Wi junelik yook qak’a’uxl naru nokooyajerk ut traho’q ajwi’ qach’ool. Naru ajwi’ tixk’e xtz’aqob’ li qarahilal chiru li yook wi’ qak’a’uxl sa’ xtiklajik.

•  Maanumsi naab’al li hoonal chi rilb’al malaj rab’inkil li yib’ aj esil. Moko aajel ta ru tqanaw chixjunil chirix li nak’ulmank. Wi tqab’aanu a’in yal tqaseb’esi qib’ ut tnumtaaq qak’a’uxl.

   Xraqal li Santil hu: «Li rahil ch’oolej na’oksink yajel» (Proverbios 17:22, Li Santil Hu, Sociedad Bíblica de Guatemala SBG).

   «Moko ch’a’aj ta k’ayk chi xsik’b’al li esil li toja’ xk’ulmank malaj li xuwajel. Ab’an moko us ta xb’aanunkil a’in. Naq moko naab’al ta li esil nawil, ink’a’ nanumtaak ink’a’uxl» (Laj John).

   K’oxla a’in: Jarub’ sut chiru li kutan nakaawil eb’ li esil re naq taanaw li yook chi k’ulmank?

•  Xaqab’ xhoonal li nakaab’aanu. Waklin, wa’in, b’aanu laak’anjel ut ayu’ chi wark sa’ li hoonal li ak xaaxaqab’. Xb’aanunkil a’in tatxtenq’a re naq ink’a’ tjalaaq laayu’am ut ink’a’ tnumtaaq laak’a’uxl.

   Xraqal li Santil Hu: «Li k’aru k’oxlanb’il rix chi chaab’il, q’axal us na’elk» (Proverbios 21:5 SBG).

   «Naq xtiklaak li COVID-19 xinkanab’ xb’aanunkil li ak xaqab’anb’il inb’aan ut ninnumsi naab’al li hoonal chi rajsinkil wu rik’in eb’ li na’leb’ li ink’a’ nikine’xtenq’a. Xb’aan naq nawaj roksinkil chi’us linhoonal, xink’e xhoonalil li junjunq chi k’anjel li tinb’aanu chiru li kutan» (Laj Joseph).

   K’oxla a’in: Ma ak xaaxaqab’ xhoonal li junjunq chi k’anjel li taab’aanu? Naq naraqe’k li kutan, ma nakaak’oxla naq xk’eb’al xhoonal laak’anjel xatxtenq’a re naq us tat-elq?

•  K’oxla chixjunil li chaab’il. Wi ink’a’ nakaakanab’ xk’oxlankil naq jalanq xatruuk raj xb’aanunkil jun li k’anjel malaj chirix li rahilal li naru nak’ulmank moqon, ka’ajwi’ tnumtaaq laak’a’uxl. K’e b’an laach’ool chi xjultikankil wiib’ oxib’ li na’leb’ li tento taab’anyoxi.

   Xraqal li Santil Hu: «Junelik texb’anyoxinq» (Colosenses 3:15).

   «Naq nawil sa’ li Santil Hu nawisi sa’ inch’ool li yib’ aj esil ut ka’ajwi li chaab’il nink’oxla. Tz’aqal yaal naq jo’kan nak’ulmank ut nak’anjelak!» (Li xLisa).

   K’oxla a’in: Ma naxik’ aach’ool chi xk’oxlankil li maa’usilal li nakaak’ul ut ink’a’ nakaak’e reetal li chaab’ilal li wank sa’ laayu’am?

•  K’oxla eb’ li junch’ol. Naq yook qak’a’uxl maare naqanajtob’resi qib’ rik’ineb’ li junch’ol, maab’aanu a’an. K’oxla b’an chanru xtenq’ankileb’.

   Xraqal li Santil Hu: «Meesik’ li us ka’ajwi’ cho’q eere, teesik’ b’an li us cho’q reheb’ li junch’ol» (Filipenses 2:4).

   «Tenq’ank naxk’e xsahil qach’ool. Li taatenq’aheb’ junelik tate’xjultika ut laa’at moko ka’aj tawi’ laach’a’ajkilal taak’oxla. Li xyaalal a’an naq maak’a’aq chik aahoonal re xk’oxlankil laak’a’uxl» (Li xMaria).

   K’oxla a’in: Ma nakaanaw ru junaq li kristi’aan li naru nakaatenq’a? K’aru tatruuq xb’aanunkil chirix?

•  Kol laakawilal. Chaachiq’le laajunxaqalil. Aanilan, b’een ut pisk’on b’ayaq. Chathilanq ut chattzekanq chi’us. Wi kawat sahaq laach’ool ut ink’a’ tnumtaaq laak’a’uxl.

   Xraqal li Santil Hu: «Us naq naqatzol qib’ chi xch’olaninkil qib’ re naq kawaqo» (1 Timoteo 4:8, Li Santil Hu, Wycliffe Bible Translators. Ak’ tz’iib’).

   «Linyum ut laa’in ink’a’ nokooruuk chi elk chi b’eek, ut chi aanilak. Jo’kan naq xqak’e qahoonal chi xkawresinkil li qajunxaqalil sa’ qochoch. Ut a’in xooxtenq’a re naq sa tqek’a qib’ ut tqak’am qib’ chi’us» (Li xCatherine).

   K’oxla a’in: Ma na’ajmank chaawu wa’ak chi’us, b’eek ut aanilak re naq kawaq laajunxaqalil?

 Xb’aanunkil eb’ li na’leb’ a’in ak naab’aleb’ xe’xtaw rusilal re naq ink’a’ t-oq xk’a’uxeb’ chirix chixjunil li nak’ulmank. K’aru chik kitenq’anq reheb’? Xnawb’al li yeechi’om li natawmank sa’ li Santil Hu chirix li kutan chalkeb’ re, eb’ li yeechi’om a’in naxk’ojob’ qach’ool. Chaawil li tzolom «Kʼaru tixbʼaanu li Xʼawabʼejilal li Yos?»