Li chʼuut re Naciones Unidas naxkʼe li esil aʼin:

•   Chalen 7 toj 23 re octubre 2023, li yalok u saʼ Gaza ut Israel xkamsi numenaq 6,400 li qas qiitzʼin ut 15,200 xeʼtawasiik. Chi mil ajwiʼ li kristiʼaan xeʼxkanabʼ li rochochebʼ.

•   Saʼ 24 re septiembre 2023, li yalok u saʼ xyanq Rusia ut Ucrania xkamsi 9,701 li kristiʼaan ut 17,748 xeʼtawasiik aran Ucrania.

 Kʼaru naxyeechiʼi li Santil Hu choʼq rehebʼ li yookebʼ xnumsinkil li rahilal xbʼaan li yalok u?

 Li Santil Hu naxye naq li Yos tixsach li yalok u chi junajwa (Salmo 46:10). Re xbʼaanunkil aʼin, li Xʼawabʼejilal li Yos tkanaaq choʼq reqaj li xʼawabʼejilal li winq (Daniel 2:44). Li Xʼawabʼejilal li Yos tixbʼaanu naq ebʼ li qas qiitzʼin teʼwanq saʼ tuqtuukilal.

 Kʼe reetal li tixbʼaanu li Jesukriist, li Awabʼej re li Xʼawabʼejilal li Yos:

•   «Aʼan taakoloq re li nebʼaʼ li yo chi tzʼaamank, a’ li toqʼobʼ ru li inkʼaʼ natenqʼaak xbʼaan anihaq. Taaruxtaana ruhebʼ li nebʼaʼ ut li wankebʼ sa’ rajbʼal ru; tixkolebʼ xyuʼam li qʼaxal ra wankebʼ. Aʼan taaʼisinq rehebʼ sa’ li raasa ut li rahobʼtesiik» (Salmo 72:12-14, Li Santil Hu, Sociedad Bíblica de Guatemala).

 Li Yos troksi li Xʼawabʼejilal re xsachbʼal chi junajwa li rahilal ut li rahil chʼoolej li naxkʼam chaq li yalok u ut li raaxiikʼ.

•   «Tixmes li xyaʼalebʼ ru, maakʼaʼaq chik li kamk chi moko li rahil chʼoolej chi moko li yaabʼak chi moko li rahilal. Chixjunil li narahobʼtesink chaq qe moko wank ta chik» (Apocalipsis 21:4).

 Chi seebʼ li Xʼawabʼejilal li Yos tixchaabʼilobʼresi li Ruuchichʼochʼ. Chanru naqanaw? Xbʼaan naq li Santil Hu naxye resil «li yalok u» li naqil saʼebʼ li qakutan (Mateo 24:6). Aʼin ut jalan chik li naʼlebʼ naxkʼut naq wanko «saʼ xraqik ebʼ li kutan» naq yookebʼ chi awabʼejink ebʼ li winq (2 Timoteo 3:1).