li Santil Hu naru nakaatikibʼ rikʼin jun li naʼlebʼ li twulaq chaawu. Wi taawaj xtawbʼal xkomon laanaʼlebʼ chirix jun li kristiʼaan li nawbʼil ru saʼ li Santil Hu naru nakaabʼaanu chi junjunqal. Li kaaxukuut « Tzol chiʼus li Santil Hu re xnawbʼal ruhebʼ li kristiʼaan li naʼaatinak wiʼ» naru nakatxtenqʼa wi taawaj xkomon laanaʼlebʼ chirix junaq li kristiʼaan. Naru nakaayaabʼasi junaq li naʼlebʼ malaj joʼ chanru kikʼulmank li yookat xyaabʼasinkil.