Li Jesús kixye rehebʼ li xtzolom: «Laaʼexaq aj yehol yaal chiwix […] toj saʼ xmaril li ruuchichʼochʼ» (Hechos 1:8). Ebʼ laj testiiw re li Jehobʼa nekeʼxbʼaanu aʼin chi anchalebʼ xchʼool. Usta joʼkaʼin, toj maajiʼ naqapuktesi li chaabʼil esilal saʼ junjunq chi naʼajej, xbʼaan naq, naabʼalebʼ li poyanam ut ninq li teep. Saʼ wiibʼ oxibʼ li tenamit moko naabʼalebʼ ta aj Testiiw (Mateo 9:37, 38). Kʼaru yooko xbʼaanunkil re naq toowulaq saʼ xteepebʼ?

 Re xbʼaanunkil li xtaql li Jesús, li chʼuut li naril li puktesink re li Nekeʼjolomink re Xmolam li Jehobʼa nekeʼxtaqla ebʼ laj puktesinel bʼarwiʼ naʼajmank li tenqʼ. Anaqwan wank 3,090 li nekeʼtaqlaak chi puktesink saʼ jalan chik tenamit.  aJunjunq rehebʼ aʼin, nekeʼtzoleʼk saʼ jun li tzolebʼaal joʼ Tzolok chirix li Xʼawabʼejilal li Yos. Moqon chik ebʼ laj puktesinel aʼin nekeʼxkanabʼ li rochoch re naq teʼxik saʼ jalan chik tenamit. Rikʼin li xtzolbʼalebʼ, nekeʼxtenqʼa ajwiʼ li poyanam re naq teʼoq joʼ xtzolom li Kriist.

 Saʼ li qamolam, li nekeʼril li nekeʼxkʼe chixjunil li xhoonal saʼ li puktesink, nekeʼkʼanjelak rochbʼen li chʼuut li naril li qakʼanjel re xtenqʼankilebʼ li nekeʼxik chi puktesink saʼ jalan chik tenamit. Ut nekeʼxkʼe rochochnal, nekeʼileʼk, ut nekeʼxkʼe bʼayaq xtenqʼ re naq teʼxloqʼ li kʼaru nekeʼraj. Chiru li chihabʼ 2020, li qamolam kiroksi 27 miyon chi dólar re xtenqʼankilebʼ li hermaan aʼin re naq us teʼxbʼaanu li xkʼanjel ut teʼxtenqʼa ebʼ li hermaan.

 Chanru nekeʼtenqʼank li nekeʼpuktesink saʼ jalan chik tenamit? Laj Frank Madsen, li natzʼaqonk saʼ li chʼuut li naril li qakʼanjel saʼ Malaui, naxye: «Seebʼebʼ xchʼool ut nekeʼpuktesink chi maakʼaʼebʼ xxiw saʼebʼ li naʼajej bʼarwiʼ inkʼaʼ nekeʼraj abʼink. Ut nekeʼxtzol jalan jalanq ebʼ li aatinobʼaal, nekeʼxtzol ajwiʼ, chanru xwanjikebʼ li kristiʼaan ut ebʼ li raatinobʼaal, chi joʼkaʼin nekeʼxkʼutbʼesi jun chaabʼil eetalil. Nekeʼxtenqʼahebʼ ajwiʼ ebʼ li saaj re naq teʼoq xkʼebʼal chixjunil li xhoonal saʼ li puktesink. Ut chixjunil aʼin naqabʼanyoxi re li Jehobʼa».

 Jun rehebʼ li natzʼaqonk saʼ li chʼuut li naril li kʼanjel saʼ jun chik li tenamit naxye: «Li nekeʼtaqlaak chi puktesink saʼ jalan chik tenamit nekeʼtenqʼank re naq ebʼ laj testiiw re li Jehobʼa nekeʼxkʼut naq usta jalan jalanq li xtenamitebʼ wankebʼ saʼ junajil. Ut aʼin nekeʼxkʼe ajwiʼ reetal li maawaʼebʼ aj Testiiw, naq maakʼaʼ naru nekeʼjachok re chiribʼilebʼ ribʼ. Nekeʼxyuʼami li naxye li Santil Hu ut aʼin naxbʼaanu naq wankebʼ saʼ junajil».

 Chanru ebʼ li hermaan aʼin nekeʼxtenqʼa laj puktesinel saʼ li chʼuut? Laj Paulo, li wank Timor Oriental, oxloqʼ chiru li kʼanjel li nekeʼxbʼaanu li hermaan aʼin saʼ li xchʼuut. Naxye: «Xbʼaan naq aran kʼajoʼ li tiq, usta ebʼ laj puktesinel aʼin nekeʼchalk saʼ kehil chʼochʼ, junelik wankebʼ saʼ li puktesink. Nekeʼxkanabʼ ulaʼanink waʼlebʼ ut nekeʼpuktesink ajwiʼ ewu. Nekeʼxtenqʼa naabʼal li qas qiitzʼin ut saʼ xyanq aʼin wankin laaʼin. Nekeʼkʼanjelak chiru li Jehobʼa chi anchalebʼ xchʼool, ut aʼin naxtenqʼa ebʼ li hermaan re naq teʼraj xkʼebʼal xkomon chik xkʼanjel chiru li Jehobʼa».

 Li xKetti, li naxbʼaanu 70 hoor li wank Malaui, naxye naq kʼajoʼ kitenqʼaak xbʼaan li sumal li keʼtaqlaak chi puktesink saʼ jalan chik tenamit: «Naq xeʼwulak saʼ li qachʼuut, kaʼajwiʼ raj chaq laaʼin aj Testiiw ut kʼajoʼ naq xineʼxtenqʼa joʼ ajwiʼ linjunkabʼal. Xeʼwank choʼq qamiiw. Ut aʼin kixbʼaanu naq kixtenqʼahebʼ linkokʼal. Xeʼxkʼe reetal naq kʼanjelak chiru li Jehobʼa qʼaxal naxkʼe sahil chʼoolejil. Saʼ xkʼabʼaʼ aʼin, oxibʼ rehebʼ linkoʼ wankebʼ joʼ aj kʼamolbʼe li nekeʼxbʼaanu 70 hoor ut linbʼeelom kiʼok ajwiʼ chi wulak saʼebʼ li chʼutam».

 Ut, bʼar natawmank li tumin re xtenqʼankilebʼ laj puktesinel li nekeʼxik saʼ jalan chik tenamit? Li tenqʼ aʼin nekeʼxkʼe ebʼ li hermaan saʼ chixjunil li ruuchichʼochʼ. Nabʼaanumank rikʼin ebʼ li naʼlebʼ li wank saʼ donate.pr418.com. Bʼanyox li tenqʼ li nekeekʼe chi anchal eechʼool.