Sean Gladwell/Moment via Getty Images
JUNELIK AJ’AJAQ QU!
Li sachomq re xkawresinkil li yalok u sa’ chixjunil li Ruuchich’och’ naxq’ax ru 2 b’illon chi dólar | K’aru naxye li Santil Hu?
Sa’ li 2022, li sachomq re xkawresinkil li yalok u sa’ chixjunil li Ruuchich’och’ kiwulak toj 2.24 b’illon chi dólar. A’in xmaak naq Rusia naraj reechaninkil Ucrania. Jun li esil k’eb’il sa’ abril 2023 xb’aan li molam SIPRI, li Stockholm International Peace Research Institute (Instituto Internacional de Estudios para la Paz de Estocolmo), naxye li xk’ulmank chiru li 2022:
Li sachomq re xkawresinkil li yalok u sa’ Europa kik’iik 13% chiru li chihab’ a’an, a’in xk’ihal li sachomq li kib’aanumank chalen chaq sa’ li Guerra Fría.
«Xb’ismank naq li sachomq re xkawresinkil li yalok u sa’ li tenamit Rusia kik’iik 9.2%». Anaqwan Rusia wank sa’ li rox na’aj sa’ xyanqeb’ li tenamit li numtajenaq xsachomeb’ re xkawresinkil li yalok u sa’ chixjunil li Ruuchich’och’.
Estados Unidos a’an li tenamit li numtajenaq nasachok chiruheb’ li junch’ol: naroksi «39% li nasachmank re xkawresinkil li yalok u sa’ chixjunil li Ruuchich’och’».
Laj Nan Tian, li kitenq’ank re xtz’iib’ankil li esil re li molam SIPRI, naxye: «Li xk’iijik li sachomq re xkawresinkil li yalok u sa’ chixjunil li Ruuchich’och’ chiruheb’ li chihab’ a’in naxk’utb’esi naq moko wanko ta sa’ tuqtuukilal».
Li Santil Hu ak kixye chaq naq sa’ li qakutan tnumtaaq li ch’a’ajkilal sa’ xyanqeb’ li xninqal ru awab’ejilal. Naxye ajwi’ chanru naru xtawb’al li tz’aqal tuqtuukilal.
Kiyeemank chaq naq tnumtaaq li yalok u sa’ xyanqeb’ li tenamit
Li Santil Hu naxye naq eb’ li kutan li wanko wi’, a’an li roso’jikeb’ li kutan (Daniel 8:19).
Li hu Daniel kixye chaq naq te’wanq li nimla awab’ejilal li xik’ te’ril rib’ chirib’ileb’ rib’. Eb’ li xninqal ru awab’ejilal a’in «te’xyal xmetz’ew» sa’ xyanqeb’ xb’aan naq neke’raj q’axok u. Sa’ xk’ab’a’ a’in te’xsach li «xb’ihomaleb’», naraj naxye li xtumin malaj jalan chik (Daniel 11:40, 42, 43).
Wi nakaawaj xtawb’al xkomon li na’leb’ chirix li propesiiy a’in li wank sa’ li Santil Hu, chaawil li b’ideo Li xtz’aqlojik ru li propesiiy re Daniel 11.
Chanru xtawb’al li tuqtuukilal
Li Santil Hu naxye naq li Yos tixsacheb’ li x’awab’ejilal li winq. A’an «tixwaklesi chaq jun awab’ejihom li maajun wa taajuk’manq, chi moko taakanaaq rub’el xwankil jalan chik tenamit. Tixjuk’i ut tixputz’iheb’ li awab’ejihom junch’ol, ut a’an wanq xwankil chi junelik» (Daniel 2:44, Li Santil Hu, Sociedad Bíblica de Guatemala).
Li Jehob’a a chi seeb’ tixk’am chaq li tz’aqal tuqtuukilal, xb’aan naq eb’ li winq ink’a’ neke’ruuk xb’aanunkil. Chanru tixb’aanu? Rik’in li xchoxahil Awab’ejihom tixsach li raaxiik’ ut chixjunil eb’ li puub’ (Salmo 46:9, 10).
Wi nakaawaj xnawb’al xkomon chirix li tixb’aanu li X’awab’ejilal li Yos chaawil li na’leb’ «Li X’awab’ejilal li Yos tixk’am chaq naab’al li tuqtuukilal».
a Li xk’ab’a’ li Yos a’an Jehob’a (Salmo 83:18. La Biblia, Traducción del Nuevo Mundo, 2019 sa’ español).