JUNELIK AJʼAJAQ QU!
Kʼaʼut naq ebʼ li nekeʼraj wank joʼ awabʼej nekeʼxjach li kristiʼaan? | Kʼaru naxye li Santil Hu?
Saʼ chixjunil li Ruuchichʼochʼ naabʼalebʼ li tenamit jachjokebʼ chaq ru xbʼaan li nekeʼraj wank joʼ awabʼej. Joʼ xtzʼil chaq rix li molam Pew Research Center saʼ li chihabʼ 2022, «kachʼin chik ma chixjunilebʼ li kristiʼaan re 19 chi tenamit nekeʼxye naq wank naabʼal li chʼaʼajkilal saʼ xyanqebʼ li nekeʼtaqenk re li awabʼej».
Bʼar wankat wiʼ, ma yookebʼ xjachbʼal ribʼebʼ xbʼaanebʼ li awabʼej ebʼ li kristiʼaan? Kʼaʼut nakʼulmank aʼin? Ma wank chanru xtuqubʼankil ru? Kʼe reetal li naxye li Santil Hu.
Ebʼ li naʼlebʼ li naxjach ebʼ li kristiʼaan
Li Santil Hu ak xye naq saʼebʼ li qakutan, li nanawmank ru joʼ li «rosoʼjikebʼ li kutan», tchʼaʼajkoʼq chiruhebʼ li kristiʼaan xtawbʼal li junajil xbʼaan naq yibʼ ru xnaʼlebʼebʼ.
«Chanawaq naq saʼ rosoʼjikebʼ li kutan wank honal qʼaxal chʼaʼajkaq xnumsinkil. Ebʼ li winq junes rehebʼ teʼraj, […] maakʼaʼaq chik usilal rikʼinebʼ» (2 Timoteo 3:1-3, Li Santil Hu, Sociedad Bíblica de Guatemala, SBG).
Nachʼaʼajkoʼk chiruhebʼ li awabʼej xbʼaanunkil chiʼus li xkʼanjel usta naabʼalebʼ li poyanam yookebʼ xkʼebʼal xqʼe re naq us t-elq. Wankebʼ jalan nekeʼnaʼlebʼak ut nachʼaʼajkoʼk chiruhebʼ kʼanjelak saʼ junajil re xtuqubʼankil ebʼ li chʼaʼajkilal. Chixjunil aʼin naxkʼutbʼesi naq yaal li kixye chaq li Santil Hu.
«Wankebʼ li winq wankebʼ xwankil saʼ xbʼeenebʼ li ras riitzʼin ut nekeʼxbʼaanu raylal rehebʼ» (Eclesiastés 8:9, Li Santil Hu, Wycliffe Bible Translators, Wy. Akʼ tzʼiibʼ).
Abʼan, li Santil Hu naxye naq wank ani nabʼeresink re jun li Awabʼejihom li naru tixsach chixjunil ebʼ li chʼaʼajkilal ut li xrahilal li kristiʼaan.
Jun chaabʼil aj kʼamolbʼe li naxkʼe xchʼool chirixebʼ li junchʼol
Li Santil Hu naʼaatinak chirix jun laj kʼamolbʼe li moko juntaqʼeet ta chiru junaq chik, jun aj kʼamolbʼe li wank xwankil re xtuqubʼankil ru ebʼ li chʼaʼajkilal. Aʼan li Jesukriist. Wank xkawilal, xwankilal ut naʼalaak saʼ xchʼool xkʼambʼal chaq li tuqtuukilal ut li junajil saʼ xbʼeen li Ruchichʼochʼ.
«Chinumtaaq ta li tuqtwuqil usilal ut li tiiqilal naq waanq chi taqlaank li rey saʼ xbʼeenebʼ li tenamit» (Salmo 72:7, Wy).
«Chixjunilebʼ li tenamit [te]ʼkʼanjelaq chiru» (Salmo 72:11, SBG).
Li Jesús aʼan li chaqʼal ru aj kʼamolbʼe, xbʼaan naq naxik xchʼool chirix ebʼ li qas qiitzʼin li xeʼxnumsi ebʼ li chʼaʼajkilal ut naraj xtenqʼankilebʼ.
«A’an taakoloq re li neb’a’ li yo chi tz’aamank, a’ li toq’ob’ ru li ink’a’ natenq’aak xb’aan anihaq. Taaruxtaana ruheb’ li neb’a’ ut li wankeb’ sa’ rajb’al ru; tixkoleb’ xyu’am li q’axal ra wankeb’. A’an taa’isinq reheb’ sa’ li raasa ut li rahob’tesiik» (Salmo 72:12-14, SBG).
Naw xkomon li naʼlebʼ chirix li Xʼawabʼejilal li Yos ut chirix li awabʼej aʼ li Jesús, ut taakʼe reetal chanru li awabʼej aʼin truuq aatenqʼankil ut chanru tat-okenq chirix.
Chaawil li bʼideo Kʼaru tzʼaqal Xnimajwal Awabʼejilal li Yos?
Chaawil li naʼlebʼ «Li Xʼawabʼejilal li Yos: maakʼaʼ li maaʼusilal rik’in».