Sa’ li 27 re enero 2023 naab’aleb’ li poyanam te’xjultika li rahob’tesink ut li kamsink li kiwank sa’ li xkab’ nimla yalok u, numenaq 75 chihab’ anaqwan. Maare na’ok aak’a’uxl chi xk’oxlankil k’a’ut naq li Yos kixkanab’ naq tk’ulmanq li rahilal a’in.

•   Re xnawb’al k’aru naxye li Santil Hu, chaawil li naleb’ «K’a’ut kiwank li rahob’tesink ut li kamsink sa’ li xkab’ nimla yalok u? K’a’ut li Yos ink’a’ kixkoleb’?».

 Eb’ laj judiiy ke’rahob’tesiik sa’ li xkab’ nimla yalok u. Jwal ke’rahob’tesiik, ut chi miyon ke’kamsiik. Wankeb’ ajwi’ xe’rahob’tesiik ut xe’kamsiik re jalan chik ch’uut chiru li nimla yalok u a’in. Sa’ xyanq a’in wankeb’ laj testiiw re li Jehob’a, li xe’rahobtesiik sa’ xk’ab’a’ li xpaab’aleb’ li chalenaq sa’ li Santil Hu.

•   Re xnawb’al xkomon, chaawil li naleb’ «K’aru xe’xk’ul eb’ laj testiiw re li Jehob’a chiru li rahob’tesink ut li kamsink sa’ li xkab’ nimla yalok u?».

 Naab’aleb’ li poyanam nekexxiwak xk’oxlankil naq tk’ulmanq wi’ chik li rahob’tesiik ut li kamsink. Ab’an naxk’ojob’ qach’ool xnawb’al naq li Santil Hu naxye naq maajunwa chik tk’ulmanq li rahilal a’in.

•   «Laa’in wank sa’ inch’ool k’aru tinb’aanu cho’q eere: twaj texwanq sa’ tuqtuukilal ut ink’a’ sa’ rahilal, re naq toxeetaw xsahil eech’ool chi junelik. Laa’in, li Qaawa’, ninyehok re a’in» (Jeremías 29:11, Li Santil Hu, Sociedad Bíblica de Guatemala, SBG). a

 Li yeechi’om a’in ttz’aqloq ru naq li Jehob’a trisi chixjunil li maa’usilal ut naq tix’ak’ob’resi chixjunil. Chi seeb’ li Yos tixb’aanu a’in:

•   Tixsacheb’ chixjunil li maa’useb’ xna’leb’ li neke’xrahob’tesi li ras riitz’in (Proverbios 2:22).

•   Tixsach chixjunil li xrahilal li xe’rahob’tesiik, ut te’xtaw xk’ojob’ankil xch’ool (Apocalipsis 21:4).

•   Tixwaklesiheb’ wi’ chik chi yo’yo arin sa’ Ruuchich’och’ li ak xe’kamk (Juan 5:28, 29).

 Naru taak’ojob’ aach’ool chirix li oyb’enihom a’in li wank sa’ li Santil Hu. Wi nakaawaj xnawb’al k’a’ut, kub’ laatzolb’al chirix li santil hu.