Saʼ naabʼal chi tenamit ebʼ li awabʼej keʼxye rehebʼ li poyanam naq teʼxnajtobʼresi ribʼ ut inkʼaʼ nekeʼxkʼulubʼa naq teʼxchʼutubʼ ribʼ. Joʼ aj testiiw re li Jehobʼa naqapaabʼ li chaqʼrabʼ aʼin, abʼan inkʼaʼ naqakanabʼ xchʼutubʼankil qibʼ. Joʼkan naq, ebʼ li chʼuut yookebʼ roksinkil ebʼ li kʼanjelobʼaal joʼ li Zoom re xbʼaanunkil ebʼ li chʼutam.

 Re naq junelik wanq li qachʼutam li Nekeʼjolomink re Xmolam li Jehobʼa keʼxkʼulubʼa roksinkil li tenqʼ tumin re xtojbʼal li kʼanjelobʼaal Zoom choʼq rehebʼ li chʼuut. Aʼin jun tenqʼ choʼq re wiibʼ oxibʼ li chʼuut li inkʼaʼ nekeʼruuk xtojbʼal 15 malaj 20 dólar. Ebʼ li chʼuut aʼin nekeʼroksi jalan chik ebʼ li kʼanjelobʼaal li inkʼaʼ natojmank bʼarwiʼ moko kʼihebʼ ta nekeʼruuk chi ok. Chixjunilebʼ li chʼuut li nekeʼroksi li Zoom li tojbʼil xbʼaan li qamolam nekeʼruuk xbʼeresinkil chiʼus li chʼutam ut naabʼalebʼ chik naru nekeʼokenk. Anaqwan, saʼ numenaq 170 chi tenamit wank numenaq 65,000 li chʼuut li yookebʼ xtawbʼal rusilal aʼin.

 Li chʼuut Kairagi re li tenamit Manado (saʼ xteepal Célebes Septentrional re Indonesia) kixkanabʼ roksinkil li videoconferencia li sibʼil ut kiʼok roksinkil li Zoom re li qamolam. Li hermaan Hadi Santoso naxye: «Usta ebʼ li hermaan inkʼaʼ nekeʼxnaw naabʼal chirix li ululchʼiichʼ nekeʼxyal xsahil li chʼutam. Xbʼaan naq moko naabʼal sut ta chik yookebʼ chi ok naq ak yook li chʼutam».

 Laj Léster Jijón alalbʼej, jun cheekel winq re li chʼuut Guayacanes Oeste re Guayaquil (Ecuador), naxye: «Saʼ xkʼabʼaʼ naq ebʼ li hermaan moko naabʼal ta xtuminebʼ, kichʼaʼajkoʼk raj chiruhebʼ xtojbʼal jun li naʼaj saʼ Zoom li tixbʼaanu naq chixjunilebʼ teʼruuq chi ok saʼ jun ajwiʼ chi hoonal. Xbʼaan li xtenqʼ li qamolam anaqwan wank qanaʼaj saʼ Zoom li naxbʼaanu naq tooʼoq chiqajunilo. Joʼkan naq naru naqabʼoqebʼ naabʼal li poyanam saʼebʼ li qachʼutam chi maakʼaʼ qakʼaʼuxl».

 Li hermaan Johnson Mwanza, re li chʼuut Norte Ngwerere re li tenamit Lusaka (Zambia), kixtzʼiibʼa: «Naabʼal ebʼ li hermaan nekeʼxye: “Li naʼaj re Zoom li tojbʼil xbʼaan li qamolam moko kaʼaj tawiʼ naxbʼaanu naq nachʼ tqekʼa qibʼ rikʼinebʼ li hermaan naxbʼaanu ajwiʼ naq tqekʼa li xrahom li Jehobʼa”».

 Li tumin re xloqʼbʼal li Zoom xʼelk saʼ xyanq li tumin li xokxo choʼq re li kʼanjel li nabʼaanumank naq nakʼulmank junaq li rahilal. Li tumin aʼin natawmank saʼ xkʼabʼaʼ li tenqʼ tumin li nakʼemank saʼ chixjunil li ruuchichʼochʼ. Naabʼal re aʼin nakʼemank saʼ donate.pr418.com. Kʼajoʼ naqabʼanyoxi eere li tenqʼ li nekeekʼe, joʼkan ajwiʼ naʼoksimank li tumin aʼin naq nakʼulmank junaq li rahilal (2 Corintios 8:14).