•   «Li tenamit China naxye naq li saqʼehil aʼin, aʼan li jwal kaw kikʼulmank ut kixye ajwiʼ naq aʼan li rox chihabʼ li jwal tiq ru» (The Guardian, 7 re septiembre 2022).

•   «Chiru ebʼ li oobʼ chihabʼ aʼin, saʼ jun xjachalil li tenamit África qʼaxal tnumtaaq wiʼ chik li tiq» (Noticias ONU, 26 re agosto 2022).

•   «Numenaq xjachalil li tenamit Europa xiwxiw wank xbʼaan li chaqiʼel ut maare aʼin li qʼaxal tiq chiru li 500 chihabʼ li ak kinumeʼk» (BBC News, 23 re agosto 2022).

 Naabʼalebʼ li wankebʼ xnawom chirix aʼin, nekeʼxye naq toj yooq li tiq malaj qʼaxal tnumtaaq wiʼ chik. Ma naru naq tqoybʼeni naq tjalaaq? Kʼaru naxye li Santil Hu?

 Aʼin li kixye li Santil Hu chirix ebʼ li qakutan:

•   «Sa’ naab’al chi na’ajej, taawanje’q we’ej» (Lucas 21:11, Li Santil Hu, Sociedad Bíblica de Guatemala, SBG).

 Naabʼal sut li chaqiʼel naxkʼam chaq li weʼej ut ebʼ li propesiiy li wank saʼ li Santil Hu, naʼaatinak chirix li weʼej ut li tixkʼam chaq: li rahilal ut li kam (Apocalipsis 6:6, 8).

 Li Santil Hu naxkʼe jun li xyaalal. Naxye:

•   «Li winq moko a’an ta yaal re sa’ xb’een li xyu’am, chi moko sa’ ruq’ wank li xb’eenik» (Jeremías 10:23, SBG).

 Aʼin naraj xyeebʼal naq ebʼ li kristiʼaan moko us ta teʼelq wi teʼraj xbʼeresinkil ut xtaqlankil ribʼ xjunesebʼ ut rajlal li nekeʼxsikʼ xbʼaanunkil naxkʼam chaq li chaqiʼel ut naq maakʼaʼaq chik li haʼ.

•   Li xkʼihalil ebʼ li nekeʼxtzʼil rix li jalan jalanq chi naʼlebʼ nekeʼxye naq li nekeʼxbʼaanu ebʼ li qas qiitzʼin naxbʼaanu naq qʼaxalaq chik xtiqwal ru li chʼochʼ ut naq twanq li chaqiʼel saʼ chixjunil li ruuchichʼochʼ.

•   Li nekeʼxrahi ru li kristiʼaan ut li nekeʼraj wank joʼ awabʼej, inkʼaʼ nekeʼxkʼoxla rix li tkʼulmanq moqon, nekeʼxbʼaanu naq teʼsachq ebʼ li kʼicheʼ, nekeʼxtzʼajni ru li iqʼ ut inkʼaʼ us yookebʼ roksinkil chixjunil li wank saʼ li qasutam. Aʼin naxbʼaanu naq tmajeloʼq li haʼ.

 Abʼanan, li Santil Hu naxkʼe qoybʼenihom.

 Li Santil Hu naxye naq li Yos tixtuqubʼ ru li chʼaʼajkilal chirix li haʼ. Chanru tixbʼaanu?

1.  1. Li Yos tixsachebʼ «ajwiʼ li nekeʼsachok re li ruuchichʼochʼ» (Apocalipsis 11:18, SBG). Li Yos tixsach ru li nabʼaanunk re naq tmajeloʼq li haʼ: ebʼ li kristiʼaan li yibʼebʼ ru xnaʼlebʼ ut li kaʼajwiʼ nekeʼxkʼoxla ribʼ xjunes li nekexsach ru chixjunil li wank saʼ li qasutam (2 Timoteo 3:1, 2).

2.  2. «Li chaqich’och’ taakanaaq jo’ li saab’ ru» (Isaías 35:1, 6, 7, SBG). Li Yos tixsach ru chixjunil li nabʼaanunk re naq tmajeloʼq li haʼ ut tixbʼaanu naq li Ruuchichʼochʼ twanq joʼ jun chʼinaʼusil naʼajej bʼarwiʼ numtajenaqaq li haʼ ut li tzekemq.

3.  3. «Laa’at nokolaawil li ch’och’ ut nakat’aqres: k’ajo’ naq nakak’e chi chaab’ilo’k!» (Salmo 65:10, SBG). Rikʼin li rosobʼtesihom li Yos saʼ li Ruuchichʼochʼ tnumtaaq li tzekemq ut saqaq chik ru li haʼ.