Saʼ li 24 re mayo 2022 kikʼulmank jun li nimla rahilal saʼ jun li teep re Uvalde, Texas (Estados Unidos). Li hu The New York Times, kixye naq «jun li winq kixkamsi 19 li kokʼal ut wiibʼ laj kʼutunel [...] saʼ li tzolebʼaal Robb».

 Kokʼaj xsaʼ naʼabʼimank chirix aʼin. Saʼ li esil USA Today kixye naq saʼ Estados Unidos «kiwank numenaq 249 li puubʼak saʼebʼ li tzolebʼaal chiru jalan chik ebʼ li chihabʼ chalen 1970».

 Kʼaʼut nakʼulmank ebʼ li rahilal aʼin? Kʼaru tooruuq xbʼaanunkil re xqʼaxbʼal ru? Ma twulaq li kutan naq maakʼaʼaq chik li maaʼusilal? Li Santil Hu naxsume ebʼ li patzʼom aʼin.

•    Li Santil Hu naxkʼabʼaʼi li qʼehil aʼin joʼ «rosoʼjikebʼ li kutan» naq ebʼ li kristiʼaan «inkʼaʼ chik teʼxrahatq ribʼ», «qʼaxal josqʼaqebʼ», teʼokenq chi rahobʼtesink ut xbʼaanunkil li xuwajel ru aj naʼlebʼ. Chixjunilebʼ li nekeʼbʼaanunk re aʼin qʼaxal wiʼ chik «taanumtaaq li xmaaʼusilalebʼ» (2 Timoteo 3:1-5, 13, Li Santil Hu, Sociedad Bíblica de Guatemala, SBG). Re xnawbʼal xkomon chirix aʼin, chaawil li naʼlebʼ «Ma kixye li Santil Hu chanru teʼnaʼlebʼaq ebʼ li kristiʼaan saʼebʼ li qakutan?».

 Naabʼalebʼ nekeʼxkʼoxla: «Kʼaʼut li Yos naxkanabʼ naq tkʼulmanq ebʼ li nimla rahilal joʼ li puubʼak saʼebʼ li tzolebʼaal?». Re xnawbʼal kʼaru naxye li Santil Hu, chaawil li naʼlebʼ «Kʼaʼut nekeʼxkʼul rahilal li kristiʼaan li chaabʼilebʼ xnaʼlebʼ?».

•    «Joʼchʼinal joʼnimal kitzʼiibʼaak chaq junxil, re qatzolbʼal naq kitzʼiibʼaak chaq, re naq rikʼin [...] li xkʼojobʼankil li qaanm naxkʼe li Santil Hu chiwanq xnimal qoybʼenihom chi junelik» (Romanos 15:4, SBG).

 Li naʼlebʼ li wank saʼ li Santil Hu truuq aatenqʼankil re xqʼaxbʼal ru li rahilal li wank saʼ ruuchichʼochʼ. Re xnawbʼal xkomon chaawil li hu Ajsi aawu!, li naxkʼabʼaʼi «Ma twulaq li kutan naq maakʼaʼaq chik li rahilal?», maakʼaʼ saʼ qʼeqchiʼ.

 Re rilbʼal chanru li naʼbʼej yuwaʼbʼej teʼxtenqʼa ebʼ li ralal xkʼajol rikʼin li esil li xuwajel ru li nekeʼril saʼ tele, naru teʼril li naʼlebʼ «Li chʼaʼajkilal li nekeʼxtaw li kokʼal rikʼin li esil li nekeʼril saʼ tele».

•    «Aʼan taaʼisinq rehebʼ saʼ li raasa ut li rahobʼtesiik» (Salmo 72:14, SBG).

•    «Teʼxsutqʼisi ebʼ li qʼesnal chʼiichʼ choʼq piklebʼ chʼochʼ, ut li xjutzʼ chʼiichʼebʼ teʼkanaaq choʼq setlebʼ kʼim. Ebʼ li tenamit inkʼaʼ chik teʼyaloq chiribʼilebʼ ribʼ chi moko teʼxkawresi ribʼ re yalok» (Miqueas 4:3, SBG).

 Li Yos tixbʼaanu li inkʼaʼ nekeʼruuk xbʼaanunkil ebʼ li kristiʼaan. Li Xʼawabʼejilal tixsach chixjunil li kʼanjelobʼaal li naʼoksimank saʼ li yalok ut trisi chi junajwa li rahilal. Re xnawbʼal kʼaru chik tixbʼaanu li Xʼawabʼejilal, chaawil li naʼlebʼ «Li Xʼawabʼejilal li Yos tixkʼam chaq naabʼal li tuqtuukilal».