Saʼ li eqʼla re li kutan 24 re febrero 2022 ebʼ laj puubʼ re li tenamit Rusia keʼok chi pleetik rikʼin li tenamit Ucrania, kikʼulmank aʼin usta li wankebʼ xwankil saʼebʼ li tenamit keʼxyal xrambʼal li yalok. Joʼkʼihal tawiʼ li rahilal tixkʼam chaq li yalok aʼin saʼ ruuchichʼochʼ? Laj António Guterres li nataqlank saʼ li chʼuut re Naciones Unidas, kixye naq inkʼaʼ tooruuq xkʼoxlankil joʼkʼihal li rahilal li tixkʼam chaq aʼin saʼ li tenamit Europa ut saʼ chixjunil li ruuchichʼochʼ.

•   Li Jesukriist ak xyehom chaq naq twanq hoonal naq teʼpleetiq li «tenamit rikʼin jalan chik tenamit, li awabʼej rikʼin jalan chik awabʼej» (Mateo 24:7, Li Santil Hu, Sociedad Bíblica de Guatemala, SBG). Re rilbʼal chanru ebʼ li yalok u li yook chi kʼulmank saʼebʼ li qakutan naxkʼutbʼesi naq yook chi tzʼaqlok ru li propesiiy li kixye chaq li Jesús, chaawil li naʼlebʼ «Kʼaru naxkʼutbʼesi naq wanko “saʼ rosoʼjikebʼ li kutan”?».

•   Li hu Apocalipsis naxye naq li yalok chanchan jun li kristiʼaan li wank saʼ xbʼeen jun li «kawaay, kaq rix» li narisi «li tuqtuukilal saʼ ruuchichʼochʼ» (Apocalipsis 6:4, SBG). Re xnawbʼal chanru ebʼ li yalok li yook chi kʼulmank saʼebʼ li qakutan naxchap ribʼ rikʼin li propesiiy aʼin, chaawil li naʼlebʼ li naxch‘olob‘ li xyaalal li kaahib‘ li wankeb‘ sa‘ xb‘een li kawaay li na‘aatinak wi‘ li hu Apocalipsis.

•   Saʼ li hu Daniel naʼaatinak chirix «li awabʼej re Ejiipt [awabʼej re rokebʼl iqʼ]» ut «li awabʼej re Siria [awabʼej re relebʼl iqʼ]» ut kixye naq xikʼ teʼril ribʼ (Daniel 11:25-45, SBG). Re xtawbʼal ru kʼaʼut nayeemank naq li tenamit Rusia ut li nekeʼxkʼam ribʼ saʼ aatin rikʼin xeʼkanaak joʼ li awabʼej re relebʼl iqʼ, a chaawil li bʼideo Li xtzʼaqlojik ru li propesiiy re Daniel 11.

•   Li hu Apocalipsis naʼaatinak ajwiʼ chirix li «yalok saʼ li xnimal xkutankil li Nimajwal Yos» (Apocalipsis 16:14, 16, SBG). Abʼanan, saʼ li yalok aʼin moko teʼpleetiq ta ebʼ li tenamit chiribʼilebʼ ribʼ joʼ yook chi kʼulmank anaqwan. Re xnawbʼal xkomon chirix li yalok li tkʼulmanq saʼ li kutan chalk re, chaawil li naʼlebʼ «Kʼaru li Armagedón?».

•   Li Santil Hu naxye naq tixsach ru chi junajwa «li yalok toj saʼ xmaril li ruuchichʼochʼ» (Salmo 46:10, SBG). Re xnawbʼal chirix li naxyeechiʼi qe li Yos, chaawil li naʼlebʼ «Li chaqʼal ru yeechiʼom choʼq re li kutan chalk re».

•   Li Jesús kixkʼut chiruhebʼ li xtzolom naq teʼxpatzʼ saʼ li xtijebʼ naq tchalq li Xʼawabʼejilal li Yos (Mateo 6:9, 10). Li awabʼejilal aʼin wank saʼ choxa ut tixbʼaanu li rajom li Yos arin saʼ Ruuchichʼochʼ ut li Yos naraj naq twanq li tuqtuukilal saʼ chixjunil li Ruuchichʼochʼ. Re xnawbʼal kʼaru tixbʼaanu li awabʼejilal chaawix, chaawil li bʼideo Kʼaru tzʼaqal Xnimajwal Awabʼejilal li Yos?

 Saʼ li tenamit Ucrania wankebʼ numenaq 129,000 aj testiiw re li Jehobʼa. Joʼebʼ laj testiiw re li Jehobʼa saʼ chixjunil li ruuchichʼochʼ nekeʼxkʼam re rikʼin li Jesús naq inkʼaʼ nekeʼokenk saʼ xnaʼlebʼ li ruuchichʼochʼ. Joʼkan ajwiʼ inkʼaʼ nekeʼokenk chirix junaq li awabʼej ut inkʼaʼ nekeʼtzʼaqonk saʼ li yalok u (Juan 18:36). Saʼ chixjunil li ruuchichʼochʼ ebʼ laj testiiw re li Jehobʼa yookebʼ xkʼebʼal chi naweʼk «li chaabʼil esilal» chirix li Xʼawabʼejilal li Yos ut nekeʼxye ajwiʼ naq ttuqlaaq ru li chʼaʼajkilal, saʼ xyanq aʼin wank li yalok u (Mateo 24:14, SBG). Joʼkan naq, naqaj naq tat-aatinaq qikʼin re xnawbʼal xkomon chirix li chaabʼil esil li naxkʼe li Santil Hu.