Sa’ chixjunil li ruuchich’och’, eb’ laj testiiw re li Jehob’a ut chi miyon chi qas qiitz’in neke’ch’utlaak jun sut chiru li chihab’ re xnimankil li xkamik li Jesús, jo’ chanru kixye li Jesús naq taab’anumank (Lucas 22:19). Li ch’utam a’in nokooxtenq’a chi xtawb’al ru k’a’ut naq li Jesús kixk’e li xyu’am sa’ xk’ab’a’ eb’ li poyanam. Nokooxtenq’a ajwi’ chi xtawb’al ru naq li mayej a’in wank xwankil cho’q qe anaqwan ut sa’ li kutan chalk re (Juan 3:16).

 Maak’a’ naxye ma xatwulak malaj ink’a’ chi xnimankil li xkamik li Jesús sa’ li chihab’ a’in, chanru taataw rusilal li xkamik li Jesús? Li Jesús kixk’ut naq jwal aajel ru xb’aanunkil wiib’ li na’leb’.

1.  1. Xtzolb’al chirix li Yos ut li Jesús. Naq li Jesús kitijok kixye re li xYuwa: «A’an a’in li junelik yu’am: naq te’xnaw aawu laa’at li junat chi tz’aqal Yos ut li xataqla chaq, li Jesus a’ li Kriist» (Juan 17:3, Li Santil Hu, Sociedad Bíblica de Guatemala, SBG).

2.  2. Xyu’aminkil li naqatzol. Li Jesús kixye naq tento tqak’utb’esi sa’ li qayu’am li naqatzol. Jun eetalil, sa’ xraqik li xseeraq’ sa’ li tzuul, li Jesús kixk’e xsahil xch’ool li na’abink re li raatin «ut naxk’anjela ru» (Lucas 6:46-48, SBG). Ut kixye ajwi’: «Wi nekenaw a’in, us xaq eere wi teeb’aanu chi jo’kan» (Juan 13:17, SBG).

 Ma taawulaq raj chaawu xnawb’al chirix li Yos ut li Jesús? Ma taawaj rilb’al chanru taayu’ami li nakaatzol? Arin wank wiib’ oxib’ li tenq’ li tk’anjelaq chaawu.

 Li tzolok li nak’emank yook xtenq’ankil naab’al li poyanam chi xtzolb’al li Santil Hu ut chi xyu’aminkil li neke’xtzol.

•   Taawil li na’aj «Kubʼ laatzolbʼal chirix li Santil Hu» re xnawb’al chirix li tzolok a’in.

•   Il li b’ideo Sa qach’ool naq taatikib’ xtzolb’al li Santil Hu re naq taawil chanru xtzolb’al li Santil Hu rik’ineb’ laj testiiw re li Jehob’a.

 Eb’ laj testiiw re li Jehob’a neke’xch’utub’ rib’ wiib’ sut sa’ li xamaan sa’eb’ li Ch’utleb’aal Kab’l. Sa’eb’ li ch’utam a’in, naqatzol li Santil Hu ut chanru xyuaminkil li naxk’ut.

 Sa’eb’ li ch’utam a’in yalaq ani naru nawulak; moko aajel ta ru naq laa’ataq aj Testiiw re naq tatwulaq. A’ yaal chanru li na’aj b’arwi’ wankat, naru taawil sa’ videoconferencia malaj chi poyanamil.

•   Sa’ li b’ideo Kʼaru nabʼaanumank saʼebʼ li Chʼutlebʼaal Kabʼl rehebʼ laj Testiiw?, taawil chanru nab’aanumank a’in.

•   Sik’ li na’aj «Eb’ li ch’utam reheb’ laj testiiw re li Jehob’a» re rilb’al b’ar wank li ch’uut li nach’ wank b’arwi’ wankat.

 Sa’ li qana’aj sa’ internet naru taataw naab’al li na’leb’ ut eb’ li b’ideo li tatxtenq’a xtawb’al ru li kixk’ut li Jesús ut chirix li xkamik.

 Jun eetalil, wi taawaj xnawb’al chanru li xkamik jun chi winq naru xkolb’al chi miyon li kristii’an, taawil eb’ li na’leb’ «Chanru nokooxkol li Jesús?» ut «K’a’ut kixk’ul li rahil ut kikamk li Jesús?» malaj taawil li b’ideo K’a’ut kikamk li Jesús?