Li Jehobʼa naraj naq chixjunilebʼ li poyanam maakʼaʼ naxye li xwanjikebʼ, teʼxnaw ru ut teʼxtzol chirix li Xʼawabʼejilal (1 Timoteo 2:3, 4). Joʼkan naq, ebʼ laj testiiw re li Jehobʼa nekeʼxkʼubʼ li Santil Hu ut ebʼ li tenqʼ re xtzolbʼalebʼ li kristiʼaan ut saʼ xyanq aʼin wankebʼ li inkʼaʼ nekeʼruuk chi abʼink. Li qamolam ak xkʼubʼ chi mil ebʼ li tasal hu saʼ bʼideo, saʼ numenaq 100 chi aatinobʼaal choʼq rehebʼ li inkʼaʼ nekeʼruuk chi aatinak ut abʼink. a Chanru nayiibʼamank ut najekʼimank ebʼ li tasal hu aʼin? Kʼaru yook chi chaabʼilobʼresiik?

 Saʼ chixjunil li ruuchichʼochʼ wankebʼ li chʼuut li nekeʼjalok aatin saʼ jalan jalanq li raatinobʼaalebʼ li inkʼaʼ nekeʼruuk chi aatinak ut abʼink. Naq naʼajmank xjalbʼal saʼ jalan chik aatinobʼaal junaq li tasal hu, ebʼ laj jalol aatin xbʼeenwa nekeʼxtzʼil rix chiʼus. Ut moqon, nekeʼxkʼubʼ chanru tkʼutbʼesimanq saʼ li raatinobʼaalebʼ li inkʼaʼ nekeʼruuk chi aatinak ut abʼink. Chirix chik aʼan nekeʼxxok li tasal hu saʼ bʼideo. Anaqwan wank 60 li chʼuut li nekeʼxjal rajlal jalan jalanq li tenqʼ re xtzolbʼal li Santil Hu ut 40 chik li nekeʼxjal chi joqʼeqil.

 Junxil jwal terto xkʼubʼankil ebʼ li bʼideo rehebʼ li inkʼaʼ nekeʼruuk chi aatinak ut abʼink. Ebʼ li kamara ut chixjunil li naʼajmank jwal terto xtzʼaq chiru anaqwan. Joʼkan ajwiʼ aajel ru jun li naʼajej re naq truhanq xxokbʼal li bʼideo, wank sut naʼajmank xkabʼlankil li naʼajej aʼin ut wank sut naʼajmank xchaabʼilobʼresinkil junaq li naʼajej li ak wank. Joʼkan naq, re naq chaabʼilaq junaq li naʼajej re xxokbʼal li bʼideo nasachmank 30,000 chi dólar. b

 Re roksinkil chiʼus li tenqʼ tumin, li qamolam kixkawubʼresi ribʼ re xkʼosbʼal ut xchaabʼilobʼresinkil li naʼlebʼ chirix li jalok aatin. Re xbʼaanunkil aʼan yooko roksinkil li kʼanjelobʼaal li kubʼenaq xtzʼaq, li moko chʼaʼaj ta roksinkil ut li tojeʼ xʼelk. Jun eetalil, moko naʼajmank ta chik ebʼ li naʼaj re xxokbʼal li bʼideo, ebʼ li junjunq chi chʼuut re jalok aatin naru nekeʼxbʼaanu saʼ li xʼofisiin kaʼajwiʼ rikʼin roksinkil jun li tzʼak li bʼonbʼil chi rax. Naq nekeʼelk naabʼal li hermaan saʼ jun li bʼideo, li junjunq naru tixbʼaanu li xkʼanjel saʼ li xʼofisiin malaj saʼ li rochoch.

 Xqakʼubʼ ajwiʼ junjunq li kʼanjelobʼaal saʼ li ulul chʼiichʼ re naq ebʼ laj jalol aatin teʼruuq xbʼaanunkil li xkʼanjel. Saʼ xkʼabʼaʼ aʼin moko naabʼal ta chik li hoonal naʼoksimank re xyiibʼankil li tasal hu saʼ raatinobʼaalebʼ li inkʼaʼ nekeʼruuk chi aatinak ut abʼink. Ebʼ li hermaan kʼajoʼ nekeʼxbʼanyoxi aʼin. Laj Alexánder jun li hermaan naxye: «Jwal sa saʼ inchʼool xbʼaan naq anaqwan naabʼal chik li bʼideo naʼelk chiru junxil. Rajlal kutan nawil junaq li bʼideo».

 Anaqwan xkanabʼankil li kʼanjelobʼaal chi kʼubʼkʼu re jun chʼuut laj jalol aatin nasachmank kachʼin chik ma 5,000 chi dólar. Ut li rusilal aʼan naq tooruuq xbʼaanunkil li bʼideo saʼ naabʼal chik li aatinobʼaal choʼq rehebʼ li inkʼaʼ nekeʼruuk chi aatinak ut abʼink.

 Naq ak xxokmank saʼ bʼideo junaq li tasal hu, aajel ru xtaqlankil rehebʼ li hermaan li naʼajmank chiruhebʼ. Junxil naq ak wank chik li bʼideo, nataqlamank saʼ jun li nimla kʼayibʼaal bʼarwiʼ nekeʼxkʼubʼ li DVD ut li kaset. Ut moqon chik najekʼimank saʼebʼ li junjunq chi chʼuut. Abʼan, re xbʼaanunkil chixjunil aʼin naʼajmank naabʼal li hoonal ut li tumin. Saʼ 2013 kisachmank numenaq wiibʼ miyon chi dólar re xyiibʼankil li DVD rehebʼ li poyanam li inkʼaʼ nekeʼruuk chi aatinak ut abʼink.

 Ebʼ li inkʼaʼ nekeʼruuk chi abʼink jwal sahebʼ saʼ xchʼool rikʼin ebʼ li bʼideo aweʼ. Abʼan li xyaalalil aʼan naq chʼaʼaj roksinkil qʼaxal chik naq natamk ebʼ li DVD ut li kaset. Wank sut, jun ajwiʼ xtasalil li Santil Hu naxkʼam naabʼal li DVD. Laj Gilnei jun li hermaan li wank Brasil naxjultika: «Naq naqaj raj xyaabʼasinkil junaq xraqal li Santil Hu, tento xnawbʼal saʼ kʼaru DVD wank ut moqon xsikʼbʼal li raqal. Jwal chʼaʼaj aʼin». Li xRafayane jun li hermaan li naroksi chaq ebʼ li DVD saʼ li raatinobʼaal li inkʼaʼ nekeʼruuk chi aatinak ut abʼink naxye: «Xtzolbʼal li Santil Hu saʼ junesal jwal nachʼaʼajkoʼk chaq chiwu. Naabʼal li hoonal nawoksi re xsikʼbʼal ebʼ li raqal ut xkomon li naʼlebʼ». Ut saʼ li puktesink, ebʼ li hermaan tento teʼxkʼam ebʼ li DVD ut li kaset re xkʼebʼal saʼebʼ li xtele li poyanam li nekeʼraj rabʼinkil li esil. Wankebʼ nekeʼxkʼam li xkʼanjelobʼaal re xkʼebʼal li DVD. Abʼan Moqon, kiʼelk li kʼanjelobʼaal re li DVD li naruuk xkʼambʼal yalaq bʼar ut moko chʼaʼaj ta roksinkil. Laj Bobby, li wank Estados Unidos, naxye: «Wi ak xaakʼut jun li raqal ut nakaawaj xkʼutbʼal jalan chik, naʼajmank xjalbʼal naabʼal sut li DVD. Xbʼaan naq aweʼ naxkʼam naabʼal li hoonal, chʼaʼaj roksinkil li Santil Hu saʼ li puktesink».

 Saʼ 2013, li xmolam li Jehobʼa kixkʼubʼ li kʼanjelobʼaal JW Library Sign Language bʼarwiʼ naru teʼxkubʼsi li junjunq chi bʼideo li wank saʼ raatinobʼaalebʼ li inkʼaʼ nekeʼruuk chi aatinak ut abʼink ut moqon teʼril saʼebʼ li xselular malaj li xtableta. Saʼ xtiklajik, kaʼajwiʼ wank saʼ raatinobʼaalebʼ li inkʼaʼ nekeʼruuk chi aatinak ut abʼink re Estados Unidos. Abʼan saʼ li chihabʼ 2017, kiʼakʼobʼresimank re naq chixjunilebʼ li inkʼaʼ nekeʼruuk chi aatinak ut abʼink teʼruuq roksinkil. Qʼaxal keʼsahoʼk saʼ xchʼool ebʼ li hermaan. Laj Juscelino, jun li hermaan li wank Brasil, naxye: «Xsach inchʼool rabʼinkil aʼin. Inkʼaʼ ninkanabʼ xkʼoxlankil rix naq li Nekeʼjolomink re Xmolam li Jehobʼa jwal nokooʼeʼxra li inkʼaʼ nokooruuk chi abʼink ut nekeʼraj naq tookʼiiq saʼ li qapaabʼal joʼebʼ li nekeʼruuk chi abʼink. Naq kiʼelk li kʼanjelobʼaal kʼajoʼ kisahoʼk saʼ inchʼool ut qʼaxal chik nawaj xtzolbʼal li Santil Hu».

 Saʼebʼ li qakutan nayiibʼamank chixjunil ebʼ li bʼideo saʼebʼ li raatinobʼaal li inkʼaʼ nekeʼruuk chi aatinak ut abʼink ut nakʼemank saʼ li qanaʼaj saʼ internet ut saʼ JW Library Sign Language. Saʼ xkʼabʼaʼ aʼin, xjalbʼal, xxokbʼal ut xkʼebʼal ebʼ li tasal hu sa’ebʼ li raatinobʼaal li inkʼaʼ nekeʼruuk chi aatinak ut abʼink, moko naxkʼam ta chik naabʼal po malaj chihabʼ. Joʼkan ajwiʼ, saʼ naabʼal chi aatinobʼaal ebʼ li tasal hu juntaqʼeet naʼelk rikʼin li raatinobʼaal li nekeʼruuk chi aatinak.

 Kʼe reetal li nekeʼxye wiibʼ oxibʼ li qechpaabʼanel li tzʼap xxikebʼ. Li xKlízia naxye: «Maajun chik molam naxkʼe xchʼool chiqix li inkʼaʼ nokooruuk chi abʼink joʼ naxbʼaanu li xmolam li Jehobʼa li naxkʼe naabʼal li naʼlebʼ li naʼajmank chiqu re xkawresinkil li qapaabʼal. Kaʼajwiʼ li xmolam li Jehobʼa nabʼaanunk re aʼin». Laj Vladimir naxye: «Ebʼ li bʼideo naxkʼut chiwu naq li Jehobʼa qʼaxal naxrahebʼ li tzʼap xxik joʼ ajwiʼ li nekeʼruuk chi abʼink».

 Saʼ naabʼal li bʼideo li wank saʼ li raatinobʼaal li inkʼaʼ nekeʼruuk chi aatinak ut abʼink natawmank li aatin aʼin: «Li hu aʼin nakʼanjelak re xtawbʼal ru chiʼus li Santil Hu ut napuktesimank saʼ chixjunil li Ruuchichʼochʼ. Li kʼanjel aʼin nabʼeresimank rikʼin joʼnimal nekeʼraj tenqʼank ebʼ li poyanam». Jwal naqabʼanyoxi naq nekeekʼe leetenqʼ tumin joʼ li nabʼaanumank saʼ donate.pr418.com. Li tenqʼ tumin aʼin nakʼanjelak re xyiibʼankil li Santil Hu ut jalan jalanq li tenqʼ re xtzolbʼalebʼ li kristiʼaan joʼ li naʼelk saʼ li raatinobʼaalebʼ li inkʼaʼ nekeʼruuk chi aatinak ut abʼink.