Tenq’aheb’ li junch’ol re naq ink’a’ chik twek’a aawib’ aajunes | Li naxye li Santil Hu
Sa’ chixjunil li ruuchich’och’, naab’aleb’ li qas qiitz’in neke’rek’a naq wankeb’ xjunes ut naq maak’a’eb’ ramiiw. Wiib’ oxib’ reheb’ li wankeb’ xnawom chirix li kawilal neke’xye naq re xq’axb’al ru li ch’ajkilal a’in aajel ru xtenq’ankileb’ li junch’ol.
«Xtenq’ankileb’ li junch’ol naru tixk’e xsahil qach’ool, naru nokooxtenq’a re naq ink’a’ tqanajtob’resi qib’ rik’ineb’ li junch’ol ut re naq ink’a’ tqek’a qib’ qajunes» (Institutos Nacionales de la Salud, re Estados Unidos).
Li Santil Hu naxye qe k’aru tooruuq xb’aanunkil re xtenq’ankileb’ li junch’ol. Xyu’aminkil a’in tooxtenq’a re naq ink’a’ tqek’a qib’ qajunes.
Li tatruuq xb’aanunkil
Chatk’ehoq. Wotz rik’ineb’ li junch’ol li k’aru wank aawe, jo’ laahoonal. K’e aach’ool chi wank sa’ komonil rik’ineb’ li junch’ol. Naq nakatk’ehok, eb’ li junch’ol neke’xb’anyoxi li nakaab’aanu chirixeb’ ut sa neke’rek’a rib’ aawik’in.
Xraqal li Santil Hu: «Meekanabʼ kʼehok ut tkʼemanq eere» (Lucas 6:38).
K’e aach’ool chi tenq’ank. Sik’ chanru xtenq’ankil li wankeb’ sa’ rahilal, maare rik’in xk’eb’al laahoonal re rab’inkileb’, xtawb’al ru li neke’rek’a malaj xyeechi’inkil aawib’ re xtenq’ankileb’ chi xb’aanunkil jun li k’anjel sa’ rochocheb’.
Xraqal li Santil Hu: «Li tz’aqal amiiw junelik narahok» (Proverbios 17:17, Li Santil Hu, Sociedad Bíblica de Guatemala).
Wi taawaj xnawb’al chanru xtawb’aleb’ laachaab’il amiiw, chaawil li na’leb’«Laajunkab’al ut eb’ laawamiiw».
