Anaqwan naq tiklaak re li chihabʼ 2023, laaʼo ut li qajunkabʼal naqaj naq us tooʼelq, joʼkan naq, kʼaʼut naru naq kawaq qachʼool chirix li kutan chalk re?

 Li Santil Hu naxkʼe li chaabʼil esil bʼarwiʼ naxye naq ebʼ li chʼaʼajkilal li naqanumsi anaqwan chi seebʼ teʼosoʼq. Joʼkan naq wank xyaalal li naxye li Santil Hu naq chixjunil li wank chisaʼ «re qatzolbʼal naq kitzʼiibʼaak chaq, re naq rikʼin [...] li xkʼojobʼankil li qaanm naxkʼe li Santil Hu chiwanq xnimal qoybʼenihom» (Romanos 15:4, Li Santil Hu, Sociedad Bíblica de Guatemala, SBG).

•   Re xtzolbʼal xkomon li naxyeechiʼi li Santil Hu, chaawil li naʼlebʼ «Li chaqʼal ru yeechiʼom choʼq re li kutan chalk re».

 Li oybʼenihom li naxkʼe li Santil Hu aʼan «kamaʼ jun li ankla choʼq re li qaanm» (Hebreos 6:19, SBG). Nokooxtenqʼa re xqʼaxbʼal ru ebʼ li qachʼaʼajkilal re naq us toonaʼlebʼaq ut wanq xsahil qachʼool chi junelik. Joʼ eetalil:

•   Kʼe reetal chanru naq li oybʼenihom li naxkʼe li Santil Hu kixtenqʼa jun li winq li inkʼaʼ naxkanabʼ kalaak. Chaawil li bʼideo «Kʼajoʼ chaq xyibʼal ru linyuʼam».

•   Kʼe reetal chanru naq li oybʼenihom li naxkʼe li Santil Hu naru nokooxtenqʼa naq nakamk junaq li qakomon. Chaawil li bʼideo «Li rahilal li naqekʼa naq nakamk jun li qakomon».

 Naabʼalebʼ li poyanam nekeʼroybʼeni naq tkʼulmanq li chaabʼil naʼlebʼ, abʼan moko chʼolchʼo ta chiruhebʼ naq joʼkan tkʼulmanq. Abʼan rikʼin li Santil Hu moko joʼkan ta. Kʼaʼut? Xbʼaan naq li yeechiʼom li wank chisaʼ nachalk rikʼin li Jehobʼa a Yos li «inkʼaʼ natikʼtiʼik» (Tito 1:2, SBG). Kaʼajwiʼ li Jehobʼa wank xwankil re xbʼaanunkil li naxyeechiʼi xbʼaan naq aʼan naxbʼaanu «joʼnimal li nawulak chiru xbʼaanunkil» (Salmo 135: 5, 6, SBG).

 Naqaj naq taataw rusilal li oybʼenihom li naxkʼe li Santil Hu. Naru taakʼojobʼ aachʼool chirix naq yooqat «xtzʼilinkil xsaʼ li Santil Hu rajlal kutan» (Hechos 17:11, SBG). Taakʼe reetal aʼin naq taakʼulubʼa xtzolbʼal li Santil Hu chi sibʼil. Tikibʼ li chihabʼ 2023 rikʼin rilbʼal chi chaabʼil li kutan chalkebʼ re!